பிண அரசியல்

ஒவ்வொரு வருட நீட் தேர்வின் போதும் தமிழகத்தில் சர்ச்சையாவது வழக்கமாகி விட்டது. இந்த ஆண்டும் (2020) வழக்கம் போலப் பிண அரசியல் துவங்கி விட்டது.

மருத்துவம் படிப்பது சிலருக்கு சிறு வயது விருப்பமாகவும், பெற்றோருக்குக் கௌரவமாகவும் இருப்பதால், அதிகளவில் வரவேற்பு காணப்படுகிறது. Image Credit

பிண அரசியல்

அடுத்த ஆண்டுப் பொதுத்தேர்தல் நடக்கப்போவதால், இந்த வருடம் நீட் தேர்வை வைத்து அரசியல் செய்வது உக்கிரமாக உள்ளது.

மாணவன் தற்கொலை செய்துகொண்டபின் அவனது குடும்பத்துக்கு உதவித்தொகையை அரசியல் கட்சிகள் வழங்கினார்கள். தற்கொலை செய்ததுக்கு நிதி உதவி செய்வது தவறான எடுத்துக்காட்டாக உள்ளது.

ஊடகங்கள் தங்கள் TRP க்காக இதையே நிமிடத்துக்கு ஒரு முறை கூறி, மாணவர்களையும், பெற்றோரையும் மன உளைச்சலுக்கு ஆளாக்குகின்றனர்.

அரசியல்வாதிகளும், ஊடகங்களும் போட்டிபோட்டு எதிர்மறை செய்திகளையே கொடுத்தால், மக்கள் மனமும் எதிர்மறை எண்ணங்களுக்கே செல்லும்.

நீட் தேர்வு எழுதிய மாணவர்கள் பலர், நேர்மறையாகக் கூறும் கருத்துகளைத் தவிர்த்து, தேடிப்பிடித்து எதிர்மறை கருத்துகளையே கூறி மக்களை ஊடகங்கள் சோர்வடைய வைக்கின்றன.

மாணவர்களின் வாழ்க்கையில் விளையாடும் அரசியல்வாதிகள்

‘திமுக ஆட்சிக்கு வந்தால், நீட் தேர்வு நீக்கப்படும்‘ என்கிறார் ஸ்டாலின். மாநில அரசு எப்படி நீட் தேர்வை நீக்க முடியும்? இதை ஸ்டாலின் தான் விளக்க வேண்டும்.

புதுச்சேரி முதலமைச்சர் நாராயணசாமி ‘மத்தியில் காங் ஆட்சிக்கு வந்தால், நீட் தேர்வை ரத்து செய்யும்‘ என்கிறார். அதாவது இவர்களே பாம் வைப்பார்களாம், இவர்களே அதையும் எடுப்பார்களாம்.

நீட் தேர்வை அறிமுகப்படுத்தியதே காங் அரசு தான் ஆனால், காங் ஆட்சிக்கு வந்தால் நீட்டை நீக்கும் என்கிறார். இவர் கட்சிக்காரர் ப.சிதம்பரம் அவர்களின் மனைவியே (நளினி சிதம்பரம்) நீட்டுக்காக வாதாடியவர்.

இவர்களது தலைவர் ராகுல் காந்தி அவர்களே நீட் தேர்வு எழுதும் மாணவர்களுக்கு வாழ்த்துக் கூறியுள்ளார் என்பதை நாராயணசாமி அவர்கள் கவனிக்கவில்லை போல.

உச்சநீதிமன்ற தீர்ப்பு

உச்சநீதிமன்றமே முடியாது என்று கூறிய பிறகும், தமிழகத்தைத் தவிர மற்ற மாநில அரசுகள் எதிர்ப்பு தெரிவிக்கவில்லை என்பதால் மத்திய அரசும் இதை நீக்காது என்று நன்கு தெரிந்தும் மக்களை ஏமாற்றிக்கொண்டு உள்ளார்கள்.

கேரளாவை பாருங்கள்! கேரளாவை பாருங்கள்!! என்று இங்குள்ளவர்களால் எடுத்துக்காட்டுக் காட்டப்படும் கேரளாவே நீட்டுக்கு ஆதரவை தெரிவித்து விட்டது.

தற்கொலை செய்துகொண்டவர் குடும்பத்துக்கு வழங்கும் நிதியை, வெற்றிபெற நினைக்கும், ஏழை மாணவர்களுக்குப் பயிற்சி வகுப்பு ஆரம்பித்து ஏன் உதவக்கூடாது?

இதே போலச் சுர்ஜித் என்ற குழந்தை ஆழ்குழாய் கிணற்றில் விழுந்த போது, இக்குழந்தையின் பெற்றோருக்கு நிதியும் அரசு பணியும் கொடுக்கப்பட்டது.

இக்குழந்தை விழுந்து இறந்தது பெற்றோரின் அஜாக்கிரதையால் ஆனால், அக்குழந்தையின் தாய்க்கு அரசுப் பணி!

இதைப்போல உதவும் அரசியல்வாதிகளின் எண்ணம் பொதுமக்கள் மீதான அக்கறையினால் அல்ல என்பது பலருக்கும் தெரிந்த உண்மை ஆனால், இவை தான் பேசப்படுகிறது. எதிலும் பிண அரசியல்.

மாறிய பாடத்திட்டம்

சமச்சீர் கல்வித்திட்டம் தோல்வியடைந்த கல்வித்திட்டம். இக்கல்வி முறையால் மாணவர்கள் கல்வித்திறன் மேம்படவில்லை, மற்ற மாநிலங்களின் கல்வித்திட்டத்தோடு ஒப்பிடும் போது மிகவும் பின்தங்கி இருந்தது.

தற்போதைய தமிழகக் கல்வித்துறையால் திருத்தப்பட்ட பாடங்கள் இந்தியாவில் நடத்தப்படும் அனைத்து தேர்வுகளையும் எதிர்கொள்ளும் வகையில் வடிவமைக்கப்பட்டு இருந்தது.

இந்தாண்டு (2020) தேர்வு எழுதிய மாணவர்கள் பலரும் குறிப்பிட்டது, ‘11 மற்றும் 12 ம் வகுப்புப் பாடங்களை நன்கு படித்தாலே போதுமானது. கேள்விகள் அனைத்தும் 11 & 12 ம் வகுப்புப் பாடங்களில் இருந்தே கேட்கப்பட்டது‘ என்று கூறினார்கள்.

Blue print எனப்படும் முக்கியக் கேள்விகளை மட்டுமே படித்துத் தேர்வை எழுதும் மனப்பாட கல்வி முறை மாறி, புத்தகத்தைப் புரிந்து படித்தால் மட்டுமே தேர்வு எழுத முடியும் என்ற நிலை வந்துள்ளது.

இந்நிலை மாணவர்களின் கல்வித்திறனை மேம்படுத்தியுள்ளது. மனப்பாடம் செய்து எழுதுவதைத் தவிர்த்துப் பாடங்களைப் புரிந்து படிப்பதால், நீட்டை எளிதாக எதிர்கொள்ளும் நிலை வந்துள்ளது.

தமிழக மாணவர்கள் மிகத்திறமையானவர்கள் ஆனால், பாடத்திட்டம் சரியில்லை என்பதால், பிரச்சனைகளை எதிர் கொண்டார்கள்.

தற்போதைய பாடத்திட்டங்கள் அனைத்து தேர்வுகளையும் எதிர் கொள்ளும் மன வலிமையை மாணவர்களுக்குக் கொடுத்துள்ளது. எனவே, இனி வரும் காலங்களில் மிகச்சிறப்பான தேர்வு முடிவுகளைத் தமிழகம் பெறும்.

பொய் வாக்குறுதிகள்

தற்போது மாணவர்களுக்குத் தேவை உற்சாகமான வார்த்தைகளும், நம்பிக்கையூட்டும் செய்திகளுமே! ஆனால், இதற்கு அப்படியே எதிராகத் தமிழகத்தில் நடந்து கொண்டுள்ளது. பார்க்கவே வெறுப்பாக உள்ளது.

தற்போதைக்கு நடக்காது, நடைமுறையில் சாத்தியமில்லை என்று நன்கு தெரிந்தும் பொய் வாக்குறுதிகளைக் கொடுத்து, மாணவர்களை நம்பிக்கை இழக்க வைத்து, பயமுறுத்தி அரசியல் செய்து வருகிறார்கள்.

தமிழக மாணவர்கள் சாதிப்பார்கள்

பிற்காலத்தில் நீட் தேர்வில் தமிழகமே முன்னணியில் இருக்கும், பயனைப் பெறும். தமிழக மாணவர்களின் கல்வித்திறனை இந்தியாவே கண்டு வியக்கப்போகிறது.

கடந்த வருடங்களில் இருந்தே இவற்றைக் கூறி வருகிறேன். கால அளவில் வேண்டும் என்றால் கூடுதல் குறைவு இருக்கலாம் ஆனால், நிச்சயம் நடக்கும்.

அரசியல்வாதிகளின் எதிர்மறை பேச்சுகளை ஒதுக்கி, திருத்தப்பட்ட பாடத்திட்டத்தைச் சரிவரப் படித்தாலே ‘நீட் வெற்றி’ மாணவர்கள் கைவசம்.

மாணவர்களே!

தயவு செய்து எதிர்மறை பேச்சுகளைக் கேட்காதீர்கள், முக்கியத்துவம் கொடுக்காதீர்கள், பசப்பு வார்த்தைகளை நம்பாதீர்கள்.

மிகப்பெரிய மருத்துவக் கல்லூரிகள் கோடிகளில் சம்பாதிக்க முடியாது என்பதால், எதிர்ப்புகளை ஊக்குவித்து வருகிறார்கள். தமிழகத்தில் பெரும்பாலான மருத்துவக்கல்லூரிகள் அரசியல்வாதிகளுடையது தான்.

நீட் தேர்வு என்பது மாற்ற முடியாதது என்ற நிதர்சனத்தை உணருங்கள். எனவே, நீட் தேர்வு ரத்து என்று ஒரு காலத்தில் வந்தால்! அப்போது பார்த்துக்கொள்ளலாம்.

நடைமுறை எதார்த்தம் புரிந்து அதன்படி நடந்து படிப்பில் வெற்றிப் பெறுங்கள்.

மருத்துவம் மட்டுமே வாழ்க்கையல்ல

இவையெல்லாவற்றையும் விட மருத்துவம் மட்டுமே வாழ்க்கையல்ல, இதில் தோல்வியடைந்தால் வேறு எதோ பெரிய வெற்றி உங்களுக்காகக் காத்துள்ளது என்று நேர்மறையாக எண்ணுங்கள்.

பெற்றோர்களும் உங்கள் கனவை பிள்ளைகள் மீது திணித்து நெருக்கடிக்கு உள்ளாக்காதீர்கள். சிறப்பாக எழுதும் மாணவரைக் கூட மன அழுத்தம் சுமாராக எழுத வைக்கும்.

விரும்பியது கிடைக்காமலே வாழ்க்கையைத் தொடர்பவர்கள் தான் உலகில் பெரும்பான்மையினர். எனவே வெற்றி பெற்றால் மகிழ்ச்சி அடையுங்கள், தோல்வி என்றால் துவண்டு விட வேண்டாம்.

இது போலக் கூறுவது எளிது ஆனால், கனவாகக் கண்டவர்களின் வலியை எங்களால் உணர முடியாது. எனவே, நிதர்சனத்தை உணர்ந்தால் வெற்றியையும் தோல்வியையும் கடந்து வரலாம்.

எண்ணம் போல வாழ்க்கை.

Read : தவறு செய்தால் 30+ இலட்சம்

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).