பாகிஸ்தான் | பணமதிப்பிழப்பு செய்த சம்பவம்

இந்தியாவில் 2016 ல் நடந்த பணமதிப்பிழப்பு சம்பந்தேமே இல்லாத பாகிஸ்தானை சீரழித்து விட்டதைக் கேட்க வியப்பாக இருக்கும் ஆனால், உண்மை. Image Credit

பணமதிப்பிழப்பு

இந்தியாவில் கருப்புப் பணத்தை ஒழிக்க 2016 ம் ஆண்டு நவம்பர் 8 ம் தேதி இரவு 8 மணிக்கு ₹1000, ₹500 நோட்டுகள் செல்லாது என்று பிரதமர் மோடி அறிவித்தார்.

தினமும் காஷ்மீரில் நடந்து கொண்டு இருந்த கல் வீச்சுச் சம்பவங்கள் மோடி அறிவித்த பிறகு டக்கென்று நின்று விட்டது.

என்ன காரணம்?

காஷ்மீரில் உள்நாட்டுக் குழப்பத்தை ஏற்படுத்த அங்குள்ள இளைஞர்கள், இளைஞிகளுக்குப் பாக் தீவிரவாதிகள் மூலமாகப் பணம் கொடுக்கப்பட்டுக் கல்லெறி சம்பவங்கள் தொடர்ச்சியாக நடைபெற்று வந்தன.

இதனால், தினமும் நடைபெறும் சம்பவங்களைச் சமாளிக்க முடியாமல், இராணுவமே திணறிக்கொண்டு இருந்தது.

கல் வீசுபவர்களைப் பிடித்து அறிவுரை வழங்கி விடுவித்தாலும், இந்நிகழ்வு நிற்கவில்லை ஆனால், பணமதிப்பிழப்பு நடந்த பிறகு முற்றிலும் நின்றது.

காரணம், பாக் அரசு இந்திய ரூபாய்களைக் கள்ள நோட்டாக அச்சடித்துத் தீவிரவாதிகள் மூலமாக விநியோகித்துக் கல்வீச்சுச் சம்பவங்களை நடத்தி வந்தது.

பணமதிப்பிழப்பு நடந்து, ஏற்கனவே இருந்த பணம் பயனற்றதாகிப் போனதால், அவர்களுக்குக் கொடுக்கப் பணமில்லை. எனவே, பணம் வராததால், யாரும் கல்வீச்சுச் சம்பவங்களில் ஈடுபடவில்லை.

பண மதிப்பிழப்பால் கல்லெறி சம்பவம் நின்றதுக்கு ஒரு முஸ்லீம் பெரியவர் மோடிக்கு நன்றி தெரிவித்த நிகழ்வு பலருக்கு நினைவு இருக்கலாம்.

இந்திய ரூபாய் நோட்டு இயந்திரம்

இந்திய நோட்டுகளை அச்சடிக்கும் பழைய இயந்திரத்தை அன்றைய காங்கிரஸ் நிதி அமைச்சர் ப சிதம்பரம், அரபு நாடு ஒன்றுக்கு விற்றதைப் பாகிஸ்தான் வேறு வழியில் பெற்று விட்டதாக குற்றச்சாட்டு.

இவ்வாறு பெறப்பட்ட இயந்திரத்தின் மூலம், இந்திய ரூபாய் நோட்டுகளை எளிதாக அச்சடித்துக் கள்ளப்பணமாகப் புழக்கத்தில் விட்டு வந்தது.

இப்பணத்தை அச்சடிக்கப் பயன்படுத்தும் காகிதம், மற்றும் மை இங்கிலாந்து நிறுவனத்திடம் பெறப்பட்டு வந்ததையும் பாக் பெற்றுப் பயன்படுத்திக்கொண்டது.

இதனால் இந்தியா ரூபாய் மூலம் பாக் பொருளாதாரம் சீராக இருந்தது ஆனால், பணமதிப்பிழப்புக்கு பிறகு சூழ்நிலையே மாறி விட்டது.

வீழ்ந்த பொருளாதாரம்

இந்திய ரூபாயின் தாக்கம் எந்த அளவுக்குப் பாகிஸ்தானில் இருந்துள்ளது என்பதை அறிந்தால், வியப்பாக இருக்கும்.

பணமதிப்பிழப்புக்குப் பிறகு பாகிஸ்தானின் பண மதிப்பு தொடர்ந்து வீழ்ச்சி அடைந்து வருகிறது. இதை எவரும் கூகுளில் சென்று சோதித்துப் பார்க்கலாம்.

இதைத்தொடர்ந்து கொரோனாவும் சேர்ந்து பாகிஸ்தான் பொருளாதாரத்தை முற்றிலும் சிதைத்துக் கடனாளி நாடாக்கி விட்டது.

பண வீக்கம்

உற்பத்தி குறைவு, சீனாவிடம் வாங்கிய கடன், ஊழல், நிதி கை இருப்புக் கரைந்தது உட்படப் பல்வேறு காரணங்களால் பொருளாதாரம் மிக மோசமாகி வருகிறது.

தற்போது (2023 செப்டம்பர்) பெட்ரோல் கட்டணம் பாக் ரூபாய் 300 தாண்டிச் சென்று கொண்டுள்ளது.

பல நிறுவனங்கள் பாக்கை விட்டு வெளியேறி வருகின்றன. விமானத்துக்குப் பெட்ரோல் போடவே பணம் இல்லாமல் பாக் அரசு திணறி வருகிறது.

பணவீக்கம், மோசமான பொருளாதாரம் காரணமாக, பொதுமக்கள் பலர் வழக்கம் போல ஐரோப்பா நாடுகளுக்கு இடம் பெயர்ந்து வருகிறார்கள்.

அரபு நாடுகளின் நெருக்கமும் குறைந்து விட்டது, அரபு நாடுகள் இந்திய நட்பை வளர்த்து வருகின்றன.

பாகிஸ்தானுக்கு உதவியாக அவ்வப்போது இருப்பது துருக்கி மட்டுமே! துருக்கியும் அரசியல் ரீதியாக மட்டுமே உதவுகிறது, நிதி அளவில் அல்ல.

பாக் ஆக்கிரமிப்பு காஷ்மீர் விஷயத்தில் அரபு நாடுகள் கை விட்ட நிலையில், பாக்குக்கு ஆதரவு கொடுத்து வருவது துருக்கி மட்டுமே.

பாகிஸ்தான் ஆக்கிரமிப்பு காஷ்மீர்

2019 ல் Article 370 ரத்தால், காஷ்மீர் வேகமாக வளர்ச்சி அடைந்து வருகிறது.

உட்கட்டமைப்புகள், சாலைகள், மேம்பாலங்கள் கட்டப்பட்டு மேம்படுத்தப்பட்டு வருகின்றன. இவற்றைக் விளக்கமாக தனிக்கட்டுரையாக எழுதுகிறேன்.

தீவிரவாதத்தால் இழந்த சுற்றுலா வருமானத்தைப் பொதுமக்கள் திரும்பப் பெற்று வருகிறார்கள். சுற்றுலா வரும் பொதுமக்களின் எண்ணிக்கை அதிகரித்து வருகிறது.

ஆனால், பாக் ஆக்கிரமிப்புக் காஷ்மீரில் நிலைமை தலைகீழாக உள்ளது. மக்கள் அடிப்படை வசதிக்கே திண்டாடி வருகிறார்கள்.

சன்னி பிரிவு பெரும்பான்மை உள்ள நாடு பாக் ஆனால், பாக் ஆக்கிரமிப்புக் காஷ்மீரில் ஷியா பிரிவு மக்கள் அதிகம்.

எனவே, பாக் அரசு அங்கே சன்னி பிரிவு மக்களைக் குடியமர்த்திப் பிரச்சனை ஏற்படுத்தி வருகிறது.

இதன் காரணமாக, அங்குள்ள பாக் மக்கள் தங்களை இந்தியாவுடன் இணைக்கக் குரல் எழுப்பியும், போராட்டம் செய்தும் வருகிறார்கள்.

உள்நாட்டு கலவரம்

தீவிரவாதத்தால் இந்தியாவை நெருக்கடிக்கு ஆளாக்கி வந்த பாகிஸ்தானுக்குப் பொருளாதாரம் வீழ்ந்ததால், அவர்கள் வளர்த்த தீவிரவாதமே எமனாகியுள்ளது.

பாக்கிலிருந்து தங்களைப் பிரித்துத் தரக்கோரி பலுசிஸ்தான் போராடி வருகிறது. இதையொட்டி சண்டைகள், தற்கொலை படை தாக்குதல்கள் நடைபெறுகிறது.

அவ்வப்போது பாக் இராணுவ முகாம், வாகனம், காவல்துறை அலுவலகத்தில் வெடிகுண்டுத் தாக்குதல் நடைபெற்றுத் தொடர்ச்சியாகப் பலர் இறந்து வருகிறார்கள்.

இவற்றை விட மிகப்பெரிய தலைவலியாகப் பாகிஸ்தானுக்கு ஆப்கானிஸ்தான் தாலிபான்கள் மாறி வருகிறார்கள்.

பாக் மசூதியில் குண்டு வெடித்து 100 பேர் இறந்தது பெரிய சம்பவமானது.

கர்மா

தான் வளர்த்த கடா தன் மார்பிலே பாய்வது போல, தான் வளர்த்த தீவிரவாதம் பாக் மீதே நடந்து வருகிறது.

இதற்கிடையில் தீவிரவாத தலைவர்கள் பாக்கிலும், பாக் ஆக்கிரமிப்பு காஷ்மீரிலும் மர்மமான முறையில் கொல்லப்பட்டு வருகிறார்கள். எப்படி நடக்கிறது? என்பது புரியாமல் பாக் தலையைப் பிய்த்துக்கொண்டுள்ளது.

முன்னாள் இந்திய இராணுவ அதிகாரி கூறியது போல, கத்தியின்றி ரத்தமின்றி நமக்குப் பாகிஸ்தான் ஆக்கிரமிப்பு காஷ்மீர் கிடைத்து விடும்.

1947 முதல் தீவிரவாதத்தைத் தூண்டி இந்தியாக்குத் தலைவலியாக இருந்து வந்த பாகிஸ்தான், கொஞ்சம் கொஞ்சமாக அழிந்து வருகிறது.

தீவிரவாதத்தை ஆதரித்தால், அதுவே நமக்கு ஆபத்தாக முடியும் என்பதற்கு பாகிஸ்தான் எடுத்துக்காட்டு. அடுத்த எடுத்துக்காட்டாக கனடா மாறி வருகிறது.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).