யாழ்ப்பாணம் | சொந்த ஊர் என்றாலே மகிழ்ச்சி தானே!

தலைவர் ரசிகரும் ஈழத்தமிழருமான ஜீவதர்ஷன் இயக்கத்தில் அடுத்த படைப்பு யாழ்ப்பாணம். Image Credit

யாழ்ப்பாணம்

சொந்த ஊரான யாழ்ப்பாணம் வரும் ஒருவர் எப்படித் தன் விடுமுறையை நண்பர்கள், சொந்தங்கள், மக்களோடு கழிக்கிறார் என்பதே இப்பாடலின் கதை.

இப்பாடல் பார்த்த பிறகே யாழ்ப்பாணம் மற்றும் Jaffna இரண்டுமே ஒரே இடம் என்று தெரியும், சிங்களத்தில் வேறு பெயர். பெயர்ச்சொல் எப்படி அழைத்தாலும் ஒரே பெயரிலேயே அழைக்கப்பட வேண்டும்.

முந்தைய அரசியல், நிலப்பரப்பு பிரச்சனைகள் காரணங்களால் இப்பெயர் மாற்றம் நடந்து இருக்கலாம்.

யாழ்ப்பாணம் இவ்வளவு அழகாக இருக்குமா?! என்று வியப்பாக உள்ளது. எவ்வளவு பசுமை, சுத்தம்! அடடா! அருமை.

நம்ம ஊரில் இது போன்று பார்க்க வேண்டும் என்றால், பொள்ளாச்சி, கோபி, தேனி போன்ற இடங்களுக்குச் சென்றால் காணலாம்.

ஆனால், கடல் கிடைக்காது. இங்கே அனைத்துமே அற்புதமாக உள்ளது. கிராமத்திலும் சாலை தரமாக உள்ளது.

இலங்கை சுற்றுலா

இலங்கை சுற்றுலா சென்ற பலரும் அங்கு உட்கட்டமைப்பு சிறப்பாக இருக்கும், சாலை விதிகள் சரியாகப் பின்பற்றப்படும், குப்பை போட மாட்டார்கள் என்று கூறுவார்கள்.

இக்காணொளி பார்த்தால், உண்மை தான் என்று தோன்றுகிறது. பேருந்து நிலையம் மட்டும் நம்ம ஊரு போலச் சுவரொட்டியால் கெடுத்து வைத்துள்ளார்கள் 🙂 .

கடல் நீர், அதையொட்டி நீர் நிலை எங்குமே சுத்தமாக, குப்பை இல்லாமல் இருப்பது மகிழ்ச்சியை அளிக்கிறது.

இக்காணொளி அவசியம் இலங்கைக்கு சுற்றலா செல்ல வேண்டும் என்ற திட்டத்தை உறுதிப்படுத்துகிறது. இந்தியா UPI இலங்கையில் சில இடங்களில் வந்து விட்டது.

கிராமம்

ஒரு பக்கா கிராமத்துக்குச் சென்றால் மக்களின் வாழ்க்கை எப்படி இருக்குமோ அப்படியே இக்காணொளியில் உள்ளது.

சொந்த கிராமத்துக்கு, ஊருக்குச் செல்வதை விரும்புபவர்கள், இக்காணொளி பார்த்தால், தாங்கள் வாழ்ந்த வாழ்க்கையை நினைக்காமல் இருக்க முடியாது.

பல்வேறு பிரச்சனைகளால் தாய் நாட்டிலிருந்து வேறு நாட்டுக்குப் புலம்பெயர்ந்த ஈழத்தமிழர்களின் தற்போதைய வாழ்க்கை முறை மாறி விட்டாலும் இக்காணொளி பார்த்தால், ஒரு ஏக்கம் வருவதைத் தவிர்க்க முடியாது.

அந்த அளவுக்கு அற்புதமாகக் காட்சிப்படுத்தியுள்ளார்கள்.

தொழில்நுட்பம்

ஒளிப்பதிவு அட்டகாசமாக உள்ளது. ட்ரோன் காட்சிகள் ஆகட்டும், வழக்கமான காட்சிகள் ஆகட்டும் கண்ணில் ஒற்றிக்கொள்ளலாம் போல உள்ளது.

ரசனையாக படமாக்கியுள்ளார்.

பாடல் பார்த்த யாருக்கெல்லாம் தங்கள் சொந்த ஊரைத் தவற விடுகிறோமே என்று தோன்றுகிறதோ அங்கெல்லாம் இயக்குநர் வெற்றி பெறுகிறார்.

பாடலும் சிறப்பு ஆனால், ஒரே பாடலாக இல்லாமல் இடையிடையே வேறு பாடல்களும் வருவது ஒரு தொடர்ச்சியை (conitnuity) துண்டிக்கிறது.

பாடல் இடையே குரல்கள் வந்து பாடல் தொடர்வது இயல்பானது ஆனால், வேறு பாடல்களும் வருவது ஒரு கோர்வையாக ரசிப்பதைத் தடுப்பது போல உள்ளது.

பாடல் வரிகள் அழகாக, ஊரைத் தவறவிடுகிறோமே என்ற ஏக்கத்தைச் சரியாக பிரதிபலித்துள்ளது.

Blog பிரபலமாக இருந்த காலத்தில் எழுதிய ஜீவதர்ஷன் தற்போது சம்பந்தமே இல்லாமல் அற்புதமான காணொளிகளை இயக்குவது வியப்பை அளிக்கிறது.

யாரிடம் என்ன திறமை உள்ளது என்றே புரிந்து கொள்ள முடிவதில்லை!

ஒற்றுமை

ஜீவதர்ஷன் இயக்கிய இரு காணொளிகளிலும் ஒரு ஒற்றுமையைக் காண முடிகிறது.

ஈழம் என்றாலே, அழுகை, பரிதாபம், போர் காயங்கள், சோகம் என்று எதிர்மறையான செய்திகள், காணொளிகளையே பார்க்கும் நமக்கு இக்காணொளிகள் நேர்மறை எண்ணங்களைக் கொடுக்கிறது.

இலங்கையின் மீதுள்ள பொதுப் பார்வையை மாற்றுகிறது.

இக்காணொளிக்காக உழைத்தவர்கள் அனைவருக்கும் வாழ்த்துகள்.

இதே ஜீவதர்ஷன் இயக்கிய குறும்படம் –> சாம் சூசைட் பண்ண போறான்

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).