நம்பினால் நம்புங்கள்

நம்பினால் நம்புங்கள் கட்டுரையில் கூறப்பட்டுள்ளவை அனைத்தும் என் தனிப்பட்ட அனுபவங்களே. பொதுவான கருத்தாகக் கருத வேண்டாம். Image Credit

நம்பினால் நம்புங்கள்

இத்தலைப்பு பார்த்து உங்களுக்குப் பழைய நினைவு வந்தால், தூர்தர்ஷனில் Ripleys Believe it or not நிகழ்ச்சியை சிறு வயதில் பார்த்து இருப்பீர்கள்.

‘Ripleys Believe it or not நம்பினால் நம்புங்கள்‘ நிகழ்ச்சியில் சில சம்பவங்களைத் தொகுத்து வழங்குவார்கள், நம்பவும் முடியாது நம்பாமலும் இருக்க முடியாது.

இது போன்ற ஒரு சூழ்நிலையில் தான் இருக்கிறேன் 🙂 .

சிலதை நம்பவும் முடியலை, நம்பாமலும் இருக்க முடியலை. எதேச்சையாக நடக்கிறதோ என்றும் தோன்றுகிறது, அப்படியில்லை என்றும் தோன்றுகிறது.

நேர்மறை எண்ணங்கள்

இத்தளத்தைத் தொடர்ந்து படிப்பவர்களுக்கு நேர்மறை எண்ணங்கள் குறித்து இங்கே எழுதுவதைக் கவனித்து இருக்க முடியும். படிப்பவர்களை மனரீதியாகச் சோர்வடையச் செய்யும் கட்டுரைகளை எழுதுவதில்லை.

சமூகக் கோபங்கள், அரசியல் விமர்சனங்கள் இருக்கும் ஆனால், அதுவே வேலையாக வைத்துக்கொள்வதில்லை.

2015 ம் ஆண்டுக்குப் பிறகு நேர்மறை எண்ணங்களில் ஆர்வம் ஏற்பட்டது. பதட்டமாகாமல் இருப்பது, அவசரப்படக் கூடாது என்பது போன்ற வழக்கங்களைப் பின்பற்றத் துவங்கினேன்.

பள்ளி & வீடு

சிங்கப்பூரிலிருந்து சென்னைக்கு வந்த நேரம். மகன் வினயை பள்ளியில் சேர்க்கணும் ஆனால், பள்ளிகளில் நடுவில் (3 ம் வகுப்பு) சேர்க்க எவரும் ஒப்புக்கொள்ள வில்லை.

அனைவரும் LKG க்கு மட்டுமே முன்னுரிமை அளித்தார்கள். சில பள்ளிகளில் வாய்ப்புக் கிடைத்தது ஆனால், அதற்கான வழிமுறைகள் மிகக் கடினமாக இருந்தது.

இருப்பினும் எப்படியும் கிடைக்கும் என்று பதட்டமாகாமல் நம்பிக்கையாக இருந்தேன். அதே போல ஒரு பள்ளியில் ஒரே முயற்சியிலேயே கிடைத்து விட்டது.

சென்னையில் வீடு தேடிய போதும் ஒரே முயற்சியிலேயே வீடு வாடகைக்குக் கிடைத்து விட்டது. தற்போது வரை அதே வீட்டில் தான் வசிக்கிறேன்.

இது எனக்கு எதோ நேரம் நன்றாக உள்ளது அதனால் பிரச்சினை இல்லாமல் கிடைத்து இருக்கும் என்று கருதிக்கொண்டேன்.

மூன்று வருடங்களைக் கடந்தது (2018)

இதன் பிறகு தொடர்ந்து நேர்மறை (Positive) எண்ணங்களைத் தீவிரமாகப் பின்பற்றத் துவங்கினேன். முன்னர் கடினமாக இருந்தது, பின்னர் எளிதாகி விட்டது.

அதாவது, இதற்காக எந்த முயற்சியும் எடுக்க வேண்டியதில்லை. இயல்பாகவே நமக்கு அமைந்து விடும்.

இதன் பிறகும் பல்வேறு சம்பவங்கள் தொடர்ந்து நடந்தது ஆனாலும், எதேச்சையாக நடப்பதாகவே தோன்றியது.

ஆனால், மூன்று வருடங்களைக் கடந்தும் அப்படியே இருக்குமா?! என்று தோன்றினாலும் நம்பவும் முடியலை, நம்பாமலும் இருக்க முடியவில்லை.

நேர்மறையாக நினைத்தும் எதிர்மறை செய்திகளில் ஆர்வம் செல்கிறதே என்ற கவலை முன்பு இருந்தது ஆனால், தற்போது எதிர்மறை செய்திகளில் முற்றிலும் ஆர்வமில்லை.

இது முழுக்கத் தொடர் ஆர்வம், பயிற்சியாலே சாத்தியமானது.

ஆறு வருடங்களைக் கடந்தது (2022)

முன்னர் எதையெல்லாம் தவிர்க்கச் சிரமப்பட்டேனோ அவையெல்லாம் எளிதாகப் புறக்கணிக்க முடிந்தது. தேவையற்ற எண்ணங்கள் என்னை அண்டுவதில்லை.

கடந்த ஓரிரு வருடங்களாக அனைவருமே அன்பாக நடந்து கொள்கிறார்கள். யார் என்றே தெரியாதவர் கூட என்னிடம் அன்பாக நடந்து கொள்கிறார்.

சூர்யவம்சம் படத்தில் பேருந்தில் செல்பவருக்கு மணிவண்ணன் கை காட்டுவரே அது மாதிரி பேருந்தில் இருப்பவர் நிலையில் குழப்பமாக இருப்பேன் 🙂 .

படிக்கும் உங்களுக்கு நம்பச் சிரமமாக இருக்கும் என்பதை உணர்கிறேன் ஆனால், நம்பினால் நம்புங்கள்.

இதற்கு என் எண்ண அலைகள் காரணமாக இருக்கலாம் என்று கருதுகிறேன்.

யாரையும் எதிரியாக கருதுவதில்லை ஆனால், இந்து மதத்தை, இந்தியாவை, தமிழகத்தை இழிவுபடுத்துபவர்களை வெறுக்கிறேன்.

கோபம் வருகிறது, ஆத்திரமாக இருக்கிறது ஆனால், அவையெல்லாம் அந்நேரத்துக்கு மட்டுமே. இதையவே நினைத்துக் கொண்டு இருப்பதில்லை.

தனிப்பட்ட முறையில் எனக்கு எதிரிகளே இல்லை. ஒருவேளை பிரச்சனை செய்தாலும், அதை மனதில் வைத்துக்கொண்டு இருப்பதில்லை, அப்போதே மறந்து விடுகிறேன் அல்லது புறக்கணித்து விடுகிறேன்.

எனவே, என் மீது அன்பு செலுத்துபவர்கள் எண்ணிக்கை சமீபமாக அதிகரித்து வருகிறது 🙂 . ஆமாம். நம்பினால் நம்புங்கள்.

கடவுள் நம்பிக்கை

நேர்மறை எண்ணங்களோடு கடவுள் நம்பிக்கையும் உண்டு. இரண்டும் இணைந்து எனக்கு அளவற்ற நன்மைகளைக் கொடுப்பதாக மனப்பூர்வமாக நம்புகிறேன்.

அனைத்தையும் பிரச்சனைகளாகக் கருதக் கூடாது என்பதைத் தொடர்ந்து பின்பற்றித் தற்போது எதுவுமே பிரச்சனையாகத் தோன்றுவதில்லையா அல்லது எனக்குப் பிரச்சனைகளே இல்லையா என்பதில் தற்போதும் குழப்பம்.

எந்தப் பிரச்சனை வந்தாலும் சமாளிக்கலாம் என்ற எண்ணங்கள் பெரியளவில் உதவுகிறது. தேவைப்படும் நேரத்தில் கடவுள் உதவுகிறார் என்பதும் உறுதியாகிறது.

ஏனென்றால், என்னால் முடியவில்லை என்ற நிலை வரும் போது எங்கிருந்தாவது தானாகவே உதவி கிடைக்கிறது, பொய் கூறவில்லை.

என் சிறு வயதிலிருந்து இது நடந்து வருகிறது.

கடவுள் துணை இருக்கிறார் என்று திரைப்படங்களிலும், பெரியவர்களும் கூறுவது மற்றவர்களுக்கு எப்படியோ! எனக்கு நடப்பது உண்மையே.

இதை உறுதிப்படுத்தும் பல சம்பவங்கள் நடந்துள்ளது. பெரிய சம்பவங்களும் கண் முன்னே நடக்கும் போது, கடவுள் உடன் இருப்பதாகவே உணர்கிறேன்.

இக்கட்டுரை எழுதவும் அது போல நடந்த ஒரு சம்பவமே! எனக்கு எது நல்லது எது கெட்டது என்று உடன் இருக்கும் கடவுளுக்குத் தெரிகிறது.

எனவே, என் முயற்சியைக் கடந்து என்ன நடந்தாலும் அதற்குக் காரணம் இருக்கும், நம் நன்மைக்கே என்றே எடுத்துக்கொள்கிறேன் அல்லது அது விதியாக இருக்கலாம் என்று ஏற்றுக்கொள்கிறேன்.

பிரச்சனைகளே இல்லையா?

இதற்காக பிரச்சனைகளே வாழ்க்கையில் இல்லையா?! என்று நினைக்க வேண்டாம். இருக்கிறது! ஆனால், அவற்றைப் பிரச்சனைகளாகக் கருதுவதில்லை.

‘உனக்கும் கீழே உள்ளவர் கோடி‘ என்ற கண்ணதாசன் வரிகளே நினைவுக்கு வருகிறது. எனவே, எதையும் கடந்து செல்லவே விரும்புகிறேன்.

கடந்து செல்வது தானே வாழ்க்கை.

மனைவியைச் சமாளிப்பது தான் கடினம். ஏங்க! உங்களுக்கு எது தாங்க பிரச்சனை! என்பார் 🙂 .

கடவுளிடம் பல வருடங்களாக எனக்காக எதையும் வேண்டுவதே இல்லை (ஒரே ஒரு வழக்குப் பிரச்சனை தவிர்த்து). ஏனென்றால், இதற்கு மேல் வேண்டும் என்று கேட்பதே நியாயமில்லாததாக உள்ளது.

என்னால் முடியவில்லை என்ற நிலை வரும் போது தானாகவே, யார் மூலமாகவோ உதவி கிடைக்கும் போது எதற்காக பயப்பட, கவலைப்பட வேண்டும்!

எல்லாம் மேலே இருக்கிறவன் பார்த்துப்பான் 🙂 .

எண்ணங்களுக்கு பலம் அதிகம்

முக்கியமான ஒன்றை எப்போதும் நினைவில் நிறுத்துங்கள்.

‘என்ன நினைக்கிறீர்களோ அதுவாகவே ஆகிறீர்கள்‘ என்கிறார் புத்தர். எனவே, எதிர்மறை எண்ணங்களையே நினைத்துக்கொண்டு இருந்தால், அது தொடர்பான நிகழ்வுகளே உங்களுக்கு நடக்கும்.

Pls don’t underestimate your THOUGHTS.

எனக்கு ஏன் நடக்கவில்லை என்பதற்கான காரணமே மேலே கூறப்பட்டவை. எதிர்மறையாக எப்போதும் நினைப்பது இல்லை, இருந்தாலும் மிக மிகக்குறைவு.

எனவே, நல்லதையே நினையுங்கள் நல்லதே நடக்கும். 

உடனடியாக இதன் பலன் தெரியவில்லை என்றாலும் நாளடைவில் நிச்சயம் உங்களால் வித்யாசத்தை உணர முடியும்.

நம்பினால் நம்புங்கள் 🙂 .

தொடர்புடைய கட்டுரைகள்

நேர்மறை எண்ணங்கள் என்றால் என்ன?

எண்ணம் போல் வாழ்க்கை என்றால் என்ன?

மற்றவரை மதிக்கக் கற்றுக்கொள்ளுங்கள்

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).