ஆழ்மனதின் அதிசய சக்தி

ஒவ்வொரு மனிதனின் வாழ்க்கையிலும் ஆழ்மனம் எவ்வளவு முக்கியமானது என்பதை The Miracles of Your Mind புத்தகம் விவரிக்கிறது. Image Credit

ஆழ்மனம்

அனைவரிடமும் Conscious Mind (சுய நினைவு) Subconscious Mind (ஆழ்மனம்) என்ற இரு பிரிவுகள் உள்ளன. சுய அறிவுடன் செய்வது, மற்றொன்று நம் ஆழ்மனதிலிருந்து இயல்பாக இயக்கப்படுவது.

எளிமையான எடுத்துக்காட்டுகளுடன் பார்ப்போம்.

Conscious Mind (சுய நினைவு)

ஒருவருடன் பேசுவது, ஒரு செயலைப் புதிதாகச் செய்வது போன்றவை. இவை நம் சுயநினைவுடன் நடப்பவை.

Subconscious Mind (ஆழ்மனம்)

இவை தொடர் பழக்கங்களினால் ஆழ்மனதில் பதியப்பட்டுத் தானியங்கியாக, நம் முயற்சிகள் இல்லாமலே நடப்பவை. திரும்பத்திரும்பச் செயல்படுத்தும் போது, நினைக்கும் போது, அவை தானாகவே நடைபெறுகிறது.

எடுத்துக்காட்டு, பல் துலக்குவது, வாகனம் ஓட்டுவது.

பல் துலக்கும் போது வேறு எதையாவது நாம் நினைத்துக்கொண்டு இருந்தாலும், நம் கைகள் தானாகவே அனைத்தையும் செய்கிறது.

சுய நினைவில் வாகனம் ஓட்டப்பழகுகிறோம். எனவே, பழகும் போது ஒவ்வொரு முறை கியர் போடும் போதும் பொறுப்பாகக் கவனித்து, இயக்கிறோம்.

ஆனால், பழகி ஆழ்மனதில் இருத்திவிட்டால், கியர், க்ளட்ச், வேகம், நிறுத்தம் அனைத்தையும் தானியங்கியாகவே நம் உடல் செய்யப்பழகி விடுகிறது.

அதாவது இதற்காகத் துவக்கத்தில் செய்தது போலக் கூடுதல் முயற்சிகளை எடுக்காமலே நடக்கிறது. காரணம், இவை நம் ஆழ்மனதில் பதிந்து விடுவதால்.

எனவே தான், ஒருவர் தன்னையே மறந்தாலும், வாகனம் ஓட்டுவதையோ, நீச்சல் அடிப்பதையோ மறப்பதில்லை.

தட்டச்சு பழகும் போது ஒவ்வொரு எழுத்தாகப் பார்த்து அடிப்போம் ஆனால், பழகி விட்டால் நம் விரல்கள் தானாகவே மிக வேகமாக இயங்குகிறது.

எதனால் என்று யோசித்துள்ளீர்களா? யார் இயக்குவது? மூளை, ஆழ்மனம்.

நல்லது கெட்டது

மேற்கூறியவை நம் நடவடிக்கைகளுக்கு எடுத்துக்காட்டாகக் கூறியவை.

இதன் இன்னொரு பகுதி தான் எண்ணங்கள்.

நாம் நம்புவதை ஆழ்மனம் நடத்திக்காட்டுகிறது. இதையே ‘நம்பிக்கையே வாழ்க்கை‘, ‘எண்ணம் போல வாழ்க்கை‘ என்கிறார்கள்.

ஆழ்மனதுக்கு நல்லது எது? கெட்டது எது? என்று தெரியாது. ஆழ்மனம் ஒரு கணினி போல. அதற்கு என்ன பயிற்றுவிக்கப்படுகிறதோ அதைச் செயல்படுத்தும்.

ஒரு செயலை நடக்கும் என்று நேர்மறையாக நம்பினால், அதை நடத்திக்காட்டும். ஒரு செயலை நடக்காது என்று எதிர்மறையாக நினைத்தால், அதை நடத்தாது.

இதையே தான் ‘என்ன நினைக்கிறாயோ அதுவாகவே ஆகிறாய்‘ என்றார் புத்தர்.

எனவே, தொடர்ந்து ஒன்றை உறுதியாக நம்பி ஆழ்மனதை நம்ப வைத்து விட்டால், அது பல அற்புதங்களைச் செய்யும் என்பது தான் இப்புத்தகத்தின் சுருக்கம்.

எனவே, எதிர்மறை சிந்தனைகளை அதிகம் நினைத்தால், எதிர்மறையான சம்பவங்களே உங்கள் வாழ்வில் நடைபெறும்.

அதே நேர்மறையாக நினைத்தால், நேர்மறை நிகழ்வுகள் தொடரும்.

உடல்நலம்

உடல் நலத்தில் பிரச்சனை உள்ளது என்றால், எனக்கு இது சரியாகி விடும், இப்பிரச்சனைகளிலிருந்து விடுபடுவேன் என்று ஆழ்மனதை நம்ப வைத்து விட்டால், நம் உடல் பிரச்சனைகளைச் சரி செய்து விடும்.

மாறாக, எதிர்மறையாக நினைத்துக்கொண்டிருந்தால், நம் உடல் நிலையை மோசமான நிலைக்கு இட்டுச்செல்லும்.

நம்பிக்கை என்பது அவநம்பிக்கையாக இருக்கக் கூடாது. முழுமையாக நம்பி ஆழ்மனம் நம்பும்படி செயல்பட்டாலே இதனுடைய பலன்கள் தெரியும்.

நான் நம்புகிறேன் என்று மேலோட்டமாகக் கூறிக்கொண்டு ஆனால், பயத்துடன், சந்தேகத்துடன் இருந்தால், எதுவுமே நடக்காது.

எனவே, முழுமையான நம்பிக்கை மிக முக்கியம்.

நம் உடல் பிரச்சனை சரியாகனும், நல்ல மதிப்பெண் பெறனும், பதவியை அடையனும் என்று விருப்பப்பட்டால் மட்டும் போதாதாது அதை முழுதாக நம்புவதோடு அதற்கான முயற்சிகளையும் எடுக்க வேண்டும்.

இவ்வாறு தொடரும் போது அவை நடைபெறுவதை நம் வாழ்க்கையில் காணலாம்.

எனவே, விருப்பம் வேறு நம்பிக்கை வேறு. ஆசைப்படுவதால் மட்டுமே எதுவுமே நடக்காது. முழுமையாக நம்பனும் அது தொடர்பான முயற்சிகளை எடுக்க வேண்டும்.

இவை உண்மையா?

100% உண்மை என்று கூற முடியும்.

உடல்நலம் உட்பட மற்ற விருப்பங்கள் குறித்து எனக்குத் தெரியவில்லை ஆனால், நேர்மறையாக நினைத்தால், நேர்மறையான சம்பவங்களே நடக்கும்.

இதை உறுதியாகக் கூறக்காரணம், அதற்கு எடுத்துக்காட்டே நான் தான்.

தோராயமாக 2016 ல் இருந்து நேர்மறையாக நினைத்து நடக்கிறேன். துவக்கத்தில் கடினமாக இருந்தது ஆனால், அவை ஆழ்மனதில் பதிந்ததால் அதற்குக் கூடுதல் முயற்சிகள் பின்னர் தேவைப்படவில்லை.

அதாவது, தட்டச்சுச் செய்வது போல, வாகனம் ஓட்டுவது போல முயற்சிகளை எடுக்காமல் இயல்பாகவே நடக்கிறது.

இதை விட முக்கியம், என்னிடம் யாரும் சண்டையிடுவதில்லை, கோபப்படுவதில்லை, எதிரியாக நினைப்பதில்லை. பிரச்சனைகளைச் செய்வதில்லை.

அனைத்துமே சுமூகமாக நடைபெறுகிறது.

என் தளத்தில் எழுதப்படும் மாற்று கருத்துகளால் சிலர் என்னை வெறுக்கலாம், கோபப்படலாம், எரிச்சல் அடையலாம் ஆனால், என் தனிப்பட்ட வாழ்க்கையில் எவரும் இவ்வாறு நடந்து கொள்வதில்லை.

ஓரிரு நாட்கள், ஓரிரு மாதங்கள் அல்ல, பல வருடங்களாக. அறிமுகமில்லாதவர் கூட நட்பாக நடந்து கொள்கிறார்கள், உதவுகிறார்கள்.

இவையனைத்தும் நேர்மறையாகச் சிந்திக்க ஆரம்பித்த பிறகு நடக்க ஆரம்பித்தது. துவக்கத்தில் தற்செயலாக (coincindence) நடப்பதாக நினைத்தேன் ஆனால், 5+ வருடங்களாகத் தற்செயலாக நடக்குமா?!

நம்ப மாட்டீர்கள் என்று என்னால் புரிந்து கொள்ள முடிகிறது ஆனால், உண்மை.

ஏதாவது வெறுக்கும்படியாக நடந்துள்ளதா என்று யோசித்துப்பார்த்தாலும் எந்த மோசமான சம்பவங்களும் பிடிபடவில்லை. சமூகக் கோபங்கள், வருத்தங்கள் உள்ளது ஆனால், தனிப்பட்ட முறையில் இல்லை.

எனவே தான் உறுதியாகக் கூறுகிறேன்.

ரஜினி

இதை எனக்குப் பிடித்த தலைவர் ரஜினியை வைத்தே கூறுகிறேன்.

ரஜினியை அவரது கருத்துகளால், செயல்பாடுகளால், அரசியல் நிலைப்பாடு காரணமாகப் பலர் கடுமையாக விமர்சிக்கலாம், தூற்றலாம் ஆனால், அவரை நேரில் சந்தித்தால் எதிர் சூழ்நிலை நிலவுகிறது.

அதாவது, அவரால் ஈர்க்கப்படுகிறார்கள், நட்பாகி விடுகிறார்கள், பாராட்டுகிறார்கள், அவரது நேர்மறைப் பேச்சால் கவரப்பட்டு மதிப்புக்கொள்கிறார்கள்.

இதற்கு, அவரது நேர்மறையான எண்ண அலைகளே காரணம் என்று கருதுகிறேன்.

அதே போல நேர்மறையாகச் சிந்திப்பதால், எதிர்மறை எண்ணங்கள் இல்லாததால் என்னிடம் வருபவர்களும் அன்பாக நடந்து கொள்கிறார்கள் என்று கருதுகிறேன்.

நேர்மறையாகச் சிந்திக்கும் போது நமது எண்ண அலைகள் (Positive Vibe) நம்மைச் சுற்றி இருக்கும். எனவே, வெறுப்புணர்வோடு வருபவர்கள் கூட அந்த எண்ண அலைகளால் மனம் மாறி விடுவதாகப் புரிந்து கொள்கிறேன்.

மேற்கூறியவை என் புரிதல், இது தான் சரி என்று கூறவில்லை. இப்படி இருக்கலாம் என்று நினைக்கிறன், அவ்வளவே!

கடவுளா ஆழ்மனமா?

ஆழ்மனம் நடத்துவதை அறிவியலாகக் கருதலாம், கடவுள் நம்பிக்கையாகவும் கருதலாம். நான் இரண்டையுமே நம்புகிறேன்.

சிலர் ஸ்ரீ ராம ஜெயம் போன்றவற்றை 1000 முறை எழுதுவார்கள். இது பண்டை காலத்திலிருந்து வரும் வழக்கம். ஒருவேளை ஆழ்மனதில் நம்பிக்கையைப் பதிய வைக்க முன்னோர்கள் எடுத்த முயற்சியாகவும் இருக்கலாம்.

கடவுள் செய்ததாக நம்புகிறோம்! அது நம் ஆழ்மனதின் சக்தியாகவும் இருக்கலாம். நமக்கு மேலே ஒரு சக்தியுள்ளது என்பதை முழுமையாக நம்புகிறேன்.

காரணம், என் வாழ்க்கையில் இது போல எதையும் பின்பற்றாமல் சில சம்பவங்கள் நடந்துள்ளன. இவை ஆழ்மனதையும், நேர்மறை எண்ணங்களையும் தாண்டி எதோ உள்ளது என்று உணர்த்துகிறது.

அதை நான் கடவுளாக, கர்மாவாக நினைக்கிறன். என் உடன் பயணிப்பதாகவும், என்னைக் காப்பதாகவும் நம்புகிறேன். நான் இவ்வாறு நினைக்க நியாயமான, உண்மையான காரணங்களும் உள்ளன.

எனவே, ஆழ்மனம் / நம்பிக்கை என்பது விளையாட்டல்ல.

எப்படிச் செயல்படுத்துவது?

இரவு 9 -10 மணிக்குள் தூங்கி விடுவது நல்லது. தூங்கும் முன் மனதை அமைதியாக வைத்து நம் நம்பிக்கைகளை ஆழ் மனதில் பதிய வைக்க வேண்டும்.

காலை 4 மணிக்கு மனம் அமைதியாக உள்ள நேரத்தில், உடலில் புதுச் செல்கள் உருவாகும் நேரத்தில் நம் நம்பிக்கைகளை அழுத்தமாகத் தியானம் செய்ய வேண்டும்.

உடல் நலப்பிரச்னைகள் சரியாகி விடும் என்று உறுதியாக நம்ப வேண்டும்.

அதிகாலை நேரத்தில் செல்கள் புதிதாக உருவாகும் நேரத்தில் இதைச் செய்யும் போது உடல் பிரச்சனைகள் சரியாகும் என்று ஆசிரியர் கூறுகிறார். அறிவியல் பூர்வமாக உண்மையா என்று தெரியாது, இவர் கூறியதை கூறியுள்ளேன்.

முக்கியமாக, நம் நம்பிக்கை முழுமையானதாக இருக்க வேண்டும், அவநம்பிக்கை, சந்தேகம் கூடாது. இருந்தால், இம்முயற்சி பலனளிக்காது.

சிலவற்றைப் பின்பற்றி வருகிறேன், அவை பலனளித்ததா என்று பின்னர் தெரிவிக்கிறேன்.

ஆசிரியர் Joseph Murphy

இப்புத்தகத்தை எழுதிய ஆசிரியர் Joseph Murphy, ஆழ்மனதின் அற்புதங்களை மிக அற்புதமாக விளக்கி இருக்கிறார், குறிப்பாக முதல் 2 அத்தியாயங்கள்.

இதைத் தமிழில் மிகச்சிறப்பாக விளக்கிப் பேசியுள்ளவருக்கு என் பாராட்டுகள்.

அழகான, பிசிறில்லாத, சீரான குரல்.

எப்படி இவ்வாறு பேச முடிகிறது என்று வியப்பாக உள்ளது! இதைக்கேட்டால் நீங்களும் நான் கூறுவதை உண்மை என்று நம்புவீர்கள்.

எந்தத் தடங்கலும், திணறலும் இல்லாத தெளிந்த நீரோடை போல அற்புதமான குரலில் எளிமையான விளக்கம்.

அவசியம் கேட்க வலியுறுத்துகிறேன். 6 மாதங்களுக்கு ஒரு முறை திரும்பக் கேட்கும் போது (குறைந்த பட்சம் முதல் இரு அத்தியாயங்கள்) எந்த நிலையில் உள்ளோம் என்பதை உணர முடியும்.

அமைதியான சூழலில், மற்றவர்கள் தொந்தரவு, வேறு பணிகளில் கவனச்சிதறல் இல்லாத நேரத்தில் கேட்கும்படி வலியுறுத்துகிறேன்.

இந்தவொரு அற்புதமான புத்தகத்தை, குரல் பதிவைப் பரிந்துரைத்த JaiSuba Moorthik க்கு மனமார்ந்த நன்றிகள்.

தொடர்புடைய கட்டுரைகள்

நம்பினால் நம்புங்கள்

நேர்மறை எண்ணங்கள் என்றால் என்ன?

எண்ணம் போல் வாழ்க்கை என்றால் என்ன?

கடவுளை எப்போது நினைப்போம்?

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.