Bye Bye சிங்கப்பூர்

எப்போது என்று எதிர்பார்த்து ஒருவழியாக இந்தியா திரும்புகிறேன். Bye Bye சிங்கப்பூர் 🙂 .

சிங்கப்பூர் 2007 ல் வந்த போதே நிரந்தரமாகத் தங்கும் திட்டமில்லை. வெளிநாடு செல்லனும்,  பணி புரியணும் என்ற இயல்பான விருப்பம் இருந்தாலும், சிங்கப்பூர் வந்தது குடும்பத்துக்கு இருந்த கடனைக் கட்டவேண்டும் என்ற நெருக்கடி காரணமாகவே!

இங்கேயே தொடர்ந்து இருக்க வேண்டும் என்ற எண்ணம் துவக்கத்தில் இருந்தே இல்லை. எனவே PR (Permanent Resident) கூட விண்ணபிக்கவில்லை. Image Credit

ஒவ்வொருவருக்கும் ஒவ்வொரு விருப்பம் / தேவைகள் / கடமைகள் என்றுள்ளது. எனவே, ஒருவர் வெளிநாட்டிலேயே இருப்பதும் திரும்ப ஊருக்கே வருவதும் ஒவ்வொருவருடைய  தனிப்பட்ட விருப்பம் / நிலையைச் சார்ந்தது.

Bye Bye சிங்கப்பூர்

எனவே, ஒருவரின் விருப்பத்தில் தலையிட கருத்துக்கூற மற்றவர்களுக்கு உரிமையில்லை. நான் இந்த எட்டு வருடங்களில் கண்டது கீழ் கண்ட வகையினரை.

• வெளிநாட்டிலேயே தான் வாழ வேண்டும், திரும்ப இந்தியாக்கு வரவேண்டும் என்ற எண்ணமே இல்லை என்று தெளிவாக இருப்பவர்கள்.
• இந்தியாக்கும் திரும்பனும் ஆனால், வெளிநாட்டு சொகுசும் வேண்டும். எனவே, இந்தியா திரும்பலாம் என்ற எண்ணம் இருந்தாலும் சொகுசை விட முடியாமல் புலம்பிக் கொண்டே தொடர்ந்து இருப்பவர்கள்.
• தேவை காரணமாக வெளிநாட்டில் இருந்து, அவை முடிந்ததும் திரும்ப இந்தியாக்குத் திரும்புவதில் உறுதியாக இருப்பவர்கள் (என்னைப் போல) .
• இந்தியாக்கு திரும்பனும் ஆனால், குடும்பத்தினரின் நெருக்கடி, பணத்தேவை, கடமைகள் காரணமாகப் பிடிக்கவில்லை என்றாலும் இருக்க வேண்டிய கட்டாயச் சூழல்.
• ஊருக்கு வரவேண்டும் என்ற ஆசையுண்டு ஆனால், தேவைகளை அதிகரித்துக்கொண்டே செல்வதால், இன்னும் கொஞ்சம் சம்பாதித்துப் பிறகு வரலாம்!! என்று தள்ளிப்போட்டுக்கொண்டே இருப்பவர்கள்.
• ஊருக்கு வந்தால் என்ன செய்வது? என்ன வேலை பார்ப்பது? என்ற பிரச்சனையிலே இன்னும் தொடர்ந்து இருப்பவர்கள்.

Read: நம் பிரச்சனைகளுக்கு யார் காரணம்?

வெளிநாட்டில் இருப்பவர்கள் மேற்கண்ட வகையில் ஏதாவது ஒரு நிலையில் இருப்பார்கள்.

நான் செய்த தவறு

2014 டிசம்பர் ஊருக்குத் திரும்ப வேண்டும் என்ற உறுதியான முடிவை 2012 லேயே எடுத்து விட்டேன்.

இரண்டாவது குழந்தை பிறந்த போது மனைவி குழந்தைகளை ஊரிலேயே இருக்கக் கூறி விட்டேன். இதனால் கேட்பவர்கள் அனைவரிடமும் 2014 இறுதியில் இந்தியா செல்கிறேன் என்று கூறி வந்தேன்.

அனைவரும் இந்தியா செல்கிறேன் என்று கூறியதை மட்டும் நினைவில் வைத்து இருந்தார்கள் ஆனால், 2014 இறுதி என்பதை மறந்து விட்டார்கள்.

எனவே, இரண்டு வருடமும் (2013 – 2014) “கிரி! இந்தியாக்கு போறேன்னு சொன்னே எப்போ போறே?!” என்று கேட்க ஆரம்பித்து விட்டார்கள்.

எனவே, இந்தியாக்கு கிளம்பனும் என்று இருப்பவர்கள் எதுவும் கூறாமல் அனைத்தும் உறுதியானதும் கூறப் பரிந்துரைக்கிறேன்.

நான் முன்பே கூறியது தவறு என்று கூற முடியாது. ஏனென்றால் என் மனைவி குழந்தைகள் ஊரில் இருந்தார்கள். எனவே, “ஏன் அவர்கள் இங்கே இல்லை?” என்று நண்பர்கள் கேட்கும் போது திட்டத்தைக் கூற வேண்டிய நெருக்கடி ஏற்பட்டது.

மாறிய திட்டம்

கோவையில் ஒரு இடம் வாங்கியிருந்தேன், அந்த இடத்தை விற்றுத் தான் என் (2013 ல் கட்டிய) வீட்டு வங்கிக் கடனை அடைக்கத் திட்டமிட்டு இருந்தேன். எனவே எப்படியும் விற்று விடும் என்ற எண்ணத்தில் இருந்தேன்.

ஆனால், ஜெ ஆட்சிக்கு வந்து சில மாதங்களில் கிரயக் கட்டணங்களை உயர்த்தி விட்டார்.

இதன் காரணமாக ரியல் எஸ்டேட் படுத்து விட்டது. இதனால் எவ்வளவு முயன்றும் கிட்டத்தட்ட 2 1/2 வருடங்களாக என்னால் இடத்தை விற்க முடியவில்லை. எனவே, 2014 இறுதியில் கிளம்ப முடியாத சூழ்நிலை ஏற்பட்டது.

EMI என்ற பெயரில் வட்டி கட்டியே ஏகப்பட்ட பணம் நட்டமானது. ஏற்கனவே, வட்டி கட்டி வெறுத்துப் போய் இருந்ததால், கடுமையான மன உளைச்சலை ஏற்படுத்தி இருந்தது.

உறுதியான முடிவு

2014 இறுதி வரை இடம் விற்பதற்கான எந்த அறிகுறியும் தெரியவில்லை. எனவே எனக்குப் பொறுமையிழந்து, எப்பத் தான் ஊருக்குப் போவோம் என்ற வெறுப்பே வந்து விட்டது.

வங்கிக் கடனை கட்டாமல் ஊருக்குப் போனால் சம்பளத்தில் பாதி இதற்கே சென்று விடும்.

எனவே, ஊருக்கும் போக முடியாமல் இங்கேயும் தொடர்ந்து இருக்கப் பிடிக்காமல் ஒரு நெருக்கடியான நிலையாக இருந்தது.

2014 இறுதியில், இடம் விற்றாலும் விற்கவில்லையென்றாலும் 2015 ஜூனில் கிளம்பிட வேண்டும் என்று வெறுத்துப் போய் உறுதியாக முடிவு செய்தேன். My threshold reached 🙂 .

ஊருக்குச்  செல்ல வேண்டும் என்று நினைத்ததற்கு இன்னொரு முக்கியக் காரணமும் உள்ளது. அது பற்றி பின்னர் கூறுகிறேன்.

பிற்சேர்க்கை : காரணம் இது தான். ஐடி துறை : 35 – 40 வயதுக்கான எச்சரிக்கை!

சனிப் பெயர்ச்சி

டிசம்பர் 2014 சனிப்பெயர்ச்சியில் எனக்குக் கட்டம்! சரியில்லை என்று வர, யோசித்தாலும் முடிவில் பின்வாங்கவில்லை.

எனக்காகக் குடும்பத்தினர் பயப்பட்டார்கள். “இவ்வளோ வருடங்கள் சிரமப்பட்டுட்டே ஒருவழியா முடித்துட்டே வந்துடு” என்றார்கள்.

இருப்பினும் சரியோ தவறோ யோசித்து ஒரு முடிவு எடுத்து விட்டால் நியாயமான காரணங்கள் இல்லாமல் பின்வாங்க மாட்டேன்.

எனவே, என்ன ஆனாலும் பார்த்துக்கலாம் என்ற முடிவில் நான் 2015 ஜூன் ஊருக்கு வருவது உறுதி என்று கூறி விட்டேன்.

இதன் பிறகு இரண்டு நாட்களில் இரண்டரை வருடங்களாக விற்காமல் போக்குக் காட்டி வந்த இடம் எந்த இழுபறியும் இல்லாமல் ஒரே நாளில் முடிந்தது வியப்பாக இருந்தது.

Read: சனிப் பெயர்ச்சி

Read: கர்ம வினையும் இந்து மதமும்

வேலை மாற்றல்

இங்கே இருந்து செல்ல வேண்டும் என்றால் இதே நிறுவனத்திற்குப் போவதா அல்லது வேறு நிறுவனத்திற்கா என்ற கேள்வி வந்தது.

இரண்டு வருடத்துக்கு முன்பு மாற்றல் சாத்தியமில்லை என்ற நிலையிருந்தது. எனவே, இது குறித்து மேலதிகாரிகளுடன் பேசினேன்.

அவசரப்படக் கூடாது என்ற முடிவை எடுத்து விட்டேன். காலம் எடுத்தாலும் மாற்றலுக்கு ஒப்புக் கொண்டார்கள். இது நடந்தது 2015 ஜூன்.

ஆனால், இதன் பிறகு எங்கள் சிங்கப்பூர் அலுவலகத்தில் சில பணிகள் காரணமாக அக்டோபர் இறுதி கிளம்புவது என்று முடிவானது.

அப்படி இப்படி என்று இதோ இன்னும் சில நாட்களில் கிளம்பப் போகிறேன் 🙂 .

Read: சிங்கப்பூர் போதுங்க!

நம் ஊரைப் போல உள்ள நாடு சிங்கப்பூர் 

எனக்கு நம்ம ஊர் / நாட்டின் மீது பாசம் அதிகம். யாருக்காகவும் எதற்காகவும் விட்டுக் கொடுத்தது கிடையாது. என் எழுத்துக்களில் அவ்வப்போது கண்டு இருக்கலாம்.

சிங்கப்பூர் மிகச் சிறந்த நாடு என்பது அனைவருக்கும் தெரிந்த ஒன்று. இந்தியர்களுக்குக் குறிப்பாகத் தமிழர்களுக்கு நம்ம ஊரைப் போலவே உள்ள இந்த நாட்டைப் போல ஒரு நாடு கிடைத்து விடாது.

ஒழுங்கு, உயர்தர வசதிகளுடன் திட்டமிடல்களுடன் சென்னை இருந்தால், எப்படி இருக்குமோ அது தான் சிங்கப்பூர்.

நம்ம ஊருக்கும் இங்கேயும் பெரிய வித்யாசமில்லை. எனவே, எனக்கு வெளிநாட்டில் இருக்கிறோம் என்ற உணர்வே இல்லை.

எங்குப் பார்த்தாலும் தமிழர்கள், எளிதாக நம் திரைப்படங்கள் பார்க்கும் வசதி, நம்ம ஊர் உணவகங்கள், கோவில் வேறு என்ன வேண்டும்?!

ஆனால், அனைத்தையும் தாண்டி சில சம்பவங்களால் நாம் இந்த ஊருக்கு சொந்தமில்லை நாம் வேற்று நாட்டவர் என்ற எண்ணம் அழுத்திக் கொண்டே இருக்கும்.

என்ன தான் அனைத்தும் இருந்தாலும் நம்ம ஊர் இல்லையென்ற உணர்வு இருக்கும்.

ஒவ்வொருவரும் எப்படி எடுத்துக் கொள்கிறார்கள் என்பதும் இருக்கிறது. சிலருக்கு இது பெரிய விசயமாகமில்லாமல் இருக்கலாம் ஆனால், எனக்கு அப்படியில்லை.

இந்தியா வரவில்லை என்றால் துரோகியா?

வெளிநாட்டிலேயே இருக்க விருப்பப்படுகிறவர்களுக்கு இந்தியா திரும்பக் கூடாது என்ற ஆயிரம் காரணங்கள் இருக்கலாம் அதை நாம் மதிக்க வேண்டும். வர விரும்பாதவர்களைத் துரோகிகள் என்பது போலச் சித்தரிப்பது தவறு.

ஒவ்வொருவரின் தனிப்பட்ட விருப்பம் என்றளவில் யோசித்தால், புரியும்.

வெளிநாட்டிலேயே பல வருடங்கள் இருந்து பழகியவர்கள் இந்தியாவில் இருப்பது என்பது சிரமமான ஒன்றே!

காரணம், அந்தச் சூழ்நிலைக்குப் பழகியவர்கள், அவர்களின் குழந்தைகள் புதிய சூழ்நிலையை எதிர்கொள்ளும் போது அவர்களால் ஒத்துப் போக முடிவதில்லை.

எளிமையாகக் கூற வேண்டும் என்றால், “நம் நாட்டில் கிராமத்தில் வாழ்ந்தவர்கள் பிழைப்புத் தேடி நகரத்துக்கு இடம் பெயர்ந்த பிறகு ஏன் திரும்ப கிராமம் செல்ல விரும்புவதில்லை?” இந்தக் கேள்விக்கான பதில் புரிந்தால் மேற்கூறியதும் புரியும்.

நீண்ட விடுமுறையில் சென்னையில் இருந்து கிராமத்துக்கு / சிறு நகரத்துக்கு வரும் அனைத்துக் குழந்தைகளும் கூறும் ஒரு வசனம்  “ஒரே போர் அடிக்குது” என்பது தான். உங்கள் குடும்பத்திலேயே கூட இந்த வசனத்தைக் கேட்டு இருக்கலாம்.

எனவே, இந்தியா வரவில்லை என்பவர்களை திட்டுவதில் நியாயமில்லை.

இந்தியா வராததற்கு  கூறும் “காரணங்கள்” நியாயமானவையா?

வெளிநாட்டிலேயே தொடர்ந்து இருப்பவர்கள் இந்தியா வராமல் இருப்பதற்காக இந்தியாவின் ஊழல், லஞ்சம், ஏமாற்றல், பாதுகாப்பில்லை என்று அனைவருக்கும் தெரிந்த ஏராளமான காரணங்களைக் கூறுகிறார்கள்.

வெளிநாட்டிலேயே இருக்க நினைப்பவர்களை இந்தியாவில் உள்ளவர்கள் எப்படித் தவறாகக் விமர்சிக்கக் கூடாது என்று நினைக்கிறார்களோ அதே போல வேண்டாம் என்று ஒதுக்கி விட்ட இந்தியாவை வரவேண்டாம் என்பதற்கான காரணமாக விமர்சிக்கத் தார்மீக உரிமையில்லை.

இதே அழுக்கான, லஞ்சம் ஊழல் அதிகமுள்ள, ஒழுங்கற்ற, இன்னும் கணக்கிலடங்கா குறைகளைக் கொண்ட இந்தியா தான் நீங்கள் வெளிநாட்டில் சொகுசாக இருக்கக் காரணம் என்பதை மறக்க வேண்டாம்.

எத்தனை தலைமுறைகள் அங்கே இருந்தாலும் உங்கள் பூர்வீகம் இந்தியா தான்.

உங்கள் இந்திய முகத்தை எத்தனை தலைமுறைகள் மாறினாலும் மாற்ற முடியாது. அந்த நாட்டின் குடிமகனாகவே மாறினாலும் மற்றவர்கள் பார்வைக்கு நீங்கள் இந்தியன் தான், வேற்று நாட்டவர் தான், தற்காலிகமாக வந்தவர் தான்.

எத்தனை வருடங்கள் / தலைமுறைகள் இருந்தாலும் நீங்கள் இருக்கும் வேறு நாடு உங்கள் சொந்த நாடாகாது. தரவுகளின் அடிப்படையில் அந்நாட்டின் குடிமகனாகலாம் ஆனால், பூர்வீகம் இந்தியா என்றே தலைமுறைகள் மாறினாலும் கூறப்படும்.

எனவே, வெளிநாட்டிலேயே வசிக்கவேண்டும் என்று விருப்பப்படுபவர்கள் தாராளமாக இருங்கள் ஆனால், நீங்கள் வராமல் இருப்பதற்கு இந்தியாவில் உள்ள குறைகளைக் காரணமாகக் கூறி உங்களை நீங்களே தாழ்த்திக் கொள்ளாதீர்கள்.

நீங்கள் வராமல் இருப்பதற்கு நீங்கள் தற்போது வசிக்கும் நாட்டில் உள்ள வசதிகள், பாதுகாப்புகள், கட்டமைப்பு, அடிப்படை வசதிகள், சம்பளம், கல்வி என்று பல காரணங்களைக் கூறுங்கள் ஆனால், உங்கள் செயலை நியாயப்படுத்த இந்தியாவைக் குறை கூற வேண்டாம், அது நியாயமல்ல.

நீங்கள் குறை கூறும் நாட்டில் தான் உங்களைச் சார்ந்த ஏராளமானோர் இன்னமும் வாழ்ந்து கொண்டு இருக்கிறார்கள். அதில் உங்கள் குடும்பத்தினரே கூட இருக்கலாம்.

இது எப்படி என்றால் நாம் படிக்க, வளர, நமக்கு அனைத்தையும் கொடுத்த அம்மாக்கு வயதாகி விட்டது, நோய் வாய்ப்பட்டு விட்டார்கள் என்று கழட்டி விடுவது போலத்தான்.

சிங்கப்பூர் செய்த உதவி

முதன் முதலாகப் பயந்து கொண்டே சிங்கப்பூர் வந்து சந்தேகம் கேட்க ஒருவரைத் தேடி தெருவில் ஒரு தமிழர் இருப்பதைப் பார்த்து, கடவுளைப் பார்த்தது போல நினைத்த முதல் நாள் இன்னும் மறக்கவில்லை, எட்டு வருடங்கள் முடிந்து விட்டது.

வாழ்க்கையில் சில உதவிகளை மறக்க முடியாது. அதில் ஒன்று சிங்கப்பூர். நான் மட்டுமல்ல எங்கள் குடும்பமே சிங்கப்பூருக்கு நன்றி கடன் பட்டு இருக்கிறோம்.

நான் இங்கு வந்த போது பல்வேறு கடன் பிரச்சனைகளில் எங்கள் குடும்பம் இருந்தது.

ஒருவேளை எனக்கு வெளிநாடு வாய்ப்புக் கிடைக்காமல் இருந்து இருந்தால், என்னால் எங்கள் நிலையைக் கற்பனையும் செய்ய முடியவில்லை.

இப்பிரச்சனைகள் தீர சிங்கப்பூர் தான் உதவியது என்பதால், ஆயுசுக்கும் கடமைப்பட்டு இருக்கிறேன்.

எப்படி எனக்குப் பிடித்த இடங்களை விட்டுக் கொடுக்க மாட்டேனோ அந்த இடத்தில் சிங்கப்பூருக்கு மனப்பூர்வமான இடமுண்டு.

சிங்கப்பூர் இன்னும் பலரை வாழ வைக்க வேண்டும், பலருக்கு உதவ வேண்டும் என்று வேண்டிக் கொள்கிறேன்.

மாற்றம் / குறை

நான் 2007 ல் பார்த்த சிங்கப்பூருக்கும் தற்போதைய (2015) நிலைக்கும் பெரும் வித்தியாசம். கூட்டம் அதிகரித்து விட்டது, சுத்தம் குறைந்து விட்டது.

நடைபாதை போக்குவரத்து விதிகள் சரிவர மதிக்கப்படுவதில்லை.

குறிப்பாக அலுவலகங்கள் நிறைந்த முக்கியப்பகுதியான Robinson Rd / Cecil Street பகுதிகளில். லிட்டில் இந்தியா பகுதி தண்ணீர் தெளித்து விட்டாச்சு.

அடிக்கடி ஹாரன் சத்தம் கேட்கிறது, முன்பெல்லாம் இது போலக் கேட்டதே இல்லை. ஆங்காங்கே குப்பைகள் இருப்பதைக் காண முடிகிறது.

பொதுமக்களுக்குப் பொறுமை குறைந்து அவசரம் அதிகம் ஆனது போலத் தோன்றுகிறது.

சிங்கப்பூர் ஆங்கில நாளிதழ்களுக்கு இந்தியா மீது என்ன கோபமோ..! ஏதாவது சிக்கி விட்டால் அதைக் கட்டுரை கட்டுரையாக எழுதி நாறடித்து விடுகிறார்கள்.

ஏன் இது போல இந்தியாவை மட்டும் தொடர்ந்து குறிப்பிட்டு தாக்கி எழுதுகிறார்கள் என்று புரியவில்லை. பல சமயங்களில் எனக்கு ஆத்திரத்தை ஏற்படுத்தி இருக்கிறது.

தொடர்ச்சியாக இதைக் கவனித்தவர்கள் உணர்ந்து இருக்கலாம்.

Blog

2006 முதல் Blog எழுதி வந்தாலும் 2007 ல் சிங்கப்பூர் வந்து 2008 ல் இருந்து தான் அதிகம் எழுதி வருகிறேன். சிங்கப்பூர் பற்றி அதிகம் எழுதி இருக்கிறேன்.

சிங்கப்பூர் இல்லாமல் வேறு நாட்டில் இருந்தாலும் அந்த நாடு பற்றி எழுதி இருப்பேன்.

சிங்கப்பூர் வந்த பிறகே என்னால் நிறைய எழுத முடிந்தது. 2008 ல் எப்படி எழுதிக்கொண்டு இருந்தேனோ அதே ஆர்வத்தோடு தான் இன்று வரை எழுதுகிறேன்.

எப்போதாவது சலிப்புத் தட்டும் ஆனால், அவை சில நாட்கள் தான்.

சிங்கப்பூர் குறித்த பல செய்திகளை, பயனுள்ள தகவல்களை எழுதி இருக்கிறேன் என்பதில் எனக்குப் பெருமையுண்டு.

எனவே, எழுத்தைப் பொருத்தவரை எனக்கு நிறைவான ஒன்றே.

சிங்கப்பூர் பற்றி எழுதியதில் எனக்குப் பிடித்த சில கட்டுரைகள் பின்வருமாறு.

த்தா.. பயத்தை மட்டும் மூஞ்சில காட்டிடாதே!

சிங்கப்பூர் உணவகங்கள்

நவீன சிங்கப்பூரின் தந்தை திரு “லீ குவான் யூ” (என்னை கண்ணீர் விட வைத்த கட்டுரை)

சிங்கப்பூரும் கோயமுத்தூரும்

இந்த கேலாங் ரோடு எப்படி போகணும்?

சிங்கப்பூர் கலவரம் – தமிழக ஊடகங்களும் அரசியலும்

சிங்கப்பூர் மெக் டொனால்டும் என் தலைவலியும்!

சுவாரசியமான சிங்கப்பூர் Formula 1 Grand Prix 2010

சிங்கப்பூர் விவசாயம்!

சிங்கப்பூர் பற்றி தெரிந்து கொள்ளுங்கள்

என் முதல் வெளிநாட்டு (சிங்கப்பூர்) விமான பயண அனுபவம் !!!

சென்னை

தீபாவளி விடுமுறை முடிந்து சென்னையில் பணியில் சேர வேண்டும்.

சிங்கப்பூரில் நான் ஒரே ஆள் தான் இருப்பினும் அழுத்தம் குறைவு ஆனால், சென்னையில் உதவிக்குப் பலர் ஆனால், பணி அழுத்தம் அதிகம்.

எனவே பெரிய மாற்றம் தான். எப்படிப் போகிறது என்று பார்ப்போம்.

இனி தற்போது எழுதுவது போல என்னால் எழுத முடியாது, நேரமிருக்காது. எப்போதெல்லாம் நேரம் கிடைக்கிறதோ அப்போதெல்லாம் எழுத முயற்சிக்கிறேன். Image Credit

இந்த முறை சென்னையில் தலைவர் FDFS 🙂 . சென்னையில் FDFS க்கு இருந்து எட்டு வருடங்களாகி விட்டது. கடைசியாகப் பார்த்தது சிவாஜி FDFS. லிங்கா செம்ம பல்பாகி விட்டது. எனவே, தலைவர் கபாலியில் கலக்கி இருப்பார் என்று நம்புவோமாக.

இவ்வளவு வருடங்களாகச் சிங்கப்பூர் செய்திகள் / தகவல்கள் கூறிக் கொண்டு இருந்தேன், இனி தமிழக / சென்னை செய்திகள் போட்டுத் தாக்குவோம்!

Lets Begin! Get ready folks 😉 .

தொடர்ந்து ஆதரவு தரும் நண்பர்களுக்கு நன்றி! குறிப்பாகச் சிங்கப்பூர் மக்களுக்குச் சிறப்பு நன்றி!

Bye Bye சிங்கப்பூர் 🙂 .

பிற்சேர்க்கை – வணக்கம் சென்னை!

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).