நேர்மை / நேர்மறைக்கு என்ன தகுதி?

அடிக்கடி நேர்மறை எண்ணங்கள், அதனால் கிடைக்கும் பலன்கள் பற்றி எழுதி வருகிறேன் ஆனால், அதையொட்டி விமர்சனங்களும் வருகின்றன. Image Credit

முன்னரே கூறி இருந்தபடி அதற்கான விளக்கமே இது.

நேர்மறை எண்ணங்கள்

நேர்மறை எண்ணங்களால் கிடைத்த நன்மைகளைப் பலமுறை குறிப்பிட்டுள்ளேன். அதையொட்டி எழுதப்படும் கட்டுரைகளுக்கு வரவேற்பு உள்ளது.

கருத்துப்பகுதியில் அதை வெளிப்படுத்தவில்லையென்றாலும், தனிப்பட்ட முறையில் பேசும் போது பலர் குறிப்பிடுவது மகிழ்ச்சி.

கூகுளிலிருந்து தேடி படிக்க வருபவர்களே அதிகம்.

விமர்சனங்கள்

ஆனால், என்ன தான் நேர்மறை எண்ணங்களைப் பற்றிக் கூறினாலும், ஒவ்வொருவருக்குமுள்ள பல்வேறு புரிதல்களால் விமர்சனங்கள் இருக்கும்.

இத்தளத்தைப் படிக்கும் Fahim மற்றும் Alim இருவர் கூறிய விமர்சனங்களுக்குப் பதிலளிக்க விரும்புகிறேன்.

இன்னொருவரும், திமுக பற்றி விமர்சிக்கும் நீங்கள், நேர்மறை எண்ணங்களைப் பற்றிப் பேசலாமா? என்று ஓரிரு வருடங்களுக்கு முன்பு கேட்டு இருந்தார்.

என்ன கட்டுரை என்று மறந்து விட்டது ஆனால், சாராம்சம் மேற்கூறியது தான்.

Fahim : நேர்மறை எண்ணங்கள், கர்மா என்று அடிக்கடி பேசும் நீங்கள் அதற்கு மாற்றாகச் செயற்படுவது இப்போது நன்றாகத் தெரிகிறது.

Alim (facebook page): நீங்கள் நேர்மையற்றவர்.

இத்தளத்தை மேற்கூறியவர்கள் இன்னும் படிக்கிறார்களா என்று தெரியாது. ஒருவேளை படித்தால், அவர்களின் கேள்விகளுக்கான பதிலே பின்வருவன.

மத ரீதியான விமர்சனங்கள்

இந்து மதம் என்ற சனாதன மதத்தின் மீது அளவற்ற பற்றுக் கொண்டுள்ளேன். எனவே, அதற்கு எதிராக நடந்தால், பேசினால் எதிர்க்கருத்தை முன் வைப்பேன்.

என் மதத்தை விமர்சித்தால் வாதத்தை முன்வைக்கிறேன். நேர்மறையை பேசுபவர் எப்படி இது போல எழுதலாம் என்றால் என்ன செய்வது?

நான் சாதாரண மனிதன். அனைத்தையும் அமைதியாகக் கடந்து போகும், முற்றும் துறந்த யோகி அல்ல.

கோபம், வருத்தம், எரிச்சல், மனக்கசப்பு, சமூகக்கோபங்கள் என்று அனைத்துமே உள்ளது. அதை நாகரீகமான முறையில் வெளிப்படுத்துகிறேன்.

நேர்மறை, கர்மா பேசினால் இதெல்லாம் பேசக் கூடாது என்று எதிர்பார்த்தால், அதற்கான நபர் நான் அல்ல.

தனிப்பட்ட முறையில் யாரையும் விரோதியாகக் கருதுவதில்லை.

நேர்மையற்றவர்

முதலில் நேர்மையாக பேசுபவர் என்றால் யார்? அதற்கு என்ன விளக்கம்?

நேர்மையாக பேசுபவர் யார் என்றால், நமக்குப் பிடித்தமான, நமக்கு ஏற்புள்ள கருத்துகளைக் கூறுபவரை நேர்மையானவர் என்று கூறுகிறோம் அவ்வளவே.

அடுத்தவரிடம் எதிர்பார்க்கும் நியாயத் தர்மங்களை நம் விஷயத்தில் மறந்து விடுகிறோம்.

அடுத்தவர் அனைத்திலும் சரியாக இருக்க வேண்டும் ஆனால், நான் இருக்க மாட்டேன் என்பது என்ன மாதிரியான எண்ணம்?!

Alim கூறியது எந்த விதத்திலும் என்னைப் பாதிக்கவில்லை. காரணம், யாருடைய சான்றிதழையும் எதிர்பார்ப்பதில்லை.

எனவே, நேர்மையற்றவர், ஒரு சார்பாக எழுதுகிறீர்கள் என்று கூறும் போது அதை விமர்சனமாக எடுத்துக்கொள்கிறேன்.

எதையும் மறைக்கவில்லை

நடுநிலை பற்றி தெளிவாக விளக்கியும் கட்டுரை எழுதியுள்ளேன். எங்கேயுமே எதையும் மறைக்கவில்லை, அது எனக்குத் தேவைப்படவுமில்லை.

ஏற்கனவே, பல முறை கூறியது போல எழுதுவது Passion, இந்துமதம் என்ற சனாதன மதத்தின் பின் தொடர்வாளன், வலது சாரி ஆதரவாளன், ரஜினி ரசிகன் இதுவே நான்.

இதையொட்டியே என் கருத்துகளும் இருக்கும். கூறிய கருத்தில் விமர்சனம் இருந்தால், கேள்வி கேளுங்கள், நிச்சயம் பதிலளிப்பேன்.

எனவே, எதுக்கு இந்து மத, பாஜக, ரஜினி ஆதரவா எழுதறீங்க? என்று கேட்காமல், கூறியுள்ளதில் என்ன தவறோ, விமர்சனமோ அதை முன் வையுங்கள்.

அதை விடுத்து உங்கள் கருத்தை ஏற்க வேண்டும் என்று எதிர்பார்க்காதீர்கள்.

உங்களுக்கு ஒரு அரசியல், மத, ரசிக நிலைப்பாடு இருப்பது போல எனக்கும் உள்ளது.

திமுக எதிர்ப்பு

திமுகவை விமர்சிக்கும் போது நேர்மறை எண்ணங்கள் எங்கே சென்றது? என்று ஒருவர் கேட்டதுக்கும் மேற்கூறியதே பதில்.

இந்து மதம் என்ற சனாதன மதத்தை டெங்கு, கோவிட், மலேரியா, எய்ட்ஸ், தொழுநோய் என்று மிக மோசமாக விமர்சிக்கிறார்கள்.

இந்து மதத்தின் மீதுள்ள வெறுப்பில், HIV, தொழுநோயால் பாதிக்கப்பட்டு மனதளவிலும், உடலளவிலும் துன்பப்படுபவர்களையும் ராசா இழிவுபடுத்துகிறார்.

திமுக ஆதரவாளர்களுக்கு அவர்கள் ஆதரிக்கும் கட்சிக்காக அவர்கள் இழிவுபடுத்தும் அனைத்தையும் சகித்துச் செல்ல வேண்டிய நிலை.

என்னைப்போன்றவர்களுக்கு அப்படியிருக்க என்ன தேவை? எதற்கு இந்த அவமானத்தைக் கடந்து, சகித்துச் செல்ல வேண்டும்?!

மீம் பகிர்ந்தவரை இரவில் கைது செய்கிறார்கள் ஆனால், இந்து மதத்தை இவ்வளவு கேவலமாகப் பேசியுள்ளார்கள் ஆனால், FIR கூட இல்லை! இதையெல்லாம் கடந்து செல்லச் சொல்கிறீர்களா?

அரசியலிலும் இவர்கள் சொல்வது ஒன்று செய்வது ஒன்று.

எனவே, ஏராளமான அரசியல் விமர்சனங்களும் உள்ளன. தமிழக அடிமை ஊடகங்களால் தவறுகளை மறைத்து வருகிறார்கள்.

கேள்வி கேட்க முழு உரிமையுண்டு

நான் கூறியதில் தகவல் பிழை இருந்தால், கேள்வி கேளுங்கள், சுட்டிக்காட்டுங்கள் ஆனால், இதை எழுதக் கூடாது என்று கூற யாருக்கும் உரிமையில்லை.

இன்றுவரை இத்தளத்தில் கருத்து மட்டுறுத்தல் (moderation) கிடையாது.

திமுக எதிர்ப்புக் கட்டுரைகள், மோடி அரசின் நலத்திட்டங்கள், மத ரீதியான விமர்சனங்கள் தொடரவே செய்யும்.

சனாதன மதத்தை இழிவுபடுத்தும் திக, திமுக உட்பட அனைவரையும் தொடர்ந்து விமர்சிப்பேன், யாருக்காகவும் விட்டுக் கொடுக்க மாட்டேன்.

தனிப்பட்ட நபர்கள் அல்லது என் சார்ந்த தனிப்பட்ட செயல்களுக்கு மட்டுமே நேர்மறை எண்ணங்களைப் பின்பற்றுகிறேன், வைக்கப்படும் அரசியல், சமூக விமர்சனங்களுக்கு அல்ல.

எனவே, விருப்பமுள்ளவர்கள் தொடரலாம், மற்றவர்கள் புறக்கணிக்கலாம்.

நன்றி 🙏🏻

கொசுறு 1

இந்த விளக்கத்தைத் தனிக்கட்டுரையாகக் கொடுக்கக் காரணம், இதன் பிறகும் தொடர்ந்து நேர்மறை எண்ணங்களைப் பற்றிக் குறிப்பிடத்தான் போகிறேன்.

எனவே, அவ்வப்போது கேட்கப்படும் கேள்விகளுக்கு ஒவ்வொரு முறையும் விளக்கம் கொடுக்கச் சிரமமாக உள்ளதால் இக்கட்டுரை.

இனி எவரும் கேட்டால், இந்த லிங்க் கொடுத்து விடுவேன்.

நடுநிலை என்பது சாத்தியமா இல்லையா? கட்டுரை பல கேள்விகளுக்கு பதிலாக கொடுக்க எளிதாக இருப்பது போல, இக்கட்டுரையும் இருக்கும்.

கொசுறு 2

மேற்கூறியவை ஒரு பக்கம் என்றாலும், நேர்மறை எண்ணங்களால் நான் அடைந்த பலன்கள், நன்மைகள் ஏராளம். எனவே, எதிர்மறை எண்ணங்களைத் தவிர்த்து நேர்மறை எண்ணங்களைப் பின்பற்றுங்கள்.

நிச்சயம் உங்கள் தனிப்பட்ட வாழ்க்கையில் பல அற்புதங்களைக் காண்பீர்கள், எந்தச் சந்தேகமும் வேண்டாம்.

தொடர்புடைய கட்டுரைகள்

நேர்மறை எண்ணங்கள் என்றால் என்ன?

எண்ணம் போல் வாழ்க்கை என்றால் என்ன?

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.