மலையாளிகள் பேக்கரி

நிலாக்கு சென்றாலும் அங்கும் மலையாளிகள் டீக்கடை வைத்திருப்பார்கள் என்பது நகைச்சுவையாகக் கூறப்படும் கருத்து. தற்போது மலையாளிகள் பேக்கரி பக்கம் வந்துள்ளதை இக்கட்டுரை கூறுகிறது. Image Credit

மலையாளிகள் பேக்கரி

மற்ற மாநிலங்களில் எப்படி என்று தெரியவில்லை ஆனால், தமிழகத்தில் குறிப்பாகக் கொங்கு பகுதியில் மலையாளிகள் ஆதிக்கம் அதிகம்.

இதற்குக் கேரளா கொங்கு எல்லையாக இருப்பதும், தொழில் செய்யக் கொங்குப் பகுதி பிரச்சனை இல்லாததும் முக்கியக்காரணம்.

முன்பு எங்குப் பார்த்தாலும் இவர்களின் டீக்கடை இருக்கும். இங்கெல்லாம் எப்படிக் கடை திறந்தார்கள் என்று வியக்கும் அளவுக்குக் கடை வைத்திருப்பார்கள்.

தற்போது டீக்கடையிலிருந்து பேக்கரி மாடலுக்கு கொங்கு பகுதி மாறி வருகிறது. டீக்கடை + பேக்கரி இணைந்து இருப்பதை மக்கள் அதிகம் விரும்புகிறார்கள்.

டீக்கடையாக மட்டுமே இருந்த கடைகளும் தற்போது பேக்கரியாக மாறி வருகிறது. டீக்கடையாக மட்டுமே இருக்கும் கடைகளுக்கு ஆதரவு குறைந்து வருகிறது.

இவ்வாறு வைக்கப்படும் பேக்கரிகளில் பெரும்பாலும் (80%) மலையாளிகளே உள்ளனர்.

சென்னையில் இவ்வகைக் கடைகள் பிரபலமாகததற்குக் காரணம், கடையின் பரப்பளவு அதிகமாக இருப்பதால் வாடகை அதிமிருக்கும்.

தேர்வு செய்யப்படும் இடங்கள்

தமிழர்கள் இந்த விசயத்தில் மலையாளிகளிடம் பின்தங்கி இருக்கிறார்கள் என்று வருத்தம் இருந்தாலும், திறமை உள்ளவர் வெற்றி பெறுகிறார்கள்.

தமிழர்களால் முடியாததை மலையாளிகள் வெற்றிகரமாகச் செய்து வருகிறார்கள் என்பதைப் பிடிக்கவில்லையென்றாலும் ஏற்றுக்கொள்ளத்தான் வேண்டும்.

விடுமுறையில் ஊருக்குச்சென்றபோது பல சாலைகளில் பயணிக்கும் போது பார்க்கும் போதே நம்மை ஈர்க்கும் கடைகளாக இருக்கும்.

ஒவ்வொரு கடைக்குச் செல்லும் போதும் இது தமிழர் கடையாக இருக்க வேண்டும் என்று நினைத்துச் செல்வேன் ஆனால், பெரும்பாலும் ஏமாற்றமே கிடைக்கும்.

இவர்கள் தேர்வு செய்யும் இடம் வியப்பாக உள்ளது. மிகச்சரியான அனைவருக்கும் எளிதாக உள்ள இடங்களைத் தேர்வு செய்து கடை அமைக்கிறார்கள்.

கோபி கோயம்புத்தூர் பிரிவு அருகே ஒரு கடை வந்துள்ளது, கூட்டம் அள்ளுகிறது. எங்கே இருந்து அந்த இடத்துக்கு இவ்வளவு வருகிறார்கள் என்று புரியவில்லை.

கொளப்பலூரிலிருந்து திங்களூர் செல்லும் வழியில் இடதுபுறம் ஒரு கடை. இதுபோலக் குறிப்பிட ஏராளமான கடைகள் உள்ளன.

இவர்கள் தேர்வு செய்யும் ஒவ்வொரு இடத்தை வைத்தும் Phd யே செய்யலாம்.

நின்று கொண்டு காஃபி குடிப்பதை விட Relax ஆக அமர்ந்து குடிப்பது பிடிக்கும். எனவே, இயல்பாகவே பேக்கரி காஃபி கடைகள் விருப்பமானதாகி விட்டது.

காஃபி சுவை

நண்பர்களோடு சென்னையில் வசித்த போது நண்பர்கள் அனைவரும் டீ / காஃபி குடிக்கச் செல்வார்கள் இரவு 1.30 க்கு கூட ஆனால், நான் மட்டும் குடிக்க மாட்டேன்.

இவற்றில் ஆர்வமே இருந்ததில்லை.

தற்போது அலுவலகத்தில் BREAK க்காகச்சென்று காஃபி பழகி / பிடித்து விட்டது. குடிப்பதற்காக இல்லையென்றாலும் ஒரு BREAK க்கா செல்வது பழகி விட்டது.

தற்போது சுவையான காஃபியை தேடுவதே வழக்கமாகி விட்டது.

முன்பு நண்பர்கள் உடன் இருந்தார்கள் காஃபி குடிப்பதில் ஆர்வமில்லை, தற்போது காஃபி குடிப்பதில் ஆர்வமுள்ளது உடன் வர நண்பர்கள் இல்லை 🙂 .

‘கிரி! ஒரு டீ போடலாமா..!‘ என்று கேட்கும் விஜய் சென்னையில் இல்லை 🙂 .

காஃபியில் ஆர்வம் அதிகமாகி, ஒரு காஃபி ஷாப் எதிர்காலத்தில் வைக்க வேண்டும் என்ற விருப்பம் அதிகமாகி விட்டது.

ஒரு சுவையான காஃபி கடையைச் சிறிய அளவில் துவங்க வேண்டும் என்ற விருப்பம் மனதின் ஓரத்தில் இருந்துகொண்டே உள்ளது.

ஆனால், 70’s / 80s கிட்ஸ்களுக்கு விருப்பமும் அதற்கான முதலீடு இருந்தாலும் எதிர்காலக் குடும்பப் பொறுப்புகளைக் கடந்து ரிஸ்க் எடுப்பது எளிதல்ல.

தமிழர்கள் காஃபி

கவனித்ததில் மலையாளிகள் காஃபி சுவை ஒரே மாதிரியுள்ளது, தமிழர்கள் காஃபி சுவை வேறு மாதிரியுள்ளது. தொடர்ந்து மலையாளிகள் கடையில் குடித்ததாலோ என்னவோ சுவை அலுத்து விட்டது.

பல புதிய கடைகளை (காஃபி சுவையை) முயற்சிக்கிறேன் ஆனால், வெகு சில கடைகளைத் தவிரத் திருப்தியளிக்கவில்லை.

கடந்த கட்டுரையில் குறிப்பிட்டது போல Black Pekoe கடையில் சுவை நான் எதிர்பார்க்கும்படியுள்ளது. இக்கடை மலையாளிகள் கடையல்ல.

குறைந்தபட்சம் பணிபுரிபவர்கள் மலையாளிகள் அல்ல. பணிபுரிபவர்கள் மலையாளிகள் இல்லையென்றாலே கடை அவர்களுடையதாக இருக்காது.

காரணம், மலையாளிகள் பெரும்பாலும் மலையாளிகளையே பணி அமர்த்துவார்கள் குறைந்தபட்சம் ஒருவராவது இருப்பர். தமிழர்கள் கடையில் தமிழர்கள், மலையாளிகள், வடக்கத்தினர் பணியாளர்களாக இருப்பார்கள்.

என் காஃபி தேடல் தொடர்ந்து கொண்டே உள்ளது 🙂 . சுவாரசியமாகவும் உள்ளது.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).