ரஜினி கமல் அரசியல்

இடைத்தேர்தலில் காங்கிரசுக்கு ஆதரவு கொடுத்துத் திமுக கூட்டணியில் கமல் இணைந்ததது சர்ச்சையை ஏற்படுத்தியுள்ளது குறிப்பாக மாற்றாக நினைத்து வாக்களித்தவர்களுக்கு ஏமாற்றத்தை ஏற்படுத்தியுள்ளது. Image Credit

கமல்

ரஜினி கட்சி ஆரம்பிக்கப்போவதாக கூறிய பிறகு அதுவரை அரசியலில் ஆர்வமில்லை என்று கூறிக்கொண்டு இருந்த கமல், திடீரென்று கட்சியைத்துவங்கினார்.

ஆனால், கட்சி ஆரம்பிக்கப்போவதாக கூறிக்கொண்டு இருந்த ரஜினி தனது உடல்நிலை மற்றும் கோவிட் பிரச்சனை காரணமாக அரசியலிலிருந்து விலகுவதாக அறிவித்தது விமர்சனங்களை ஏற்படுத்தியது.

காரணம், ரஜினியும் அரசியலும் 90 களிலிருந்து பிரிக்க முடியாததாக இருந்தது. எனவே, நிச்சயம் கட்சி ஆரம்பிப்பார் என்று இருந்த நிலையில் ஆரம்பிக்கவில்லை என்று உறுதியாக அறிவித்து விட்டார்.

ரஜினி கட்சி ஆரம்பிப்பதாக கூறியதால் கமல் கட்சி ஆரம்பித்ததாக விமர்சனங்கள் எழுந்தன, இருப்பினும் அரசியல் மாற்றத்தை ஏற்படுத்த மய்யத்தை துவங்குவதாக கூறினார்.

டீ கேன்சல் என்று ரஜினி கூறி விட்டுப் பட வேலைகளைப் பார்க்கக் கிளம்பி விட்டார்.

மய்யத்தின் கட்டமைப்பு

கமல் கட்சிக்கு அமைப்பு ரீதியாக பலமில்லை என்றாலும், கமலின் முகத்துக்காக, திராவிட கட்சிகளுக்கு வாக்களிக்க விருப்பமில்லாதவர்கள் கமலுக்கு வாக்களித்தனர்.

எனக்குத் தெரிந்து பல ரஜினி ரசிகர்கள், என் குடும்பத்தினர் மற்றும் உறவினர்கள் கூடக் கமலுக்கு வாக்களித்து இருந்தனர்.

திமுக B Team என்று கமல் விமர்சிக்கப்பட்டாலும் (ஓட்டுகளைப் பிரித்ததால்), திமுக கூட்டணியில் இணையாததால் விமர்சனங்கள் இருந்தாலும் மய்யத்துக்கு மதிப்பு இருந்தது.

இடையில் பலர் கட்சி மாறினாலும், கமல் என்ற நபருக்காக அவர் கட்சி மீது மதிப்பு வைத்து இருந்தவர்கள் ஆதரவாக தொடர்ந்தனர் ஆனால், திமுக கூட்டணிக்கு அதிகாரப்பூர்வமாக மாறிய பிறகு வாக்களித்த பலரும் கோபத்தில் உள்ளனர்.

கோபத்துக்கு காரணம், தாங்கள் ஏமாற்றப்பட்டதாக உணர்வதால்.

கமலின் திராவிட கூட்டணி முடிவு

கமல் இது போல ஒரு முடிவை எடுப்பார் என்று பலரும் எதிர்பார்த்தது தான் என்றாலும், 2024 ல் நடக்கும் என்று எதிர்பார்த்தது முன்னரே நடந்து விட்டது.

தமிழக சட்டமன்றத் தேர்தல் 2021 | முடிவுக்குப் பின் கட்டுரையில் கமல் இரு முடிவுகளை மட்டுமே எடுக்க முடியும். எடுக்கவில்லையென்றால், இதே தான் தொடரும் என்று குறிப்பிட்டு இருந்தேன்.

கமல் திமுக ஆதரவு நிலையை எடுத்து விட்டார். இதற்கு உதயநிதியின் பட ஆதரவுகள் போன்ற வேறு காரணங்களும் இருக்கக்கூடும்.

MP பதவிக்காக இணைந்து விட்டீர்களா என்று செய்தியாளர்கள் கேட்ட போது ‘ஏன் இருக்கக் கூடாது?‘ என்று கேட்டு உண்மை காரணத்தைத் தெளிவுபடுத்தி விட்டார்.

MP பதவிக்காகவும், பட வியாபாரத்துக்காகவும் கட்சியைத் திமுக கூட்டணியிடம் அடகு வைத்து விட்டார்.

சிலர் ஆசைக்கும் தேவைக்கும் வாழ்வுக்கும் வசதிக்கும்
ஊரார் கால் பிடிப்பார்
ஒரு மானமில்லை அதில் ஈனமில்லை – அவர்
எப்போதும் வால் பிடிப்பார்

என்று ட்விட்டரில் எம்ஜிஆரின் பாடலை முன்னர் கமல் குறிப்பிட்டு இருந்தார் ஆனால், தற்போது அவர் கூறியதுக்கு அவரே எடுத்துக்காட்டாகி விட்டார்.

ஒருவேளை தற்போது தான் முழுமையான அரசியல்வாதியாகி இருக்கிறாரோ! 🙂 .

ரஜினி

ரஜினியின் ரசிகனான எனக்கு மற்ற எதிலும் எதிர்பார்ப்பு இல்லையாததால் ஏமாற்றமில்லை ஆனால், உண்மையாகவே ரஜினி வந்தால் மாற்றமிருக்கும் என்று உறுதியாக நம்பினேன்.

ஆனால், நடக்கவில்லை என்பது மிகப்பெரிய ஏமாற்றத்தை அளித்தது.

சுயமுன்னேற்ற புத்தகங்களில் அல்லது அது தொடர்பான புத்தகங்களில் No சொல்வது பற்றி ஒரு புத்தகம் உள்ளது.

அதாவது, நம்மால் முடியாத, சமாளிக்க முடியாத நிலை வரும் என்றால், No சொல்லிப்பழக வேண்டும் என்பது.

பலருக்கு பல விஷயங்களில் No சொல்லத்தெரியாது. எனவே, செய்கிறேன் என்று கூறி அவர்களை அவர்களே வருத்திக்கொள்வார்கள், பின்னர் புலம்புவார்கள்.

முடியாத ஒன்றை ஒப்புக்கொண்டு இவர்களே சிக்கலில் வாழ்வார்கள்.

ஆனால், No கூறினால், எவ்வளவு பெரிய விமர்சனங்கள் வரும் என்று தெரிந்தும் ரஜினி தைரியமாக No சொல்லி விட்டார்.

ரஜினி முடிவால் பலர் நிச்சயம் பாதிக்கப்பட்டு இருப்பார்கள்.

ரஜினி எதிர்ப்பாளர்கள்

இதன் பிறகு 2021, 2022 கால மாற்றம் இதை மெதுவாக மறக்க வைத்தாலும், அரசியலுக்கு வருகிறேன் என்று சொன்னதாலே அதிகமான எதிரிகள் இன்னமும் ரஜினியை அனைத்துக்கும் எதிர்த்துக்கொண்டு தான் உள்ளனர்.

சமீபத்தில் சிகரெட், சரக்கு, அசைவம் ஒரே நேரத்தில் அதிகம் எடுத்துக்கொள்வது ஆபத்தானது என்று கூறியதை, ரஜினி அசைவத்துக்கு எதிராக பேசினார் என்று பலர் அவர் பேசியதை கூட என்னவென்று பார்க்காமல் கொந்தளித்து வருகின்றனர்.

தலைவர் அரசியலுக்கு வரப்போவதாக கூறிய போது இது போன்ற சர்ச்சைகள் வந்தால், கடுப்பாக இருக்கும் ஆனால், தற்போது எந்தக்கவலையும் இல்லை 🙂 .

எவனோ எதையோ உளறிட்டுப் போறான் இதனால் நமக்கு என்ன?! என்று எந்தப் பதட்டமும் இல்லாமல் இருப்பது சுகமானதாக உள்ளது 🙂 .

அரசியலுக்கு வந்தாலும் சரி வரலைனாலும் சரி ரஜினியை எப்போதுமே Talk Of The Town ல் வைத்து இருக்க கடுமையாக உழைப்பது அவரது ஹேட்டர்கள் தான்.

வலது சாரி எண்ணங்கள்

நான் வலது சாரி / பாஜக ஆதரவாளன்.

ஒருவேளை ரஜினி அரசியலுக்கு வந்து இருந்தாலும், அவரது காலத்துக்குப் பிறகு கட்சி எப்படிப்போகும் என்று தெரியாது. அதற்கு சரியான நபராக அண்ணாமலையை தேர்வு செய்து வைத்து இருந்தார்.

ரஜினி கட்சி என்பது ரஜினிக்காக மட்டுமே!

எனவே, அவர் காலத்துக்குப் பிறகு வாக்களித்தவர்கள் தொடர்வது நிச்சயமில்லை. கட்சி தொடரும் என்பதற்கு உத்தரவாதமுமில்லை.

தற்போது அதே அண்ணாமலை பாஜகவில் இருப்பது இரண்டும் ஒன்று தானே! எனவே, நடந்தவை, நடப்பவை, நடக்கபோகிறவை அனைத்தும் நன்மைக்கே!

அண்ணாமலை

ஆக மொத்தத்தில் தலைவர் அரசியலுக்கு வரவில்லையென்றாலும், அவரை எந்த அளவுக்கு அரசியலில் நேர்மையாக இருப்பார் என்று எதிர்பார்த்தேனோ அதே அளவு அண்ணாமலை மீதும் நம்பிக்கையுள்ளது.

எனவே, தலைவர் வரவில்லையே என்ற ஏமாற்றம் இருந்தாலும், அதை ஈடு செய்யும் அளவுக்கு அண்ணாமலை வந்ததில் மகிழ்ச்சியே.

தமிழ்நாடு முன்னேற வேண்டும், வளர்ச்சியடைய வேண்டும், இந்துமதம் மதிக்கப்பட வேண்டும் என்பதே என் விருப்பம்.

எனவே, யார் மூலமாக நடந்தாலும் எனக்கு மகிழ்ச்சியே.

ஆக மொத்தத்தில் ரஜினியை வைத்து நினைத்தது நடக்கவில்லையென்றாலும், தமிழக அரசியலில் நான் எதிர்பார்ப்பது நடந்து வருவது மகிழ்ச்சியே! 🙂 .

தொடர்புடைய கட்டுரை

ரஜினியை விமர்சிக்கும் பாஜக ஆதரவாளர்கள்

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.