பழனி முருகன் கோவில்

வேண்டுதல் கிடையாது ஆனால், நீண்ட வருடங்களாகச் செல்ல நினைத்துத் தற்போது பழனி முருகன் கோவில் குடும்பத்துடன் சென்று வந்தேன். Image Credit

பழனி முருகன் கோவில்

பழனியை பற்றிக் கூற எனக்கு எப்போதும் எதிர்மறை செய்திகளே அதிகம் இருக்கும்.

தென் இந்தியாவின் இரண்டாவது அதிக வருமானமுள்ள கோவிலை வைத்துப் பழனியை எப்படியெல்லாமோ மாற்ற வழிகள் இருந்தும், வருமானத்தை அரசு எடுத்துக்கொண்டு கோவில் வளர்ச்சிக்குக் கிள்ளியே கொடுக்கிறது.

பல கோடி வருமானத்தை வைத்து எப்படியெல்லாம் கோவிலை அற்புதமாக மாற்றலாம், வசதிகளைப் பக்தர்களுக்குச் செய்து கொடுக்கலாம்.

கோவிலை மேம்படுத்தித் திருப்பதி போலத் தரமான வசதிகளுடன் பக்தர்களுக்கு வழங்கலாம் ஆனால், அது பற்றிய எந்த அக்கறையும் இல்லாமல் அரசுள்ளது.

அதே பராமரிப்பற்ற இடங்கள், பழைய முறையில் தொங்கி கொண்டு இருக்கும் கேபிள்கள், சுத்தம் செய்யப்படாத கழிவறைகள் என்று கூறவே சலிப்பாக உள்ளது.

வசதிகள், பராமரிப்பு இல்லையென்று மறுக்க முடியாது ஆனால், தரமானதாக இல்லை.

வரும் வருமானத்தை வைத்துப் பழனி நகரையே அற்புதமாக மாற்றலாம் ஆனால், அரசுக்கு மனமில்லையே. இதுபோலக் கூற ஏராளமான விஷயமுள்ளது ஆனால், இவற்றைப்பேசி என்ன ஆகப்போகிறது.

காவடி

கடந்த வாரம் பங்குனி உத்திரம் என்பதால், இன்னமும் காவடி எடுத்து வருகிறார்கள். இன்னமும் ஒரு மாதத்துக்குக் கூட்டம் இருக்கும் என்றார்கள்.

எதோ திருவிழா கூட்டம் போல அவ்வளவு மக்கள் வருகின்றனர். கோவிட் பிரச்சனை காரணமாக வர முடியாமல் இருந்து தற்போது அனைவரும் வருகிறார்களா என்று தெரியவில்லை.

மலையாளிகளுக்கும் பழனியில் சம்பந்தம் இருப்பதால், மொத்த கூட்டத்தில் 30 – 40% இவர்களே இருக்கிறார்கள்.

அழகென்ற சொல்லுக்கு முருகன்

‘அழகென்ற சொல்லுக்கு முருகா!‘ என்று TMS பாடியது பாடலுக்காக இல்லையென்பதை பழனி வந்தால் உணர்ந்து கொள்ளலாம்.

ஒவ்வொரு பருவ வயதிலும் உள்ள முருகனின் நிழற்படங்கள் வைத்துள்ளார்கள். அனைத்தையும் வாங்கிச் சுவற்றில் மாற்றிக்கொள்ளலாம் போல உள்ளது.

மிகைப்படுத்திக் கூறவில்லை, உண்மையாகவே அங்குள்ள படங்களைப் பார்க்கும் போது தோன்றியது.

ஃபோட்டோஷாஃப்பில் வண்ணமயமாகப் பல வடிவங்களில் முருகன் படங்கள் உள்ளது. அத்தனை நிழற்படங்களையும் வாங்க விருப்பம் என்றாலும் எங்கே மாட்டுவது?

எனவே, குழந்தை முருகனை சிவன் தூக்கி வைத்து இருந்த ஒரு அற்புதமான படத்தை மட்டும் வாங்கிக்கொண்டேன். அதன் வண்ணமும், இருவரின் மகிழ்ச்சியும், சிரிப்பும் பார்க்கும் அனைவருக்கும் நேர்மறை எண்ணங்களைக் கொடுக்கும். Image Credit

படத்தைப்பார்க்கும் போது மனம் புத்துணர்ச்சி, மலர்ச்சி அடையும் 🙂 . இப்படம் ஃபோட்டோஷாஃப்பில் இன்னும் அழகான வண்ணத்தில் மேம்படுத்தப்பட்டு இருந்தது.

திருவாவினன்குடி

பழனி செல்லும் பலரும் பல நூற்றாண்டுகள் பழைமை வாய்ந்த திருவாவினன்குடி என்ற முக்கியக் கோவிலைப் பார்க்காமலே சென்று விடுகின்றனர் ஆனால், செல்ல வேண்டிய கோவில்.

முருகனின் ஆறுபடை வீடுகளில், மூன்றாம் படை வீடாகத் திகழ்கின்றது. அகத்தியர் இங்குத் தவம் புரிந்து முருகனிடம் தமிழிலக்கணம் பயின்றதாகப் புராணங்கள் கூறுகின்றன.

பழனி முகப்பு அடிவாரத்திலிருந்து 10 நிமிட நடை பயணத்திலேயே உள்ள அழகான கோவில்.

இங்கே சென்ற போது காவடிக்குப் பறை இசையுடன் நொறுக்கித்தள்ளிக்கொண்டு இருந்தார்கள். எவ்வளவு நேரம் பார்த்தாலும் சலிக்காது.

அழகன் முருகன் நிழற்படங்கள், வெறித்தனமான காவடி ஆட்டம், சலிக்காத ஆர்ப்பரிக்கும் பக்தர் கூட்டத்தைப் பழனியில் கண்டால் முருகனுக்கு ரசிக(பக்த)ரல்லாதவர் கூட மனம் மாறி விடுவார்.

தற்போது பழனி சென்று வந்த பிறகு விருப்ப கடவுளான முருகன் மீது பல மடங்கு அன்பு அதிகரித்து விட்டது.

குறிப்பாக முருகனின் அழகு கண்டு வியந்து கொண்டே இருந்தேன். எந்த வடிவிலும் அற்புதமான அழகோடு உள்ளார். எத்தனை கடவுளுக்கு இது போல இவ்வளவு அழகான வடிவங்கள் இருக்கும்!

குழந்தை, பாலகன், சிறுவன், இளைஞன் என்று ஒவ்வொரு வயதிலும், காவி உடை, அலங்காரத்துடன் என்று எப்படிப்பார்த்தாலும் அற்புதமாக இருக்கிறார்.

கூறியதை நம்பாதவர்கள் பழனி சென்றால், அங்குக் கடைகளில் வைத்துள்ள அனைத்து வகை முருகன் நிழற்படங்களையும் பாருங்கள், ஏற்றுக்கொள்வீர்கள் 🙂 .

தொடர்புடைய விமர்சனங்கள்

தாரைத் தப்பட்டைகள் கிழிந்த தைப்பூசம் | சிங்கப்பூர்

சிங்கப்பூரை அதிரவைத்த தைப்பூசம்

அழகன் முருகன்

சஷ்டி விரதம் ஏன்? எதற்கு? எப்படி? விளக்கங்கள்

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).