கடவுள் தொடங்கிய இடம் | அகதிகளின் திகில் பயணம்

இலங்கை அகதிகள் எவ்வாறு நாடு விட்டு நாடு செல்கிறார்கள் என்பதைக் கடவுள் தொடங்கிய இடம் விவரிக்கிறது.

கடவுள் தொடங்கிய இடம்

விடுதலைப்புலி இயக்கத்தில் தன் மகன் சேரப்போவதாக உணர்ந்த பெற்றோர், மகன் நிஷாந்தை கனடாக்கு தரகர் மூலமாக அனுப்புகின்றனர்.

நிஷாந் கனடா போய்ச் சேர்ந்தானா இல்லையா என்பதே கடவுள் தொடங்கிய இடம்.

அகதிகள் எவ்வாறு ஒவ்வொரு நாட்டையும் கடக்கிறார்கள், அதில் உள்ள பிரச்சனைகள் என்ன?, தரகர்கள் பங்கு என்ன? எவ்வளவு நாட்கள் ஆகலாம்? நடைமுறை பிரச்சனைகள் என்ன? என்பன விரிவாகக் கூறப்பட்டுள்ளன.

கதை 1992 ம் ஆண்டுத் துவங்குகிறது.

ஆசிரியர் அ.முத்துலிங்கம்

ஆசிரியர் பற்றி நண்பர் யாசின் கூறித்தான் தெரியும்.

அடிக்கடி சிலாகித்துக் கூறிக்கொண்டே இருப்பார். அப்படி என்ன தான் எழுதி இருக்கிறார் என்று அவர் எழுதிய புத்தகங்களை பார்க்கலாம் என்று தேடிய போது கிடைத்த நாவலே கடவுள் தொடங்கிய இடம்.

இவர் ஈழத்தமிழர் & எழுத்து நடை முழுக்க ஈழத்தமிழில் உள்ளது.

இயக்கம் என்று தான் இந்நாவலில் கூறுகிறார், விடுதலைப்புலிகள் என்று கூறவில்லை. ஒருவேளை ஈழத்தில் இப்படிக் கூறுவது தான் இயல்போ!

ஈழ ஆங்கிலம்

சிங்கப்பூருக்கு, மலையாளிகளுக்கு ஒரு ஆங்கிலம் இருப்பது போல, ஈழ தமிழர்களுக்கும் ஒரு ஆங்கிலம் உள்ளது.

பெரும்பாலும் O எழுத்தில் துவங்குபவற்றை மலையாளிகள் போலவே உச்சரிக்கிறார்கள்.

இவை மட்டுமல்ல பல ஆங்கிலச் சொற்களும் சரியான உச்சரிப்பாக இல்லாமல் மாறுபட்டு உள்ளது.

ஒரு மொழியின் உச்சரிப்பை நம் விருப்பத்துக்கு ஏற்ப மாற்றக் கூடாது.

எடுத்துக்காட்டுக்கு Louis Philippe என்பது லூயிஸ் பிலிப்பி என்று உச்சரிக்கக் கூடாது மாறாக லூயி பிலிப் என்று கூற வேண்டும்.

இது தெரியாமல் லூயிஸ் பிலிப்பி என்று உச்சரித்துக்கொண்டு இருந்தேன்.

பல நாடுகளிலும் ஆங்கில உச்சரிப்பு பிரச்சனை இருக்கிறது என்றாலும், ஈழத்தமிழர்கள் ஆங்கிலம் முற்றிலும் வேறாக உள்ளது.

அகதிகள்

இலங்கை உள்நாட்டு போர் காரணமாக ஈழத்தமிழர்கள் மட்டுமல்ல, சிங்களர்களும் கூட வேறு நாடுகளுக்கு இடம் பெயர்ந்துள்ளார்கள்.

தங்கள் சொந்த நாட்டில் வாழ முடியாத நிலையில், வாழ முடியும் என்று தோன்றும் நாடுகளுக்கு அடைக்கலம் தேடி செல்பவர்களே அகதிகள் என்று அழைக்கப்படுகிறார்கள்.

இவ்வாறு செல்லும் நாடு அவர்களை ஏற்றுக்கொண்டால் பிரச்சனையில்லை ஆனால், அவர்கள் உள்நாட்டுப் பிரச்சனைகள் காரணமாக ஏற்றுக்கொள்ளவில்லையென்றால் சிக்கலாகி விடுகிறது.

ஈழத்தமிழர்கள் விரும்பும் நாடாகக் கனடா மற்றும் ஐரோப்பா உள்ளது.

அகதிகளால் என்ன பிரச்சனை?

அகதிகள் இன்னொரு நாட்டுக்குச் செல்லும் போது அமைதியாக, வாழ இடம் கிடைத்தால் போதும் என்று மனநிலையில் செல்கிறார்கள்.

ஆனால், பலர் சேர்ந்து எண்ணிக்கை அதிகரிக்கும் போது, அவர்கள் சொந்த நாட்டிலிருந்த உரிமைகளைக் கேட்டுப் போராடுகிறார்கள்.

சில நேரங்களில் உள்நாட்டு மக்களுக்கு எதிராகவே செயல்படுகிறார்கள்.

இது அந்நாட்டு சொந்த மக்களுக்குக் கோபத்தை வரவழைக்கிறது. இதுவே தற்போதைய பிரச்சனை.

ஐரோப்பா தற்போது இப்பிரச்னையில் தான் சிக்கியுள்ளது. எதிர்காலத்தில் சட்டம் ஒழுங்குப் பிரச்சனைக்கு இந்நாடுகள் செல்லும் என்பதில் சந்தேகமில்லை.

தரகர்கள்

இந்நாவல் அகதிகள் பிரச்சனைகளைக் குறிப்பாக இலங்கையிலிருந்து செல்பவர்கள் நிலையை மிகச்சிறப்பாக விளக்கியுள்ளது.

அகதிகள் எப்படிச் செல்கிறார்கள் என்று செய்திகளில் படித்துப் புரிந்தாலும், இதில் இவ்வளவு சிக்கல்கள் உள்ளதா?! என்று திகைக்க வைத்து விட்டது.

பிரச்சனைகளின் தீவிரத்தை பொறுத்து ஒரு நபர் நினைத்த நாட்டுக்குச் செல்ல 5 வருடங்கள் கூட ஆகிறது என்பது புதிய தகவல்.

தரகர்கள் ஒவ்வொரு நாட்டிலிருந்து அகதிகளைச் சமயம் பார்த்து அனுப்புகிறார்கள். இதிலும் ஏராளமான வழிமுறைகள் உள்ளன.

சில நேரங்களில் சரியான நாளுக்காக வருட கணக்கில் இன்னொரு நாட்டில் இருக்க வேண்டியது வரும் என்பது படிக்க வியப்பாக இருக்கலாம்.

போலி விவரங்களைத் தயார் செய்து அனுப்புகிறார்கள்.

அதுவரை அகதியாகச் சென்றவர் செலவுகளைச் சமாளிக்க குடும்பத்தினர் ஊரிலிருந்து நிலத்தை விற்றுப் பணம் அனுப்புகிறார்கள்.

இவ்வாறு தரகர்கள் அனுப்பும் போது அதிர்ஷ்டம் இருந்தால் மட்டுமே இன்னொரு நாட்டின் எல்லையைத் தாண்ட முடியும். இல்லையென்றால், இராணுவத்திடம் மாட்டிக்கொள்ள நேரிடும்.

அப்படி மாட்டினால் சிறை தான். மிக ஆபத்தான திகில் பயணமே.

இதில் ஒரு தரகர் தன்னிடம் உள்ள அகதிகளை வேறொரு தரகருக்கு மாற்றி விடுவது இயல்பாக நடக்கிறது. இதில் சம்பந்தப்பட்டவர் விருப்பம் எதுவுமில்லை.

சம்பவங்கள்

நாவலில் 50% வரை இதே தான் உள்ளது ஆனால், சலிப்பாக்காமல் நாவல் நகர்கிறது.

ஒரே மாதிரியாக உள்ளது என்று நினைக்க முடியாதபடி, அகதிகளிடையே நடைபெறும் பிரச்சனைகளை விவரிப்பதால், ஏதாவது ஒரு பரபரப்பு, எதிர்பார்ப்பு இருந்துகொண்டே உள்ளது.

இக்காலங்களில் இரக்கம், அன்பு, துரோகம், காதல், அதிர்ச்சி, நட்பு, கண்ணீர், ஏமாற்றம், பயம், சலிப்பு என்று அனைத்துமே இருக்கும்.

உயிர்களுக்குப் பசி, பயம், பாலுணர்வு உணர்ச்சிகள் தவிர்க்க முடியாது என்றும் ஆனால், விதிவிலக்குகள் உள்ளதாக ஒரு கதாப்பாத்திரம் கூறுவது சிறப்பு.

இந்நாவலில் சில சுவாரசியமான தகவல்களைக் குறித்து வைத்து அவற்றை எழுத வேண்டும் என்று நினைத்து இருந்தேன் ஆனால், இதுவே பெரிதாக வந்து விட்டது.

சுவாரசியமான பகுதிகளைப் படித்துத்தெரிந்து கொள்ளுங்கள்.

யார் படிக்கலாம்?

அனைவரையும் படிக்கப் பரிந்துரைக்கிறேன்.

அகதிகள் பற்றி ஒவ்வொருவருக்கும் மாற்றுக்கருத்துக்கள் இருக்கலாம் ஆனால், அவர்கள் எப்படியான பயணத்தை, வாழ்க்கை முறையை மேற்கொள்கிறார்கள் என்பதைத் தெரிந்து கொள்ள வேண்டும்.

சொந்த நாட்டிலிருந்து இன்னொரு நாட்டுக்குச் செல்ல என்னென்ன இடர்களை எதிர்கொள்கிறார்கள் என்பதை ஆசிரியர் மிக இயல்பாகக் கூறுகிறார்.

இந்நாவல் மூலம் ஏராளமான புதிய தகவல்களைத் தெரிந்து கொள்ள முடிந்தது.

இறுதியில் ஆசிரியர் நாவலை முடித்தது மட்டும் நிறைவை கொடுக்கவில்லை. நாவலே முடியும் நேரத்தில் இருட்டில் விட்டது போலாகி விட்டது 🙂 .

அமேசானில் வாங்க இங்கே செல்லலாம்.

கொசுறு

இவ்விமர்சனம் எழுதும் போது பழைய நினைவுகள் வந்தது 🙂 .

2008 ம் ஆண்டில் ஈழத்தமிழர்கள், அவர்கள் வாழ்க்கைமுறை பற்றித் தெரிந்து கொள்ளும் பொருட்டு கேள்விகளாக ஒரு கட்டுரை எழுதினேன்.

அப்போது தான் எழுத (Blog) வந்து இருந்தேன், எந்த முன் அனுபவமும் இல்லை. எனக்கு என்னென்ன சந்தேகங்கள் இருந்ததோ அவற்றைக் கேட்டு இருந்தேன்.

எதோ குழுமத்தில் லிங்க் பகிர்ந்து விட்டார்கள் போல, திமுதிமுன்னு ஏராளமானோர் வந்துட்டாங்க.

இதெல்லாம் கூடவா தெரியாது என்று ஈழத்தமிழர்கள் என்னைக் கொத்துக்கறி போட்டு விட்டனர் 😀 . அப்போது வலையுலகில் பரபரப்பான செய்தியாகி விட்டது.

எனக்குப் பரிந்து பேசியும் சில ஈழத்தமிழர்கள் வந்தனர்.

வடிவேல் ஒரு படத்துல ‘அப்படி என்ன கேட்டுட்டேன்னு என்னைத் துரத்துறாங்க‘ என்று ஒளிந்து கொண்டு பார்ப்பாரே! அது மாதிரி ஆகிட்டேன்.

அப்போதெல்லாம் ஈழம், இலங்கை பிரச்சனைகள், மக்கள் பற்றி எதுவுமே தெரியாது. ஒரு சராசரி தமிழ்நாட்டு தமிழனாகக் கேட்டு இருந்தேன்.

என்ன கோபத்துல இருந்தார்களோ போட்டுப் பொளந்துட்டாங்க 🙂 .

அதன் பிறகு ஈழம் தொடர்பாக நிறைய எழுதி இருந்தாலும், இக்கட்டுரை மட்டும் என் எழுத்து வாழ்க்கையில் மறக்க முடியாததாகி விட்டது.

அக்கட்டுரையை Private செய்து விட்டேன் 🙂 .

தொடர்புடைய கட்டுரைகள்

ஐரோப்பாவைத் திணறடிக்கும் அகதிகள் பிரச்சனை [FAQ]

Comrade in America (2017 – மலையாளம்)

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).