பாஸ்போர்ட் எளிதாகப் பெறுவது எப்படி?

புதிய பாஸ்போர்ட் பெறுவது, புதுப்பிப்பதை மத்திய அரசு எளிதாக்கியுள்ளது, முன்பு போல நெருக்கடிகள் இல்லை. இக்கட்டுரையில் எளிதாகப் பாஸ்போர்ட்டை பெறுவது / புதுப்பிப்பது எப்படி என்று பார்ப்போம். Image Credit

பாஸ்போர்ட்

• https://passportindia.gov.in/ இணையதளத்தில் பயனர் கணக்கு உருவாக்கிக்கொள்ளுங்கள்.
• உள்ளே நுழைந்தவுடன் Apply for Fresh Passport/Re-issue of Passport தேர்வு செய்து, இணைய வழியில் விண்ணப்பிக்கும் வழியைத் தேர்ந்தெடுக்கவும்.
• Fresh Passport / Re-issue of Passport, Normal / Tatkaal என்று தேவைக்குத் தகுந்தபடி தேர்வு செய்து அது தொடர்பான Option களுக்கு பதில் அளிக்கவும்.
• விவரங்களைப் பொறுமையாக, ஒருமுறைக்கு இரு முறை கவனித்து உள்ளீடு செய்யவும். தவறான விவரங்கள் சிக்கலில் விட்டு விடும்.
• நான் பாஸ்போர்ட் புதுப்பிக்கத் தேர்வு செய்தேன்.

இதுவரை செய்ததை இறுதியில் மறக்காமல் சேமித்துக்கொள்ளுங்கள்.

கட்டணம்

கட்டணம் செலுத்தும் முறையில் Credit Card / Debit Card / UPI வசதிகளில் தேவையானதை தேர்வு செய்துகொள்ளலாம்.

என் பரிந்துரை UPI. இதற்குக் கூடுதல் கட்டணம் இல்லை.

ஆனால், பணம் செலுத்தும் போது Error வந்து தடைபட்டு விடுகிறது. விசாரித்ததில் பலருக்கு இது போல நேர்ந்தது என்று தெரியவந்தது.

முன்பு பதிந்தவற்றைச் சேமித்து இருப்பதால் பயமில்லை.

View Saved/Submitted Applications –> Select Application –> Payment and Appointment –> Track Payment Status சென்று Cancel செய்தால் மட்டுமே திரும்பப் பணம் செலுத்த முடியும்.

டிஜிட்டல் இந்தியா என்று இந்தியா வளர்ந்தாலும், பணம் செலுத்தும் பகுதி மட்டும் எப்போதும், எங்கும் திகில் பட அனுபவம் போலவே உள்ளது 🙂 .

SMS அனுப்ப ₹50 செலுத்தும்படி இருக்கும், தேவைப்பட்டால் தேர்வு செய்யலாம் (Optional) ஆனால், அவசியமில்லை.

செலுத்த வேண்டிய கட்டணம் ₹1500.

பாஸ்போர்ட் அலுவலக இடத்தை / நேரத்தை நாமே தேர்வு செய்யலாம்.

அருகேயுள்ள கடற்கரை ரயில்நிலையம் பாஸ்போர்ட் அலுவலகத்தைத் தேர்வு செய்ய முடிந்தது ஆனால், நேரத்தைத் தேர்வு செய்ய முடியவில்லை.

பாஸ்போர்ட் அலுவலகம்

TCS மேற்பார்வையில் பாஸ்போர்ட் அலுவலகங்கள் மிகச்சிறப்பாக உள்ளது என்று பலரும் கூறியதால், பலவித கற்பனைகளோடு சென்றால், 20 X 20 க்கு அறையில் இரண்டே அலுவலர்கள் மட்டுமே இருந்தனர்.

அதோடு அலுவலகமும் பழைய காலத்தைப் பிரதிபலிப்பதாக இருந்தது.

அங்கே ஒரு பெண்ணும், ஒரு பெரியவரும் மட்டுமே இருந்தார்கள். இருவரும் சிறப்பான சேவையைக் வழங்கினார்கள்.

பெரியவர் வழக்கமான அரசு அலுவரை போலக் கடுமையாக நடந்து கொள்வாரோ என்று நினைத்ததற்கு மாறாக மிக மரியாதையுடன், பொறுப்புடன் பேசினார்.

பின்னர் தெரிய வந்தது அலுவலகம் TCS மேற்பார்வையில் இல்லை, இவர்களும் TCS ஊழியர்கள் அல்ல, தபால் அலுவலக ஊழியர்கள் என்று.

சேவை சிறப்பாக இருந்தாலும் அலுவலகத்தை மேம்படுத்திப் புதுப்பிக்க வேண்டிய நிலையில் உள்ளது. வெளியுறவுத்துறை இதைக்கருத்தில் கொள்ள வேண்டும்.

வடபழனி, தாம்பரம் பாஸ்போர்ட் அலுவலகம் சிறப்பாக இருந்ததாகவும், ஏராளமானோரை கையாள்கிறார்கள் என்றும் நண்பர்கள் கூறினார்கள்.

கொண்டு செல்ல வேண்டியவை

• புதுப்பிப்பதாக இருந்தால், பழைய பாஸ்போர்ட்.
• ஆதார் ஒரிஜினல் மட்டும் போதும் என்று நினைத்து இருந்தேன் ஆனால், பான், வாக்காளர் எண்களை விண்ணப்பத்தில் குறிப்பிட்டு இருந்ததால் ஒரிஜினல் கேட்டார்கள்.
• DigiLocker வைத்து இருந்தால், அதில் இருந்தே பான் அட்டை காண்பிக்க முடியும்.
• நிழற்படம் (Photo) கேட்டார்கள் (அவர்களாக கொடுத்த ஒரு விண்ணப்பத்தில் ஒட்ட) ஆனால், மற்ற இடங்களில் கேட்கவில்லையென்றார்கள்.
• ஆதார் முழு விவரங்களும் ஒரே பக்கத்தில் வருவது போல ஜெராக்ஸ். அதே போலப் பழைய பாஸ்போர்ட் முதல் கடைசி அட்டை விவரங்கள் ஒரே பக்கத்தில்.

அன்று தான் DigiLocker முக்கியத்துவத்தை உணர்ந்தேன்.

ECNR க்கு கல்லூரி விவரங்களைக் கேட்கவில்லை. பாஸ்போர்ட் புதுப்பிப்பு என்பதால், ஏற்கனவே கொடுத்து இருந்ததையே எடுத்துக்கொண்டார்கள்.

ஆதார் Finger Print Lock செய்து வைத்து இருந்ததை, கைரேகைக்காக Unlock செய்தேன்.

எதிர்காலத்தில் அனைத்து அடையாள அட்டைகளும் இணைக்கப்பட்டு ஆதார் மட்டும் போதும் என்ற நிலை நிச்சயம் வரும். இப்போதே ஆதார் மட்டும் போதுமானது ஆனாலும், இது போலக் கேட்கிறார்கள்.

DigiLocker ல் வாக்காளர் அடையாள எண்ணும் இணைக்கப்பட்டு விட்டால், ஒரிஜினல் அனைத்தும் DigiLocker லேயே வந்து விடும்.

மேற்கூறிய விவரங்களைக் கேட்பது இடத்துக்கு இடம் மாறுபடுகிறது.

Digital Camera ல் நிழற்படம் எடுக்கிறார்கள். எடுத்த பிறகு சரியாக உள்ளதா? என்று கேட்கிறார். சரியில்லை என்றால், திரும்ப முயற்சிக்கலாம்.

அனைத்தும் முடிந்ததும், கிளம்பி விடலாம்.

இதன் பிறகு பாஸ்போர்ட் இணையதளத்தில் (Track Application Status) தற்போதைய நிலையைத் தெரிந்து கொள்ளலாம்.

காவல்துறை சோதனை

பாஸ்போர்ட் அலுவலகத்தில் வேலை முடிந்த பிறகு காவல்துறை சோதனை தான்.

வழக்கமாகக் காவல்துறை சோதனையின் போது அறிவிக்கப்படாத சட்டம், காவலருக்கு ₹200 / ₹300 பணம் கொடுக்க வேண்டும் என்பது.

கொடுக்கவில்லையென்றால், வேண்டும் என்றே தாமதப்படுத்துகிறார்கள், பிரச்சனை செய்கிறார்கள் என்ற குற்றச்சாட்டுண்டு.

நண்பர்களிடையே விசாரித்த போது பலர் கொடுக்கவில்லை என்றார்கள். வீட்டுக்கு வந்தால் கொடுக்க வேண்டியதில்லை ஆனால், அதே காவல்நிலையம் சென்றால் வாங்கி விடுவார்கள் என்றார்கள்.

15 நாட்களுக்குப் பிறகு தொலைபேசியில் அழைத்த காவலர், முகவரியை உறுதி செய்துகொண்டு வீட்டுக்கே வந்தார்.

ஆதார் கேட்ட போது DigiLocker வழியாக ஆதார் காட்டினேன், தயங்கினார். பின்னர் இதுவும் அதிகாரபூர்வ அட்டை தான் என்றேன், தெரியும் என்றார்.

எத்தனை வருடங்களாக இங்கே வசிக்கிறீர்கள்? என்ற வழக்கமான கேள்விகளுடன் (முகவரி மாற்றம் கேட்டு இருந்தேன்) விசாரித்துச் சென்று விட்டார்.

அட! என்று வியப்பாக இருந்தது. பணம் கொடுக்க வேண்டிய நெருக்கடியை எனக்கு ஏற்படுத்தாதற்கு மனதினுள் நன்றி தெரிவித்துக்கொண்டேன்.

காவலர் வந்தமா, வேலையை முடித்தமா, போனோமா என்று இருந்தார்.

ஸ்பீட் போஸ்ட்

இரண்டு நாட்கள் கழித்து மின்னஞ்சலும், குறுந்தகவலும் வந்தது. பாஸ்போர்ட் தள ஸ்டேட்டஸில் Passport Dispatched என்று இருந்தது.

அடுத்த நாளே ஸ்பீட் போஸ்ட் வழியாக பாஸ்போர்ட் கொடுத்து விட்டார்கள். விண்ணப்பித்த நாளிலிருந்து 20 நாட்களில் பாஸ்போர்ட் கைக்கு வந்தது.

காவல்துறை எவ்வளவு விரைவாக உறுதிப்படுத்துகிறார்கள் என்பதைப் பொறுத்து சில நாட்கள் முன்னே பின்னே இருக்கலாம்.

பாஸ்போர்ட்டில் நிழற்படம் மங்கலாக இருந்தது. எனக்கு மட்டுமே தானோ என்று நண்பர்களிடம் விசாரித்ததில் அவர்களும் இதையே கூறினார்கள்.

வெளிநாட்டு சுங்க சோதனையில் உள்ளவர்களுக்கு கடுப்பாகவே இருக்கும்.

இந்தியா எவ்வளவு தான் முன்னேறினாலும் இது போன்ற விஷயங்களில் மேம்படுத்த வேண்டியது எவ்வளவோ உள்ளது என்பதை உணர்த்துகிறது.

சிறு குறைகள் இருந்தாலும், கடந்த காலங்களை ஒப்பிடும் போது பாஸ்போர்ட் விண்ணப்பிப்பது மிகப்பெரியளவில் எளிமையாக்கப்பட்டுள்ளது.

கொசுறு

பாஸ்போர்ட் விண்ணப்பிப்பதற்கு எங்கும் யாருக்கும் பணம் கொடுத்துச் சேவை பெற வேண்டாம். யாருடைய உதவியுமின்றி எளிதாக நாமே விண்ணப்பிக்கலாம்.

இக்கட்டுரை படித்தால், விண்ணப்பிக்கும் போது ஏற்படும் சிறு சந்தேகங்களும் வராது.

தொடர்புடைய கட்டுரைகள்

DigiLocker | அரசு சேவைகள் உங்கள் கைகளில்

ஆதார் கை ரேகையைப் பாதுகாப்பது எப்படி?