வாணியம்பாடி தோல் தொழிற்சாலை

ஏலகிரி செல்லும் வழியில் நண்பன் பங்குதாரராக உள்ள வாணியம்பாடி தோல் தொழிற்சாலை நிறுவனத்தைக் காணும் வாய்ப்புக் கிடைத்தது.

நான் கோவை, கோபி பகுதியைச் சேர்ந்தவன் என்பதால், பெரும்பாலான பயணங்கள் விழுப்புரம், சேலம், கோபி, கோவை என்றே முடிந்து விடும்.

ரொம்ப வருடங்களுக்கு முன்பு இப்பகுதிக்கு வந்துள்ளேன் ஆனால், நினைவில்லை.

கடந்த இடைத்தேர்தலில் முஸ்லீம் வாக்குகள் இங்கு அதிகம் என்று பேசப்பட்ட போது ‘ஓ! அப்படியா’ என்ற அளவிலேயே என் புரிதல் இருந்தது.

இந்த முறை ஆற்காடு, ஆம்பூர், வாணியம்பாடி சென்ற பிறகு தான் முஸ்லீம் மக்கள் எவ்வளவு பேர் இங்கே இருக்கிறார்கள் என்பதே எனக்குத் தெரிந்தது.

எங்கே பார்த்தாலும் இம்மக்களே! இவ்வளோ பேரை ஒரே சமயத்தில் இங்கே தான் பார்க்கிறேன் 🙂 .

ஆற்காடு நவாப் காலகட்டத்தில் இருந்தே இவர்களின் எண்ணிக்கை அதிகம் என்று கூறினார்கள்.

வட மாநிலத்தில் நிறைய இடங்கள் சுற்றுப்பயணம் செய்ய வேண்டும் என்பது என்னுடைய பல கால விருப்பம் ஆனால், தமிழ்நாட்டுக்குளேயே நிறைய இடங்கள் செல்ல வேண்டியது உள்ளது போல இருக்கு.

வாணியம்பாடி தோல் தொழிற்சாலைகள்

இப்பகுதி முழுக்கவே தோல் தொழிற்சாலைகள் தான்.

சென்னை கிண்டி தொழிற்பேட்டைக்குச் சென்றால், எப்படிச் சிறு சிறு அளவில் தொழிற்சாலைகளைக் காண முடியுமோ அதுபோல ஏராளமாக இருந்தது.

தோல் தொழிற்சாலை என்றாலே அதனுடைய கழிவு நீர் பற்றி அறியாமல் இருக்க முடியாது காரணம், தோல் பணிக்கான நீர் தேவை என்பது அதிகம். அதுபோல அவை வெளியேற்றும் நீர் கழிவுகளும் அதிகம். இவை சுற்றுப்புற சூழ்நிலையில் பாதிப்பை ஏற்படுத்துபவை.

தற்போது இக்கழிவுகள் அனைத்துத் தொழிற்சாலைகளில் இருந்தும் ஒரே குழாய் வழியாகக் கொண்டு செல்லப்பட்டுச் சுத்திகரிக்கப்பட்டு வெளியேற்றப்படுகிறது.

முன்பை விடத் தற்போது இதில் கட்டுப்பாடுகள் அதிகம் உள்ளதாகக் கூறினார்கள்.

ஏராளமான சிறு தொழிற்சாலைகளை இங்கே காண முடிந்தது. இதில் பல நிறுவனங்கள் GST வருகையால் பாதிக்கப்பட்டுள்ளன.

30 நிமிடங்கள் மட்டுமே அங்கே இருந்ததால், அதிகம் விசாரிக்க முடியவில்லை. வெளியே வந்த பிறகே விரிவாக விசாரித்து இருக்கலாம் என்று தோன்றியது.

ஏலகிரி செல்லும் மனநிலையில் இருந்ததால், இங்குத் திடீர் என்று வந்த திட்ட மாறுதலால், நான் மனதளவில் தயாராகவில்லை. முன்னரே திட்டமிட்டு இருந்தால், இதற்குத் தகுந்த மனநிலையோடு வந்து பல விவரங்களைச் சேகரித்து இருப்பேன்.

இந்த இயந்திரம் உற்பத்தி செய்யப்பட்டத் தோலை ‘stretch’ செய்ய உதவுகிறது.

தோலுக்குச் சாயம் அடிப்பதையும், சாய வேலை முடிக்கப்பட்ட தோல் வெளியே வரும் காணொளிகளையும் இணைத்துள்ளேன். இதன் பிறகு பல்வேறு நிலைகளைக் கடந்தே நமக்கு இவை Bag, Shoe மற்றும் பல்வேறு பொருட்களாகப் பயன்பாட்டுக்கு வருகிறது.

இரு நிலைகளை மட்டுமே காணொளிகளாக இணைத்துள்ளேன். தோல் எப்படியோ போய் நமக்கு எப்படியோ வருகிறது 🙂 . இதன் பின்னணி உழைப்பு அபரிமிதமானது.

தொடர்புடைய கட்டுரைகள்

‘ஏலகிரி’ பயணப் பரிந்துரைகள்

‘ஜலகாம்பாறை’ நீர்வீழ்ச்சி

🛑 To get Blog Article, Finance, UPI, OTT, Tech News follow -–> giriblog WhatsApp Channel (WhatsApp Blog ⭐).