முதல் அமேசான் இ-புத்தகம்

அமேசானில் Kindle வாங்கிய பிறகு பல புத்தகங்களைப் படிக்க முடிந்தது. இன்னொன்று, பல வருடங்களாகக் காரணமே தெரியாமல் தள்ளிப்போட்டுக்கொண்டு இருந்த அமேசான் இ-புத்தகம் வெளியிடுவது மூன்றே வாரங்களில் நடந்தது 🙂 .

கடந்த இரு வாரங்களாகப் பல்வேறு இணையத் தளங்கள், YouTube காணொளிகள் பார்த்து, படித்து எப்படிப் புத்தகம் வெளியிடுவது என்று கற்றுக்கொண்டேன்.

இ-புத்தகம் வெளியிட மாமல்லன் எழுதிய ‘அமேசானில் இ-புத்தகம் வெளியிடுவது எப்படி’ புத்தகமும், அருண் சாரதி YouTube காணொளிகளும் உதவியாக இருந்தது,

அருண் சாரதி YouTube Link 

என்னுடைய பல்வேறு சந்தேகங்களை இவர்களின் விளக்கங்களே தீர்த்து வைத்தன. நான் வேறு யாரிடமும் உதவி கேட்காமல் இவற்றை வைத்தே வெளியிட்டு விட வேண்டும் என்று உறுதியாக இருந்தேன், அதே நடைபெற்றதில் மகிழ்ச்சி 🙂 .

பல வருடங்களாக எழுதும் எல்லோருமே கிட்டத்தட்ட புத்தகம் வெளியிட்டு விட்டார்கள் ஆனால், எனக்கு ஏனோ ஆர்வமே இல்லை அல்லது நான் நினைத்தபடி வெளியிட இதுபோலச் சந்தர்ப்பம் அமையவில்லை.

என்னிடம் உள்ள கெட்ட பழக்கம், எனக்குத் திருப்தியாகும் வரை எதையும் நான் ஆரம்பிக்க மாட்டேன். எதிலுமே ஒரு ‘Perfection’ இருக்க வேண்டும் என்று நினைப்பேன். ஏனோ தானோவென்று செய்ய என்னால் முடியாது.

சிறு வயதில் இருந்தே அப்படியே பழகி விட்டது, மாற்றிக்கொள்ள முடியவில்லை.

தலைவர்

புத்தகம் வெளியிடத் தீர்மானித்த பிறகு, எனக்கு மிகவும் பிடித்த, நான் ரசிக்கும், பல நல்ல எண்ணங்களை என்னுள் விதைத்த, பல அனுபவங்களை எனக்குக் கொடுத்த ரஜினி பற்றி நான் எழுதிய கட்டுரையையே வெளியிடலாம் என்று முடிவு செய்தேன்.

‘தளபதி நினைவுகள்’ கட்டுரையையே வெளியிடலாம் என்று முடிவு செய்தேன்.

இதற்காகக் கூடுதல் தகவல்களை அதாவது நான் கட்டுரையில் எழுத மறந்த தகவல்கள், நண்பர்கள் கூறியவை ஆகியவற்றைச் சேர்த்து தயார் ஆகி விட்டேன்.

வெளியிடலாம் என்று தீர்மானத்துக்கு வந்து வெளியிடத் தயாரான நிலையில்,

நண்பர் தேவ் ‘கிரி! ஒரு கட்டுரையாகப் போடாதீங்க. இன்னும் சில தலைவர் கட்டுரைகளைச் சேர்த்து போடுங்க அப்பத்தான் நல்லா இருக்கும். செய்வன திருந்தச் செய்ங்க‘ என்றார்.

உண்மையில் இதே சில வருடங்களுக்கு இச்சம்பவம் நடைபெற்று இருந்தால், நான் இவர் கூறியதை கேட்காமல் புறக்கணித்துப் பிடிவாதமாக நான் நினைத்ததையே செய்து இருப்பேன் ஆனால், தற்போது கொஞ்சம் நிதானம் வந்துள்ளது.

இவர் கூறியதும் நியாயமாகத் தோன்றியதால், எனக்கு மிகவும் பிடித்த கட்டுரைகளைப் புதுப்பித்து, பிழை திருத்தம் செய்து, புதிய தகவல்களைச் சேர்த்தேன்.

எல்லாமே பழைய கட்டுரைகளாக இருந்தால், புதிதாகப் படிப்பவர்களுக்குச் சுவாரசியமாக இருக்கலாம் ஆனால், ஏற்கனவே என் தளத்தில் படித்தவர்களுக்குச் சுவாரசியத்தைத் தராது.

ஓடிக்கொண்டே இருக்கும் குதிரை

எனவே, சிலவற்றை திருத்தியும், தளத்தில் வெளியிடாத, ஒரு கட்டுரையைப் புதிதாக சேர்த்தும் இருக்கிறேன் 🙂 . தலைப்பு ‘ஓடிக்கொண்டே இருக்கும் குதிரை‘ .

அமேசான் இ-புத்தகம் வெளியிடும் முயற்சியில் பல புதிய தொழில்நுட்பங்களைக் கற்றுக்கொண்டேன்.

இதில் உள்ள அட்டைப்படம் எவரின் உதவியும் இல்லாமல் நானே செய்தது. இதை எளிதாகச் செய்பவர்களுக்குப் பெரிய விஷயமில்லை. முதல் முறையாக முயன்று இதைச் செய்வது என்னைப் பொறுத்தவரை எனக்குச் சாதனையாக உள்ளது 🙂 .

மிகைப்படுத்தப்பட்டதாகத் தோன்றலாம், என் நிலையில் இருந்து யோசித்தால் அப்படித் தோன்றாது.

இணையத்தில் இலவசமாகப் பல தளங்கள் இதைச் செய்ய உள்ளன. இவையெல்லாம் இருக்கிறது என்பதே எனக்கு இப்பத்தான் தெரியும். இது நாள் வரை எனக்குத் தேவை வரவில்லை. எனவே, இவ்வசதிகள் பற்றி அறிந்திருக்கவில்லை.

இலவசமாக வெளியிடவே நினைத்தேன் ஆனால், அமேசான் அனுமதிக்கவில்லை. குறைந்தபட்ச விலை ₹49 கட்டாயம். ஏனென்றால், அவர்களுக்கு இது வியாபாரம்.

Kindle Unlimited போன்ற அமேசான் வசதிகள் மூலம் இலவசமாகவும் படிக்கலாம். ₹49 விலை குறைவு என்பதால், வாங்க நினைப்பவர்களுக்குச் சுமையில்லை.

அமேசானில் வாங்க –> தலைவர் ரஜினி Link

இந்தச் சுட்டி Amazon.in க்கு உண்டானது, மற்ற நாடுகளிலும் கிடைக்கும்.

பல்வேறு கட்டுரைகளை ஒருங்கிணைத்து இ-புத்தகம் வெளியிடும் திட்டமுள்ளது. இணையம் இருக்கும் வரை என் புத்தகங்கள் சுற்றிக்கொண்டு இருக்கும்.

எனக்கு எழுதுவது ரொம்ப விருப்பம். எனவே, Blog க்கு அப்புறம் பெரிய மாற்றமாக அமேசான் இ-புத்தகம் எனக்கு மிகப்பெரிய திருப்தியை அளித்துள்ளது.

எதிர்காலம் E-Book என்பதால், இதில் கவனம் செலுத்த வேண்டும் என்று தீர்மானித்து இருக்கிறேன், பார்ப்போம் எப்படிப் போகிறது என்று.

என் எழுத்தார்வம் தொடர்ந்து நான் எழுத உறுதுணையாக இருந்தாலும், படிக்கும் உங்களின் ஆதரவும் உற்சாகமும் நான் தொடர மிக முக்கியக் காரணம்.

இதுவரை என்னை உற்சாகப்படுத்தி வரும் அனைத்து நண்பர்களுக்கும் நன்றி 🙂 .

என் முதல் புத்தகம் ரஜினியை ரசிப்பவர்களுக்குச் சமர்ப்பணம்.

Read : அமேசான் Kindle ஏன் வாங்க வேண்டும்?!

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).