திரையரங்கு உரிமையாளர்கள் Vs தயாரிப்பாளர்கள்

தயாரிக்கப்பட்ட படங்கள் கொரோனா பிரச்சனை காரணமாக வெளியிட முடியாத சூழலால், தயாரிப்பார்கள் தங்கள் படங்களை OTT என்ற ஆன்லைன் தளங்களுக்கு விற்று வருகிறார்கள். Image Credit

திரையரங்கு உரிமையாளர்கள்

இதற்குத் திரையரங்கு உரிமையாளர்கள் பக்கமிருந்து கடும் எதிர்ப்பு கிளம்பியுள்ளது. குறிப்பாக நடிகர் சூர்யா தயாரிப்பில் ஜோதிகா நடித்து வெளிவர இருக்கும் பொன்மகள் வந்தாள் படத்தின் OTT வெளியீட்டு அறிவிப்புக்குப் பிறகு.

இந்தியில் அமிதாப்பச்சன் படமும் இதே போல வெளிவருவதற்கு எதிர்ப்புகள் வந்துள்ளன.

திரையரங்கு உரிமையாளர்கள் கூறும் காரணம்

பல கோடி முதலீட்டில் திரையரங்குகளைக் கட்டியுள்ளோம். இப்படி அனைவரும் ஆன்லைனில் வெளியிட்டால் எங்கள் நிலை என்னாவது?

எனவே, ஆன்லைனில் வெளியிட்டால், இனி அந்நடிகர்களின் திரைப்படங்களைத் திரையரங்குகளில் வெளியிட மாட்டோம். சூர்யாவின் சூரரைப் போற்றுப் படத்தை நாங்கள் வெளியிட மாட்டோம் என்று அறிவித்துள்ளார்கள்.

பின்னர் பேச்சுவார்த்தைகளுக்குப் பிறகு வெளியிடப்படும் என்றே நம்புகிறேன்.

நியாயம் உள்ளதா?

இவ்விவாதம் திரையரங்கு உரிமையாளர்களுக்கும் தயாரிப்பாளர்களுக்கும் உள்ள பிரச்சனை. இதில் உள்ள பிரச்சனைகள் தெரியாமல் கருத்து கூறுவது ஏற்புடையதல்ல.

ஆனால், கொரானா காலத்தில் திரையரங்கு உரிமையாளர்கள் தயாரிப்பாளர்களை நெருங்குவது நியாயமானது அல்ல.

கொரோனா பிரச்சனை எப்போது சரியாகும் என்று யாருக்கும் தெரியாது. தயாரிப்பாளர்கள் அனைவருமே கடன் வாங்கித்தான் படங்களைத் தயாரிக்கிறார்கள்.

இந்நிலையில் எத்தனை மாதங்களுக்குத் தயாரிப்பாளர்கள் வட்டி கட்டிக்கொண்டு படத்தை அப்படியே வைத்துக்கொண்டு இருக்க முடியும். ஐந்து மாதங்களுக்குக் கோடிக்கணக்கான ரூபாய்க்கு வட்டி என்ன ஆவது?

இவ்வளவு பேசும் திரையரங்கு உரிமையாளர்கள் பல திரைப்படங்களுக்குத் திரையரங்கு கொடுப்பதில்லை. கொடுத்தாலும், வேறு படம் வந்தால், உடனே தூக்கி விடுகிறார்கள்.

திரையரங்கு உரிமையாளர்களைக் கேட்டால், அவர்கள் பக்க நியாயத்தைக் கூறுகிறார்கள். அதே போலத் தயாரிப்பாளர் நிலையை ஏன் ஏற்றுக்கொள்ள மறுக்கிறார்கள்?!

சூழ்நிலை வேறு

ஒரு சாதாரணச் சூழ்நிலையில் இது போல நடந்தால் கேட்பதில் நியாயம் உண்டு.

ஆனால், கொரோனா காலத்தில் எப்போது திரையரங்கு திறப்பார்கள் என்று யாருக்குமே தெரியாத சூழ்நிலையில் எவ்வளவு நாள் வட்டி கட்டி காத்திருப்பது?

சூழ்நிலை சரியாகி அரசு அனுமதித்தாலும் எவ்வளவு பேர் உடனே திரையரங்கு வரப்போகிறார்கள்?

அரசு அனுமதித்தாலும் திரையரங்கு செல்லப் பலரும் யோசிப்பார்கள். திரையரங்கில் வெளிவந்தாலும், முன்பு வசூலித்த வசூல் கிடைக்காது.

ரசிகர்கள் மூலமாகத் துவக்க வசூல் கிடைக்கும் ஆனால், பொதுமக்களின் ஆதரவு முன்பு போல இருக்காது.

எனவே, திரையரங்கு முதலாளிகள் இந்தச் சூழலில் தயாரிப்பாளர்களை மிரட்டுவது நியாயமானதல்ல.

மல்டிப்ளெக்ஸ் வந்ததில் தனித் திரையரங்கு உரிமையாளர்கள் கடுமையாகப் பாதிக்கப்பட்டனர். இதை எப்படிக் கால மாற்றம் என்று கூறினார்களோ OTT யும் கால மாற்றம் என்று எடுத்துக்கொள்ள வேண்டியது தான்.

திரையரங்கில் பார்க்கும் கொண்டாட்டமான மனநிலை OTT யில் கிடைக்காது ஆனால், மக்கள் அதற்குப் பழகி விடுவார்கள்.

பெரிய நடிகர்கள், இயக்குநர்கள் படங்களுக்கு வேண்டும் என்றால் திரையரங்கில் வரவேற்பு இருக்கலாம், மற்றவர்களுக்கு இனி சந்தேகமே!

பிடிக்கிறதோ பிடிக்கலையோ எதிர்காலத்தில் OTT தவிர்க்க முடியாத தொழில்நுட்பமாக இருக்கும். திரையரங்குப் பிரச்சனை காரணமாக, பலர் OTT தயாரிப்புக்கு நகர்ந்து விட ஏராளமான வாய்ப்புகள் உள்ளன.

தொடர்புடைய கட்டுரைகள்

கெத்து காட்டும் NETFLIX

‘Online Streaming’ க்கு தான் இனி எதிர்காலம்

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).