விடாத கனவும் துரத்தும் கணக்கும்!

கனவு வராத நபர் உலகில் இருக்க வாய்ப்பில்லை என்றே கருதுகிறேன். விதிவிலக்காக யாரேனும் இருக்கலாம் அவ்வளவே! Image Credit

பெரும்பாலும் நம் தின வாழ்க்கையில் அதிகம் பாதித்த சம்பவங்களே இரவில் கனவாக வரும்.

ஏதாவது ஒரு சம்பவம் மனதளவில் நம்மை மிக மகிழ்ச்சிப்படுத்தியிருக்கலாம், துன்பப்படுத்தி இருக்கலாம், அதனுடைய பாதிப்பு கனவாக விரியும்.

கனவு நேரலை

சில வருடங்களுக்கு முன்பு ஒரு கட்டுரையில் கனவு பற்றிக் குறிப்பிடும் போது கனவிலேயே சிந்திக்கிறேன், அதிலேயே முடிவும் எடுக்கிறேன் அதாவது கனவு நேரலையில் பங்கு கொள்வது போன்று என்று கூறி இருந்தேன்.

எனக்கு மட்டும் நடக்கிறதோ என்று நினைத்தால், கருத்துரையில் ஒருவர் எனக்கும் அது போல உள்ளது. நானும் கனவில் சிந்திப்பேன், முடிவெடுப்பேன் என்று கூறினார்.

சரி! பலருக்கும் நடக்கும் சம்பவம் போல என்று கருதிக் கொண்டேன்.

நாம் கனவில் இருக்கிறோமா?!

கனவு ஒரு தினுசாக விவகாரமாகப் போய்க் கொண்டு இருக்கிறது என்று தோன்றினால், இது கனவாக இருக்கும் நாம் விழிக்க வேண்டும் என்று நினைத்து, விழித்து அப்பாடா! கனவு தான் என்று நிம்மதியடைந்து இருக்கிறேன்.

நடக்கும் கனவிலேயே யோசித்து இது போலச் செய்யக் கூடாது என்று முடிவெடுப்பேன்.

கனவு சில நேரங்களில் என் கட்டுப்பாட்டில் இருக்கும், சில நேரங்களில் என் கட்டுப்பாட்டை மீறிச் சென்று கொண்டு இருக்கும்.

இதை எல்லாவற்றையும் விட ஒரு கனவில் பாதியில் விழித்துப் பின் தூங்கி அது தொடர்ந்து திரும்ப விழித்துப் பின் தூங்கியவுடன் திரும்பத் தொடர்ந்து என்னைத் திகைக்க வைத்து இருக்கிறது 🙂 .

பொதுவா, விழித்து விட்டால் கனவு துண்டிக்கப்படும் ஆனால், எனக்குச் சில நேரங்களில் தொடர்ந்து கொண்டே இருக்கும்.

விட்டால்.. இரண்டாம் பாகம் எல்லாம் வரும் போல இருக்கு 😀 .

விடாத கனவும் துரத்தும் கணக்கும்

இவையெல்லாம் பிரச்சனையில்லை.. என்னை ஒரு கனவு 20 வருடங்களுக்கும் மேலாகப் பாடாய் படுத்தி வருகிறது.

எனக்குக் கணக்குச் சுத்தமாக வராது. கணக்கில் தேர்வாகி விட்டால் அனைத்திலும் தேர்வு தான். இதற்குப் பயந்தே 11 ம் வகுப்பில் கணக்கே இல்லாத பிரிவு எடுத்தேன்.

இன்னும் நன்றாக நினைவு உள்ளது. 9 ம் வகுப்பில் காலாண்டில் 36, அரையாண்டில் 35 மதிப்பெண்கள் பெற்றுத் தப்பித்தேன் பிழைத்தேன் என்று தேர்வானேன்.

அந்த அளவுக்குக் கணக்கு என்றால் எனக்குத் திகில் படம் போலவே இருக்கும்.

திகில் / ஹாரர் படமெல்லாம் கூடப் பயப்பட மாட்டேன் ஆனால், பொண்ணுக கரப்பான் பூச்சிக்குப் பயப்படற மாதிரி, கணக்கு என்றால் தெறித்து விடுவேன் 🙂 .

கணக்குப் பயம் மனதில் ஆழப்பதிந்து விட்டது போல, 20 வருடங்களாகக் கணக்குப் பிரச்சனை கனவாக வந்து இன்னும் இம்சித்துக் கொண்டு உள்ளது.

தம்பி! கணக்கு போட்டுட்டியா?! 🙂

கனவில் முழு ஆண்டுத் தேர்வு தொடங்குவது போல இருக்கும் ஆனால், கணக்குப் புத்தகம் மட்டும் தொட்டு இருக்கவே மாட்டேன்.

முழு ஆண்டுத் தேர்வு நெருங்கும் “கணக்குத் தேர்வு எப்படிடா எழுதுவது” என்ற பயம் என்னை வாட்ட ஆரம்பிக்கும்.

தேர்வுக்கு அனைவரும் தயாராகிக்கொண்டு இருப்பார்கள்.. அதோடு “கிரி கணக்கு தேர்வுக்குத் தயாராகிட்டியா!” என்று கேட்பார்கள்.

எனக்கும் என்னடா செய்வது! என்ற பயம் வயிற்றைப் புரட்டும். தூக்கம் கலைந்து எழுந்து விடுவேன்.

அப்பாடா! இது கனவு தான் என்ற நிம்மதி கிடைக்கும் பாருங்க. சுகமே தனி! 🙂 .

கொசுத் தொல்லை தாங்கல…

இந்த மாதிரி கணக்கு தேர்வு குறித்த பல கனவுகள் பல விதங்களில் வந்து கொண்டு இருக்கிறது. வருடத்துக்கு மூன்று அல்லது ஐந்து முறை வந்து விடுகிறது.

வழக்கம் போல கடந்த வாரம் வந்து என்னைக் கடுப்படித்து விட்டது.

கணக்குத் தொல்லையால் படாதபாடு பட்டுக்கொண்டு இருக்கிறேன். இதில் இருந்து எப்படித் தப்பிப்பது என்றே தெரியவில்லை.

கவுண்டர் சொல்ற மாதிரி “டேய் நாராயணா! இந்தக் கொசுத்தொல்லை தாங்க முடியலடா.. எங்க போனாலும் பின் தொடர்ந்தே வருது…!” 🙂 .