கோபிசெட்டிபாளையம் 2023

பொங்கலுக்காக ஒரு வார விடுமுறை வழக்கம் போல இல்லாமல் சரியான அளவில் இருந்தது. ஒரு சில வேலைகளைச் செய்ய முடியவில்லையென்றாலும் அது என் திட்டமிடுதலில் ஏற்பட்ட தவறே. Image Credit

பயணக்குறிப்புகள்

ஊருக்குச் சென்றால் முன்பு போலப் பயணக்குறிப்புகளை எழுதுவதைத் தவிர்த்து வருகிறேன்.

காரணம், கிட்டத்தட்ட ஒரே மாதிரியான அனுபவங்களாக இருப்பதால், படிப்பவர்களுக்குச் சுவாரசியம் இருக்காது என்பதே காரணம்.

எனவே, வருடத்துக்கு ஒருமுறை பொங்கலுக்கு ஊருக்குச் சென்று வரும் போது எழுதலாம் என்று நினைக்கிறேன்.

இதிலும் கிட்டத்தட்ட பழைய தகவல்கள் இருக்கும் என்றாலும், முடிந்தவரை புதிய தகவல்களை எழுத முயற்சிக்கிறேன்.

கோபி

எப்படியிருந்த கோபி யார் கண் பட்டதோ கண்டம் ஆகி இருக்கிறது.

கோபி என்றாலே தரமான, சுத்தமான சாலைகள் தான் பிரபலம் ஆனால், தலைகீழாகச் சமீப வருடங்களில் மாறி விட்டது.

கொடூரமான சாலைகளாக உள்ளது. இது போதாது என்று கோபி குடியிருப்புப் பகுதி முழுக்க ஜல் ஜீவன் திட்டத்துக்காகச் சாலை நடுவே குழி தோண்டி இருப்பதால், அதை Patch Work பண்ணாமலே இருக்கிறார்கள்.

செய்து இருந்தால், மேடாக உள்ளது.

கார்களில் செல்பவர்களுக்குப் பெரியளவில் தெரியாது ஆனால், இரு சக்கர வாகனங்களில் செல்வர்களுக்கு spinal cord பிரச்சனை வந்தாலும் வியப்பில்லை.

குப்பையாக, மணலாக உள்ள கோபியைப் பார்க்கவே ரத்தக்கண்ணீர் வருகிறது. நகராட்சி என்ன செய்கிறது என்றே தெரியவில்லை!

செங்கோட்டையன் பெயருக்குத் தான் MLA, கோபியையே மறந்து பல காலங்களாகி விட்டது. எந்தப் புதிய திட்டங்களும் 10 வருடங்களாக இல்லை.

மனசாட்சியே இல்லாமல் கண்டுகொள்ளாமல் உள்ளார். இவருக்கே வாக்களித்துள்ளேன், அடுத்த முறை இவருக்கும் இல்லை, திமுகக்கும் இல்லை.

ஈரோடு சத்தி சாலை

ஈரோடு சத்தி சாலையை நான்கு வழிப்பாதையாக்கி வருகிறார்கள். இன்னும் ஒரு வருட பணி ஈரோடு – கோபி வழியில் உள்ளது.

கோபி – சத்தி வழி இரு வருடங்களுக்கு மேலாகும்.

நகரத்தின் முக்கியப் பகுதியான, இதயமான டவுன்ஹால் பிரியாணி உணவகத்துக்கும் ஈபீஸ் கடைக்கும் இடைப்பட்ட சாலையை வாக்கு அரசியல் காரணங்களால் அகலமாக்காமல் தவிர்த்து விட்டார்கள்.

நிச்சயம் இந்தப்பகுதி மட்டும் போக்குவரத்து நெரிசல் ஆவது உறுதி. இதையும் அகலமாக்கி இருந்தால், போக்குவரத்துக்கு எளிதாக இருந்து இருக்கும்.

மேலே உள்ளது பழைய படம், இடது புறம் உள்ள மரங்கள் எதுவுமே தற்போது இல்லை, கடைகளாகி விட்டது.

பாரியூர்

பொங்கல் நேரத்தில் வழக்கமாக வரும் பாரியூர் கொண்டத்து காளியம்மன் தேர் திருவிழாக்கு பசங்க கூடச் சென்று வந்தேன். கூட்டம் காரணமாகக் கோவிலுக்குச் செல்லவில்லை.

கடைகளுக்குக் கட்டணத்தொகை / ஏலத்தொகை ஏகத்துக்கும் ஏற்றி விட்டார்களாம்.

ஒரு விளையாட்டுக்கு ₹100 கேட்டதால், கட்டுபடியாகாது என்று இரு ரைடு மட்டும் சென்றோம். அதிகக் கட்டணத்தால், பசங்களே வேண்டாம் என்று கூறி விட்டார்கள்.

கொரானா காரணமாகக் கடந்த வருடங்களில் விழா நடத்த முடியாததால், கடந்த வருடத்தை விட இந்த வருடம் கூட்டம் அதிகமிருந்தது.

கேரளா குலுக்கி என்று ஜூஸ். தகர மேசையில் அடித்து மேலே பறக்க விட்டு (Bar ல செய்வது போல) ஜூஸ் போட்டுத் தந்தார்கள், நன்றாக இருந்தது.

Zomato

கோபியில் Zomato வந்து விட்டது என்பதை நம்ப முடியவில்லை. யார் ஆர்டர் செய்கிறார்கள்?! சென்னை போலச் சுற்றிக்கொண்டே உள்ளார்கள்.

கோபியில் எல்லாமா தொடர்ந்து ஆர்டர் செய்து சாப்பிடுகிறார்கள்! என்று உள்ளது. ஒன்றும் சொல்வதற்கில்லை.

உணவகங்களின் எண்ணிக்கை தாறுமாறாக அதிகரித்து விட்டது. எப்படிக் கூட்டம் போகிறது? எப்படி நடத்துகிறார்கள்? என்று புரியவில்லை.

மண்ணின் மைந்தர்கள்

கோபியில் மண்ணின் மைந்தர்கள் குறைந்து வருகிறார்கள் என்பது புதிய நபர்கள் நடமாட்டங்களைக் காணும் போது புரிகிறது.

என்னைப்போலப் பலர் சென்னை, பெங்களூரு, வெளிநாடு என்று உட்கார்ந்து கொண்டு இதைக்கூற வருத்தமாக உள்ளது, இருப்பினும் கூறாமல் இருக்க முடியலை.

பெரும்பாலான கடைகள் கொங்கு அல்லாத வெளி மாவட்டத்தினரே வைத்துள்ளார்கள்.

கோபி ஒரு அமைதியான, தொழில் செய்யச் சிறந்த இடம் என்பதாலையே பலரும் இங்கே வருகிறார்கள். இதனால் மகிழ்ச்சி வருத்தம் இரண்டுமே உள்ளது.

மகிழ்ச்சி கோபி வளர்கிறதே என்று உள்ளது, வருத்தம் இப்படி கோபியின் அடையாளம் தொலைந்து வருகிறதே என்று உள்ளது.

கொங்கு வழக்கில் பேசுபவர்களே குறைந்து விட்டார்கள்.

கோபியை மிக நேசிக்கிறேன்.

காஸ்மோபாலிடன் க்ளப்

சென்னையின் பழம் பெருமைகளில் ஒன்றான காஸ்மோபாலிடன் க்ளப் கோபியிலும் உள்ளது.

இங்கே உறுப்பினராகச் சேர வேண்டும் என்பது சிறு வயது விருப்பம். சிறு வயதில் அப்பா மற்றும் உறவினருடன் சென்று வந்ததிலிருந்து ஒரு காதல்.

முன்பு உறுப்பினராக ₹2000 என்று இருந்தது என்று கூறப்பட்டது தற்போது வைப்புத்தொகை ₹1,00,000 ஆகி விட்டதாம்.

பணம் கொடுத்தால் மட்டும் அனைவரும் உறுப்பினராகி விட முடியாது, அங்குள்ள உறுப்பினர்கள் அனுமதித்தால் மட்டுமே முடியும்.

பணிக்காலம் முடிந்தால் கோபி தான் என் வாழ்க்கை என்று தீர்மானமாக இருப்பதால், இதற்காகப் பணம் சேர்த்தவுடன் இணைந்து விட முயற்சி எடுத்து விடுவேன் 🙂 .

அதோடு காஸ்மோபாலிடன் க்ளப் என் வீட்டிலிருந்து ஐந்து நிமிட நடையில் உள்ளது.

திருமணம்

முன்பு பெண்கள் குறைவாக இருந்தார்கள் என்று திருமணத்துக்குப் பெண்கள் கிடைப்பது பிரச்சனையாக இருந்தது ஆனால், தற்போது ஆண்கள் குறைவு, பெண்கள் அதிகரித்து விட்டார்கள்.

ஆனாலும், பெண் கிடைப்பதில்லை.

இது பெரிய உளவியல் மற்றும் சமூக சிக்கல்கள். எனவே, பின்னர் விரிவாக எழுதுகிறேன்.

புதிய கடைகள்

கோபியில் பெரிய நகரங்களில் உள்ள கடைகள் கூட வந்து விட்டன. Max, Specsmakers என்று ஏராளமான கடைகள் வந்து விட்டன.

Black Pekoe என்ற chain காஃபி கடை வைர விழா பள்ளி அருகே வந்துள்ளது.

எப்போதும் கூட்டம். அக்கா பையன் சொன்னான் என்று சென்று வந்தேன், கட்டணமும் (₹10) குறைவு (பின்னர் உயர்த்தப்படலாம்), சுவையும் அதிகம்.

கோபியின் முக்கிய அடையாளங்களில் ஒன்றான CKS பங்களா (நாட்டாமை, சின்னத்தம்பியில் வரும் வீடு) பகுதியில் பிரபல நகைக்கடையான டாடா நிறுவனத்தின் Tanishq வருகிறதாம்.

எங்கள் பகுதியைச் சுற்றி ICICI வங்கி, பெட்ரோல் நிலையம், சூப்பர் மார்க்கெட், பழமுதிர் நிலையம், காய்கறி சந்தையென அனைத்துமே இருப்பது எளிதாக உள்ளது.

UPI

ஏற்கனவே கூறி இருந்தேன், எங்க வீட்டின் அருகே உள்ள ஒரு பால் தயிர் கடையில் UPI இல்லை.

வழியில் அம்மா அழைத்து வாங்கி வரக்கூறினார்கள் என்று சென்றேன். வேட்டி கட்டியிருந்ததால், பர்ஸ் எடுத்து வரவில்லை.

Google Pay இருக்கிறதா என்று கேட்டவுடன், இல்லை என்று கூறி விட்டு நான் திரும்பிய பிறகு அங்கே இருந்த இன்னொரு பெண் வாடிக்கையாளரிடம் எதோ கூறி சிரித்தார்.

இவர் ஒரு நாள் UPI கண்டிப்பாக வைக்கத்தான் போகிறார் அன்று நான் சிரித்து விட்டு வருகிறேன் 🙂 .

UPI யைத் தள்ளிப்போடலாம் ஆனால், எதிர்காலத்தில் தவிர்க்க முடியாது. கோபியில் பெரும்பாலான கடைகளில் UPI வைத்துள்ளது வசதியாகவுள்ளது.

இலந்தை வடை

இலந்தை பழம் கிடைப்பதே அரிதாகி வருகிறது. எப்படியோ கிடைத்து அக்கா தயார் செய்து வைத்துள்ளார்கள். காய்ந்த பிறகு சென்று எடுத்து வர வேண்டும் 🙂 .

பல கடைகளில் தற்போது ரெடிமேடாகக் கிடைக்கிறது. மார்க்கெட் பகுதி மீரா கடையில் உள்ள வடை நன்றாக இருந்தது.

இலந்தை பழ வாசனையே கிறுகிறுக்க வைத்து விடும். புதியவர்கள் பலருக்கு பிடிக்காதது எனக்கு வசதி, யாரும் பங்குக்கு வர மாட்டார்கள் 🙂 .

தொடர்புடைய கட்டுரை

இலந்தை வடை சாப்பிட்டு இருக்கீங்களா?

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).