நாட்டின் நிலைமை என்னவாகும்? | உச்சநீதிமன்றம்

பட்டாசு வெடிக்க விதிக்கப்பட்டுள்ள நேரக்கட்டுப்பாட்டை நீடிக்கும்படி பட்டாசு தொழிலை நம்பியுள்ளவர்கள் கோரிக்கை வைத்ததற்கு உச்சநீதிமன்றம் நாட்டின் நிலைமை என்னவாகும் என்று கேட்டுள்ளது. Image Credit

நாட்டின் நிலைமை என்னவாகும்?

சுற்றுசூழலை பாதிக்கும் அனுமதிக்கப்படாத இரசாயனத்தைப் பயன்படுத்துவதால் நேரக்கட்டுப்பாடு என்கிறார்கள்.

சிலர் செய்யும் தவறுக்கு அனைவரையும் தண்டிப்பது எப்படி நியாயமாகும் என்கிறார்கள் பட்டாசு உற்பத்தியாளர்கள்.

சிலர் அல்ல பெரிய நிறுவனங்களே இதைச் செய்கிறார்கள் என்கிறது உச்சநீதிமன்றம்.

பட்டாசு தொழிலை நம்பி 5 லட்சம் குடும்பங்கள் உள்ளனர் என்கிறார்கள் பட்டாசு உற்பத்தியாளர்கள்.

சுற்றுச் சூழலினால் பாதிக்கப்படும் நாட்டின் நிலைமை என்ன? என்கிறது உச்சநீதிமன்றம்.

தீபாவளி

தீபாவளி வந்தாலே உடனே நீதிமன்றங்களுக்கும் போராளிகளுக்கும் சுற்றுச் சூழல் மீது மிகுந்த அக்கறை வந்து விடும் மர்மம் மட்டும் புரியவில்லை.

மேற்கூறிய வழக்கில் குழப்பம் என்ன உள்ளது என்று தெரியவில்லை.

தடை செய்யப்பட்ட இரசாயனம் பயன்படுத்தும் நிறுவனத்தை மீண்டும் உற்பத்தி செய்ய முடியாதபடி தடை செய்யலாம், தொடர்ந்தால் வாழ்நாள் தடை என்று அறிவிக்கலாம்.

இது தானே நியாயம். இவர்கள் தவறுகளுக்கு மற்றவர்களைத் தண்டிப்பதேன்!

தீபாவளி அன்று சுற்றுச்சூழல் கேடு ஏற்படுகிறது என்பது உண்மை தான் ஆனால், அன்று மட்டும் தான் சுற்றுசூழல் பாதிக்கப்படுகிறதா? என்பதே கேள்வி.

தினமும் காற்றின் தரம் மோசமாக உள்ளது. காற்று மாசுபாட்டினால் இந்தியாவில் தினமும் பல ஆயிரம் பேர் இறக்கிறார்கள்.

இதற்கு உச்சநீதிமன்றம் எப்போதாவது கடுமையான நடவடிக்கை எடுத்துள்ளதா? வருடத்தில் 364 நாட்கள் நடப்பதை கண்டுகொள்ளாமல் 1 நாளில் நடப்பதற்கு மட்டும் பொங்குவதேன்.

இன்னமும் அரசுப் பேருந்துகள் புகையைக் கக்கிக்கொண்டு தான் செல்கின்றன. பல வாகனங்கள் Emission Check செய்யாமல், செய்தும் ஏமாற்றித் தொடர்கிறார்கள்.

ஹாரன் என்ற பெயரில் ஒலி மாசுபாட்டை நாரசமாகச் செய்து கொண்டுள்ளார்கள்.

சாயக்கழிவை முறையாகச் சுத்திகரிக்காமல் நிலத்தினுள் செலுத்தி நிலத்தடி நீரையே நாசம் செய்கிறார்கள்.

அவர்களை மாசு கட்டுப்பாட்டு வாரியம் கண்டுகொள்ளாததைக் கண்டிக்காதது ஏன்?

மக்களின் வாழ்வாதாரத்தையே அழிக்கும் மேற்கூறிய செயல்களைக் கண்டுகொள்ளாமல் பட்டாசுக்கு மட்டும் நியாயம் பேசினால் சரியா?

சுற்றுச்சூழல் என்றால் அனைத்துக்கும் பொருந்தும் தானே! ஒன்றுக்கு நியாயம் பேசினால் மற்றதுக்கும் சரியாக இருக்க வேண்டும் தானே.

பட்டாசு

இனி இதுபோலச் செய்தெல்லாம் குறைக்க வேண்டியதில்லை. மக்களே பட்டாசு வெடிப்பதில் தற்போது ஆர்வம் குறைந்து விட்டார்கள்.

முன்பெல்லாம் தீபாவளிக்கு ஒரு மாதம் முன்பிருந்தே பட்டாசு சத்தம் கேட்கும் ஆனால், தற்போது தீபாவளிக்கு முதல் நாள் தான் சத்தம் கேட்கிறது.

மக்களே பட்டாசுக்கு செலவழிப்பதை குறைத்து மற்றவற்றுக்குச் செலவழிக்கத் தயாராகி விட்டார்கள்.

சிறுவர்களும் பட்டாசு வெடிப்பதில் ஆர்வம் குறைந்து விட்டார்கள். முந்தைய தலைமுறை மக்கள் போலப் பட்டாசில் ஆர்வமில்லை.

முன்பு போலப் பட்டாசு விற்பனையில்லை என்று விற்பனையாளர்கள் கூறுகின்றனர். எனவே, நேரத்தைக் குறைப்பது இன்னும் பாதிப்பையே ஏற்படுத்தும்.

எனவே, நீதிமன்றங்களும் போராளிகளும் தங்கள் கவனத்தை மற்ற சுற்றுச்சூழல் பிரச்சனைகளில் திருப்பலாம்.

நாடு முழுவதும் தினமும் ஏராளமான சுற்றுச் சூழல் விதிமீறல்கள் நடைபெற்று வருகின்றன.

இதற்கெல்லாம் நாட்டின் நிலைமை என்னவாகும் என்று கவலைப்பட்டுக் கடும் நடவடிக்கை எடுத்தால் நாடு நன்றாக இருக்கும்.

தொடர்புடைய கட்டுரைகள்

ஹா(ர்)ரன் சைக்கோக்கள்

பட்டாசுக்கு மட்டும் கட்டுப்பாடு நியாயமா?!

தீபாவளி | ஒரு அனுபவ வெடி!

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).