பயணக் குறிப்புகள் [மே 2019]

வீட்டில் அனைவரும் கோடை விடுமுறைக்கு ஊருக்குச் சென்று விட்டார்கள். எனவே, வார இறுதியில் வீட்டுல பசங்க பஞ்சாயத்து இல்லாமல் படம் பார்க்கலாம் என்றால், வெய்யில் பொளக்குது, சாப்பிட வெளியே செல்லவே கொடூரமாக உள்ளது.

அதை விடத் தண்ணீர் பிரச்னை உச்சத்தில் உள்ளது. இங்கே தண்ணீருக்கு சிரமப்பட்டு இருப்பதை விட, ஊருக்கே போய்டலாம் என்று வார இறுதியில் ஊருக்கு சென்று விடுகிறேன்.

இதன் காரணமாகவே அதிகம் எழுத முடியவில்லை, திரைப்பட விமர்சனமும் குறைந்து விட்டது.

தண்ணீர் பிரச்னை காரணமாக வார இறுதியில் ஊருக்கு செல்வது, இனி வரும் வாரங்களிலும் மனைவி பசங்க வந்தாலும் தொடரும்.

எழுத நேரமில்லாததால், இனி வரும் சில மாதங்கள் குறைவாகவே எழுதுவேன்.

ரயில் கூட்டம்

50 நாட்கள் முன்பு ரயிலில் முன்பதிவு செய்தாலும், RAC தான் கிடைக்கிறது. படுக்கை உறுதியாகவில்லை என்றால், அமர்ந்து கொண்டே வந்தால், இடுப்பு கழண்டு விடுகிறது, தூக்கமும் இல்லை.

எனவே, திங்கள் அலுவலகம் வந்தால், தூக்கமாக வருகிறது.

ஜூலை மாதம் முழுக்க வார இறுதியில் முன்பதிவு செய்ததில் 80% நாட்கள் படுக்கை உறுதியாகி விட்டது. அப்பாடா! 🙂 .

ஒரு மாதத்துக்கு 12 முறை மட்டுமே முன்பதிவு செய்ய முடியும் என்பதால், சிக்கலாக உள்ளது. மனைவி கணக்கில் இருந்து அடுத்து வரும் மாதங்களுக்கு முன்பதிவு செய்ய வேண்டும்.

நான் எப்போதும் ரயில் தான். பேருந்தில் பயணிக்க மாட்டேன், எனக்கு அது வசதியாக இல்லை.

வெய்யில் மழை

இரண்டு வாரங்களுக்கு முன்பு கோபியில் மழை பெய்தது, தற்போது வெய்யில் செம்ம காட்டுக் காட்டுகிறது. 10 மணிக்கு மேல் 5 மணி வரை எங்கும் வெளியே செல்ல முடியாது போல.

கடந்த வாரங்களில் சத்தி, அந்தியூர் பகுதிகளில் மழை பெய்தது. தற்போது கோபியில் மழை வேண்டாம் என்று தான் வேண்டிக்கொண்டுள்ளார்கள்.

நெல் அறுவடைக்குத் தயார் நிலையில் உள்ளதால், மழை வேண்டாம் என்று உள்ளார்கள்.

வாய்க்காலில் தண்ணீர் சென்று கொண்டுள்ளது. இதை அப்படியே சென்னைக்குத் திருப்பினால் நன்றாக இருக்குமே என்று தோன்றுகிறது 🙂 .

சென்னை மற்றும் மற்ற இடங்களில் ஏற்படும் தண்ணீர் பிரச்சனையை நேர்மறையாகத் தான் பார்க்கிறேன். இப்பிரச்சனையால், அதிகாரிகள் தண்ணீரை சேமிக்க, ஏரி குளங்களைத் தூர்வார ஒரு பாடமாக எடுத்துக்கொண்டால் நல்லது.

சிலருக்கு அதிர்ச்சி வைத்தியம் தான் சரிப்பட்டு வரும். தண்ணீரின் முக்கியத்துவம் தெரியாதவர்களுக்கு இது ஒரு பாடமாக இருக்கட்டும்.

தண்ணீர் பிரச்சனை தீர்ந்தால், வழக்கம் போலப் பழையபடி ஆகி விடுவார்கள் என்றாலும், ஒன்றுமே செய்யாததற்குச் சிறு மாற்றம் நடந்தாலும் நல்லது தானே!

நேர்மறை எண்ணங்கள்

நேர்மறை பற்றிப் பேசியதும் நினைவுக்கு வருகிறது. நான் தொடர்ச்சியாக நேர்மறை எண்ணங்களால் கிடைக்கும் நன்மைகளைப் பற்றி எழுதி வருகிறேன்.

ஆனால், அது குறித்துப் படிக்கும் ஒருவர் கூட மாற்றம் உள்ளது என்று கூறியதில்லை.

அது பற்றி நானும் எதிர்பார்ப்பதில்லை ஆனால், தொடர்வேன் என்பதில் சந்தேகமில்லை.

ஒரு மாதத்துக்கு முன்பு ஊருக்குச் சென்ற போது என் அண்ணனின் நிறுவனத்தில் பணி புரியும் பெண் சோகமாக இருந்தார்.

என்ன பிரச்னை என்று கேட்ட போது, “அண்ணா! வீட்டுல பிரச்னை, குழந்தைகளிடம் அதிகம் கோபித்துக்கொள்கிறேன்” என்று கூறினார்.

அவரிடம் “கோபப்படுவதால் பிரச்சனைகளே அதிகரிக்கும், அதோடு அனைத்தையும் பிரச்சனைகளாகக் கருதினால் மனதில் நிம்மதியே இருக்காது, அதனால் நேர்மறை எண்ணங்களை வளர்ப்பது எப்படி” என்று அவரிடம் பேசினேன்.

புரிந்தது போலத் தலையாட்டினார். “உங்க கிட்ட பேசினத்துக்குப் பிறகு கொஞ்சம் மனம் பாரம் குறைந்து, கொஞ்சம் தெளிவானது போல உள்ளது” என்றார்.

பொதுவாக என்னிடம் பேசுபவர்கள் இப்படிக் கூறுவார்கள் ஆனால், நான் கூறியதை பின்பற்ற மாட்டார்கள். அதனால், நானும் கூறியதோடு மறந்து விட்டேன்.

ஆனால், கடந்த வாரம் ஊருக்குச் சென்ற போது “அண்ணா! தற்போது நீங்க சொன்னபடி உள்ளேன், நேர்மறை எண்ணங்களால் பிரச்சனைகள் குறைந்துள்ளது. முன்பு போல மன அழுத்தம் இல்லை” என்றார்.

நான் சொன்னதைக் கேட்டு ஒருத்தராவது இப்படிச் சொன்னாரே என்று உண்மையாகவே மகிழ்ச்சியாக இருந்தது 😀 .

எதிர்மறை எண்ணங்களை கொண்டுள்ள பலருக்கு நான் கூற விரும்புவது என்னவென்றால், உங்களுக்கெல்லாம் நேர்மறை எண்ணங்களின் வலிமை தெரியவில்லை, அதன் சிறப்புப் புரியவில்லை.

யாரெல்லாம் எதிர்மறை எண்ணங்களை கொண்டுள்ளீர்களோ அவர்கள் எல்லாம் நல்ல வாழ்க்கையை இழந்து கொண்டு இருக்கிறீர்கள் என்பதை என்னால் உறுதியாகக் கூற முடியும்.

நீங்கள் புரிந்து கொள்ளும் போது பல காலங்களை வீணடித்து இருப்பீர்கள், நான் வீணடித்தது போல. எனவே, நல்லதையே நினையுங்கள், நல்லதே நடக்கும்.

நீங்கள் எப்படியோ, நான் வழக்கம் போல எதிர்மறை எண்ணங்களை, செய்திகளை எழுத மாட்டேன். நேர்மறை எண்ணங்கள் குறித்த என் அனுபவங்களை எழுதிக்கொண்டே இருப்பேன்.

தேவைப்படுகிறவர்கள் பயன்படுத்திக்கொள்ளுங்கள், மற்றவர்கள் புறக்கணித்து விடுங்கள்.

மீடியன்

கோபி சாலையில் மீடியனை போக்குவரத்து நெரிசல் காரணமாக விரிவுபடுத்தியுள்ளார்கள். தற்போது தான் வாகனம் ஒட்டவே நிம்மதியாக உள்ளது.

இல்லையென்றால், எந்தப் பக்கம் இருந்து யார் குறுக்கே வருவார்கள் என்று திகிலாகவே இருக்கும்.

அதோடு கண்டபடி நடுவில் நுழைந்து கொண்டு இருந்தவர்களுக்குக் கட்டுப்பாடு அவசியமாகிறது.

கோபி சாலையைப் பார்த்துள்ளீர்களா? அட்டகாசமாக இருக்கும் 🙂 . ஒரே நேர் சாலை, மிக அகலமானது. இரவில் பயணித்தால் அவ்வளவு அழகாக இருக்கும்.

எனக்கு இரவில் கோபி சாலையில் பயணிப்பது மிகப்பிடித்தனமானது ஆனால், காவல் துறை சோதனை காரணமாகச் செல்ல முடிவதில்லை.

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.