தமிழக பாஜக அதுக்கு சரிப்பட்டு வராது

நாட்டுல ஒவ்வொருத்தரும் கட்சியை வளர்க்க படாதபாடு படுறாங்க ஆனால், நம்ம தமிழக பாஜக அவங்க கட்சியைப் போட்டி போட்டுக் காலி பண்ணிட்டு இருக்காங்க.

கடந்த இரண்டு வருடங்களில் அதுவும் முக்கியமா கடந்த ஒரு வருடத்தில் இவங்க இவர்களுக்கே வைத்துக்கொண்டு இருக்கிற சூனியம் இருக்கே…!

தமிழிசை

தமிழிசை தினம் செய்திகளில் வரணும் என்று நினைக்கறாங்களோ என்னவோ! தினம் தினம் ஏதாவது அறிக்கை விட்டுட்டே இருக்காங்க. Image Credit

இவங்க அறிக்கை விட்டால் யாரு கோபப்படுறாங்களோ இல்லையோ “Meme Creators” செம்ம மகிழ்ச்சியாகி மீம் மேல மீம் போட்டுத் தாக்குகிறார்கள்.

தினம் அறிக்கை விடுவது கடமை என்பது போலச் செய்துகொண்டு இருக்கிறார். இது எந்த வகையில் மக்களைக் கவரும்?! ஊடக வெளிச்சத்தில் நேர்மறையும் எதிர்மறையும் உண்டு.

கட்சித்தலைவராகக் கருத்து நிச்சயம் கூற வேண்டியது தான் ஆனால், இவர் செய்து கொண்டு இருப்பது சொந்த செலவில் சூனியம்.

H ராஜா

தமிழக பாஜகவை குழி தோண்டி புதைத்து விட்டுத் தான் மறுவேலை என்று ராஜா சபதம் எதுவும் எடுத்து இருப்பாரோ என்னவோ! ஒரு முறை விவகாரமா பேசலாம் ஆனால், பேசுறது எல்லாம் விவகாரமாக இருந்தால் எப்படி?!

ஒரு கட்சியில் பொறுப்பில் உள்ளவர் நடந்து கொள்வதற்கும் இவர் செய்து கொண்டு இருப்பதற்கும் எந்தச் சம்பந்தமும் இல்லை.

சமீபமாகப் பெரியார் சர்ச்சை. ஒரு தவறை சரி செய்ய இன்னொரு தவறை செய்தால் அது இன்னமும் மோசமாகத் தான் போகும் என்பதற்கு ராஜா தான் உதாரணம்.

பெரியார் பற்றிக் கூறியது தவறு என்று கூறியதோடு முடித்து இருந்தால், அதோட பிரச்சனை முடிந்து இருக்கும். என்ன.. இரண்டு நாள் விவாதம் இருக்கும்.

பிறகு வேற பிரச்சனை வந்தால் அதற்கு வழக்கம் போல ஊடகம் சென்று விடும்.

“இது என்னோட Admin செய்த வேலை” என்று கூறி, இப்ப அவர் எது கூறினாலும் “டேய் அட்மின்! எங்க ராஜா சார் பேரைக் கெடுக்க இப்படி எழுதுறியா” ன்னு கேட்டுக் கலாயித்துட்டு இருக்காங்க.

வாராவாரம் எதையாவது பேசிச் சர்ச்சையைக் கூட்டிக்கொண்டே இருக்கிறார். கொஞ்சம் யோசிங்க “போன தேர்தலில் ஓரளவு சுமாரான வாக்குகளைப் பெற்ற தமிழக பாஜக தற்போது ஏன் நோட்டா கூடத் தோற்றது?” என்று.

ஒவ்வொரு கட்சிக்கும் ஒரு கொள்கை இருக்கும் ஆனால், பெரும்பான்மை மக்களின் எண்ணத்தைப் புறக்கணித்து “நான் நினைப்பதைத் தான் பேசுவேன், நடந்து கொள்வேன்” என்றால், அதற்கான பலனையும் பெற வேண்டியது தான்.