செல்வி ஜெ. ஜெயலலிதா 1948 – 2016

யாருமே எதிர்பார்க்காத நிகழ்வு செல்வி ஜெ. ஜெயலலிதா அவர்களின் மரணம்.

கடந்த சில காலங்களில் அவ்வப்போது அவருடைய உடல்நிலை குறித்துப் பரவலாக விமர்சிக்கப்பட்டது ஆனால், இது போல ஒரு நிலையாகும் என்று கனவிலும் நினைக்கவில்லை. Image Credit

அப்போலோவில் அனுமதிக்கப்பட்ட சில நாட்களில் வதந்தி பரவியபோதும் அது குறித்து நான் நம்பவில்லை, அவ்வகைச் செய்திகளை யாரிடமும் பகிரவில்லை.

நிச்சயம் திரும்ப வருவார், ஓய்வுக்குப் பிறகு பொறுப்புக்கு வருவார் என்று உறுதியாக நம்பினேன்.

ஆனால், 4ம் தேதி Cardiac Arrest என்று கேள்விப்பட்ட போது தான் முதல் முதலாக அதிர்ச்சியானேன். அதன் பிறகு அப்போலோ கூறிய தகவல்கள் நம்பிக்கை தருவதாக இல்லை, பின் நடந்ததை அனைவரும் அறிவர்.

செல்வி ஜெ. ஜெயலலிதா

ஜெயலலிதா அவர்களின் முந்தைய நடவடிக்கைகள், செய்த ஊழல்கள், வீணடித்த மக்கள் பணம் என்று குறை கூற ஏகப்பட்ட விசயங்கள் இருந்தாலும், அவருடைய தைரியம், வழ வழ ன்னு பேசாமல் முடிவெடுக்கும் அவருடைய உறுதி அனைவரும் அறிந்தது.

அனைவரையும் திருப்தி செய்ய வேண்டும் என்று நினைத்து உருப்படி இல்லாமல் போகும் முடிவுகளை எடுக்காமல் தனக்குச் சரி என்று பட்டதை உறுதியாக எடுத்து இருக்கிறார்.

இதில் சில பெரும்பாலானவர்களுக்கு உடன்பாடில்லாத முடிவுகளும் இருக்கலாம்.

எண்ணற்ற முடிவுகள் இருந்தாலும், எனக்குத் தனிப்பட்ட முறையில் பிடித்தது பள்ளிகளில் “தமிழ்” கட்டாயம் என்ற உறுதியான முடிவு.

முதல் முறை ஆட்சிக்கு வந்த போது அனுபவம் இல்லாமல் படு மோசமாக ஆட்சி செய்து, வரைமுறை இல்லாமல் ஊழல்கள் செய்து பெரும் தோல்வியடைந்தார்.

அடுத்த ஆட்சியில் இத்தவறுகளை எல்லாம் களைந்து சிறப்பானதொரு ஆட்சியைக் கொடுத்தார். இதன் பிறகு விமர்சனங்கள் இருந்தாலும், இருக்கிற அரசியல்வாதிகளில் இவர் மக்களுக்கு ஏற்புடையவராக இருந்தார் என்பதில் மாற்றுக்கருத்தில்லை.

திமுக ஆட்சியில் இருந்த அளவுக்கு மாநில வளர்ச்சி திட்டங்கள் இல்லை என்றாலும், அவர்கள் அளவுக்குப் பெரியளவில் ஊழல் இல்லை என்பதும் உண்மை.

ஜெயலலிதாக்குப் பின்

ஜெயலலிதா மீது எனக்குப் பல்வேறு விமர்சனங்கள் இருந்தாலும், தற்போதைய நிலைக்கு இவரை விட்டால் ஒரு தலைவர் தமிழ்நாட்டுக்கு இல்லை.

இதுவே இவர் மீண்டு(ம்) வந்து விட வேண்டும் என்ற என் எதிர்பார்ப்பை அதிகரித்தது.

இதைப் படிக்கும் நீங்கள் யார் அடுத்தத் தலைவர் என்பதைக் காரணங்களோடு விளக்கினால் எனக்கு ஒரு தெளிவு / ஆறுதல் கிடைக்கும் என்று நம்புகிறேன்.

இதை நான் ஏன் கூறுகிறேன்?

ஜெ க்கு பிறகு அதிமுக இருக்காது என்பதே என் முந்தைய கணிப்பாக இருந்தது காரணம், இரண்டாம் கட்ட பலமான தலைவர் என்று யாருமில்லை.

தற்போது பொறுத்து இருந்து பார்க்கலாம் என்ற நிலையில் உள்ளேன்.

ஜெ க்கு பிறகு ஓரளவு நம்பிக்கையளிக்கும் தலைவராக இருப்பவர் ஸ்டாலின் மட்டுமே! இவருக்கு அனுபவம் கிடைக்காமல் இன்றுவரை தடுப்பது கலைஞர். ஸ்டாலினுக்குப் பிரச்சனை அதிமுக அல்ல கலைஞர் தான்.

கலைஞரையும் தாண்டி வந்தால், ஸ்டாலின் திறமையான நிர்வாகி என்று கூற முடியாவிட்டாலும் இவரால் முடியும் என்று நம்பிக்கையுள்ளது.

ஆனால்,

இவர் பின்னாடியே தயாநிதி மாறன், கலாநிதி மாறன், கனிமொழி, ராஜாத்தி அம்மாள் என்று ஒரு பெரிய படையே உள்ளது. இவர்கள் ஸ்டாலினை ஆட்சி செய்ய விட மாட்டார்கள். இவர்களின் தலையீடு அதிகளவில் இருக்கும்.

வைகோ திறமையான நபர் ஆனால், மிக உணர்ச்சிவசப்படுபவர். வைகோவின் சமீப நடவடிக்கைகள் இவர் மீதான மதிப்பைப் பெருமளவில் குறைத்து விட்டது.

கேப்டன் முதன் முதலில் அரசியலுக்கு வந்த சமயத்தில் சக்கை போடு போட்டார்.

தற்போது உடல்நிலை காரணமோ என்னமோ முற்றிலும் வேறாக உள்ளார். இவரின் நடவடிக்கைகள் பொறுப்பான பதவிக்குத் தகுதியானவராகக் காட்டவில்லை.

அன்புமணி மீது வேறு வழி இல்லாமல் நம்பிக்கையுள்ளது ஆனால், அவர்கள் கட்சியின் மீதும் மற்றவர்கள் மீதும் நம்பிக்கையில்லை.

இது போல மிக மோசமான நிலையில் தான் தமிழகம் தற்போது உள்ளது. உண்மையில் ஜெ வின் இழப்பை விட அவரால் ஏற்பட்ட தமிழக அரசியல் வெற்றிட இழப்பு எனக்கு மிகுந்த கவலையை அளிக்கிறது.

மத்திய அரசை மிரட்டக்கூடிய தகுதி பெற்ற ஒரே தலைவர் தற்போதைக்கு ஜெ மட்டுமே இருந்தார். இவரும் சென்ற பிறகு இது போல நமக்குப் பெருமையளிக்கக்கூடிய தலைவர் வேறு யார்? ஆளுமை மிகுந்த தலைவர் யார்?

தமிழ்நாடு என்றால் ஒரு கெத்தை நமக்குக் கொடுத்தது ஜெ யின் இருப்பு ஆனால், தற்போது யார் இது போல மத்திய அரசைக் கேள்வி கேட்கப்போகிறார்கள்? யார் தமிழகத்தை நினைத்துப் பயப்படுவார்கள்?

அதிமுகவின் தற்போதைய நிலை

அதிமுகவின் தற்போதைய நிலையைக் கற்பனையும் செய்ய முடியவில்லை.

இன்று தொலைக்காட்சி பார்த்து இருந்தீர்கள் என்றால், கவனித்து இருக்கலாம். சுற்றிலும் நின்று கொண்டு இருந்தவர்கள் மன்னார்குடியை சார்ந்தவர்கள் தான்.

ஜெ இருந்தவரை அவர் கட்டுப்பாட்டில் இருந்தார்கள்.. தற்போது?!

“இதுவும் கடந்து போகும்” என்று நினைப்பதை தவிர வேறு ஒன்றும் தோன்றவில்லை.

இறுதியில் கொண்டு செல்வது என்ன?

அரசியல்வாதிகள், அதிகாரிகள் ஜெ வையே உதாரணமாக எடுத்துக் கொள்ளலாம். எத்தனையோ ஊழல் வழக்குகள், கொள்ளை என்று பல குற்றச்சாட்டுகள் ஆனால், இறுதியில் இப்பணம் எந்த வகையில் அவருக்கு உதவியது?!

கோடிக்கணக்கான பணம் இருந்தும் அவை காப்பாற்ற முடிந்ததா!

இரு மாதங்களுக்கு மேல் பல சிரமங்களை அனுபவித்து, இவ்வளவு வருடங்களாகப் பல வழிகளில் சம்பாதித்த பணமும் காப்பாற்றாமல் இறந்து போனார்.

இறுதியில் கொண்டு செல்லப்போவது ஒன்றுமில்லை.

தொண்டர்கள்

அதிமுக அமைச்சர்கள் கோமாளிகள் போல நடந்து கொண்டார்கள். அது குறித்துக் கிண்டலடிக்காத மாநிலமே இருக்க முடியாது.

இவர்களின் நிலைக்கு ஜெ வும் ஒரு காரணம்.

தொண்டர்களும் அப்போலோ வாசலில் பல கோமாளித்தனங்களைச் செய்து கொண்டு இருந்தார்கள்.

தற்போது ஜெ இறந்த பிறகு அவர்களின் நடவடிக்கைகளை வைத்து தமிழகத்தின் மானத்தை வாங்குகிறார்கள் என்று சமூகத்தளங்களில் கூறி வருகிறார்கள்.

ரஜினி உடல்நிலை சரியில்லாமல் இருந்த போது அவரது ரசிகர்களுக்கு அவர் எப்படி இருக்கிறார் என்றே தெரியாமல் இருந்தது.

ஜெ உடல்நிலை போல யாராவது கூறி தெரிந்ததே தவிர உண்மையான நிலை என்னவென்றே தெரியாமல் இருந்தது.

சிங்கப்பூர் மருத்துவமனைக்கு அவரை அழைத்துச் செல்லும் முன்பு “கண்ணுகளா” என்று ரசிகர்களுக்கு அவர் பேசியது வெளியாகியது.

இதுவரை இது போலக் குரலைக் கேட்டு இராத ரசிகர்கள் உடைந்து போயினர்.

இதுவே இப்படி என்றால்,

நடிகையாகவும் இருந்து, எம்ஜிஆர் அவர்களின் வாரிசாக இருந்து, ஆறு முறை முதல்வராக இருந்து, அவரால் பல இலவசங்களை, வசதிகளை அனுபவித்து, ஒவ்வொரு பொருளிலும் அவரின் அடையாளத்தைக் காணும் உண்மையான தொண்டனின் மன நிலை எப்படி இருக்கும்!

விமர்சிப்பவர்களால் நிச்சயம் இதையெல்லாம் புரிந்து கொள்ள முடியாது.

விமர்சிப்பவர்களைப் பொறுத்தவரை தொண்டர்கள் செய்வது கோமாளித்தனமாகவும் அவர்களின் அழுகை கடுப்பேற்றுவதாகவும், அலறல்கள் தமிழ்நாட்டின் மானத்தை வாங்குவது போலத் தான் தோன்றும்.

ஒரே ஒரு முறை மற்றவர்கள் தமிழகத்தைப் எப்படி நினைப்பார்கள் என்று நினைக்கும் நேரத்தில் தொண்டர்கள் எப்படி உணர்வார்கள் என்று அவர்கள் மன நிலையில் இருந்து நினைத்துப் பாருங்கள், அவர்களின் உணர்ச்சிகளைப் உணர முடியும்.

அஞ்சலி

பல்வேறு மாற்றுக்கருத்துகள் இருந்தாலும், ஜெ போல ஒரு தைரியமான, உறுதியான முடிவெடுக்கும், மத்திய அரசை எதிர்க்கும் ஆளுமை கொண்ட தலைவர் இல்லை.

ஜெ வின் இழப்பு தமிழகத்துக்கு மாபெரும் இழப்பு என்பதில் சந்தேகமில்லை.

இது போல ஒரு தைரியமான பெண் தலைவரைத் தமிழகம் காண காலங்கள் ஆகும்.

இவை இக்கட்டுரைக்கான அலங்கார வார்த்தைகள் அல்ல, உண்மையான என் மனதின் வார்த்தைகள்.

செல்வி ஜெ. ஜெயலலிதா அவர்கள் ஆன்மா சாந்தியடைய இறைவனை வேண்டுகிறேன். உண்மையான தொண்டர்களுக்கு என் ஆழ்ந்த அனுதாபங்கள்.

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.