ஒளிப்பதிவு சட்டத் திருத்தம் எதிர்ப்புகள்

ஒளிப்பதிவு சட்டத் திருத்தம் கொண்டு வரப்படுவது படைப்பாளியின் கருத்துரிமையை, கருத்துச் சுதந்திரத்தை பாதிக்கிறது என்று தமிழகத்தில் எதிர்ப்புக்குரல்கள் எழுந்துள்ளன. Image Credit

ஒளிப்பதிவு சட்டத் திருத்தம்

1. ஏற்கெனவே இருக்கும் U, U/A, மற்றும் A சான்றிதழ்களுடன் வயது வாரியாகச் சில புதிய சான்றிதழ்களும் அறிமுகப்படுத்தப்பட உள்ளன.

U/A 7+, U/A 13+ & U/A 16+ என U/A சான்றிதழை மூன்றாகப் பிரித்துள்ளார்கள். வெளிநாடுகளில் இது போல உள்ளது.

2. வரைவில் சேர்க்கப்பட்டிருக்கும் பிரிவு 6AA-யின் படி, ஒரு படைப்பாளியின் எழுத்துப்பூர்வ அனுமதி இல்லாமல், அதை நகல் எடுக்கவோ, அதை வீடியோவாகவோ, ஆடியோவாகவோ பதிவு செய்யவோ, ஒளிபரப்பு செய்யவோ கூடாது.

மீறினால், 3 மாதங்கள் முதல் 3 வருடங்கள் வரை சிறைத் தண்டனையும், ரூ.3,00,000 அல்லது படத்தின் தயாரிப்புச் செலவில் 5 சதவிகிதம் வரை அபராதமும் வசூலிக்கப்படும்.

3. தற்போதுள்ள சட்டத்தின்படி, ஒரு படத்தின் தணிக்கை சான்றிதழ் 10 வருடங்கள் மட்டுமே செல்லுபடியாகும். அதன் பின்னர், அதைப் புதுப்பிக்க வேண்டும்.

புதிய வரைவில் இது மாற்றப்பட்டு, சென்சார் சான்றிதழ் இனி காலக்கெடு ஏதுமின்றி ஆயுள் முழுவதுக்குமான சான்றிதழாக இருக்கும் என்று குறிப்பிடப்பட்டுள்ளது.

4. ஒளிப்பதிவுச் சட்டம் 1952-ன் பிரிவு 5B (1)-ல், ஒரு படம் நாட்டின் பாதுகாப்புக்கோ, இறையாண்மை மற்றும் ஒருமைப்பாட்டுக்கோ, மற்ற நாடுகளுடனான நட்புறவுக்கோ, சட்ட ஒழுங்கிற்கோ, ஒழுக்கம் அல்லது அறநெறிக்கோ ஊறுவிளைவிப்பதாக இருந்தால் அதற்குச் சான்றிதழோ பொதுவெளியில் திரையிடப்படுவதற்கான அனுமதியோ மறுக்கப்படும்.

அவதூறு, நீதிமன்ற அவமதிப்பு அல்லது இது போன்ற எந்தவொரு குற்றத்திற்கும் பொருந்தும் என்று தெரிவிக்கப்பட்டுள்ளது.

எதிர்ப்புகள்

முதல் மூன்று திருத்தங்களுக்கு யாரும் எதிர்ப்பு தெரிவிக்கவில்லை,

நான்காவது திருத்தத்துக்குத் தான் தற்போது சில தமிழக நடிகர்கள், இயக்குநர்கள் மற்றும் தயாரிப்பாளர்கள் எதிர்ப்பு தெரிவித்துள்ளார்கள்.

சிலர் மட்டுமே அமர்ந்து படத்தைப் பார்த்துச் சரி தவறு (தணிக்கை) என்று எப்படி முடிவு செய்ய முடியும்? என்று குறிப்பிட்ட சதவீதத்தினர் கேட்கிறார்கள்.

சிலர் தணிக்கை செய்யப்பட்ட பிறகு எப்படிப் படத்தை எதிர்க்கலாம் என்று கேட்கிறார்கள்.

எடுத்துக்காட்டுக்கு 10 பேர் அமர்ந்து ஒரு படத்தைப் பார்த்துத் தணிக்கை செய்கிறார்கள். இவர்கள் 10 பேர் அனைத்து மக்களின் எண்ணங்களையும் பிரதிபலிக்கப் போவதில்லை / முடியாது.

இந்தச் சூழ்நிலையில் தான் படம் வெளியான பிறகு சர்ச்சையாகிறது. இந்நிலையில் நடவடிக்கை எடுக்கும் அதிகாரம் மத்திய அரசுக்கு இருப்பதாகச் சட்ட திருத்தம் கூறுகிறது.

தணிக்கை செய்யப்பட்ட பிறகு மத்திய அரசுத் தடை செய்தால், அது படைப்பாளியின் கருத்துரிமையைப் பறிக்கும் செயல் என்பது இயக்குநர், நடிகர்கள் குற்றச்சாட்டு.

படம் வெளியாகி ஒரு படம் தடுக்கப்பட்டால், முதல் போட்டு எடுத்த தயாரிப்பாளர்கள் நிலை என்ன ஆவது என்பது தயாரிப்பாளர் கேள்வி.

ஏற்கனவே உள்ள தணிக்கை முறையிலேயே ஏராளமான திரைப்படங்கள் வெளியிட அனுமதி கிடைக்காமல் முடங்கியுள்ளன என்பது குறிப்பிடத்தக்கது.

திருத்தத்தில் என்ன குறிப்பிடப்பட்டுள்ளது?

சர்ச்சை ஏற்பட்டால் திரும்ப மறு ஆய்வுத் தணிக்கைக்கு மத்திய அரசு அனுப்பும் படி தான் திருத்தத்தில் குறிப்பிடப்பட்டுள்ளது.

நீதிமன்ற மாண்பு, மற்ற நாடுகளின் நட்பு, சட்டம் ஒழுங்கு, இந்திய ஒருமைப்பாடு போன்றவற்றை குலைக்கும் வகையில் இருந்தால் மறு ஆய்வுக்கு உட்படுத்தப்படும்.

மத்திய அரசு படத்தையே தடை செய்வார்கள் என்பதெல்லாம் மிகைப்படுத்தப்பட்டவை.

அப்படியோரு சூழ்நிலை இருந்தால், துவக்கத்திலேயே தணிக்கையைத் தாண்டியே வர முடியாது என்பது தான் எதார்த்தம் / லாஜிக்கல்.

வந்தால் என்ன நடக்கும்? சர்ச்சைக்குரிய காட்சியை நீக்க வலியுறுத்துவார்கள்.

படத்தையே தடை செய்வதற்கான எதார்த்த வாய்ப்புகள் மிகக் குறைவு.

1000 / 10,000 ல் ஒன்றில் நடக்கலாம்.

இதில் மத ரீதியாக தனித்து குறிப்பிடப்படவில்லை. இந்திய ஒருமைப்பாடு என்று வரும் போதே இதில் அனைத்தும் அடங்கி விடும் என்று கருதுகிறேன்.

ஆனால், கண்டிப்பாக மத ரீதியான துவேச கருத்துகளுக்கும் கட்டுப்பாடு தேவை.

கருத்துரிமை

முதலில் யாராவது கருத்துரிமை என்பதைத் தெளிவுபடுத்தினால் நல்லது!

கருத்துரிமை என்பதற்கு என்ன அர்த்தம்? கருத்துச் சுதந்திரம் என்பதற்கு என்ன அளவுகோல்?

இவர்கள் விருப்பத்துக்கு மற்றவர்களைக் காயப்படுத்தி ஒரு படத்தை எடுப்பார்கள் ஆனால், எல்லோரும் கருத்துரிமை என்று வேடிக்கை பார்க்க வேண்டும்!

எவரையும் எப்படியும் விமர்சிப்பார்கள், கிண்டலடிப்பார்கள் அது கருத்துச் சுதந்திரம்!

என்ன லாஜிக் இது?!

இந்து மத வெறுப்புணர்வு

தமிழ் திரையுலகில் இந்து மதத்தைக் கிண்டலடித்து, வெறுப்புணர்வை வெளிப்படுத்துவது அதிகரித்து வருகிறது ஆனால், இது கருத்துச் சுதந்திரம்.

மூக்குத்தி அம்மன் படத்தில் CD வைத்தால் கேன்சர் சரியாகி விடும் என்று கிறித்துவ மதத்தில் சிலர் ஏமாற்றுவதைக் காட்சியாக வைத்ததைப் படத்தில் நீக்கி விட்டார்கள்.

இது சாதாரண நகைச்சுவை காட்சி.

இதைப் போல இந்து மதத்தில் நித்தியானந்தா, சிவசங்கர் பாபா உட்பட ஏராளமானவர்களை கிண்டலடித்து ஏராளமான படங்கள் வெளியாகியுள்ளன.

அவ்வளவு ஏன் மூக்குத்தி அம்மன் மையக்கருத்தே ஜக்கி வாசுதேவை மனதில் வைத்து எடுக்கப்பட்டது தான்.

இந்து மதத்தில் உள்ள ஒருவரை வைத்து விமர்சித்து படத்தையே இப்படி எடுக்க முடிகிறது.

ஆனால், உலகம் முழுக்க கிறித்துவ மதத்தில் நடைபெறும், அனைவருக்கும் தெரிந்த ஒரு சம்பவத்தை நகைச்சுவையாகக் கூறும் காட்சியை வெளியிட முடியவில்லை?!

மலையாளத்தில் பிரியாணி என்ற படம் வெளிநாட்டு திரைப்பட விழாக்களில் மட்டும் வெளியானது. பெரும்பாலான திரையரங்குகள் வெளியிடப் பின்வாங்கி விட்டன.

முஸ்லீம் சமுதாயத்தில் நடக்கும் சம்பவங்களை வெளிப்படையாகக் காட்டியிருந்தார்கள் ஆனால், படத்தை வெளியிடவே திரையரங்குகள் துணியவில்லை.

The Da Vinci Code படம் தமிழகத்தில் வெளியாகவே விடவில்லை.

ஆனால், இவர்கள் இந்து மதத்தையும், இந்தியாவையும் எப்படி வேண்டும் என்றாலும் அசிங்கப்படுத்தி எடுப்பார்கள், அதை வேடிக்கை பார்க்க வேண்டும்.

கேட்டால், கருத்துச் சுதந்திரம்.

இந்து மதம் மட்டும் இளிச்சவாய மதமா?

சரி! இதுவரை இந்து மதத்தைத் தவிர்த்து வேறொரு மதத்தை விமர்சித்துச் சமீப காலங்களில் ஒரு படமாவது தமிழ்நாட்டில் வெளியாகி இருக்குமா? வெளியிடத் தான் விட்டுவிடுவார்களா?

இந்து மதம் விமர்சிக்கப்படக்கூடாத மதமல்ல ஆனால், இந்து மதம் மட்டுமே விமர்சிக்கப்பட வேண்டிய மதமுமல்ல.

அனைத்து மதங்களிலும் நல்லது கெட்டது உள்ளது.

இந்து மதம் மட்டும் இளிச்சவாய மதமா? யார் வேண்டும் என்றாலும் நக்கல் அடிக்க!

தமிழ் திரையுலகில் தற்போது இடது சாரி ஆதரவாளர்கள் அதிகரித்து விட்டனர். எனவே, இந்து மதத்தை இழிவு படுத்துவது, இந்தியாவைக் கேவலப்படுத்துவது அதிகரித்து வருகிறது.

மலையாள திரையுலகம்

இது போன்ற கருத்துகளைத் தெரிவிக்க மலையாள திரையுலகுக்கே அதிக உரிமையுண்டு.

காரணம், தமிழ் திரையுலகைப் போல அல்லாமல் எப்போதாவது அனைத்து மதங்களையும் விமர்சித்துப் படங்கள் வருகிறது.

சமீப Trance படத்தைக் கூறலாம். பிரியாணி படத்தைத் தமிழ்நாட்டில் வெளியிட 100% வாய்ப்பில்லை.

கருத்து சுதந்திரம்னு தற்போது பேசிட்டு இருக்கும் அனைவரும் எங்கே இருக்கிறார்கள் என்பதே தெரியாத அளவுக்கு அமைதியாக இருப்பார்கள்.

ஆனால், இது போல இந்து மதத்தை விமர்சித்து 100 படங்கள் வந்து இருக்கும்.

மடியில் கனம் இருப்பவனுக்குத் தான் வழியில் பயம்.

நேர்மையா படத்தை எடுப்பவன் எதற்குப் பயப்பட வேண்டும்?! சர்ச்சை படத்தை எடுப்பவர்கள் தான் கவலைப்பட வேண்டும்.

கருத்துச் சுதந்திரம் என்பது நாகரீகமான முறையில் கருத்தை, விமர்சனத்தை முன் வைப்பது, கொச்சைப்படுத்துவதல்ல.

இரத்தம் தக்காளி சட்னி

இத்திருத்த சட்டத்துக்குப் பொங்கும் பலர் Family Man 2 சீரீஸ் வெளியிடக் கூடாதுனு பொங்கியவர்கள் என்பது குறிப்பிடத்தக்கது.

ஆமாம், கருத்து சுதந்திர இரத்தம் தக்காளி சட்னி தான்.

Family Man 2 சீரீஸுக்கு பொங்கியவர்கள் இச்சட்டத்துக்கு எதிர்ப்பு தெரிவிக்க என்ன தார்மீக உரிமை உள்ளது?

இதிலிருந்து என்ன புலனாகிறது என்றால், அவர்களுக்குப் பிடிக்காத விஷயத்துக்கு அனுமதி கொடுக்கக் கூடாது ஆனால், அவர்களுக்குப் பிடித்த விஷயம் மற்றவர்களுக்கு ஏற்புடையது இல்லையென்றாலும் அது கருத்து சுதந்திரத்தில் வரும்!

இச்சட்டத்துக்கு தமிழகத்தில் மட்டுமே எதிர்ப்பு அதிகம். மற்ற மாநிலங்களில் உள்ள ஒட்டு மொத எதிர்ப்பையும் சேர்த்தாலும் தமிழகத்தில் உள்ள அளவு கூட வராது.

இச்சட்டத்தை எதிர்ப்பவர்களைக் கவனித்தால், அனைவரும் ஒரு புள்ளியில் இணைவார்கள்.

நம்பிக்கையில்லை என்றால் இதுவரை அவர்கள் எதிர்த்த விஷயத்தைக் கவனித்துப் பாருங்கள்.

கருத்துச் சுதந்திரம் என்ற பெயரில் எதை வேண்டும் என்றாலும் பேசலாம், படம் எடுக்கலாம் என்று எண்ணவோட்டம் திரையுலகில் அதிகரித்து வருகிறது.

இவர்களுக்குக் கடிவாளம் போடவில்லை என்றால், வரும் காலங்களில் இன்னும் மோசமாகத்தான் போகும்.

தேச ஒருமைப்பாடு என்பதில் மதமும் அடங்கும் என்ற நம்பிக்கையில் ஒளிப்பதிவு சட்டத் திருத்தம் மாற்றத்தை முழு மனதோடு வரவேற்கிறேன்.

கொசுறு

சமூகத்தளங்களில் தவறான கருத்துகளைப் பகிர்ந்தால், பெண்களை இழிவுபடுத்தினால், அரசியல் தலைவர்களைத் தவறாக விமர்சித்தால், கடுமையான நடவடிக்கை எடுக்கப்படும் என்று DGP சைலேந்திரபாபு அறிவித்துள்ளார்.

இதுபற்றிப் பின்னர் விவாதிப்போம், கூற நிறைய உள்ளது.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).