திரையுலகம் பதிவுலகம் | ஒப்பீடு

பதிவுலகமும் திரையுலகமும் சில விசயங்களில் ஒன்றைப்போலவே உள்ளது, அதனால் நான் இது வரை பார்த்த பதிவுலகத்தையும் திரையுலகத்தையும் ஒப்பிட்டு இருக்கிறேன்.

பட்டியல் போட்டால் சுவாராசியமாகவே உள்ளது! 🙂 . Image Credit

ஒப்பீடு

திரையுலகில் நல்ல படங்கள் சரியாக போவதில்லை, நல்ல படமாக இருந்தாலும் திரைக்கதை சரியாக இருந்தால் தான் ஓடும் எடுத்துக்காட்டு பருத்தி வீரன்.

பதிவுலகில் நல்ல பதிவுகள் அதிகம் படிக்கப்படுவதில்லை, காற்று வாங்கிக்கொண்டு இருக்கும். நல்ல பதிவாக இருந்தாலும் சுவாராசியமாக எழுதப்படும் பதிவுகள் மட்டும் கவனிக்கப்படுகின்றன.

மசாலா படங்களே அதிகம் பேரால் விரும்பப்படுகின்றன, கூட்டமும் அதற்குத்தான் அதிகம் வருகிறது.

காமெடி, கிண்டல், திரைப்படம் பற்றிய கட்டுரைகளே அதிகம் இங்கே படிக்கப்படுகிறது, ஹிட்ஸும் அதற்கு தான் அதிகம் கிடைக்கிறது.

படம் ஓடவில்லை என்றாலும் இவர்களே இவர்களுக்கு வெற்றி விழா எடுப்பார்கள். ஓடாத படத்திற்கு நூறு நாள் போஸ்டர் அடித்துக்கொள்வார்கள்.

யாரையாவது விட்டுப் படத்தைப் பற்றிக் கருத்து கூற வைத்துப் பிரபலமாக்குவார்கள்.

இங்கே கட்டுரை கண்டுகொள்ளப்படவில்லை என்றால் நண்பர்களிடம் ஓட்டு போடக்கூறி பிரபலமாக்குவார்கள். சமயங்களில் இவர்களே கள்ள ஓட்டும் போடுவார்கள்.

பிரபல இயக்குநர் சர்ச்சைக்குள்ளான படம் எடுத்தால் அனைவராலும் நொக்கி எடுக்கப்படுவார் எடுத்துக்காட்டு பாய்ஸ்.

பிரபல பதிவர் விவகாரமாக ஏதாவது கூறி விட்டால் அனைவராலும் கும்மப்படுவார், எடுத்துக்காட்டு பலர்.

திரையுலகில் அரசியல் குழுக்கள் பல உண்டு, ஒருவர் படம் ஓடக் கூடாது பிரபலம் ஆகக் கூடாது என்று எண்ணுபவர்கள் அதிகம். தோல்வி அடைந்தால் அதைப் பார்ட்டி வைத்துக் கொண்டாடுவார்கள், மற்றவரை வேண்டுமென்றே விமர்சித்துப் பேட்டியளிப்பார்கள்.

பதிவுலகிலும் ஏகப்பட்ட அரசியல், குழுக்கள் உண்டு அவர்களுக்குள் பின்னூட்டம் (Comments) இட்டுக்கொள்வார்கள், மற்றவர்கள் கட்டுரை நன்றாக இருந்தாலும் பாராட்ட மாட்டார்கள்.

எதிர் குழு நபர் ஏதாவது விசயத்தில் சிக்கிக்கொண்டால் அவரை எதிர் பதிவு போட்டுப் படுத்தி எடுத்து விடுவார்கள்.

அடிதடி படங்கள், சோகமான படங்கள், காமெடி படங்கள், வன்முறை படங்கள் சைக்கோ படங்கள் என்று பலவகையான திரைப்படங்கள் வரும்.

இங்கேயும் அரசியல் பதிவுகள், சினிமா பதிவுகள், விரக்தியான பதிவுகள், காமெடி பதிவுகள், கிண்டல் பதிவுகள், விளையாட்டுப் பதிவுகள் என்று பலவகையான பதிவுகள் வரும்.

எந்த மாதிரி படமெடுத்தாலும் ஓட மாட்டேங்குதே! எப்படித்தான் படமெடுப்பது என்று புலம்புபவர்கள் உண்டு.

எந்த மாதிரி எழுதினாலும் யாரும் படிக்க மாட்டேன் என்கிறார்களே! எப்படித்தான் எழுதுவது என்று புலம்புபவர்கள் உண்டு.

பிரபலம் ஆக வேண்டும் என்றே ஏதாவது சர்ச்சையான படத்தை எடுப்பார்கள், அவர்கள் நினைத்தது போல அனைவரது கவனமும் இவர்கள் பக்கம் திரும்பும்.

பிரபலம் ஆக வேண்டும் என்பதற்காக சர்ச்சையான விஷயத்தை கட்டுரையாக எழுதுவார்கள், அதே போல இவர்கள் பதிவு பற்றி அனைவராலும் விவாதிக்கப்படும். யார் இந்தப்பதிவர் என்று விசாரிக்கப்படும்.

ஒரு காலத்தில் பிரபலமாக இருந்த இயக்குனர்கள் பலர் தற்போது இருக்கும் இடம் தெரியவில்லை அல்லது அவர்களாகவே ஒதுங்கிக் கொண்டார்கள்.

அதே போல முன் பதிவுலகில் பிரபலமாக இருந்த பலரை காணவில்லை அல்லது அவர்களாகவே விருப்பப்பட்டு ஒதுங்கிக் கொண்டார்கள்.

யார் என்ன கூறினாலும் சரி யாருமே படமே பார்க்கவில்லை என்றாலும் சரி! இப்படித்தான் படமெடுப்பேன் என்று கூறுபவர்கள் உண்டு.

யார் படித்தாலும் சரி படிக்கலைனாலும் சரி! நான் இப்படித்தான் எழுதுவேன் என்று எழுதுபவர்கள் உண்டு.

நல்ல படங்கள் கவனிக்கப்படுவதில்லை என்று அவ்வப்போது ஏதாவது இயக்குனர் மக்களைக் குறை கூறி பேட்டியளிப்பதுண்டு உடன் திரையுலகத்தையும்.

நல்ல பதிவுகள் கவனிக்கப்படுவதில்லை என்று சில பதிவர்கள் சில நேரங்களில் பொங்குவதுண்டு உடன் பதிவுலகத்தையும் காய்ச்சி.

ஒரு கணிப்பொறியும் இணையமும் இலவசமாக ஒரு தளமும் கிடைத்து விட்டால் கண்டதையும் விமர்சனம் என்கிற பெயரில் எழுதுகிறார்கள் என்று வலைப்பதிவர்கள்மீது குற்றம் சாட்டுகிறார்கள்.

எதோ ஒரு தயாரிப்பாளர் கிடைத்து விட்டார் என்பதற்காக விளங்காத படமாக எடுக்கிறார்கள், உருப்படியான படமே எடுப்பதில்லை என்று திரையுலகின் மீது குற்றச்சாட்டு வைக்கிறார்கள்.

இதைப் போல இன்னும் ஏகப்பட்ட ஒற்றுமைகள் இருக்கிறது.. இதுவே போதும் என்று நினைக்கிறேன்.

ஆக மொத்ததுல…. 😉 .

தொடர்புடைய கட்டுரை

பத்திரிக்கை உலகம் பதிவுலகம் | ஒப்பீடு