வெளிப்படையாகப் பாராட்டப் பழகுங்கள்

தன்னை யாராவது பாராட்ட மாட்டார்களா? அங்கீகரிக்க மாட்டார்களா? என்று எதிர்பார்க்கும் பெரும்பாலானோர் மற்றவர்களைப் பாராட்டுவதில்லை. எனவே, பாராட்டப் பழகுங்கள்.

பாராட்டை, அங்கீகாரத்தை விரும்பாத எவரும் இவ்வுலகில் இருக்க வாய்ப்பில்லை, அப்படியே இருந்தாலும் அவர்கள் சராசரி மனிதர்களாக இருக்க வாய்ப்பில்லை.

நாம் தினமும் சந்திக்கும் எவ்வளவோ பேர் சிறந்த செயலைச் செய்து இருப்பார்கள் ஆனால், அதைப் பாராட்டாமல் தவிர்த்து இருப்போம்.

மற்றவரைப் பாராட்ட நம் மனம் ஒத்துக்கொள்வதில்லை. Image Credit – https://quotefancy.com/

‘நம்மை எவனும் கண்டுக்க மாட்டேங்குறான், நாம் கூறுவதற்கு மதிப்பு கொடுக்க மாட்டேங்குறான் ஆனால், நாம மற்றவர்களைப் பாராட்டணுமா!‘

என்ற எண்ணமே மேலோங்கியுள்ளது.

இதனால், ஒருவரின் திறமையை ரசித்தாலும், அதனால் பயன் பெற்றாலும் அவரைப் பாராட்டாமல் தவிர்த்து விடுகிறோம். பொறாமை, சுய கௌரவம் (EGO) தவிர்த்து வேறில்லை.

பாராட்டுவதில் என்ன பிரச்சனை?

அனைத்துக்கும் பாராட்ட வேண்டியது அவசியமில்லை ஆனால், உண்மையிலேயே ஒருவர் சிறப்பான செயலைச் செய்து இருந்தால், அவரைப் பாராட்டுவதில் என்ன பிரச்சனை?

நம்முடைய பாராட்டு மற்றவர்களுக்குச் சிறு ஊக்கத்தையும் அவர்கள் செய்யும் பணியில் திருப்தியையும் கொடுக்கும். நமக்குச் சாதாரண ஒரு செயலாக இருக்கலாம் ஆனால், சம்பந்தப்பட்டவருக்கு அப்படியல்ல.

குழந்தைகளுக்குக் கற்றுக் கொடுங்கள்

இதைத் தற்போது என்னுடைய பசங்களுக்கும் கற்றுக் கொடுக்கிறேன்.

Cab ல் சென்றால், ஓட்டுநருக்கு டாடா சொல்வதை இவர்களுக்குப் பழக்கப்படுத்தி இருக்கிறேன்.

காரில் செல்கிறோம், இடம் வந்தால் இறங்கிக்கொள்கிறோம். ஓட்டுநர்களும் நாள் முழுக்க ஓட்டிச் சலிப்பாகி இயந்திரம் போலவே மாறி இருப்பார்கள்.

அவர்களுக்கு இது போன்ற சின்ன உற்சாகத்தைக் கொடுக்கும் போது அவர்கள் மனது இளகுகிறது, நம்மையும் மதித்துக் கூறுகிறார்களே என்ற மகிழ்ச்சியைப் பெறுகிறார்கள்.

வெளிப்படையான பாராட்டு

பாராட்டுவதை மனதில் மட்டுமே நினைத்துக்கொண்டு இருக்காதீர்கள். அது மற்றவர்களுக்கு எக்காலத்திலும் தெரியாது. எனவே, வெளிப்படையாகப் பாராட்டப் பழகுங்கள்.

உங்கள் மேலாளர் ‘நீ நல்லா வேலை பண்ணுறேன்னு!‘ சொல்வது சரியா? பொறுமை இழந்து இதைக் குற்றச்சாட்டாக நீங்கள் வைக்கும் போது ‘மனதில் நினைத்துட்டு இருந்தேன்னு‘ சொல்வது சரியா? எதை விரும்புகிறீர்கள்?!

எனவே, வெளிப்படையாகப் பாராட்டக் கற்றுக்கொள்ளுங்கள். மனதில் மட்டுமே நினைத்துக்கொண்டு இருந்தால் போதாது. அன்பையும் வெளிப்படுத்தினால் மட்டுமே அதற்கு மதிப்பு, மனதில் நினைத்துக்கொண்டு இருப்பதால் அல்ல.

மனதினுள் மட்டும் நினைக்கும் பாராட்டும், அன்பும் பயனற்றது.

நீங்கள் நீங்களாக இருங்கள்

உண்மையிலேயே சிறப்பாகச் செய்து இருந்தால், மனைவி, கணவர், குழந்தைகள், நண்பர்கள், சக ஊழியர்கள், ஓட்டுநர்கள் என்று அனைவரையும் பாராட்டுங்கள்.

மற்றவர்கள் நம்மைப் பாராட்டவில்லை என்பதால், நாமும் அதே போல இருக்க வேண்டும் என்பதில்லை. கொடுக்கப்பழகுங்கள் பின்னர் நீங்களும் பெறத்துவங்குவீர்கள்.

துவக்கத்தில் சில விஷயங்களுக்கு ஏமாற்றமாக இருந்தாலும், நாம் சரியாக உள்ளோம் என்ற திருப்தியை உங்களுக்குக் கொடுக்கும்.

மற்றவர் குணங்கள் உங்களைக் கட்டுப்படுத்த / மாற்ற அனுமதிக்காதீர்கள்.

தொடர்புடைய கட்டுரை

சிகரத்தை அடைய எளிய வழி எது?

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).