அம்பானி வீட்டுத் திருமணமும் ஏழை விவசாயியும்!

முகேஷ் அம்பானி தனது மகள் இஷா அம்பானியின் திருமணத்தைப் பிரம்மாண்டமாக  நடத்தி வருகிறார். Image Credit

இதற்காக விமானங்கள், அதி சொகுசு விடுதிகள், விலையுயர்ந்த கார்கள் ஆகியவை விருந்தினர்கள் வருகைக்காக முன்பதிவு செய்யப்பட்டுள்ளன.

இது போதாதா நம்ம மக்கள் பொங்குவதற்கு!

ஏழை விவசாயி

“ஒரு ஏழை விவசாயி சிரமப்படுகிறான்” என்ற வசனத்தை ஆரம்பித்து விட்டார்கள். இவர்களுக்கு அக்கறை ஏழை விவசாயின் மீதல்ல, அம்பானி செய்யும் செலவின் மீது.

நம்ம ஆளுங்களுக்கு அது என்னமோ பணக்காரன் என்றாலே வயித்தெரிச்சல். இது வயித்தெரிச்சல் என்பதை விட மிகப்பெரிய தாழ்வு மனப்பான்மை.

நம்மால் செய்ய முடியாததை இது போல ஆதங்கத்தைச் சப்பைக்கட்டு கட்ட சம்பந்தமே இல்லாம பாவம் விவசாயி சட்டையைப் பிடித்து இழுக்கறாங்க.

விவசாயி

விவசாயி முக்கியத்துவம் இவர்கள் கூறி யாருக்கும் தெரிய வேண்டியதில்லை. விவசாயிகள் பல்வேறு நடைமுறை சிக்கல்களை எதிர்கொண்டு வருகிறார்கள்.

ஆனாலும் தங்கள் கெத்தை விடாமல் விவசாயம் செய்து வருகிறார்கள். இலாபமோ நட்டமோ விவசாயியால் விவசாயத்தை விட்டு வெளியே வர முடியாது.

என்ன பிரச்னை இருந்தாலும், சிக்கல்களை எதிர்கொண்டாலும் மதிப்பாகவே வாழ்கிறார்கள், குறைந்த பட்சம் வாழ முயற்சிக்கிறார்கள். இதைப்படித்துக்கொண்டு இருக்கும் பலரின் அப்பா விவசாயியாக இருப்பார், இருந்து இருக்கலாம்.

ஆனால், இந்தப் போராளிகள் இவர்கள் வயித்தெரிச்சலை, பொறாமையைச் சரிக்கட்ட சம்பந்தமே இல்லாமல் எதற்கெடுத்தாலும் விவசாயியைக் கொண்டு வந்து அனைத்திலும் நுழைத்து அவர்களை அசிங்கப்படுத்திக்கொண்டு இருக்கிறார்கள்.

“ஏழை விவசாயி” என்ற சொல்லே தற்போது சமூகத்தளங்களில் கிண்டலடிக்கப் பயன்படுத்தும் சொல்லாகச் சிலருக்கு மாறி விட்டது.

எதையாவது கூறி, “ஏழை விவசாயி கடந்து சென்றார்” என்று மீம் போடுகிறார்கள்.

விவசாயிகள் பருவமழை பொய்ப்பு, இடைத்தரகர்கள் என்று பல சிரமங்களையும் கடந்து தங்கள் வாழ்க்கையைத் தொடர்கிறார்கள்.

அவர்களை ஏன் இந்தப் போராளிகள் எதோ முடியாதவர்களைப் போலக் கட்டமைக்கிறார்கள்?!

இது அவர்களைச் சிறுமைப்படுத்தும் செயலே!

உனக்குப் பில்லியன் அடுத்தவனுக்கு லட்சம்

அம்பானி உலகின் மிகப்பெரும் பணக்காரர்களுள் ஒருவர், ஒரே பொண்ணு (இரண்டு பசங்க) அதற்குச் செலவு செய்ய நினைப்பார்.

ஒண்ணுமில்லாதவனே இப்ப இல்லாத அட்டகாசம் பண்ணுறான். பில்லியன் கணக்கில் சொத்துள்ளவர் செலவு செய்ய மாட்டாரா?!

அம்பானிக்கு அறிவுரை சொல்றவங்க, 15 – 20 லட்சம் செலவு செய்து திருமண மண்டபத்தில் திருமணம் செய்வதை நிறுத்திக் கோவிலிலோ / பதிவு திருமணமாகவோ செய்து ஏன் மீதியை ஏழை விவசாயிக்குக் கொடுக்கக் கூடாது?

உனக்குப் பில்லியன் பெரிய பணம் என்றால், உனக்குக் கீழே உள்ளவனுக்கு லட்சங்கள் பெரியது தானே!

உன்னோட தாழ்வு மனப்பான்மை, வயித்தெரிச்சலை மறைக்க எதுக்குயா பாவம் விவசாயிக்குச் செண்டிமெண்ட் முலாம் பூசி அவர்களை அசிங்கப்படுத்துறீங்க!

மற்றவர்களுக்கு உதவும் எண்ணம் உள்ளதா? மகிழ்ச்சி. உதவி செய். அடுத்தவனை உதவி செய்யச் சொல்லி நிர்பந்திக்காதே! பொறாமைப்படாதே!

உனக்கு அம்பானி செய்வது வெட்டிச் செலவாக இருந்தால், நீ செய்வது உனக்குக் கீழே உள்ளவனுக்குத் தண்டச் செலவாக இருக்கும்.

இதெல்லாம் புரியாமல் போராளி வேடம் போடுவது சரியல்ல. பலரின் பிரச்சனைகளுக்கு, கோபங்களுக்கு காரணம் வயித்தெரிச்சல் அன்றி வேறில்லை.