வெக்கை (நாவல்)

அசுரன் திரைப்படத்தின் மூலக்கதை ‘வெக்கை’ நாவல்.

வெக்கை

இயக்குநர் வெற்றிமாறன், ‘வெக்கை நாவலைப் படித்தவர்களுக்கு ‘அசுரன்’ படம் பிடிக்காது‘ என்று கூறியதால், இந்த நாவலைப் படம் பார்த்த பிறகே படித்தேன்.

ஏனென்றால், ‘எரியும் பனிக்காடு‘ நாவலை முதலில் படித்து, பின் அதை இயக்குநர் பாலா ‘பரதேசி‘ என்று எடுத்துக் கொடுமை செய்து விட்டார்.

நாவலைச் சொதப்பியதும் அல்லாமல், அந்த நூலின் ஆசிரியரையும் பரதேசியில் கேவலப்படுத்தி விட்டார்.

எனவே, அசுரனை பார்த்த பிறகு வெக்கை நாவலைப் படிக்கலாம் என்று முடிவு செய்தேன்.

வெற்றிமாறன் கூறியதில் உண்மை இருக்கலாம் ஆனால், எனக்கு நாவலைவிடத் திரைப்படம் ரொம்பப் பிடித்தது.

இந்நாவல், சிதம்பரம் கொலை செய்து விட்டுத் தனது அப்பாவுடன் சில நாட்கள் பல இடங்களில் மறைவாகத் தங்கி பின்னர் சரணடையச் செல்வதாகக் கதை செல்கிறது.

கிளைக்கதைகள் அம்மக்களின் வாழ்வியல், எண்ணங்களை நம்மிடையே போகிற போக்கில் எளிமையாக, எந்தத்திணிப்பும் இல்லாமல் இயல்பாகக் கூறிச் செல்கிறது.

சட்டம் என்பது பொது தானே! தங்களுக்கு மட்டும் ஏன் வேறு மாதிரி உள்ளது? என்பது தான் நாவல் நெடுக வினவப்படுகிறது.

கொலை நடந்தது மட்டுமே மையக்கருத்து ஆனால், அதன் பிறகு இரு சமூகங்களுக்கு இடையே நடைபெறும் சண்டையைக்காட்டாமல் அவர்கள் எப்படிச் சில நாட்கள் மறைந்து இருந்து பின் சரணடைகிறார்கள் என்பது மட்டுமே நாவல்.

வன்முறையும் இயல்பானது

சிறுவன் செய்த கொலையைக் கூடப் பதட்டம் இல்லாமல், இயல்பாக ஏற்றுக்கொள்ளும் அளவுக்கு அவர்கள் சமூகம் காயப்பட்டு இருக்கிறது.

நாவலில் திரைப்படம் போலத் திடீர் திருப்பங்களோ, வியப்புகளோ, சண்டைகளோ இல்லை.

கிளைக்கதைகள் பல இடங்களில் பிரிவதால், நாவலில் தற்போது யார் பேசுகிறார்கள், யார் காட்சியில் இருக்கிறார்கள், யார் எதைப் பற்றிப் பேசுகிறார்கள் என்ற குழப்பம் நாவல் நெடுக இருந்தது, கொஞ்சம் சலிப்பாகவும் இருந்தது.

‘Non Linear’ கதைபோல உள்ளது, பின்தொடரக் கடினமாக இருந்தது.

ஆசிரியர் பூமணி

நாவல் ஆசிரியர் பூமணி, அசுரன் திரைப்படத்தைப் பாராட்டி இருந்தாலும், எடுக்கப்பட்டதில் தனக்கு முழுத் திருப்தி இல்லையென்று கூறியதாக எதோ செய்தித்தாளில் படித்த நினைவு.

ஆசிரியரின் ஏமாற்றம் ஏற்கத்தக்கது ஏனென்றால், நாவலுக்கும் திரைப்படத்துக்கும் வேறுபாடுள்ளது.

தன் படைப்பு என்று கூறப்படும் திரைப்படம் தன் நாவல் போல இல்லாமல் வேறு மாதிரியாக எடுக்கப்பட்டு இருக்கும் போது இவ்வாறு தோன்றுவதில் வியப்பில்லை.

ஏனென்றால், எவருமே தன் எழுத்தை வேறொருவர் மாற்றி அதைத் தன் படைப்பாக வெளியுலகம் உணர்ந்தால், ஏற்க சிரமமே.

தான் சொல்லாத கருத்துகளும், காட்சிகளும் வந்து இருந்தால், அது எப்படித் தன் படைப்பாகக் கருத முடியும்.

எனவே, அவர் நினைத்தது இயல்பான ஒன்றே.

தவிர்க்கப்பட்ட ஆவணப்படம்

நாவலின் மையக்கருத்து, கதாப்பாத்திரங்கள் மற்றும் சில காட்சிகளை மட்டும் எடுத்துக்கொண்டு அசுரன் உருவாக்கப்பட்டு இருக்கிறது.

இயக்குநர் வெற்றிமாறன் தரப்பில் இருந்து யோசித்தால், அவர் செய்தது சரி தான்.

ஏனென்றால், இந்நாவலை அப்படியே படமாக்கி இருந்தால், அசுரன் ஆவணப்படம் போல இருந்து இருக்கும், பலரை சென்றடைந்து இருக்காது.

ஒருவகையில் வெக்கை நாவல் அப்படியே எடுக்கப்படவில்லையென்றாலும், ஆசிரியர் கூற வந்த மையக் கருத்துச் சிதைக்கப்படாமல் அனைத்து மக்களிடையே சென்று சேர்ந்து இருக்கிறது, தாக்கத்தை ஏற்படுத்தியிருக்கிறது.

இதற்காக ஆசிரியர் ‘பூமணி’ அவர்கள் பெருமைப்பட்டுக்கொள்ளலாம். இது மட்டுமல்லாமல் வெக்கை நாவல், விற்பனையில் தற்போது பரபரப்பாக உள்ளது.

எனவே, அவர் கூற வந்து கருத்து பலரிடையே சென்று சேர ‘அசுரன்’ முக்கியக் காரணியாக இருந்துள்ளது.

1982 ம் ஆண்டு எழுதப்பட்ட நாவலுக்கு 2019 ல் மிகப்பெரிய வரவேற்பு என்றால், முழுக் காரணமும் ‘அசுரன்’ தான்.

ஆனால், 37 (2019*) வருடங்களைக் கடந்தும்  நாவலில் வரும் காட்சிகள் இக்காலத்துக்கும் பொருந்துவது வருத்தமளிக்கிறது.

அமேசானில் வாங்க –> வெக்கை Link

தொடர்புடைய கட்டுரைகள்

எரியும் பனிக்காடு – உண்மைச் சம்பவங்களின் தொகுப்பு

பரதேசியும் எரியும் பனிக்காடும்

கொசுறு

அசுரன் திரைப்படம் வெளிவந்த வந்த சமயத்தில் அதிகம் விற்பனையான புத்தகங்கள் வரிசையில் முதலிடத்தில் ‘வெக்கை’ நாவல் இருந்தது குறிப்பிடத்தக்கது.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).