“சிவசக்தி” பாண்டியன்

1980 களில் பிறந்தவர்களுக்கு 90 களில் சிவசக்தி பாண்டியன் அவர்கள் தயாரிப்பில் வெளி வந்த படங்கள் அச்சமயத்தில் இளைஞர்களைப் பெருமளவில் கவர்ந்தவை.

இவர் படங்களின் பாடல்களைக் கேட்டாலே நண்பர்களுடன் சுற்றியது தான் நினைவுக்கு வரும். இவர் படங்கள், பாடல்கள் குறித்து அதிகம் பேசி இருக்கிறோம்.

ஓவ்வொரு படத்தின் பாடல்களும் அவ்வளவு அட்டகாசமாக இருக்கும்.

தேவா இவரின் படங்களுக்கு மட்டும் அதிகச் சிரத்தை எடுத்துக்கொண்டாரோ என்று நினைக்கத் தோன்றும்.

டூரிங் டாக்கீஸ்

சித்ரா லட்சுமணனின் “டூரிங் டாக்கீஸ்” சேனலுக்காகக் கொடுத்த பேட்டியைப் பார்த்த போது பழைய நினைவுகளுக்குச் சென்று விட்டேன், அற்புதமான நாட்கள் அவை.

சிவசக்தி பாண்டியன் அவர்களின் உறவினர் பையன் என் அறையில் இருந்தான்.

அப்போது அவர் தயாரித்த படங்கள் குறிப்பாகக் காதல் கோட்டை தயாரிப்பு, சம்பவங்கள் பற்றி அவன் கூறும் போது வியப்பாகக் கேட்டுக்கொண்டு இருப்போம்.

அதுவும் ஹீரா பற்றிக் கூறும் போது.. 🙂 🙂 .

சென்னை பாடியில் “சிவசக்தி” என்ற திரையரங்கை வைத்துள்ளார் அதனாலயே “சிவசக்தி” பாண்டியன் என்று அழைக்கப்பட்டார்.

மிகப்பெரிய தலைவர் ரசிகர் இவர். இவருடைய படப் பாடல்களில் எல்லாம் ஏதாவது ஒரு காட்சியில் தலைவரைக் கொண்டு வந்து விடுவார்.

வான்மதி & காதல் கோட்டை

திரையரங்கில் வெளியிட்ட “முத்து படத்தின் தின வசூலை வைத்தே அஜித் நடித்த “வான்மதி” படத்தை 60% முடித்தேன்” என்று கூறிய போது வியப்பாக இருந்தது.

“வான்மதி” படம் மிகச்சிறந்த பொழுது போக்குப் படம். அதில் வரும் பாடல்களை இன்றும் ரசித்துக் கேட்பேன். எனக்கு மிக மிகப் பிடித்த பாடல்கள்.

லாஜிக், தமிழ் திரையுலகை மாற்ற வந்த படம் என்றெல்லாம் யோசிக்காமல் பொழுதுபோக்கான படம் என்று பார்த்தால், ரசிக்கத் தக்க படம்.

“காதல் கோட்டை” பற்றிச் சொல்லவே வேண்டியதில்லை. அஜித்துக்கு மிகப்பெரிய வியாபாரத்தை, திருப்பு முனையைக் கொடுத்த படம்.

இப்படம் பற்றிய தன்னுடைய அனுபவங்களைச் சிவசக்தி பாண்டியன் கூறுவதைச் சலிப்புத்தட்டாமல் கேட்கலாம்.

திரைப்படத்தைப் போன்ற ஒரு சுவாரசியத்தை இவர் பேட்டி கொடுத்தது.

கண்ணெதிரே தோன்றினாள்

“கண்ணெதிரே தோன்றினாள்” படம் அப்போது சக்கை போடு போட்ட படம். இதில் வரும் பாடல்கள் அனைத்தும் அப்படியொரு வெற்றியைப் பெற்றது.

“ஜீன்ஸ்” படம் வந்த கையோடு பிரசாந்துக்கு வெற்றியாகிய படம்.

பிரசாந்த்துக்கு இப்படத்தின் கதாப்பாத்திரம் மிகப்பொருத்தமாக அமைந்தது. பிரசாந்தை தவிர வேறு எவருக்கும் பொருந்தி இருக்குமா என்பது சந்தேகமே!

எப்படியோ வந்து இருக்க வேண்டிய பிரசாந்த் எப்படியோ போய்ட்டார்.

இப்படம் பற்றிக் கூறும் போது ஒரு விஷயத்தைப் பகிர வேண்டும் என்று தோன்றுகிறது.

பலர் கூறி கேட்டு இருக்கலாம். “இப்படத்தில் எனக்கு சிறு காட்சி தான் ஆனால், முக்கியமான காட்சி, திருப்புமுனை காட்சி” என்று கூறுவார்கள் ஆனால், படம் வந்தால் அவர்கள் கூறிய அளவுக்கு இருக்காது.

இப்படத்திலும் சின்னி ஜெயந்த், “எனக்கு இது முக்கியமான கதாப்பாத்திரம், குறைவான நேரம் வந்தாலும் எனக்கு முக்கியத்துவம் இருக்கும்” என்றார்.

வழக்கம் போலச் சொல்கிறார்கள் என்று நினைத்தேன் ஆனால், உண்மையாகவே இவருடைய கதாப்பாத்திரம் படத்தின் இறுதியில் காட்சியையே மாற்றும்படி இருக்கும். எனக்கு இப்படம் ரொம்பப் பிடிக்கும்.

இசையமைப்பாளர் தேவா

தேவா ஒவ்வொரு படத்திலும் ஒரு கானா பாடலைப் போட்டுக்கொடுத்து விடுவார். அந்த ஒரு பாடலும் அசத்தல் வெற்றி பெறும்.

இதை நேரம் என்பதைத் தவிரச் சொல்ல வேறு ஒன்றுமில்லை.

“நானும் சென்னை, தேவாவும் சென்னை எனவே கானா பாடல் எங்களுக்கு நன்கு பொருந்தியது” என்று சிவசக்தி பாண்டியன் கூறியது ஏற்றுக்கொள்ளும்படி இருந்தது.

“வெற்றிக்கொடி கட்டு” படமெல்லாம் அதிரி புதிரி வெற்றியாகும். அனைத்துமே ஒருங்கே அமைந்த படம். இப்படத்தின் நகைச்சுவை இன்றளவும் பேசப்படுகிறது.

பார்க்காமல் காதல், பேசாமல் காதல் என்று வித விதமான காதல் படங்களை எடுத்தார்.

இக்காலம் சிவசக்தி பாண்டியன் அவர்களுக்குச் சுக்கிர திசை காலம் என்றே கூற வேண்டும். ஒவ்வொருவருக்கும் ஒவ்வொரு காலம்.

தொட்டதெல்லாம் வெற்றி என்று இருந்தது.

மக்களின் ரசனை அறிந்து பல வெற்றிப்படங்களைப் பொழுதுபோக்குப் படங்களைக் கொடுத்து ரசிகர்களை மகிழ்வித்து இருக்கிறார்.

சிவசக்தி பாண்டியன் அவர்களின் வாழ்க்கையில் மறக்க முடியாத, கூடாத நபர் என்றால் அது நிச்சயம் இசையமைப்பாளர் தேவாவாகத்தான் இருக்க முடியும்.

அவர் படங்களின் வெற்றியில் தேவாவின் பங்கு மகத்தானது.

இவருடைய பேட்டியைத் தவறாமல் பாருங்கள். இவரின் பேச்சுக்காகவே பார்க்கலாம். அனுபவங்களை அவ்வளவு ஆர்வமாக, சுவாரசியமாக, ரசித்துக் கூறுகிறார்.

சிறப்பாகப் பேட்டி எடுத்த சித்ரா லட்சுமணன் அவர்களுக்கு வாழ்த்துகள்.

தொடர்புடைய கட்டுரை

இசையமைப்பாளர் தேனிசைத் தென்றல் தேவா

“டூரிங் டாக்கீஸ்” சித்ரா லட்சுமணன்

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).