சிங்கப்பூர் விவசாயம்!

என்னது சிங்கப்பூர்ல விவசாயமா!! என்று குழப்பமாக இருக்கா! எனக்கும் அப்படித்தான் இருந்தது ஆனால், நம்ம ஊர் போலப் பெரியளவில் சிங்கப்பூர் விவசாயம் அல்ல.

சிங்கப்பூர் விவசாயம்

புதிய வழிமுறைகளைப் பயன்படுத்தி சிறிய அளவில் செய்து கொண்டு உள்ளார்கள்.

ஆறு வருடமாகச் சிங்கப்பூரில் இருந்தும் இப்படியொரு விஷயம் இருப்பது தற்போது தான் தெரிய வருகிறது. இது கொஞ்சம் கடுப்பாகவும் இருந்தது.

விவசாயம், இயற்கை, மரங்கள், சுற்றுச் சூழல் போன்றவற்றில் ஆர்வம் இருப்பதால், ஆர்வம் உள்ள நண்பர்களுடன் விவாதித்ததில் கிடைத்த தகவல் தான் இது.

முன் கூட்டியே திட்டமிட்டு கடந்த ஞாயிறு அன்று இரு நண்பர்களுடன் சென்று வந்ததில் சில தகவல்களை உங்களுடன் பகிர்ந்து கொள்கிறேன்.

இதில் எனக்கு முழு விவரங்களும் தெரியாது. தெரிந்த வரை & நண்பனிடம் கேட்டுப் பெற்ற தகவல்களை அடிப்படையாக வைத்து இதை எழுதி உள்ளேன்.

Hydroponics Plants

இங்கே குறிப்பிடும் விவசாயம் போல அல்லாமல் வேறுபல வழி முறைகளிலும் செய்கிறார்கள்.

எனவே இங்கே கூறியுள்ளதை வைத்துச் சிங்கப்பூர் முழுவதும் இந்த நடைமுறையே பின்பற்றப்படுகிறது என்று தவறாக நினைத்துக் கொள்ள வேண்டாம்.

இந்த முறையில் வளர்க்கப்படும் செடிகளுக்கு Hydroponics Plants என்று பெயர்

பல்வேறு புதிய விவசாய தொழில்நுட்பங்களைப் பற்றி தெரிந்து கொள்ள முடிந்தது ரொம்ப மகிழ்ச்சியாகவும் வித்யாசமான அனுபவமாகவும் இருந்தது.

Vermiculite

இவர்களின் இந்த விவசாயத்தில் “மண்” கிடையாது. ஆமாம்! நீங்கள் நம்பித்தான் ஆகணும் இவர்கள் வளர்க்கும் செடிகள் தண்ணீர் மூலம் மட்டும் வளர்கிறது.

மணல் போலச் சட்டிகளில் காணப்படுவதன் பெயர் Vermiculite.

இதைக் கூகுள் Images ல் தேடினால் மேலும் படங்கள் கிடைக்கும். தண்ணீர் என்றால், வெறும் தண்ணீர் அல்ல இதில் அனைத்து சத்துக்களும் கலந்து விடப்பட்டுள்ளன.

உரத்திற்கும் இதற்கும் வித்யாசம் உள்ளது.

ஸ்பான்ஞ்சில் சிறிது கிழித்து அதில் விதையைப் போடுகிறார்கள். இது போல ஒரு பெரிய ஸ்பான்ஞ் முழுக்க சீரான இடைவெளியில் செய்கிறார்கள்.

பின்னர் இதில் தண்ணீர் ஊற்றி வைத்து விடுகிறார்கள்.

விதை வளர்ந்து கொஞ்சம் பெரியதானவுடன் இதில் இருந்து எடுத்துத் தெர்மோ கோலில் ஓட்டை போட்டு வைத்து இருக்கும் இடத்தில் செருகி வைத்து விடுகிறார்கள்.

சரியாகப் புரியவில்லையே! என்று தோன்றினால் மிக எளிதான எடுத்துக்காட்டு உள்ளது. நம்ம ஊரில் விதை நெல்லை போட்டு நெற்பயிர் வளர்ப்பார்கள்.

பின்னர் கொஞ்சம் வளர்ந்தவுடன் பிடுங்கி வயலில் நாற்று நடுவார்கள்.

இதே முறை தான் மேலே நான் கூறியது.

சத்துப் பொருட்கள்

இது போல அதிகளவில் செய்து காய்கறி செடிகளை உற்பத்தி செய்கிறார்கள். இதில் சுற்றிலும் வலை போடப்பட்டுள்ளது மேலே மழைக் காகிதம் போடப்பட்டுள்ளது.

இதனால் மழை பெய்தாலும் மழை நீர் உள்ளே இறங்காது, அதோடு வெயிலும் கடுமையாகத் தாக்காது.

சிங்கப்பூரில் அடிக்கடி மழை பெய்யும் என்பது குறிப்பிடத் தக்கது. இதில் உள்ள நீர், சத்துப் பொருட்கள் கலந்து இருப்பதால், மழை நீர் கலக்காமல் பார்த்துக்கொள்ள வேண்டும்.

நாங்கள் சென்ற போது, அங்கே இருந்த மேலாளர் எங்களுக்கு மிகவும் பொறுமையாகவும் விளக்கமாகவும் பல தகவல்களைக் கூறினார்.

படத்தில் நண்பர்களுடன் அங்கே இருந்த மேலாளர்.

இங்கே செடிகள் வைக்கப்பட்டுள்ள இடத்தில் டியூப் மூலம் சத்து நீர் செலுத்தப்படுகிறது.

முதல் முறை அமைப்பது மட்டுமே சிரமமான பணி, அதன் பிறகு பராமரிப்பு பணிகள் மிகக் குறைவானவை.

இங்கே உருவாக்கப்படும் கீரை மற்றும் காய்கறிகள் Pack செய்து சிங்கப்பூரின் பிரபலமான பல்பொருள் அங்காடியான Fairprice போன்ற கடைகளுக்கு அனுப்பப்படுகிறது.

காய்கறிகள் / உணவுப் பொருட்கள்

சிங்கப்பூருக்கு வரும் காய்கறிகள் / உணவுப் பொருட்கள் மலேசியா, ஆஸ்திரேலியா மற்றும் தாய்லாந்து போன்ற நாடுகளில் இருந்து வருபவையே.

சிங்கப்பூரில் இவ்வளவு பரந்து விரிந்த விவசாய இடத்தை இங்கு தான் கண்டேன். இங்கே சென்றது மலேசியா பகுதிகளைச் சுற்றியது போல இருந்தது.

இந்த இடங்களில் இண்டஸ்ட்ரியல் எஸ்டேட்  போல நிறுவனங்கள் இவ்விடங்களை வைத்துள்ளன.

ஒவ்வொருவரும் கிட்டத்தட்ட இதே போல [அடிப்படை தொழில்நுட்பம்] ஆனால், வெவ்வேறு முறைகளில் விவசாயம் செய்கிறார்கள்.

குழந்தைகள்

அலுவலகம் உள்ளே சென்ற போது, அங்கே குழந்தைகள் உட்காரும் நாற்காழிகள் இருந்தது.

இது எதற்கென்று கேட்ட போது “இங்கே பள்ளிக் குழந்தைகளை அழைத்து வருவார்கள் அவர்கள் அமரத் தான் இவை உள்ளன” என்று கூறினார்கள்.

பள்ளிக் குழந்தைகளை அழைத்து வந்து அவர்களுக்கு இது பற்றி விவரங்களை விளக்குகிறார்கள்.

சிறு வயதிலேயே இது போன்ற விசயங்களில் குழந்தைகளுக்கு ஆர்வம் ஏற்படுத்துவது சந்தோசமாக இருந்தது. நல்ல முயற்சி.

இந்த நிறுவனத்தின் இணைய தளம் http://www.ohfarms.com.sg. இங்கே சென்று மேலும் பல தகவல்களைக் காணலாம்.

எனக்குப் புரிந்த அளவில் / நண்பன் கூறிய தகவல்களை வைத்துக் குறிப்புகளுடன் எழுதியுள்ளேன்.

மேற்கூறியதை இந்த நிழல் படங்களுடன் ஒப்பிட்டுப் பார்த்தால் புரிந்து கொள்ள எளிமையாக இருக்கும்.

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.