இந்தியாவை அதிரவைத்த இறுதிப்போட்டி | 2011

கோடிக்கணக்கான மக்களின் எதிர்ப்பார்ப்புகள் பிரார்த்தனைகளை ஈடுகட்டி மிகச்சிறப்பாக விளையாடி இந்திய அணி வெற்றி பெற்று விட்டது. Image Credit

ஏகப்பட்ட மன அழுத்தங்கள் இருந்தும் இவ்வளவு சிறப்பாக விளையாடியதை நிச்சயம் பாராட்டாமல் இருக்க முடியவில்லை.

இந்தியாவை அதிரவைத்த இறுதிப்போட்டி

முதலிலேயே டாஸ் போடும் போது குழப்பம் இரண்டாவது முறையாக சங்ககாரா டாஸ் வெற்றி பெற்று எதிர்பார்த்ததுபோலப் பேட்டிங்கை தேர்வு செய்தார்.

இதுவே இந்திய ரசிகர்களுக்கு ஏமாற்றமானது.

இருப்பினும் ஆட்டத்துவக்கதில் கட்டுக்கோப்பாக நம்மவர்கள் வீசிய பந்துகளாலும் சிறப்பான ஃபீல்டிங்காலும் இலங்கை அணியினர் எடுக்கத் திணறினர்.

ஆனால், அதிக விக்கெட் இழப்பு ஏற்படாமல் பார்த்துக்கொண்டார்கள். ஜாகிர் சிறப்பாக பந்து வீசி மூன்று மெய்டன் ஓவர்கள் போட்டுக் கலக்கினார்.

எப்போதும் கலக்கலாக விளையாடும் சங்ககாரா இதில் நன்றாக விளையாடினாலும் தொடர முடியாமல் ஆட்டம் இழந்தார்.

ஆனால், ஜெயவர்தனே தொடர்ந்து சிறப்பாக விளையாடிச் சதமடித்து இந்திய அணிக்கு அச்சுறுத்தலாக இருந்தார்.

ஸ்ரீசாந்த் பந்தை வெளுத்து வாங்கினார்கள். 45 வது ஓவர் வரை ஒழுங்காக விளையாடிக்கொண்டு இருந்த அணிக்கு அதன் பிறகு சனி ஆரம்பித்தது.

அனைத்து பந்தையும் செம்ம அடி அடித்தார்கள்.

சூப்பர் பந்து வீச்சாளராக இருந்த ஜாகிரை டப்பா பந்து வீச்சாளர் ரேஞ்சுக்கு ஆக்கி விட்டார்கள்.

ஸ்ரீசாந்த்தே பரவாயில்லை என்கிற அளவிற்கு 4, 6 ஆக வாரி வழங்கினார். கடைசி ஐந்து ஓவரில் மட்டும் 63 ரன்கள்.

இந்திய ரசிகர்கள் பலர் சுத்தமாக நம்பிக்கை இழந்து விட்டனர்.

274 ஓட்டங்கள்

இரவு ஆட்டத்தில் 274 ஓட்டங்கள் என்பது சவாலான இலக்கு தான் அதுவும் இதைப்போல டென்ஷன் மிகுந்த இறுதி ஆட்டத்தில். அதனால் இந்தியா ஜெயிப்பது கஷ்டம் என்றே பலரும் முடிவு செய்து விட்டார்கள்.

தாறுமாறான டென்ஷன் உடன் நமது ஆட்டம் துவங்கிய போது சேவாக் 4 அடித்து ஆட்டத்தைத் துவக்குவார் என்று பார்த்தால் டக் அவுட் ஆகி வெளியேறிக் கோடிக்கணக்கான இந்தியர்களின் இதயங்களை உடையச்செய்தார்.

அதன் பிறகு நூறாவது சதம் அடிப்பார் என்று அனைவராலும் எதிர்பார்க்கப்பட்ட சச்சினும் விரைவிலேயே வெளியேற அனைவரும் அதிர்ச்சியின் எல்லைக்கே சென்று விட்டனர்.

நானெல்லாம் டென்ஷனில் போட்டியே பார்க்கவில்லை.

சச்சினுக்கேல்லாம் நிச்சயம் கடுமையான மன அழுத்தம் இருந்து இருக்கும் அதனால் அவுட் ஆனதில் எனக்கு வியப்பில்லை.

இருப்பினும் 21 வருட கிரிக்கெட் அனுபவமுள்ளவர் பதட்டப்படுவது கொஞ்சம் ஏமாற்றம் தான்.

காம்பிர்

எதிர் அணியினர் உட்பட அனைவரும் சச்சினை குறி வைப்பதால் நிச்சயம் யாராக இருந்தாலும் இயல்பாக இருக்க முடியாது.

இதன் பிறகு காம்பிரும் கோலியும் நின்று விளையாடி மெதுவாக ரன்னை உயர்த்தினர் அதிலும் காம்பிர் மிக அருமையாக விளையாடினார்.

அவர் விளையாடிய ஆட்டம் தான் இந்திய ரசிகர்களிடையே இந்தியா வெற்றி பெற வாய்ப்புள்ளது என்ற நம்பிக்கையைத் தோற்றுவித்தது.

இதன் பிறகு காம்பிருடன் ஜோடி சேர்ந்த அணி கேப்டன் தோனி சிறப்பான ஆட்டத்தை வெளிப்படுத்தினார். இந்த உலகக்கோப்பை போட்டிகளில் இவர் அடித்த அதிகபட்ச ரன்களே 34 ஆகும்.

சுத்தமாக ஃபார்மே இல்லாமல் இருந்தார்.

இந்த முறை யுவராஜ் க்கு பதிலாக தோனி களம் இறங்கி தான் எடுத்த முடிவு சரியானது தான் என்பதை அட்டகாசமாக நிரூபித்தார்.

ஒவ்வொரு பந்தையும் இருவரும் சிறப்பாக விளையாடி 100 ரன்கள் சேர்த்தனர்.

100 அடிக்க மூன்று ரன்களே இருக்கையில் பரிதாபமாக காம்பிர் ஆட்டம் இழந்தார். இதன் பிறகு வந்த யுவராஜ் க்கு அதிக வாய்ப்பில்லை.

விளையாடத் தோனியே முழுப்பொறுப்பையும் ஏற்றுக்கொண்டார்.

இலங்கை அணியைப்போலக் கடைசி பந்தில் 6 அடித்து அணியை வெற்றிபெறச் செய்து 121 கோடி மக்களின் எதிபார்ப்பை ஒரு பொறுப்பான கேப்டனாக நிறைவு செய்தார்.

இக்கட்டான நேரத்தில் ஒரு கேப்டன் எப்படி நடந்து கொள்ள வேண்டும் என்பதற்கு உதாரணமாக இருந்தது நேற்றைய ஆட்டம்.

இலங்கை அணிக்கு இரண்டு முறை இறுதி ஆட்டத்தில் தோற்றது நிச்சயம் இலங்கை ரசிகர்களுக்கு கடும் மன வருத்தத்தைத் தந்து இருக்கும்.

நேற்றைய போட்டி முரளிதரனுக்கு கடைசிப்போட்டி. சச்சினுக்கு கடைசி உலகக்கோப்பைபோட்டி.

இதில் அனைவராலும் எதிர்பார்க்கப்பட்ட 100 வது சதத்தைச் சச்சினால் அடிக்க முடியவில்லை குறைந்த பட்சம் 50 கூட.

இதை விடக்கொடுமையாக முரளிதரன் ஒரு விக்கெட் கூட எடுக்க முடியவில்லை. சச்சினைப் போலவே எனக்கு பிடித்தமானவர் முரளிதரன்.

மிகவும் அமைதி, எளிமை, எந்த பந்தாவும் செய்யாதவர்.

அவருக்கும் இது ஒரு சோகமான ஒரு நிகழ்ச்சியாக இருந்து இருக்கும். சச்சின் பரவாயில்லை அணி வெற்றி பெற்று உலகக்கோப்பையை கைப்பற்றி விட்டது.

தோனி

யுவராஜ், தோனி மற்றும் அணியில் உள்ள அனைவரும் அணியை வெற்றி பெறச் செய்து இந்த வெற்றியைச் சச்சினுக்கு அளிப்போம் என்று கூறி இருந்தனர்.

சொன்னது போலவே சிறப்பாக விளையாடி வெற்றியைச் சச்சினுக்கு அளித்தனர்.

வெற்றி பெற பிறகு தோனி கூறியதாவது “ஒருவேளை இந்திய அணி தோல்வி அடைந்து இருந்தால் அஸ்வின் எடுக்கப்படாதது, ஸ்ரீசாந்த்தை எடுத்தது, யுவராஜை இறக்காமல் நான் இறங்கியது ஆகியவை பெரிய பிரச்சனை ஆகி இருக்கும் ஆனால், அவை எதுவும் நடக்காமல் போய் விட்டது” என்று கூறினார்.

உண்மை தானே!

ஹை வோல்டேஜ்

இந்திய அணி மட்டுமே மூன்று கடுமையான போட்டிகளைச் சந்தித்தது. ஆஸி யுடன் முதல்போட்டி அதன் பிறகு ஹை வோல்டேஜ் பாகிஸ்தானுடன் அதன் பிறகு மூன்றாவதாக இலங்கை அணியுடன்.

இலங்கை அணிக்கு இறுதிப்போட்டியைத் தவிர வேறு எதுவும் சிரமமாக இருக்கவில்லை.

ஆனால், இறுதிப்போட்டியில் அதனுடைய விளையாட்டு தான் இறுதிப்போட்டிக்கு முழு தகுதியானது என்பதை நிரூபிக்கும் வகையில் இருந்ததை மறுக்க முடியாது.

இலங்கை அணி வீரர் ஜெயவர்தனே சதம் அடித்த போதெல்லாம் இலங்கை அணி வெற்றி பெற்றுள்ளது இந்த 2011 உலகக்கோப்பை இறுதிப்போட்டியைத் தவிர.

முன்பு எனக்கு பிடிக்காத அணியாக பாக் இருந்தது தற்போது ஆஸி உள்ளது. இதில் நிச்சயம் இலங்கை அணி இல்லை 🙂 .

இந்த வெற்றிக்கு இந்தியா முழுத்தகுதியான அணியே!

ஆஸியுடன் 2003 ல் மிகக்கேவலமாக தோற்ற காயத்தை இந்தப்போட்டியின் சிறப்பான இந்திய அணியின் ஆட்டம் சரி செய்தது.

உலகில் நேற்று [02-04-2011] அதிக சந்தோசமாக இருந்து இருக்கும் ஒரு நபர் என்றால் அது நிச்சயம் சச்சினாகத் தான் இருக்கும்.

அணியினர் அனைவரும் ஒருவர் விடாமல் இந்த வெற்றி சச்சினுக்கு என்று கூறி அவரை பெருமைபடுத்தி விட்டார்கள்.

தன் மகன் மற்றும் மகளுடன் மிகுந்த சந்தோசமாக உலா வந்தார் சதம் அடிக்க முடியாத சிறு வருத்தத்துடன்.

உலகில் எதிரணியாக இருந்தாலும் நேசிக்கப்படுவர் சச்சின் ஒருவரே.

Gary Kirsten

அணிவீரர்கள் பலரின் உழைப்பு இருந்தாலும் இவை எல்லாவற்றையும் விட இந்தச் சாதனைக்கு மிக முக்கியமான நபர் மிக அமைதியாக இருந்து வாய்ச்சொல் வீரராக இல்லாமல் செயலில் காட்டிய பயிற்சியாளர் Gary Kirsten (தென் ஆப்ரிக்கா).

இவரையும் அணி வீரர்கள் தூக்கிச் சென்றது மனதுக்கு நிறைவாக இருந்தது.

சச்சின் 100 அடிக்கவில்லை என்றாலும் அதிக ரன்களை எடுக்கவில்லை என்றாலும் நேற்று அவரே கதாநாயகனாக இருந்தார்.

தோனி டென்ஷன் ஆகாமல் மிக கூலாக விளையாடினார்.

அவர் அடித்த கடைசி 6 ல் இந்தியாவே அதிர்ந்தது. இந்தியா முழுக்க அனைத்து மக்களும் வெடி வெடித்து ஆட்டம் போட்டு சந்தோசமாக கொண்டாடினர்.

கிரிக்கெட்டை வெறுப்பவர்களும் இந்த நேரத்தில் சந்தோசமாகவே இருந்து இருப்பார்கள் 😉 .

சுமக்க வேண்டிய நேரம்

21 வருடமாக கிரிகெட்டை தன் தோளில் சுமந்து வந்தார் இப்போது நாங்கள் சச்சினை எங்கள் தோளில் சுமக்க வேண்டிய நேரம் – கோலி

உலகக்கோப்பை நடத்திய நாடுகள் தங்களது நாட்டில் வெற்றி பெற்று கோப்பையைக் கைப்பற்றியதில்லை அது இந்தியா விசயத்தில் மாறியுள்ளது.

1983 ல் கபில் தலைமையில் உலககோப்பையை வெற்றி பெற்ற இந்திய அணி அதன் பிறகு 28 வருடம் கழித்து இந்த வெற்றியை பெற்று இருக்கிறது.

போட்டியின் நாயகனாக தோனியும் தொடர் நாயகனாக யுவராஜும் தேர்ந்தெடுக்கப்பட்டனர்.

கடந்த முறை இந்திய அணி கேவலமாக விளையாடித் தோற்றதால் வீரர்கள் வீட்டில் கல்லெறி சம்பவங்கள் நடந்தன. குறிப்பாக தோனி வீட்டில்.

இந்த வெற்றி அந்தக்காயத்தை ஆற்றும் என்று நம்புகிறேன்.

பேரன்பும் பெருங்கோபமும்

இந்திய ரசிகர்கள் கோபம் கொண்டால் கொடுமையாக இருக்கும் அன்பு கொண்டால் ஜீரணிக்க முடியாத அளவிற்கு இருக்கும்.

இந்திய கிரிக்கெட் ரசிகர்கள் பேரன்பும் பெருங்கோபமும் கொண்டவர்கள். இவர்களைச் சமாளிப்பது என்பது ஒரு போருக்கு நிகரானது.

போராடி தோற்றால் பெரிதாக பாதிப்பு இருக்காது கேவலமாக தோற்றால் இதைப்போலத் தர்மசங்கடங்கள் தவிர்க்க முடியாதது காரணம் கிரிக்கெட் இந்தியாவில் எவற்றையும் விட அதிகமாக நேசிக்கப்படுகிறது.

இந்தியாவில் உள்ள பெரிய மதம் இந்து மதமல்ல அதன் பெயர் “கிரிக்கெட்” அதன் கடவுள் சச்சின்

கோடிக்கணக்கான இந்தியர்களின் எதிர்பார்ப்புகளைப் பொய்யாக்காமல் பொறுப்புணர்ந்து சிறப்பாக விளையாடிய இந்திய அணிக்கு குறிப்பாக கம்பீர் தோனிக்கு மனமார்ந்த வாழ்த்துக்கள்.

கடும் போட்டியைக் கொடுத்த இலங்கை அணிக்கும் பாராட்டுகள்.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).