FlashPay | நம்ம ஊருக்கு எப்போது வரும்?

உலகத்திலேயே சில்லறையை மையமாக வைத்து ஒரு சுரண்டல் நடக்க முடியும் என்றால், அது இந்தியாவில் தான் இருக்க முடியும் என்று நினைக்கிறேன். Image Credit

சில்லறை இருக்கா?

எந்தக் கடை / பேருந்து சென்றாலும் “சார்! சில்லறை ரெடியா வைத்துக்குங்க!” என்ற குரல் தான் வருகிறது.

கடந்த முறை சிங்கப்பூரில் இருந்து முதன் முறையாகத் திருச்சி வந்த சமயத்தில் Exchange ல் பணம் மாற்றிய போது 100 ரூபாயாக இருந்ததால் பேருந்தில் என்ன பிரச்சனை செய்யப் போகிறார்களோ என்ற கவலையே எனக்கு இருந்தது.

அந்த அளவிற்குச் சில்லறைக்குப் பயந்து இருக்கிறேன்.

கடையில் எது வாங்கினாலும், “சார்! சில்லறை இல்லை இந்தக் கடலை பர்ஃபி ₹5 வாங்கிக்குங்க!!!, சாக்லேட் வாங்கிக்குங்க!” என்ற கண்டபடி கடுப்பை ஏத்துறாங்க.

இவர்களாலே Halls சாக்லேட் நிறுவனம் பெரிய பணக்கார நிறுவனமாக மாறி இருக்கும் என்று நினைக்கிறேன்.

பேருந்தில் நடத்துனர் பையில் சில்லறை இருந்தாலும் கொடுப்பதில்லை. 50 பைசா 1 ரூபாய் மீதம் இருந்தால், அது காந்தி கணக்குத் தான். வடிவேல் மாதிரி, கொடுப்பாரா என்று பார்த்துட்டே வர வேண்டியதாக இருக்கிறது.

இறுதியில் கொடுப்பதே இல்லை, கொடுத்தால் உலக அதிசயம்.

கட்டணத் தள்ளுபடி 

நமது மத்திய அரசாங்கம் கள்ளப்பணத்தை ஒழிக்கப் பற்று அட்டை (Debit card) கடனட்டை (Credit card) போன்றவற்றை ஊக்குவிக்கத் தற்போது முயற்சித்து வருகிறது.

இதற்குத் தற்போது விதிக்கப்படும் கட்டணங்களை ரத்து செய்யவும் பரிசீலித்து வருகிறது.

இதன் மூலம் நிறுவனங்கள் சிறு கடைகள் கூடுதல் கட்டணங்களை வசூலிப்பதை நிறுத்துவதால், பொதுமக்கள் அட்டைகளை அதிகம் பயன்படுத்துவார்கள் என்ற எண்ணத்தில் இவ்வாறு முடிவு செய்து இருக்கிறார்கள்.

மிக நல்ல முயற்சி.

இதன் மூலம் சில கடைகளில் கடனட்டை பயன்படுத்தும் போது வசூலிக்கப்படும் கட்டணத்தால் பொது மக்கள் கடனட்டை பயன்படுத்தும் தயக்கம் நீங்கும்.

அரசுக்கும் வரவு செலவு பரிமாற்றம் சரியான அளவில் கிடைக்கும்.

FlashPay

சிங்கப்பூரில் நம்முடைய பற்று அட்டை / கடனட்டையில் ஒரு வசதி உள்ளது.

அதாவது நீங்கள் இந்த அட்டைகளில் இருக்கும் வசதி மூலம் எளிமையாகப் பணம் செலுத்தலாம். ஒரே முறையில் 100$ க்கு மேல் செலவு செய்ய முடியாது.

இந்தக் அட்டைகளில் ஒரு chip இருக்கிறது, கடைகளில் வைத்துள்ள சாதனத்தில் காட்டினால் அதுவே பணத்தை எடுத்துக் கொள்ளும்.

இதற்காகக் கையொப்பம் இடுவதோ / Passcode அழுத்துவதோ அவசியமில்லை. அட்டையை 2 நொடி காண்பித்தால் போதும்.

சிங்கப்பூரில் இந்தியா போலக் கடனட்டைக்கு Passcode கொடுக்க வேண்டிய அவசியமில்லை.

எனவே, நம் கடனட்டை தொலைந்தால், வேறு யாரும் தவறாகப் பயன்படுத்தும் முன்பு உடனடியாக முடக்க வேண்டியது அவசியம்.

நம்ம ஊருக்கு வந்தால்..!

காய்கறிக் கடை, மருந்துக் கடை, பல்பொருள் அங்காடி, உணவகம் போன்ற வழக்கமாக அதிகம் புழங்கும் இடங்களில் இதை நாம் எளிதாகப் பயன்படுத்தலாம்.

இதன் மூலம் சில்லறை பிரச்னையை அறவே தவிர்க்கலாம்.

நமக்கு யாரும் கடலை பர்ஃபியோ ஹால்ஸ் மிட்டாயோ கொடுத்துச் சரிக்கட்ட முடியாது 🙂 . நமக்கும் மன உளைச்சல் குறையும்.

FlashPay என்பது இறுதியான பெயர் அல்ல. ஒவ்வொரு நிறுவனமும் இந்த வசதிக்கு வெவ்வேறு பெயர்கள் (PayPass / PayWave) வைத்துள்ளன.

இந்த வசதி நம்முடைய பேருந்தில் வந்தால் எப்படி இருக்கும்?

வழக்கமான பயணச் சீட்டு முறை மாறித் தற்போது கொடுக்கப்படும் மின்சாதன பயணச்சீட்டு வரும் என்று நாமெல்லாம் நினைத்து இருப்போமோ!

அது போல இதே வசதி இல்லையென்றாலும் வேறு முறை நிச்சயம் வரும்.

சென்னையில் இதைப் பரிசோதிக்கப் போகிறார்கள் அதாவது மெட்ரோ ரயில் மற்றும் பேருந்து இரண்டுக்கும் ஒரே அட்டை பயன்படுத்த முடியும், சிங்கப்பூர் போல.

ஆனால், இதற்குத் தொழிலாளர்கள் தரப்பில் இருந்து கடும் எதிர்ப்புக் கிளம்பும்.

காரணம், நடத்துனர் பணி பறி போய்விடும்.

Credit card Passcode

முன்பு கடனட்டை பயன்படுத்துவது என்றால், கையெழுத்து மட்டும் போடுவதாக இருந்தது, இதை எவரும் தவறாகப் பயன்படுத்தக்கூடிய வாய்ப்பு இருக்கிறது.

எனவே, இதற்கு Passcode இருந்தால் பிரச்னையைத் தவிர்க்கலாம் என்று கூறி இருந்தேன்.

தற்போது இந்திய வங்கித்துறை Passcode கட்டாயமாக்கி விட்டது. அதோடு இணையப் பரிமாற்றத்துக்கும் OTP / கடவுச் சொல் வசதி வந்து விட்டது. மிகச் சிறந்த மாற்றம்.

இது போல FlashPay நிச்சயம் நம்ம ஊருக்கு வரும் என்று உறுதியாக நம்புகிறேன்.

நான் கூறியது நல்லதோ கெட்டதோ இந்தத் தளத்தில் கணித்த விசயங்கள் பல நடந்து இருக்கிறது. அது போல இதுவும் விரைவில் நடக்கும் என்று நம்புகிறேன்.

பிற்சேர்க்கை – Contactless Transaction இந்தியாக்கு வந்து விட்டது 🙂 .

UPI இதற்கு முன்பே வந்து மிகப்பெரிய வெற்றியடைந்து விட்டது என்பது இதற்கு தொடர்புடைய கருத்து 🙂 .

Read : கிரெடிட் கார்டு பயன்கள் என்ன?

கொசுறு

சிங்கப்பூரில் 50 cent க்கு ஒரு பொருள் வாங்கி 50$ கொடுத்தாலும், எந்தக் கேள்வியும் கேட்காமல் 49.50$ திருப்பிக் கொடுப்பார்கள்.

50Cent, 1$ இருக்கிறதா? என்று கேட்க மாட்டார்கள். நாமே தேடி சில்லறையாகக் கொடுக்க முயற்சித்தாலும் அதற்குள் அவர்கள் மீதியைக் கொடுத்து விடுவார்கள்.

ஆனால், இதே இந்தியர்கள் குறிப்பாகத் தமிழர்கள் கல்லாவில் இருக்கும் கடை சென்றால், பெரும்பாலும் நம்ம ஊரைப் போலவே சில்லறை இருக்கிறதா? என்று கேட்பார்கள். 

இது மனதளவில் அப்படியே பழகி விட்டது என்று நினைக்கிறேன்.

நானும் சில நேரங்களில் சில்லறைக்காகப் பெரிய மதிப்பு நோட்டுக்களை கொடுத்து இருக்கிறேன்.

எங்கே சென்றாலும் நம் எண்ணங்களும் பழக்கங்களும் மாறவே மாறாது போல.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).