முதல் விமானப் பயண அனுபவம்

என்னால் மறக்க முடியாத முதல் விமானப் பயண அனுபவம் தான் இக்கட்டுரை.

கணிப்பொறி துறையில் இருந்தாலும் வெளிநாடு செல்ல வாய்ப்புக் கிடைக்கவில்லை.

இதை எல்லாம் ஒரு பெரிய விசயமாகக் கருதி துக்கம் விசாரித்தவங்க பல பேர்.

என்னடா இவங்க தொல்லைன்னு இருந்தாலும், எனக்கும் இந்த விமானத்துல போய் எப்படித் தான் இருக்கும் என்று பார்க்க உள்ளூர ஆசை தான். Image Credit

போனவங்க பல பேர் ‘மச்சி! அது செம கடிடா‘ என்று கூறும் போது, அனுபவம் இல்லாததால் என்னடா சும்மா சீன் போடுறாங்கன்னு நினைத்துக்கொண்டேன்.

அலுவலகத்தில் அனுப்புற மாதிரி தெரியல, சரி நாம பெங்களூராவது போய் வருவோம்னு என்னோட நண்பர்கள் இருவருடன் முடிவு செய்து பெங்களூர் விமானத்தில் செல்ல முடிவு செய்தோம்.

பயணக்கட்டணம் ₹1500.

டெக்கான் விமானம்

ஒரு சனிக்கிழமை காலையில் டெக்கான் நிறுவன விமானத்தில் போக முன்பதிவு செய்தோம். வெள்ளிக்கிழமை இரவு தூக்கமே வரலை, அடுத்த நாள் விமானத்தில் போவதை நினைத்து.

காலையில் குளித்துத் தயாராகி துணி எல்லாம் எடுத்து வைத்துக் கொண்டு குளிர் கண்ணாடி அணிந்து கொண்டு புகைப்படக் கருவி எல்லாம் எடுத்துக்கொண்டு மூவரும் உள்நாட்டு விமான நிலையம் சென்று விட்டோம்.

உள்ளே போகும் முன்பு நினைவாகப் புகைப்படம் எடுத்து உள்ளே காத்திருந்தோம், அறிவிப்பு வந்ததும் அனைத்து சோதனைகளும் முடிந்து விமானம் செல்லப் பேருந்தில் அழைத்துச் சென்றார்கள்.

ஓட்டம்

எனக்குப் பயங்கர ஆர்வம் ஆகி விட்டது, நேரம் நெருங்க நெருங்க. பேருந்தில் இறங்கியதும் எல்லோரும் தட தடன்னு விமானம் நோக்கி ஓட ஆரம்பிச்சுட்டாங்க, கோட் சூட் போட்டவனும் ஓடுறான், சாதாரணமான ஆளும் ஓடுறான்.

எங்களுக்கு ஒன்றும் புரியலை, எதுக்கு ஓடுறாங்க? பயணச் சீட்டு கையிலே இருக்கே! இருக்கை எண் உட்பட, அப்புறம் எதுக்கு ஒடுறாங்கன்னு குழப்பமாகி விட்டது.

மேலே ஏறியதும் தான் தெரிந்தது எங்க வேண்டும் என்றாலும் அமர்ந்து கொள்ளலாமாம். அடப்பாவிகளா! இது தெரியாம போச்சேன்னு நொந்துட்டு கிடைத்த இடத்தில் அமர்ந்து கொண்டோம்.

ஏன்டா! பேருந்துல தான் இப்படின்னா! விமானத்திலும் இப்படித் தானா என்று செம கோபம் வந்து விட்டது.

ஒரு பில்டப்ல வந்தா இப்படிச் சொதப்பியதில் செம காண்டாகி விட்டது. இதில் 50 பேர் உட்காரலாம் அவ்வளோதான்.

அதி வேகம்

கனவு நிறைவேறும் நேரமும் வந்தது, அறிவிப்புடன் விமானம் ஓடுதளத்தில் மெதுவாகச் சென்று திடீரெனச் செம வேகத்துடன் (வேகம்னா வேகம் அப்படியொரு வேகம்) ஓடி மேலே பறந்தது. அடி வயிற்றில் ஜிவ்வுனு இருந்தது.

இதெல்லாம் 5 நிமிடங்கள் தான் அதற்கப்புறம் ஒன்றுமே தெரியவில்லை, எதோ சாதாரணமா எப்போதும் போல் உட்கார்ந்து இருப்பதைப் போன்ற உணர்வே.

அவசர காலத்தில் எப்படி நம்மைப் பாதுகாத்துக் கொள்வது என்று பணிப்பெண் விளக்கினார்.

அது வரை எதுவும் எனக்குத் தோன்றவில்லை, இதைக் கேட்டவுடன் பயம் வந்து விட்டது.

பல ஹாலிவுட் பட விமான விபத்துக் காட்சிகள் நினைவுக்கு வந்து பயமுறுத்தின.

நடுக்கம் இருந்தாலும் அதை வெளி காட்டிக்காமல் நண்பர்களுடன் பேசிக் கொண்டு ஜன்னல் பக்கம் திரும்பியதும் சிறிய விமானம் என்பதால், மூடப்படாத காத்தாடி அதி வேகமாகச் சுற்றியதைப் பார்த்து அடி வயிறு கலங்கி விட்டது.

எதாவது பறவை வந்து மோதி விடுமோ எனச் செய்திகளில் படித்ததெல்லாம் அப்போது தான் நினைவுக்கு வந்து இம்சித்தது. பயத்தில் அந்தப் பக்கமே திரும்பவில்லை.

பணிப்பெண்

பணிப்பெண் சாப்பிட எதோ கொண்டு வந்தார், பணம் கொடுக்க வேண்டும் என்றதால், அந்த எண்ணத்தையே கை விட்டேன்.

நாங்களே கஷ்டப்பட்டு விமானப் பயணச் சீட்டு வாங்கி இருக்கோம், இதுல இது வேறயா!

இன்னும் சிறிது நேரத்தில் இறங்க போகிறோம் என்று அறிவித்தார்கள், என்னடா! இது அதுக்குள்ளே பெங்களூர் வந்து விட்டதான்னு வியப்பாகி விட்டது, 45 நிமிட பயணம் தான் சென்னையில் இருந்து.

விமான இறங்கும் போது தட தடன்னு செம சத்தம் எனக்குத் தூக்கி வாரிப் போட்டது.

ஐயையோ! இப்படியே ஒரேடியா மேலே கூட்டிட்டு போய்டுனுவாகப் போல இருக்கேன்னு பயத்துல நாக்கெல்லாம் உலர்ந்து விட்டது.

ஏற்கனவே பயந்து போய் இருந்த நான், இன்னும் பயந்து விட்டேன். எனக்குத் தெரிந்த எல்லாக் கடவுளையும் கும்பிட்டு விட்டேன்.

அது வரை சிரித்துக் கொண்டு இருந்த நண்பர்களும் கப் சிப் னு ஆகிட்டாங்க. சிரிப்பு போய் முகம் எல்லாம் வெளிறி விட்டது.

அப்புறம் ஆடிட்டே தட தட ன்னு இறங்கி விட்டது. இறங்கியதும் தான் உயிரே வந்தது. சிறிய விமானத்தில் இப்படித் தான் இருக்கும் என்று பிறகு கூறினார்கள்

இந்த மாதிரி முதல் விமானப் பயண அனுபவம் பயத்துடன் அமைந்து விட்டது. என்னோட சிங்கப்பூர் விமானப் பயணத்தை அடுத்த கட்டுரையில் கூறுகிறேன் 😀 .

பிற்சேர்க்கை – முதல் வெளிநாட்டு விமானப் பயணம்

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.