ஆதார் கட்டாயம் என்பது சரியா?!

 ஆதார் தற்போது அரசின் பல சேவைகளுக்குக் கட்டாயமாக்கப்பட்டு வருகிறது. இதற்கு ஆதரவு எதிர்ப்புக் குரல்கள் எழுந்து வருகின்றன. அதிலும் மதிய உணவுக்கு ஆதார் கட்டாயம் என்றதும் எதிர்ப்புப் பலமாக இருந்தது. Image Credit

அரசின் இந்த நோக்கம் சரியானது தான் என்பதில் எனக்கு மாற்றுக்கருத்தில்லை ஆனால், அதைச் செயல்படுத்திய முறையில் தான் தவறு.

கால அவகாசம் கொடுக்காமல், அனைத்து குழந்தைகளும் ஆதார் பெற்று விட்டார்களா! என்று உறுதி செய்யாமல் அறிவித்ததே பிரச்சனை.

பண மதிப்பிழப்பு விசயத்திலும் மக்கள், திட்டத்தை எதிர்க்கவில்லை அதைச் செயல்படுத்திய முறையையே எதிர்த்தார்கள்.

ஆதார் அவசியம் தேவை

“காங்” அரசு கொண்டு வந்த திட்டங்களிலேயே உருப்படியான திட்டம் ஆதார் தான். இதை எதிர்த்து வந்த பாஜக தற்போது அதை மேம்படுத்தி இருக்கிறது.

ஆதார் மூலம் எரிவாயு கணக்கு, குடும்ப அட்டைகளில் லட்சணக்கணக்கான போலிக் கணக்குகள் நீக்கப்பட்டுள்ளன. இதன் மூலம் நம்முடைய வரிப்பணம் சேமிக்கப்படுகிறது.

திருட்டைத் தடுக்கும் குறைந்த பட்சம் தவிர்க்கும்

தற்போது குடும்ப அட்டைகள் ஆதார் எண்ணுடன் இணைக்கப்பட்டுப் பயனாளர்களின் Mobile எண்ணுடன் மேம்படுத்தப்பட்டுள்ளது.

கடைகளில் பணி புரிபவர்கள் நாம் வாங்காமலே வாங்கியதாகக் கணக்கு எழுதும் போது பொதுமக்களுக்குக் குறுந்தகவல் வருவதால் மாட்டிக்கொள்கிறார்கள்.

இது மிகப்பெரிய திருட்டை தவிர்க்க உதவியிருக்கிறது. இதெல்லாம் யார் பணம்? அனைத்தும் மக்கள் பணம்.

மதிய உணவுக் கொள்ளை

இது போல மதிய உணவில் எவ்வளவு கொள்ளை அடிக்கப்படுகிறது என்பதை அங்கே பணி புரிந்தவர்கள் கூற கேட்டு இருக்கிறேன். இல்லாத மாணவர்கள் பெயரை எல்லாம் கொடுத்து அவர்கள் பெயரில் திருடுவது மிகச் சாதாரணம்.

உங்களுக்கு நம்பிக்கையில்லை என்றால், மதிய உணவு திட்டத்தில் பணி புரிபவர்கள் எவரையும் கேட்டுப் பார்க்கலாம். “அரிசி பருப்பு” திருட்டு வழக்கமான ஒன்று.

தற்போது ஆதார் கட்டாயமாக்கப்பட்டால், திருட்டை முழுவதும் தடுக்க முடியாது ஆனால், நிச்சயம் பெருமளவில் குறைக்கலாம்.

திட்டமிடல் வேண்டும்

இது போலத் தடாலடியாக ஆதார் இருந்தால் தான் மதிய உணவு என்று கூறாமல், அனைவரையும் ஆதார் எண் எடுக்க நடவடிக்கை எடுக்க வேண்டும்.

தற்போது பள்ளிகளிலேயே ஆதார் எடுத்துத் தருகிறார்கள். எனவே, மாணவர்களுக்கு ஆதார் எடுப்பதெல்லாம் பெரிய விசயமே இல்லை.

என் பையனுக்குக் கூட இவன் பள்ளியில் தான் ஆதார் எடுத்தார்கள்.

எனவே, குறிப்பிட்ட கால அவகாசம் கொடுத்து மாணவர்களை ஆதார் எடுக்க வைத்துப் பின் மதிய உணவுக்கு ஆதார் என்பதைக் கட்டாயமாக்கலாம்.

இதன் மூலம் மக்கள் பணம் விரையமாக்கப்படுவது திருடப்படுவது தடுக்கப்படும் குறைந்த பட்சம் தவிர்க்கப்படும்.

ஆதார் கட்டாயமாக்கப்பட வேண்டும்

ஆதார் அனைத்து துறைகளுக்கும் கட்டாயமாக்கப்பட வேண்டும்.

சரியான முறையில் திட்டமிட்டு மக்களுக்கு ஆதார் பெற வசதி செய்து கொடுத்தால், நிச்சயம் மக்களிடம் அரசு வரவேற்பை பெறும்.

ஒரு வருடமே கொடுத்தாலும் ஆதார் எடுக்காமல் மொக்கை காரணங்களைக் கூறுபவர்களை ஒன்றும் செய்ய முடியாது. சில விதிவிலக்குகள் தவிர்த்து.

என்னுடைய பெயரில் திருத்தம் இருந்தது, இதை மாற்றப் படாதபாடுபட்டேன் ஆனால், தீவிரமாக முயன்று ஒரு வழியாக மாற்றி விட்டேன்.

முயற்சி செய்தால், அனைத்துமே நடக்கும்.

எதிர்காலத்தில் ஆதார் மிக முக்கியமாகும்

எனக்கு முகவரி மாற்றம் மற்றும் பல்வேறு சேவைகளுக்கு ஆதார் மிகப்பெரிய உதவியாக உள்ளது. இதன் பயனை முழுமையாக அறிந்ததால், இதன் முக்கியத்துவம் பற்றிக் கூறுகிறேன்.

எதிர்காலத்தில் PAN கணக்கு, வாக்காளர் எண், குடும்ப அட்டை எண் இவை அனைத்தும் ஒருங்கிணைக்கப்பட்டு ஆதார் எண் என்ற ஒரு எண்ணாக மாற வாய்ப்புள்ளது, மாற வேண்டும்.

இது மக்களின் சிரமங்களைக் குறைப்பதோடு அரசுக்கும் பணிச் சுமையைக் குறைக்கும்.

உணர்ச்சிக் குவியலாக, மாணவர்கள் மதிய உணவுக்கு ஆதாரா?! என்று திட்டுவதும், Meme போடுவதும் கிண்டலடிப்பதும் நம்மை நாமே ஏமாற்றிக் கொள்வது தான் அல்லது அரசியல் செய்ய மட்டுமே உதவும்.

குறை கூறிக்கொண்டு இருக்காமல், உங்கள் குடும்பத்தில் அனைவரும் ஆதார் எடுக்க நடவடிக்கை எடுங்கள்.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).