மூன் லைட்டிங் என்றால் என்ன?

சமீபமாக மூன் லைட்டிங் என்ற வார்த்தை பரவலாகச் செய்திகளில் பேசப்படுகிறது. இது என்னவென்று பார்ப்போம். Image Credit

மூன் லைட்டிங் என்றால் என்ன?

ஒரு நபர் ஒரே சமயத்தில் ஒன்றுக்கு மேற்பட்ட நிறுவனங்களில் பகுதி நேரமாகவோ, வார இறுதியிலோ பணி புரிவதை தொழில்நுட்பத் துறையில் மூன் லைட்டிங் என்று அழைக்கிறார்கள்.

விமர்சனங்கள் என்ன?

மூன் லைட்டிங் முறைக்குப் பல நிறுவனங்கள் எதிர்ப்பைத் தெரிவித்து வருகின்றன.

• ஒரு நபர் பல நிறுவனங்களில் வேலை செய்யும் போது முதன்மை நிறுவனத்தின் பணியில் முழுமையாகக் கவனம் செலுத்த முடியாது.
• பணியின் முக்கியத்துவம் குறைகிறது.
• நிறுவன DATA பாதுகாப்பு பிரச்சனைகள்.
• கவனச்சிதறல்.
• மற்ற பணிகளின் சுமை காரணமாக, நிறுவனத்தின் பணிகள் தாமதமாகின்றன.
• ஒருவேளை போட்டி நிறுவனமாக இருந்தால், இரகசியம் பேணப்பட முடியாமை.
• ஊழியர் முழுத்திறனையும் வெளிப்படுத்துவதில்லை.
• பணிகளை அவசரமாக முடிக்க வேண்டிய நிர்பந்தம் ஏற்படுகிறது. இதனால், பணியின் தரம் குறைகிறது.

செய்தால் என்ன தவறு?

எதிர்ப்பு இருப்பது போல மூன் லைட்டிங் முறைக்கு ஆதரவும் உள்ளது.

• வேலை முடிந்தால் போதும் தானே! செய்து விட்டால் என்ன பிரச்சனை?
• ஒருவர் பல நிறுவனங்களில் பணி புரிவது அவர் சுதந்திரம்.
• சரியாகச் செய்யவில்லையென்றால், அப்ரைசலில் மதிப்பெண் குறையப்போகிறது. அதன் மூலம் நடவடிக்கை எடுக்கலாமே?
• வேலை நேரம் முடிந்த பிறகு எந்த வேலை செய்தால் நிறுவனத்துக்கு என்ன?
• கொரோனா காரணமாகப் பொருளாதாரச் சிக்கல் ஏற்பட்டுள்ளது. பணவீக்கம் காரணமாகச் செலவினம் அதிகரித்துள்ள நிலையில் இன்னொரு பணியைச் செய்து சம்பாதித்தால் என்ன?

என்ற கேள்விகள் முன் வைக்கப்படுகின்றன.

சம்பவம்

ஒரு நிறுவனத்தில் ஊழியர் ஒருவர் பணி விலகுவதாகக் கூறி Notice Period சமயத்தில், வேறு நிறுவனத்தில் இணைந்து இரு நிறுவனங்களிலும் ஊதியம் வாங்கிக்கொண்டு பணி புரிந்துள்ளார்.

அனுபவம் உள்ளவர்களுக்கு மூன்று மாதங்களும், புதிதாக இணைந்தவர்களுக்கு ஒரு மாதமும் Notice Period வழக்கமாக இருக்கும்.

WFH முறையில் பணி புரிந்ததால், இவர் இரு நிறுவனங்களிலும் கூறாமல், 3 மாதங்களாகப் பணி புரிந்து ஊதியத்தை வாங்கியுள்ளார்.

மற்ற நிறுவன HR மறு பரிசோதனைக்கு இந்த HR யிடம் வந்த போது தான், இந்தச் சம்பவம் தெரிய வந்துள்ளது.

தெரிந்த பிறகு இரு நிறுவனங்களும் ஊழியரைப் பணி நீக்கம் செய்து விட்டனர்.

மூன்லைட்டிங் செய்தவர்கள் மாட்டியது எப்படி?

இரு நிறுவனங்களிலும் PF (Provident fund) கணக்கில் பணம் செலுத்தப்பட்டதால் கண்டுபிடித்து விட்டார்கள். ஒரே கணக்கு ஆனால், இரு சம்பளம்.

இதிலிருந்து தப்பிக்க ஒப்பந்த ஊழியராக (contractor staff) இருந்தால், PF வராது. எனவே, மற்ற நிறுவனத்துக்குத் தெரிய வாய்ப்பில்லை.

இது போன்று சிலர் செயல்பட்டு வருகிறார்கள்.

முன்னணி நிறுவனங்கள்

மூன் லைட்டிங் முறையில் பணி புரிந்தால், பணி நீக்கம் செய்யப்படும் என்று விப்ரோ, இன்ஃபோசிஸ், ஐபிஎம் நிறுவனங்கள் அதிகாரப்பூர்வமாக அறிவித்து விட்டார்கள்.

இந்த வரிசையில் மேலும் பல நிறுவனங்கள் இணைய வாய்ப்புள்ளது. அதே போல இம்முறைக்கு ஆதரவு அளிக்கும் நிறுவனங்களும் உள்ளன.

ஏற்கனவே, சம்பளத்தை ஏகத்துக்கும் உயர்த்தி விட்டதில் கடுப்பில் உள்ள நிறுவனங்கள் இதில் உறுதியான எதிர்ப்பைக் காட்டி வருகின்றன.

உலகப் பணவீக்கத்தால் ஏற்பட்டுள்ள மந்த நிலை காரணமாக ஆட்குறைப்பு (Lay Off) வாய்ப்புள்ளதால், இதுவரை பல Offers காண்பித்து அதிக ஊதியத்தைக்கேட்டு கதறவிட்ட ஊழியர்களுக்கு நிறுவனங்கள் திருப்பிக்கொடுக்கும் நேரம்.

பார்ப்போம் எப்படிப் போகிறது என்று 🙂 .

தொடர்புடைய கட்டுரைகள்

WFH ஏற்படுத்தப்போகும் சமூக மாற்றங்கள்!

The Great Resignation | திணறும் ஐடி நிறுவனங்கள்

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).