அலறப்போகும் சிங்கப்பூர் – F1 Grand Prix 2010 கோலாகலம்

சிங்கப்பூர் அரசாங்கம் வெற்றிகரமாக மூன்றாவது வருடமாக Formula 1 Grand Prix இரவுப்போட்டியை நடத்த ஆயுத்தமாகி விட்டது.

போட்டிகள் வரும் வெள்ளிக்கிழமை [24-09-2010] முதல் துவங்குகிறது.

இதற்கான ஏற்பாடுகளைச் சிங்கப்பூர் அரசாங்கம் சிறப்பான முறையில் செய்து வருகிறது.

போட்டிக்காக பல்வேறு நாடுகளிலிருந்து மக்கள் குவிந்த வண்ணம் உள்ளனர். ஹோட்டல்கள் நிரம்பி வழிகிறது.

போட்டி நடக்கும் இடத்தைச் சுற்றி சில படங்கள்

வெள்ளிக்கிழமை கதறப்போகும் சாலை இது தான்.. விர்ர்ரர்ர்ர்ரர்ர்ர்ரும் சத்தம் அங்குள்ளவர்களின் காதைப் பிளக்கப்போகிறது.

இந்தச்சாலையை இந்தப்போட்டிக்காக இந்த முறை புதுப்பிக்கவில்லை அப்படி என்றால் இயல்பாகவே இந்தச் சாலையின் தரம் எப்படி இருக்கும் என்பதை உணர்ந்து கொள்ளுங்கள்.

F1 போட்டி நடக்கும் சாலை எல்லாம் கண்ணாடி மாதிரி இருக்க வேண்டும் கொஞ்சம் கூடப் பள்ளம் மேடு விரிசல் இருக்க கூடாது.

கடந்த முறை லூயிஸ் ஹாமில்ட்டன் பயிற்சி போட்டியில் சாலை குதிக்குது என்று புலம்பிட்டு முதல் பரிசைத் தட்டிட்டு போயிட்டாரு.

முதல் முறை நடந்த போட்டியில் முதலாக வந்த அலான்சோ இரண்டாவது போட்டியில் மூன்றாவது இடத்தையே பிடிக்க முடிந்தது.

இந்த முறை ஃபெர்னாண்டோ அலான்சோ முதல் இடத்தைப் பிடிக்கலாம் என்று பலர் எதிர்பார்க்கிறார்கள்.

The Fullerton Hotel

மேலே படத்தில் இருக்கும் “The Fullerton Hotel” ல் தான் F1 ஓட்டுனர்கள் தங்கப்போகிறார்கள். மிகவும் அதிகமான கட்டணத்தைக் கொண்ட ஹோட்டல் இது.

இந்த ஹோட்டல் பற்றிய ஒரு சுவாராசியமான தகவல்.

இதற்கு முன்பு இந்தக்கட்டிடம் சிங்கப்பூர் தபால் துறை அலுவலகமாக இருந்தது. இது எப்படி இருக்கு! 🙂 .

இவங்களுக்கு மக்கள் கொடுக்கும் மதிப்பு ஆர்வம் அந்த நாட்டின் பிரதமருக்குக் கூடக் கிடைக்காது.

நம்ம ஊர்ல எப்படி சச்சின் வந்தால் மற்ற எந்தப் பெரிய தலையும் ஒதுங்கித் தான் நிற்கணும்… அது போலத்தான்.

விளையாட்டு வீரர்கள் எங்கும் கடவுளை விட அதிகமாக மதிக்கப்படுகிறார்கள் நேசிக்கப்படுகிறார்கள்.

Michael Schumacher

2006 இறுதியில் ஓய்வு பெற்ற கார்பந்தய சூப்பர் ஸ்டார் Michael Schumacher தனது வழக்கமான அணியான ஃபெராரியில் இல்லாமல் வேறு நிறுவனத்திற்காக போட்டியில் கலந்து கொள்ள மீண்டும் வந்துள்ளார் இதுவரை 7 முறை உலக சாம்பியன் பட்டம் வென்றுள்ளார்.

இவரைப் பார்க்கவும் பலர் வெறித்தனமாக காத்துக்கொண்டு இருக்கிறார்கள்.

ஆடுன காலும் பாடுன வாயும் சும்மா இருக்காது என்பார்கள் அது போல கார் ஓட்டுபவர்களும் சும்மா இருக்க முடியாது என்று மறுபடியும் வந்துட்டாரு போல 🙂 .

வாங்க தல! வந்து தூள் கிளப்புங்க!

போட்டி நடக்கப்போகிறது என்றால் இடம் களைகட்டி விடும். விளம்பரத்திற்க்காக பல பெண்களை அதன் நிறுவனங்கள் கொடியுடன் நிறுத்தி இருந்தனர்.

அந்தப்பெண்கள் உற்சாகமாக அனைவருடனும் புகைப்படம் எடுத்து வந்தவர்களை மகிழ்வித்துக்கொண்டு இருந்தனர்.

குழந்தைகள் முதல் பெரியவர்கள் வரை கொடிகள் அவர்களிடம் வாங்கி உற்சாகமாக சுற்றிக்கொண்டு இருந்தனர்.

அங்கு வந்து இருந்த ஒரு வெளிநாட்டுப் பெண் அலான்சோ விற்க்காக தான் வந்து இருப்பதாகவும் அவர் தான் வெற்றி பெறுவார் என்றும் சந்தோசமாகக் கூறினார்.

அங்கு வந்து இருந்த பலர் போட்டிகளைக் காண ஆர்வத்துடன் இருப்பதை காண முடிந்தது.

டிக்கெட் விலை கண்ணைக் கட்டியதால் ஹி ஹி வழக்கம் போல டிவி யில் பார்த்துக்கொள்ளலாம் என்று விட்டு விட்டேன்.

பாபு

எத்தனை பேரைப் படம் எடுத்தாலும் குழந்தைகளை எடுப்பது போல இருக்காது என்று மீண்டும் ஒரு முறை இந்தப்படம் நிரூபித்தது.

பையன் சோக்கா இருக்கான்பா! வருங்காலத்துல பல ஃபிகர்ஸை கவர் பண்ணிடுவான் போல 😉 .

இங்குள்ள படங்கள் அனைத்தும் எனக்காக எடுத்தது என் நண்பேன்டா! பாபு 🙂 .

நான் இந்தப்போட்டியை பற்றி ஏற்கனவே அலசு அலசுன்னு அலசி விட்டதால் மறுபடியும் அதையே கூற என்ன இருக்கிறது என்று இதைப் போல முன்னோட்டம் கொடுத்து விட்டேன்.

சென்ற ஆண்டு நடந்த போட்டியைப் பற்றிய பல சுவாராசிய தகவல்களைத் தெரிந்து கொள்ளுங்கள்.

சிங்கப்பூரை அலற வைத்த “Formula 1″ – 2009

மொத்தம் மூன்று நாட்கள் போட்டி நடைபெறுகிறது வெள்ளிக்கிழமை பயிற்சிப் போட்டி, சனிக்கிழமை தகுதிப் போட்டி ஞாயிற்றுக்கிழமை இறுதிப்போட்டி.

நான் வெள்ளிக்கிழமை நடக்கும் பயிற்சிப் போட்டிக்கு நண்பன் பாபு அழைப்பின் பேரில் செல்கிறேன்.

ஹி ஹி ஒரே பரபரப்பா இருக்கு… எவ்வ்வ்வளோ பெரிய போட்டியை பார்க்கப் போகிறோம் என்று நினைத்தாலே சும்மா கிரர்ர்ர்ர் னு இருக்கிறது.

ஹய்யோ! கை கால் எல்லாம் பரபரங்குதே! பயிற்சி போட்டியைப் பார்க்குறதுக்கே இந்தக்கூத்தா என்று நினைக்காதீர்கள்.. இந்தப்போட்டியே அதகளமாக இருக்கும்.

அப்ப இறுதிப்போட்டி!… ஷாக் அடிக்கற மாதிரி இருக்கும் 🙂 .

டிரைலரே அதிரும் மெயின் பிக்சர் பட்டாசு கிளப்பும் 😉 போட்டியைப் பார்த்த பிறகு சுவாரசியமான செய்திகள் இருந்தால் அது பற்றி எழுதுகிறேன்.

கொசுறு

நேற்று இந்தப்பதிவு எழுதி ரொம்ப மகிழ்ச்சியாக இருந்தேன்.

இன்று காலையில் இந்தியாவில் நடக்கும் காமன்வெல்த் போட்டிக்காக கட்டப்பட்ட பாலம் (ஊழலால்) இடிந்து விட்டது என்ற செய்தியை படித்த உடன் மொத்த உற்சாகமும் புஸ்ஸ்ஸ் ஆகி விட்டது. அட! போங்கப்பா!

🛑 To get Blog Articles, Finance, OTT, Tech News follow 👉🏻 giriblog WhatsApp Channel ⭐.