ஜிமெயிலுக்கு ஏன் மாற வேண்டும்?

ஜிமெயில் ஒரு அற்புதமான மின்னஞ்சல் சேவை என்பது பயன்படுத்தும் அனைவருக்கும் தெரியும். ஜிமெயிலுக்கு ஏன் மாற வேண்டும்! என்று கூறுகிறேன்.

ஜிமெயிலுக்கு ஏன் மாற வேண்டும்?

1. ஸ்பாம்

சம்பந்தம் இல்லாத இடங்களில் இருந்து எல்லாம் மின்னஞ்சல் வரும். லாட்டரி பரிசுச் சீட்டு விழுந்ததாக, உங்கள் வங்கி விவரங்களைக் கேட்டு, வயாகரா மாத்திரை வாங்கக்கூறி, ஆபாச மின்னஞ்சல்கள் என்று வந்து குவியும்.

இவை ஜிமெயிலில் கிடையாது அல்லது மிகக் குறைவான அளவு வருகிறது. மிகத் திறமையான தொழில்நுட்ப முறையில் இவற்றை வடிகட்டி விடும்.

இதன் மூலம் உங்கள் பாதுகாப்பு மேம்படுத்தப்படுகிறது.

விஷயம் தெரிந்தவர்கள் ஓரளவு சமாளிக்கலாம், ஒன்றுமே தெரியாதவர்கள் ஸ்பாம் விசயத்தில் ஏமாற அதிக வாய்ப்புள்ளது.

நம் அனுமதி இல்லாமலே நாம் அனுப்பவது போல வயாகரா விளம்பரங்கள் நம் contact ல் உள்ளவர்களுக்குச் சென்று விடும்.

இதைச் சந்திக்காத நபர்களே இருக்க மாட்டார்கள் குறிப்பாக யாஹூ வில் இருந்து அதிகம் வரும்.

2. வேகம்

நாம் பயன்படுத்தும் மென்பொருளாகட்டும் கணினியாகட்டும் வேகமாக இருந்தால் தான் நமக்கும் பயன்படுத்த விருப்பம் இருக்கும்.

இல்லை என்றால் ஒன்றை க்ளிக் செய்து விட்டு அது திறப்பதற்காகக் காத்துக்கொண்டு இருக்க வேண்டும்.

இந்தப் பிரச்சனை ஜிமெயிலில் கிடையாது. தேவையற்ற விசயங்களை நீக்கி, மல்டிமீடியா சமாச்சாரங்களைக் குறைத்து, எவ்வளவு விரைவாகத் திறக்க முடியுமோ அவ்வளோ தூரம் உதவி செய்கிறது.

ஜிமெயில் AJAX என்ற தொழில்நுட்ப முறையைச் சிறப்பாகப் பயன்படுத்துகிறது. எனவே அதனுடைய வேகம் மற்ற மின்னஞ்சல்களை விட அதிவேகத்தில் உள்ளது.

புது மின்னஞ்சல் வந்தாலோ, Reply செய்தாலோ, Forward செய்தாலோ தாமதம் செய்யாமல் அடுத்த நொடியே நடக்கும்.

இதே மற்ற மின்னஞ்சல்கள் முக்கிக் கொண்டு இருக்கும். க்ளிக் செய்துவிட்டு சில நொடிகளுக்குப் பிறகே எதுவும் நடக்கும்.

3. எளிமை

கூகுள் என்றாலே எளிமையை தளத்தின் முகப்புப் பகுதியில் பார்த்தாலே புரிந்து கொள்ள முடியும். இதையே தன்னுடைய ஜிமெயில் சேவைக்கும் பின்பற்றுகிறது.

இடது புறம் Inbox sent mail Compose mail மட்டுமே இருக்கும். மற்றவை தேவை என்றால், கர்சரை கொண்டு சென்றால் அவை தெரியும் படி அமைத்து இருப்பார்கள்.

Delete Forward spam என்று எதுவும் முகப்பில் இருக்காது, ஒரு மின்னஞ்சலைத் தேர்வு செய்தால் மட்டுமே அவை தெரியும்.

காரணம் தேர்வு செய்யாமல் நாம் Delete forward அல்லது வேறு லேபிள் செய்ய முடியாது அப்புறம் எதற்கு அவை தெரிய வேண்டும்.

சுருக்கமாகக் கூறினால் ஜிமெயில் F டிவியில் வரும் மாடல் போல இருக்கும் மற்ற மின்னஞ்சல்கள் கல்யாணப் பெண் போல அதீத அலங்காரத்துடன் இருக்கும் 🙂 .

4. ஃபோல்டர் / லேபிள்

யாஹூ பயன்படுத்திக்கொண்டு இருந்த போது அதில் இருந்த ஃபோல்டர் வசதி  உபயோகமாக இருந்தது. மின்னஞ்சல்களைப் பிரிக்க எளிதாக இருந்தது.

ஜிமெயிலில் ஃபோல்டர் வசதி இல்லை ஆனால், அதற்கு இணையாக லேபிள் வசதி உள்ளது.

இதுவும் ஃபோல்டர் போலத் தான் ஆனால் வேறு மாதிரி. ஜிமெயிலுக்கு மாற நான் தயங்கியதற்கு இதுவும் ஒரு காரணம் ஆனால், பயன்படுத்திய பிறகு எவ்வளவு எளிமையானது எனப் புரிந்தது.

5. தேடல்

கூகுள் என்றால் தேடல் தான் பிரபலம். தனது ஜிமெயிலிலும் இதை உட்புகுத்தியுள்ளது.

இதன் மூலம் நமக்குத் தேவையான மின்னஞ்சல்களை நொடியில் கண்டறிய முடியும். அட்வான்ஸ் தேடுதல் முறையில் தேடுதலை இன்னும் எளிமை ஆக்குகிறது.

6. சங்கடமான சூழ்நிலைகளைத் தவிர்க்க முடியும்

நாம் சில நேரங்களில் ஒருவருக்கு அனுப்ப வேண்டிய மின்னஞ்சலைத் தவறுதலாக மற்றொருவருக்கு அனுப்பி விடுவோம்.

Send பட்டனை அழுத்திய பிறகே உணர்வோம் ஆனால், மின்னஞ்சல் சென்று விடும்.

அவசரமாகத் டைப் செய்யும் போது சில விசயங்களை மறந்து அனுப்பி இருப்போம். இதைத் தடுக்க நீங்கள் 30 நொடி வரை இதை ஜிமெயிலில் தாமதிக்க வைக்கலாம்.

மின்னஞ்சல் அனுப்பியும் 30 நொடி வரை செல்லாமல் இருக்கும்.

காத்திருக்க தேவையில்லை என்றால் Inbox / வேறு எதை க்ளிக் செய்தாலும் உடனே சென்று விடும். இதன் மூலம் தர்மசங்கடமான சூழ்நிலைகளைத் தவிர்க்க முடியும்.

7. Threaded Conversation

ஜிமெயிலில் உள்ள அற்புதமான வசதி. இது ஒன்றிக்காகவே இதைப் பயன்படுத்துபவர்கள் பலர்.

இதன் வசதி என்னவென்றால் குழும மின்னஞ்சல்கள் [Group mails] ஒரே தலைப்பில் வரும் போது தனித்தனியாக இல்லாமல் ஒரே மின்னஞ்சலிலேயே ஒன்று இரண்டு என்று சேர்ந்து கொண்டு இருக்கும்.

இதன் மூலம் பத்து பேர் இந்தத் தலைப்பில் அனுப்பி இருந்தால் ஒரே பக்கத்தில் ஒரே முறையில் படிக்க முடியும்.

வரிசையாகப் படிக்க எளிதாகவும், ஒவ்வொன்றாகத் திறந்து பார்க்க வேண்டிய அவசியமுமில்லை.  மின்னஞ்சல் எண்ணிக்கையின் அளவு குறைவாகத் தெரியும்.

இதே யாஹூ ஹாட்மெயில் என்றால் குழும மின்னஞ்சல்களில் இருந்து மின்னஞ்சல்கள் வந்து குவிந்து விடும். குப்பை மாதிரி இருக்கும்.

இந்த வசதியை இதற்கு முன் எதோ மின்னஞ்சல் நிறுவனம் வைத்து இருந்ததாகவும் இதை ஜிமெயில் காப்பி அடித்ததாகவும் ஒரு குற்றச்சாட்டு உண்டு.

தற்போது, விரும்பினால் யாஹூ ஹாட்மெயில் போல லூப் [Threaded Conversation] இல்லாமல் தனித்தனியாகவரும் படியும் வைத்துக்கொள்ள வசதி தந்து உள்ளது.

8. பாதுகாப்பு

பாதுகாப்பில் நம்மை உஷார் படுத்துவதில் ஜிமெயிலுக்கு நிகர் எந்த மின்னஞ்சல் நிறுவனமும் இருக்க முடியாது.

வழக்கமாக ஒரு இடத்தில் லாகின் செய்கிறீர்கள் என்றால், உங்கள் கணக்கை யாராவது ஹேக் செய்து பயன்படுத்திக்கொண்டு இருந்தால் நம்மை உஷார் படுத்தும்.

வேறு IP யில் இருந்து லாகின் செய்து இருக்கிறார்கள் என்று. [Open in 1 other location]

ப்ரௌசிங் சென்டர் செல்கிறீர்கள் லாகின் செய்து விட்டு மறந்து லாஃகாப் செய்யாமல் வந்து விடுகிறீர்கள். உடனே வேறு இடத்தில் லாகின் செய்து மற்ற அனைத்து இடங்களிலும் உள்ள sessions களை நீங்கள் லாஃகாப் செய்து விடலாம்.

திரும்ப அங்கேயே சென்று இதைச் செய்ய வேண்டும் என்கிற அவசியமில்லை.

அதே போல Account Activity யில் சென்று எந்தெந்த IP யில் இருந்து உங்கள் ஜிமெயில் கணக்கு பயன்படுத்தப்பட்டு இருக்கிறது என்பதை தெரிந்து கொள்ளலாம்.

சந்தேகம் இருந்தால் உடனடியாக நமது கடவுச்சொல்லை மாற்றி விடலாம்.

ஒன்றுக்கும் மேற்பட்ட இடத்தில் கணக்கு திறந்து இருந்தால் நமக்கு எச்சரிக்கைப் படுத்தும். நாட்டின் பெயருடன் இருப்பதால் நம்மால் எளிதாக அறிய முடியும்.

இரட்டை அடுக்கு பாதுகாப்பு முறை [2 – Step verification] என்ற வசதி இருக்கிறது.

வழக்கமாக நாம் எல்லோரும் கடவுச்சொல் [Password] கொடுத்து உள்ளே செல்வோம் இந்த வசதியைச் செயல்படுத்தி விட்டால் அதன் பிறகு நமக்கு ஒரு SMS Code வரும் அதை இதில் கொடுத்த பிறகு தான் நுழைய முடியும்.

இதன் மூலம் உங்கள் கடவுச்சொல்லை தெரிந்து கொண்டாலும் உங்கள் SMS பார்க்க முடியவில்லை என்றால் யாரும் ஹேக் செய்ய முடியாது.

உதாரணத்திற்கு உங்கள் வங்கிக்கணக்கில் நுழையச் சில வங்கிகள் SMS மூலம் Code அனுப்புவார்கள் அதே முறை தான் இதற்கும்.

Read: ஜிமெயிலின் இரட்டை அடுக்கு பாதுகாப்பு வசதி!

ஹேக் என்பது ஒரு திறமையான செயல். உங்கள் கணக்கை யாரும் ஹேக் செய்யவில்லை என்றால் உங்கள் கணக்கு பாதுகாப்பாக இருப்பதாக அர்த்தம் இல்லை.

உங்களை யாரும் ஹேக் செய்ய முயற்சிக்கவில்லை என்று அர்த்தம்.

இரட்டை அடுக்கு பாதுகாப்பையும் மீறி ஹேக் செய்பவர்கள்உள்ளார்கள்.கடுமையான பாதுகாப்புகளைக் கொண்ட தளங்களையே பதம் பார்த்தவர்கள் உள்ளனர்.

எனவே, எப்படி இருந்தாலும் ஹேக் செய்து விடுவார்கள் என்று அசட்டையாக இருப்பதை விட இது போலப் பாதுகாப்புகளை ஏற்படுத்திக்கொள்வது நமக்கு நல்லது. ஹேக் வாய்ப்புகளைக் குறைக்கும்.

Read: ஹேக்கிங்கில் (Hack) இருந்து தப்பிப்பது எப்படி?

மற்ற மின்னஞ்சல் பயன்படுத்துபவராக இருந்தால் ஜிமெயிலுக்கு எப்படி மாறுவது என்பதை கேள்வி பதில் [FAQ] முறையில் அமைத்து இருக்கிறேன்.

கேள்வி 1

வேறு மின்னஞ்சல் பயன்படுத்துகிறேன். தற்போது இதில் இருந்து மாறினால் என்னுடைய பழைய மின்னஞ்சல்களை எப்படி இதற்குக் கொண்டு வருவது?

மிக மிக அடிப்படையான கேள்வி. ஏனென்றால் அனைத்தையும் மாற்றுவது என்பது ஒரு அலுவலகத்தை ஒரு இடத்தில் இருந்து மற்ற இடத்திற்கு மாற்றுவதிற்கு நிகரானது.

முகவரி, தொலைபேசி எண், பொருட்கள், கணினி, நெட்வொர்க் என்று அனைத்தையும் மாற்றம் செய்வது போலச் சிரமமான பணி.

உங்களுடைய தற்போதைய மின்னஞ்சல் முழுவதையும் ஒன்று விடாமல் உங்கள் புதிய ஜிமெயில் கணக்கில் இம்போர்ட் செய்ய முடியும், அதாவது எந்த வித மாற்றமும் இல்லாமல் தேதி நேரம் உட்பட. மிக மிக எளிதானது.

இதைத் தொடங்கியவுடன் முடிய ஒன்று அல்லது இரண்டு நாட்கள் ஆகலாம். உங்களின் மின்னஞ்சல்களின் எண்ணிக்கையைப் பொறுத்து மாறுபடும். முடிந்தவுடன் தானியங்கியாக அறிவிப்பு வரும்.

இதில் மின்னஞ்சல் மட்டுமல்ல உங்கள் நண்பர்கள் முகவரிகளையும் இதுபோல செய்து விடலாம். உங்கள் மின்னஞ்சல்கள் ஒரு லேபிளில் வகைப்படுத்தப்படும்.

எடுத்துக்காட்டு contact [@] giriblog.com. இதன் மூலம் நீங்கள் பழைய முகவரி மின்னஞ்சல்களை எளிதாக இனம் காண முடியும்.

கேள்வி 2

பழைய மின்னஞ்சல் முகவரியை அனைவருக்கும் தெரிவித்து எப்படி இதை உபயோகிக்க தொடங்குவது?

உங்களுடைய புதிய மின்னஞ்சல் கணக்கில் இருந்து உங்கள் contact ல் உள்ள அனைவருக்கும் நான் இந்த புதிய முகவரிக்கு மாறி விட்டேன். எனவே, உங்கள் contact ல் இந்த முகவரியை அப்டேட் செய்து கொள்ளுங்கள் என்று அனுப்பி விடுங்கள்.

கேள்வி 3

இதற்கு மாறினாலும் தொடர்ந்து பழைய மின்னஞ்சலுக்கே அனுப்புவார்களே என்ன செய்வது?

இது நடைமுறை பிரச்சனை தான். நீங்கள் ஜிமெயில்க்கு மாறிய பிறகு Auto Reply / Vacation response Enable செய்து விடலாம்.

அதிக பட்சம் ஒரு மாதம் உங்கள் பழைய மின்னஞ்சல் கணக்கில் பதில் அளிக்கலாம், அது கூட இனி இதற்கு அனுப்பாதீர்கள்! புதிய ஜிமெயில் ஐடிக்கு அனுப்பி விடுங்கள், என்று கூறி விடுங்கள்.

ஒரு சிலர் தங்கள் contact அப்டேட் செய்யாமல் அனுப்பிக்கொண்டு இருப்பார்கள். அதற்குப் பதில் தராதீர்கள். பின் அவர்களே அனுப்புவதை நிறுத்தி விடுவார்கள்.

பதில் அனுப்பிக்கொண்டு இருந்தால், இதிலேயே தான் வந்து கொண்டு இருக்கும்.

உங்கள் மொபைல் எண்ணை மாற்றினால் நீங்கள் அறிவித்தும் பழைய எண்ணையே தொடர்பு கொள்வார்கள். அது போலத் தான். எனவே இந்தத் தவறை செய்யாதீர்கள்.

இதோடு மிக முக்கியமான விஷயம் பல்வேறு இடங்களில் (வங்கி, மொபைல் நிறுவனம் etc) உங்களுடைய பழைய மின்னஞ்சல் முகவரியே இருக்கும்.

இங்கே உங்கள் புது முகவரியை மறக்காமல் அப்டேட் செய்ய வேண்டும்.

More Details – https://mail.google.com/mail/help/intl/en/switch.html

மேற்கூறிய காரணங்களே ஏன் ஜிமெயிலுக்கு ஏன் மாற வேண்டும் என்பதற்கான விளக்கங்கள். இன்னும் ஜிமெயிலுக்கு மாறவில்லையென்றால், மாறுங்கள்.

ஜிமெயில் இலவசமாகத் தரும் எண்ணற்ற வசதிக்கு என்னால் முடிந்த சிறு உதவி. பணம் கொடுத்தால் கூட இவ்வளவு வசதி தருவார்களா என்பது சந்தேகம் தான் 🙂 .

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).