ஹேக்கிங் (Hack) பாதுகாப்பு வழிகள் என்ன?

இணையத்தை பயன்படுத்துகிறீர்கள் என்றால் “ஹேக்கிங்” (Hack) என்ற வார்த்தை அறியாமல் இருக்க மாட்டீர்கள்.

அப்படி இதைத் தெரிந்து இருக்கவில்லை என்றால், இணையத்தை பயன்படுத்தப் போதுமான அறிவை இன்னும் பெறவில்லை என்பதே உண்மை.

ஹேக்கிங் பற்றித் தெரியாதவர்களும் தெரிந்தவர்களும் படிக்க வேண்டிய கட்டுரை.

ஹேக்கிங் என்றால் என்ன?

உங்களை அறியாமல் உங்கள் மூலமாகவே அல்லது உங்களுக்குத் தெரியாமல் உங்கள் தகவல்கள், மின்னஞ்சல், வங்கி மற்றும் பல இணைய கணக்குகளின் கடவுச்சொல்லை (Password) திருடுவதே ஹேக்கிங் ஆகும்.

எதற்கு ஹேக் செய்கிறார்கள்?

சிலர் இதைப் பொழுதுபோக்காகச் செய்கிறார்கள், இன்னும் சிலர் தங்களுக்கு பிடிக்காதவர்களின் கணக்கை முடக்க செய்கிறார்கள்.

சிலர் பணத்துக்காகச் செய்கிறார்கள் அதாவது நீங்கள் பணம் கொடுத்தால், நீங்கள் கூறும் கணக்கை ஹேக் செய்து கொடுத்து விடுவார்கள்.

இன்னும் சிலர் மற்றவர்களின் பணத்தை, தகவல்களைத் திருடச் செய்கிறார்கள்.

இதை எவ்வாறு தடுப்பது?

நான் கூறப்போவது உங்களை எச்சரிக்கை படுத்தவே! என்னதான் எச்சரிக்கையாக இருந்தாலும் கொஞ்சம் ஏமாந்தாலும் நமது கணக்கு முடக்கப்பட்டு விடும்.

எனவே பின்வருவனவற்றை கூடுமானவரை பின்பற்றப்பாருங்கள்.

1. https (Hypertext Transfer Protocol Secure)

பணப்பரிவர்த்தனை, பயனர் கணக்கைப் பயன்படுத்தும் தளங்கள்  குறிப்பாக உங்கள் கிரெடிட் கார்டு, டெபிட் கார்டு பயன்படுத்தினால் கண்டிப்பாக முகவரியில் https ஆகத்தான் இருக்க வேண்டும்.

இல்லையென்றால் உள்ளீடு செய்யக் கூடாது.

வங்கிக்கணக்கு உட்பட எந்தக் கணக்கில் நுழைந்தாலும் அது https ஆக உள்ளதா என்று உறுதி செய்த பிறகே உள்ளே செல்ல வேண்டும்.

https தகவல்களை Encrypt செய்து அனுப்பும், பாதுகாப்பானது.

பிற்சேர்க்கை – முகவரியில் “HTTPS” இல்லையா..! தெறிச்சு ஓடிடுங்க 🙂

2. சரியான முகவரி

எப்போது மின்னஞ்சலைப் பயன்படுத்த நினைத்தாலும் நீங்களே முகவரியை முழுவதும் தட்டச்சு செய்யுங்கள். எடுத்துக்காட்டாக https://gmail.com. வேறு ஏதாவது சுட்டி (Link) மூலம் செல்லாதீர்கள்.

எடுத்துக்காட்டாக www.emaanthavan.com/gmail என்று இருக்கும் 🙂 . திறந்தாலும் கூகுள் மின்னஞ்சல் கணக்கு முகப்பு போலவே இருக்கும்.

கூகிள் கணக்கு என்று நினைத்துப் பயனர் கணக்கு மற்றும் கடவுச்சொல்லை கொடுத்துச் செல்வீர்கள்.

ஆனால், உள்ளே ஒன்றும் இருக்காது.

சரி! எதோ பிரச்சனை என்று மறுபடியும் நேரடியாக https://www.gmail.com என்று அடித்துச் சென்று விடுவீர்கள்.

ஆனால், உங்களுக்குத் தெரியாது, இன்னொருவருக்கு உங்கள் பயனர் விவரங்களைத் தாரை வார்த்து விட்டீர்கள் என்று.

3. OS & Anti Virus Update

கணினியில் Windows இயங்குதளம் (Operating System) பயன்படுத்துகிறீர்கள் என்றால் Windows update மற்றும் Anti Virus update கண்டிப்பாகச் செய்ய வேண்டும்.

இதைத் தானியங்கியாக அமைத்து விட்டீர்கள் என்றால், அதுவே இணையத்தை இணைத்தவுடன் Update செய்து விடும்.

அவ்வப்போது அது சரியாகச் செயல்படுகிறதா என்பதை மட்டும் கவனித்தால் போதுமானது.

இது உலவிக்கும் (Browser) பொருந்தும்.

4. சுட்டிகளில் (Link) எச்சரிக்கை

அறிமுகம் இல்லாத நபரிடம் இருந்து வரும் குறுந்தகவல், மின்னஞ்சலில் உள்ள சுட்டிகளை க்ளிக் செய்ய வேண்டாம்.

சந்தேகம் அளிக்கும் எந்தச் சுட்டியையும் க்ளிக் செய்ய வேண்டாம். இதன் மூலம் உங்கள் தகவல்களை எளிதாகச் சுருட்ட முடியும்.

5. தகவல் எச்சரிக்கை

உங்களுடைய வங்கிக் கணக்கு விவரங்கள் கேட்டு மின்னஞ்சல் வந்தால், தைரியமாக அதை டெலிட் செய்து விடலாம்.

எந்த வங்கியும் உங்கள் கணக்கு பற்றிய விவரங்கள் (பயனர் கணக்கு, OTP மற்றும் கடவுச்சொல்) கேட்டு மின்னஞ்சல் செய்யாது. 100% நம்பலாம்.

மின்னஞ்சல் பயனர் கணக்கு பற்றிய விவரங்களைக் கேட்டு வரும் மின்னஞ்சலும் இதே வகையைச் சேர்ந்ததாகும்.

6. இலவச மென்பொருள் வேண்டாம்

இலவசமாகக் கிடைக்கிறது என்று  எந்தப் புதிய மென்பொருளையும் நிறுவாதீர்கள் அதில் Spyware என்ற தகவல்களைத் திருடும் மென்பொருள் இருக்கலாம்.

இது தெரியாமல் இலவசம் என்று மகிழ்ச்சியாக நிறுவினால், உங்கள் கிரெடிட் கார்ட் எண் உட்பட அனைத்தையும் சுட்டு வேட்டு வைத்து விடுவார்கள்.

நம்ம தான் இலவசம் என்றால் பினாயிலும் குடிப்போமே! உஷாராக இருங்கள்.

எவ்வளவுக்கெவ்வளவு தேவையற்ற மென் பொருளை நிறுவுவதை தவிர்க்கிறீர்களோ அவ்வளவு நல்லது. கணினியின் வேகமும் சிறப்பாக இருக்கும்.

பிற்சேர்க்கை – கணினியைப் பராமரிப்பது எப்படி?

7. Keylogger

Keylogger என்ற மென்பொருள் உள்ளது.

இது மிக மிக அபாயகரமான மென் பொருளாகும். இதன் மூலம் நீங்கள் தட்டச்சு செய்யும் ஒரு எழுத்து விடாமல் அத்தனையையும் நீங்கள் அறியாமல் படிக்க முடியும்.

எளிமையாகக் கூறுவதென்றால் உங்களை மொட்டை அடிக்கும் மென்பொருளாகும்.

இது பற்றிச் சுருக்கமாகக் கூற முடியாது என்பதால் இது பற்றியும் இதில் இருந்து எவ்வாறு தப்பிப்பது என்பது பற்றியும் விரிவாகப் பின்னர் எழுதுகிறேன்.

பிற்சேர்க்கை – “Key Logger” என்ற ஆபத்து பற்றித் தெரியுமா?

8. பிரவுசிங் சென்டர்  

எல்லாவற்றையும் விட மிக ஆபத்தான இடம் என்றால், அது பிரவுசிங் சென்டர் தான். காசு கொடுத்து ஆப்பு வாங்கும் இடம், சொந்த செலவில் சூனியம் வைப்பது ஆகும்.

இங்கே மேற்கூறிய அனைத்துமே நடக்கலாம்.

எனவே, உங்களின் முக்கியமான கணக்குகளைப் பிரவுசிங் சென்டர்களில் பயன்படுத்துவதை கூடுமானவரை தவிருங்கள்.

தவிர்க்க முடியவில்லை என்றால், Private Browsing / Incognito முறையை IE, க்ரோம் (ctrl+shift+N) மற்றும் ஃபயர்ஃபாக்ஸில் பயன்படுத்தவும்.

இது உங்கள் தகவல்களை எங்கும் சேமிக்காது ஆனால் Keylogger மென்பொருள் முறையில் தகவல்களைத் திருட முடியும்.

பாதுகாப்பே இல்லாமல் இருப்பதற்கு இந்த முறை கொஞ்சம் பரவாயில்லை என்று கூறலாம் அவ்வளவே.

9. கடவுச்சொல்

அனைத்திலும் கவனமாக இருந்தாலும், கடவுச்சொல் கடினமாக இல்லையென்றால் விரல் சொடுக்கும் நேரத்தில் கண்டு பிடித்து விடுவார்கள்.

எவ்வளவு சிறப்பான அல்லது கேவலமான கடவுச்சொல்லை வைத்து இருக்கிறீர்கள் என்று பின் வரும் தளங்களில் சென்று அறிந்து கொள்ளுங்கள்.

மொக்கை கடவுச்சொல்லாக இருந்தால் உடனே மாற்றி விடுங்கள்.

a) https://www.security.org/how-secure-is-my-password/

b) http://www.passwordmeter.com

10. ஒரே கடவுச்சொல் கூடாது

அனைத்து கணக்குகளுக்கும் (Gmail, facebook, twitter, instagram) ஒரே கடவுச்சொல்லை வைக்கக் கூடாது.

அப்படி வைத்தால், ஒரு கணக்கை ஹேக் செய்தால் உங்கள் அனைத்து கணக்குகளும் கையை விட்டுப்போய் விடும்.

கூகிள் கணக்கை எடுத்துக்கொண்டால் அதில் மின்னஞ்சல், கூகுள் ஃபோட்டோஸ், காலண்டர், YouTube, Docs, கூகுள் ட்ரைவ் என்று அனைத்தும் காலி ஆகி விடும்.

ஒரு கடவுச்சொல் ஆனால், நீங்கள் இழப்பது எத்தனை பாருங்கள்! இவை இல்லாமல் facebook, twitter, instagram, Amazon, flipkart என்று பல கணக்குகள் உள்ளன.

11. Two step Authentication

இரட்டை அடுக்குப் பாதுகாப்பு முறையை செயல்படுத்திஇருக்க வேண்டும். இதன் மூலம் உங்கள் கணக்கின் பாஸ்வேர்ட் தெரிந்து இருந்தாலும், ஹேக் செய்தவர்களால் கணக்கில் நுழைய முடியாது.

OTP அல்லது வேறு எந்த வகையில் (Like.. Google Authenticator) செயல்படுத்தியிருக்கிறீர்களோ, அவ்வழியில் சென்றால் மட்டுமே நுழைய முடியும்.

90% பயனாளர்கள் Two step Verification செயல்படுத்தவில்லையென கூகுள் கூறுகிறது.

இவ்வசதியை செயல்படுத்தியவர்களின் கணக்கு ஹேக்கிங்கில் இருந்து பாதுகாக்கப்பட்டுள்ளது.

எனவே, இவ்வசதியை சோம்பேறித்தனம் பார்க்காமல் செயல்படுத்தவும்.

Read: ஜிமெயிலின் இரட்டை அடுக்குப் பாதுகாப்பு வசதி!

12. யாரையும் நம்ப வேண்டாம் 

உங்கள் கணக்கின் கடவுச்சொல்லை யாருக்கும் கொடுக்காதீர்கள்.

அப்படி அவசியம் கொடுக்க வேண்டி வந்தால், வேலை முடிந்தவுடன் உடனே கடவுச்சொல்லை மாற்றி விடுங்கள். எவ்வளவு நெருங்கிய நண்பராக இருந்தாலும் சரி!

இந்த விசயத்தில் யாராக இருந்தாலும் நம்ப வேண்டாம் காரணம், நாளை வேறொருவர் ஹேக் செய்தால் கூட உங்கள் நண்பரைச் சந்தேகப்பட வேண்டி வரும்.

இது அனாவசிய பிரச்சனைகளைத் தரலாம், நட்பை முறிக்கலாம்.

மேற்கூறியவை ஓரளவு இணைய பாதுகாப்பை அளிக்கும். இருப்பினும் இதையும் மீறி எச்சரிக்கையாக இருப்பது நம் கையில் தான் உள்ளது.

நம் கணக்கை யாரும் இதுவரை முடக்கவில்லையென்றால், நம் கணக்கு பாதுகாப்பாக உள்ளது என்று அர்த்தமல்ல. ஹேக் செய்பவர்கள் நம் கணக்கைக் குறி வைக்கவில்லை என்பதே உண்மை.

ஹேக் செய்பவர்கள் நினைத்தால், உங்களின் சிறு தவறு கூட அவர்களுக்குப்போதும் உங்கள் “கணக்கை” முடித்து விடுவார்கள் 🙂 .

தொடர்புடைய கட்டுரைகள்

ஃபேஸ்புக்கின் இரட்டை அடுக்குப் பாதுகாப்பு வசதி

SIM SWAP மோசடி [FAQ]

கூகுள் அறிமுகப்படுத்திய “Titan Security Key”

அடிக்கடி கடவுச்சொல்லை மாற்ற வேண்டுமா?

கூகுள் அறிமுகப்படுத்திய அதி பாதுகாப்பு வசதி

எது மாறினாலும் “123456” மட்டும் மாறவில்லை!

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).