ஃபேஸ்புக் நல்லதா கெட்டதா!

ஃபேஸ்புக் நல்லதா கெட்டதா என்பது பலரால் விவாதிக்கப்படுகிறது. Image Credit

சமீபத்தில் ஒரு பெண் வெறுத்துப் போய் ஸ்டேட்டஸ் போட்டு இருந்தார். இவர் என் நண்பர் அல்ல ஆனால், என்னுடைய நண்பருக்கு நண்பர்.

அந்தப் பெண்ணுடைய ஸ்டேட்டசில் என்னுடைய நண்பர் கமெண்ட் போட்டதால் என்னுடைய Timeline ல் தெரிந்தது.

கொஞ்சம் சூடாக இருந்ததால், சரி! என்னவென்று பார்க்கலாம் என்று படித்தேன்.

“பெண்ணியவாதிகள் என்ற பெயரில் சிலர் இருக்கிறார்கள் ஆனால், மோசமாக நடக்கிறார்கள். கேவலமான கமெண்ட் போடுகிறார்கள், அதையும் சிலர் லைக் செய்கிறார்கள்.

தான் பெரிய ஆள் என்பதை நிரூபிக்க ஏதேதோ செய்கிறார்கள். சிலர் பெண்கள் பெயரில் வந்து ஏமாற்றுகிறார்கள். பெண் என்ற போர்வையில் செக்ஸ் பற்றி பேசுகிறார்கள்.

ஒரு சில பெண்கள் தாங்கள் தான் அழகு என்பது போல நடந்து கொள்கிறார்கள். இதனால் ஃபேஸ்புக் என்றாலே வெறுப்பாகி விட்டது” .

இது போல எழுதி இருந்தார், இப்படியே அல்ல, இந்தப் பொருள் வரும்படி.

இவர் கூறி இருந்ததில் மாற்றுக்கருத்தில்லை. இதைப் படித்துக்கொண்டிருப்பவர்களில் சிலர் கூட இது போல ஒரு மோசமான வேலையைச் செய்து கொண்டு இருக்கலாம்.

ஃபேஸ்புக் நல்லதா கெட்டதா!

எங்கேயும் நல்லவர்களும் இருக்கிறார்கள், மோசமானவர்களும் இருக்கிறார்கள். இதை நாம் எப்படி எதிர்கொள்கிறோம் என்பதில் தான் நம் நிம்மதி அடங்கி இருக்கிறது.

ஃபேஸ்புக்கில் நண்பர்களிடையே அரசியல் இருக்கிறது உண்மை தான், ஆனால் அதெல்லாம் சமாளிக்கக்கூடிய ஒன்று தான்.

எல்லோருக்கும் லைக் போடுறாங்க, எனக்குப் போடுலையே, நம்மை யாரும் கண்டு கொள்ளவில்லையே.

நாம லைக் பண்ணுறோம் ஆனால், நம்ம எதுவும் போட்டால் லைக் பண்ண மாட்டேங்குறாங்களே என்று இது போலச் சின்னச் சின்ன மனத்தாங்கல்கள் மட்டுமே தவிர்க்க முடியாதது.

ஃபேஸ்புக் எப்படி அனைவரையும் நண்பர்களாக ஏற்றுக்கொள்ள வசதி தருகிறதோ, அதே அளவிற்கு நம்மைப் பாதுகாப்பாக வைத்துக்கொள்ளவும் வசதி கொடுக்கிறது.

Friend Request / Block / Unfollow

நம்ம ஆளுங்க கிட்ட இருக்கிற பெரிய பிரச்சனை…

யார் Friend Request அனுப்பினாலும் கண்ணை மூடிட்டு Approve பண்ண வேண்டியது, அப்புறம் அவன் இப்படி சொல்றான், இவன் அப்படி சொல்றான்னு புலம்ப வேண்டியது.

ஒழுங்கா பேசாமல் அநாகரிகமாகக் கமெண்ட் போடுறாங்களா? உனக்குப் பிடிக்காத விசயங்களைப் பேசுகிறார்களா? Block / Unfollow பண்ணு.

உன்னை யாரு தொடர்ந்து அனுமதிக்கச் சொன்னது?

அலப்பறை பண்ணிட்டு இருக்காங்களா, அசிங்கமா பேசுறானா, பெண் பெயரில் வந்து உங்களைப் போட்டு வாங்கறான் என்று தோன்றுகிறதோ அத்தனை பேரையும் Block பண்ணுங்க. அவ்வளோ தான் விஷயம்.

யார் தவறு?

உங்களுக்கு யார் பிடிக்கிறதோ அவர்களோட நட்பைத் தொடருங்க. எதுக்கு தேவையில்லாம பதட்டம் ஆகிட்டு, ஃபேஸ்புக்கை திட்டிட்டு இருக்கணும்.

ஃபேஸ்புக் நல்லதையும் தருகிறது கெட்டதையும் தருகிறது.

இதில் நீங்கள் எதை எடுத்துக் கொள்கிறீர்கள் என்பது உங்களுக்கான உரிமை. நான் கெட்டதை எடுத்துப்பேன் அப்புறம் கதறிக் கதறி அழுவேன் என்றால் அது யார் தவறு?

நம்மை நாலு பேரு புகழ வேண்டும், நாற்பது பேர் லைக் பண்ணனும், பாராட்ட வேண்டும் என்று ஆசைப்படும் அதே வேளையில் இது போலச் சங்கடங்களையும் எதிர்கொள்ளத் தயாராக இருக்க வேண்டும்.

உனக்கு ஜால்ரா தட்ட நாலு பேர் இருக்கும் போது, திட்ட எட்டு பேர் இருக்கமாட்டானா?

நம்முடைய பிரச்சனைகளுக்கு முக்கியக் காரணம் நம்மைத் தவிர வேறு யாரும் இருக்க முடியாது [சில விதிவிலக்குகள் உண்டு].

நீங்கள் அனுமதித்தால் மட்டுமே!

நம்மிடம் பழகுபவர்கள், நம் எதிரில் உள்ள கண்ணாடி மாதிரி தான். நாம் எப்படி இருக்கிறோமோ, அதைத்தான் அவர்களும் பிரதிபலிப்பார்கள்.

நாம் அனுமதித்தால் மட்டுமே எதுவும் தொடரும்.

எனவே, மற்றவர்களைக் குறை கூறுவதை நிறுத்தி விட்டு நாம் ஒழுங்காக நடந்து கொண்டாலே போதுமானது. நமக்கு எந்தப் பிரச்சனையும் வராது.

இல்லை, என்னால் இப்படி எல்லாம் ஒதுங்கிப் போக முடியாது என்றால், இதனுடன் வரும் பிரச்சனையையும் எதிர் கொள்ளத் தயாராகுங்கள்.

ஃபேஸ்புக் பயன்படுத்துகிறவர்கள் கிட்ட அரசியல்வாதிகள் பிச்சை எடுக்கணும், அரசியலில் அரசியல்வாதிகளையே தூக்கிச் சாப்பிட்டு விடுவார்கள் போல.

சுருக்கமாக நம் பிரச்சனைகளுக்கு நாம் தான் காரணம் மற்றவர்கள் அல்ல. முதலில் கண்டபடி அனைவரையும் நண்பர்களாகச் சேர்ப்பதை நிறுத்துங்கள்.

பிரச்சனை செய்பவர்களைத் தயங்காமல் Block செய்யுங்கள். பிரச்சனைகள் / மன உளைச்சல்கள் தானாகவே சரியாகும். ஃபேஸ்புக் நல்லதா கெட்டதா! என்பது நீங்கள் நடந்து கொள்வதிலேயே உள்ளது.

ஃபேஸ்புக்கில் எப்படி பாதுகாப்பாக இருப்பது, எதைச் செய்யலாம் எதைச் செய்யக் கூடாது என்பதைப் பற்றிப் பின்னர் விரிவாக எழுதுகிறேன்.

பிற்சேர்க்கை

குடிப்பழக்கமும் ஃபேஸ்புக் & WhatsApp பழக்கமும்

ஃபேஸ்புக் அந்தரங்கப் பாதுகாப்பு

ஃபேஸ்புக்கின் இரட்டை அடுக்குப் பாதுகாப்பு வசதி

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).