சென்னை விமான நிலையத்தில் திருடப்பட்ட பொருட்கள்

நான் இந்த முறை சிங்கப்பூரிலிருந்து இந்தியா செல்ல ஏர் இந்தியா எக்ஸ்பிரஸ் விமானத்தில் முன்பதிவு செய்து இருந்தேன். Image Credit

பயணத்திற்காக விமான நிலையம் சென்ற போது வழக்கத்தைவிட கூட்டம் அதிகமாக இருந்தது.

குருவி

நான் வரிசையில் சென்று நின்ற போது அருகே வந்த ஒருவர் என் அனுமதி இல்லாமலேயே என் பெட்டிகளை ட்ராலியில் வைக்க உதவினார்.

நான் அவர் ஏர் இந்தியா ஊழியரோ என்று நினைத்து விட்டேன்.

பிறகு அவர் உங்க பெட்டிகளின் எடை குறைவாக உள்ளது. எனவே, என்னுடைய பெட்டிகளில் ஒன்றை எடுத்துச் செல்லுங்கள் நான் உங்களுக்கு பணம் தருகிறேன் என்றார்.

எனக்கு துளி கூட விருப்பம் இல்லை என்றாலும் அவர் வயதானவராக இருந்ததாலும் ரொம்ப கெஞ்சி கேட்டுக் கொண்டதால் சரி என்று ஒத்துக்கொண்டேன்.

அதே போல் அவரும் எல்லாம் முடிந்த பின் வந்து பணம் தந்தார் ஆனால், வாங்க மறுத்து விட்டேன்.

பிறகு அவர் வரும் நபர் அனைவரிடத்தும் ஒரு பெட்டியைக் கொடுத்து இதே போல் கேட்டுக் கொண்டு இருந்தார்.

பின்பு தான் தெரிந்தது அவர் ஒரு வியாபாரி என்பதும் இவ்வாறு குறைந்த செலவில் அல்லது ஒசி யில் கொண்டு செல்பவர் என்றும்.

பிறகு என் நண்பர்கள் கூறினார்கள் இதை போல் பலர் செய்து கொண்டு இருக்கிறார்கள் என்றும், இவர்களுக்கு “குருவி” என்ற பெயரும் உண்டு இனிமேல் இதை போல் செய்யாதே என்று அறிவுறுத்தினார்கள்.

போதை பொருட்கள்

அவர்கள் அதில் போதை பொருட்கள் வைத்துக் கடத்தி வந்தால் நாம் மாட்டிக் கொள்வோம் என்று பயமுறுத்தினார்கள்.

அவர்கள் கூறியது ஏற்று கொள்ள கூடியதாக இருந்ததால் நானும் அதை ஆமோதித்தேன்.

சென்னை விமான நிலையம் வந்த போது அதே நேரத்தில் இன்னும் இரண்டு விமானங்கள் வந்ததால் இமிக்ரேசன் செய்யும் இடத்தில் கூட்டம் அதிகமாக இருந்ததால் தாமதமாகவே என் பெட்டிகளை எடுக்க சென்றேன்.

அங்கு இருந்த ஊழியர்கள் என் பெட்டிகள் மற்றும் சிலரின் பெட்டிகளுடன் காத்து இருந்தார்கள்.

என் பெட்டியைப் பார்த்ததும் நிம்மதி அடைந்து எடுக்கும் பொழுது, அவர்கள் “சார் பார்த்து எதாவது கவனிங்க உங்களுக்காக தான் காத்துட்டு இருக்கிறோம்”னு சொன்னாங்க.

நான்.. அது தானே உங்க வேலை நான் எதுக்கு உங்களுக்கு காசு தரனும் என்று கேட்டேன், பிறகு அருகே இருந்த இன்னொரு ஊழியர் சரி சார்! நீங்க போங்க என்றார்.

நானும் ஏற்கனவே சிசிங்கப்பூரில் ஒருத்தரிடம் பெட்டி வாங்கி இருந்ததால் எதுக்கு வம்பு என்று உடனே கிளம்பி விட்டேன்.

திருட்டு

வீட்டிருக்கு வந்த பிறகு தான் பார்த்தேன், நம்பர் லாக் சிஸ்டம் உடைக்கப்பட்டு உள்ளே நான் வாங்கி இருந்த மூன்று புது கடிகாரங்கள் திருடப்பட்டு இருந்தது (இதற்கு நான் தனியாக இன்னொரு பூட்டு போடவில்லை).

எனக்கு இது முதல் அனுபவம், பலரும் சொல்லிக் கேள்வி பட்டு இருக்கிறேன்.

அப்பொழுதெல்லாம் கவனிக்காமல் விட்டது இப்பொழுது நமக்கே ஏற்படும் பொழுது தான் அதன் வலி தெரிகிறது. அதன் மதிப்பு 6000 Rs என்பதால் மனது ஓரளவு சமாதானம் அடைந்து விட்டது.

கீழே விலை உயர்ந்த கேமரா இருந்ததை நல்லவேளை அவர்கள் கவனிக்கவில்லை, அந்த வகையில் மகிழ்ச்சி.

சரி நமக்கு ஒரு படிப்பினை என்று எடுத்துகொண்டேன். இனி உஷாராக இருக்க வேண்டும் என்று முடிவு செய்து கொண்டேன்.

இதை போல விலை உயர்ந்த பொருட்களை இனி கை பெட்டியுடனே வைத்து கொள்வது என்று முடிவு செய்து கொண்டேன்.

இதை போலப் பலருக்கும் கண்டிப்பாக அனுபவம் இருக்கும், என்னைப் போல உஷாராக இல்லாமல் இருப்பவர்கள் இதை விளையாட்டாக எடுத்துக் கொள்ளாமல் கவனமாக இருக்கும் படி கேட்டுக் கொள்கிறேன்.