மின்னணு பரிவர்த்தனை பயன்படுத்த ஏன் தயக்கம்?

இணையம் பல வசதிகளை / எளிமையை மக்களுக்குக் கொடுத்தாலும் பல காரணங்களால் மக்கள் மின்னணு பரிவர்த்தனை பயன்படுத்த தயங்குகிறார்கள்.

இணையம் , தொழில்நுட்பம் பற்றி அதிகம் தெரியாதவர்கள் யோசிப்பதில் நியாயம் உள்ளது. Image Credit 

அனைத்தும் தெரிந்தும் மின்னணு பரிவர்த்தனையைப் புறக்கணிக்கும் அல்லது ஆர்வமில்லாதவர்களை நினைத்துக் குழப்பமாக இருக்கிறது.

எளிமையாக இருந்தும் எதனால் பயன்படுத்த யோசிக்கிறார்கள் என்று எனக்குப் புரியவில்லை.

Paytm / கடனட்டை (Credit Card)

உதாரணத்துக்கு Paytm பெரும்பாலான இடங்களில் வந்து விட்டது ஆனாலும், பெரும்பாலானோர் பயன்படுத்த விரும்புவதில்லை.

எங்கள் அலுவலகம் அருகே ஒரு சிறு உணவகம் உள்ளது. இங்கே வருபவர்கள் 99% IT துறையினர் தான் ஆனால், என்னோட சேர்த்து அதிகப் பட்சம் 3 பேர் Paytm பயன்படுத்தினாலே அதிகம்!

பெரும்பாலோனோர் கடனட்டை பயன்படுத்துகிறார்கள். கடனட்டை பயன்படுத்திச் செலவு செய்தால், உங்களுடைய வங்கிக் கணக்கில் இருந்து பணம் எடுப்பதைத் தவிர்க்கலாம்.

இதன் மூலம் உங்கள் பணத்தை மாத இறுதியில் கடனட்டைக்குச் செலுத்துவதால், குறைந்தது 20 – 25 நாட்களாவது அந்தப்பணம் உங்கள் வங்கியில் இருக்கும்.

இதன் மூலம் உங்களுடைய வங்கி கணக்கின் மதிப்பு உயரும், காலாண்டு வட்டி சில நூறு ரூபாய்கள் கிடைக்கும்.

Read : கடனட்டை [Credit Card] என்றாலே பிரச்சனைகள் மட்டும் தானா!

சில்லறை பிரச்சனை

நான் மின்னணு பரிவர்த்தனையை அதிகம் பயன்படுத்த காரணமே சில்லறை பிரச்சனை தான்.

எங்கே போனாலும் “சார் சில்லறையா கொடுங்க!” என்பது தான், எரிச்சலாக இருக்கும். இந்தக் காரணத்துக்காகவே எங்கெல்லாம் Paytm / கடனட்டை உள்ளதோ அங்கெல்லாம் இவற்றை மட்டுமே பயன்படுத்துவேன்.

உள்ளூர் ரயிலில் பயணிக்கக் கூட நான் UTS செயலி தான் பயன்படுத்துகிறேன், பணம் கொடுத்து பயணச்சீட்டு வாங்குவதில்லை.

Read : உள்ளூர் (suburban) ரயில்களில் பயணிப்பவரா?

மேலே கூறிய உணவகத்தில் “சில்லறை கொடுங்க சார்” என்று கேட்கும் போது அருகில் உள்ள நண்பர்களைக் கேட்டுக்கொண்டு இருப்பார்கள்.

எதற்கு இக்கவலை? கண் முன்னே வசதிகள் இருக்கும் போது பயன்படுத்துவது தானே!

கணக்கில் வராத பணம்

நீங்கள் பணமாகக் கொடுத்தால், அதைக் கணக்கில் வராத பணமாக மாற்ற முடியும் ஆனால், மின்னணு பரிவர்த்தனை செய்தால், கணக்கு காட்டியே ஆக வேண்டும்.

எனவே, நாமே மின்னணு பரிவர்த்தனையைப் பயன்படுத்தாமல் இவற்றுக்குத் துணை போகிறோம் ஆனால், பேசுறதுக்கு மட்டும் குறைச்சல் இல்லை.

நண்பர்கள்

என்னுடைய நண்பர்களே நான் Paytm மூலமாகச் செலுத்தினால், “அட என்னங்க கிரி! 30 ரூபாய்க்கு போய் இதா.. பணத்தைக் கொடுத்துட்டு வாங்க!” என்று தான் கூறுகிறார்கள்.

தொடர் வற்புறுத்தலுக்குப் பிறகு என்னுடைய மனைவி, அக்கா மின்னணு பரிவர்த்தனை மட்டுமே செய்கிறார்கள். என்னுடைய அக்கா செய்யவே மாட்டேன் என்று இருந்து, தற்போது பரிவர்த்தனை முழுக்க BHIM, Google Tez தான்  🙂 .

நான் பணத்தைக் கொடுக்கும் போது கடனட்டை, Paytm போன்ற மின்னணு பரிவர்த்தனை வசதி இருந்தால், மின்னணு பரிவர்த்தனை மட்டுமே செய்வேன்.

பெங்களுருவில் Paytm, கடனட்டை பயன்படுத்துபவர்கள் எண்ணிக்கை சென்னையை விட அதிகம். இங்கே மின்னணு பரிவர்த்தனைக்கு நன்கு வரவேற்பு உள்ளது.

UPI

UPI பரிவர்த்தனை அசுர வேகத்தில் வளர்ச்சி பெற்று வருகிறது. மக்கள் தற்போது இதைப் பயன்படுத்துவதில் ஆர்வம் காட்டி வருகிறார்கள். மாதாமாதம் பயன்படுத்துபவர்கள் எண்ணிக்கை படு வேகமாக அதிகரித்து வருகிறது.

இதே வேகத்தை மற்ற மின்னணு பரிவர்த்தனையிலும் அனைவரும் காட்டினால் நல்லது.

மின்னணு பரிவர்த்தனையில் பல லாபங்கள் உள்ளன. பயன்படுத்தத் தெரிந்தால் இவையெல்லாம் அற்புதமான சேவை.

இனியாவது மின்னணு பரிவர்த்தனைக்கு முக்கியத்துவம் கொடுங்கள்.

தொடர்புடைய கட்டுரைகள்

WhatsApp UPI யை செயல்படுத்துவது எப்படி?

கூகுள் “Tez” செயலி பயன்படுத்துவது எப்படி?

BHIM செயலி பயன்படுத்துவது எப்படி?

“மின்னணு” பரிவர்த்தனை வெற்றியா தோல்வியா?! FAQ

கொசுறு

உங்களுக்கு மின்னணு பரிவர்த்தனை குறித்த சந்தேகங்கள் இருந்தால் கேளுங்கள், நான் விளக்குகிறேன்.

🛑 To get Blog Article, Finance, UPI, OTT updates, Tech News, Online Offers follow –> giriblog WhatsApp Channel (WhatsApp Blog ⭐).