சென்னையில் நடந்த “Google for தமிழ்”

தமிழுக்குப் பெருமையளிக்கும் விதமாக ஒரு மிகப்பெரிய நிகழ்வு சத்தமே இல்லாமல் கடந்த மாதம் நடந்து இருக்கிறது. Image Credit

சென்னையில் நடந்த “Google for தமிழ்”

இந்திய மொழிகளில் இந்தி மற்றும் பெங்காலி மொழிகள் மட்டுமே கூகுள் விளம்பரத்துக்குத் தகுதி பெற்று இருந்தன. தற்போது மூன்றாவது மொழியாகத் தமிழ் இணைந்து இருக்கிறது.

கூகுள் CEO வாகச் “சுந்தர் பிச்சை” அவர்கள் பொறுப்பேற்ற பிறகு இந்தியா அதிகளவில் கவனிப்புக்கு உள்ளாகி வருகிறது.

இந்தியாவின் வளர்ச்சியைக் கூகுள் செமையாகப் பயன்படுத்திக்கொண்டு வருகிறது. ஒருவகையில் நமக்கும் இது நன்மையே!

இணையத்தில் தமிழ்

உலக மொழிகளில் இணையத்தில் அதிகம் பயன்படும் மொழிகளில் தமிழ் மிக முக்கிய இடத்தில் உள்ளது ஆனால், இது வரை தமிழ் மொழிக்கு விளம்பர வசதி இல்லாமல் இருந்தது.

இதனால் தமிழ் தளத்தில் எழுதுபவர்கள் ஏமாற்றத்தில் இருந்தனர். இந்த ஏக்கத்தைப் போக்கும்படியாக இந்த அறிவிப்புள்ளது.

இனி Google AdSense பயன்படுத்தித் தமிழ்த் தளங்கள் வைத்துள்ளவர்கள் இனி விளம்பரங்கள் மூலம் சம்பாதிக்க வாய்ப்பு ஏற்பட்டுள்ளது. இது ஒரு அற்புதமான வாய்ப்பு. இது குறித்து விரைவில் எழுதுகிறேன். இது ஒரு நல்ல மாற்றம்.

தமிழ் இணையமும் பெரியளவில் அசுரத்தனமான வளர்ச்சி பெறும்.

தமிழில் விளம்பரங்கள், கூகுள் தேடல்கள் குறித்த விவரங்கள் போன்றவை குறித்த அறிமுக நிகழ்ச்சிக்கு கூகுள் ஏற்பாடு செய்து இருந்தது.

விண்ணப்பம் ஏற்கப்பட்டுத் தேர்வு செய்தவர்களுக்கு அழைப்பு விடுக்கப்பட்டு இருந்தது. இதை எந்த அடிப்படையில் தேர்வு செய்தார்கள் என்று தெரியவில்லை.

என்னுடைய விருப்ப நிறுவனம் கூகுள் நடத்தும் முதல் தமிழ் நிகழ்ச்சி என்பதால், ஆர்வமுடன் நேற்று (13 மார்ச் 2018) கலந்து கொண்டேன்.

நிகழ்ச்சி நிரல்கள்

நிகழ்ச்சி “தமிழ்” என்ற தலைப்பில் இருந்தாலும்,  பெரும்பாலும் விளக்கங்கள், பேச்சுகள் ஆங்கிலத்தில் இருந்தது பலருக்கு ஏமாற்றம் அளித்தது.

இணையத் தளங்களில் விளம்பரங்கள் எப்படிப் பயன்படுத்துவது, நல்லது கெட்டது, கொள்கைகள் பற்றி விளக்கம் கொடுத்தனர்.

கூகுள் தேடல் பற்றி ஒருவர் சிறப்பாகப் பேசினார். பல புதிய செய்திகளைத் தெரிந்து கொள்ள முடிந்தது.

பிரபல இணையத்தள நிறுவனங்களில் இருந்து வந்தவர்கள் தங்கள் அனுபவங்களை, எதிர்கால வாய்ப்புகள் குறித்துப் பகிர்ந்து கொண்டார்கள்.

பலர் தங்கள் சந்தேகங்களைக் கேட்டுத் தெளிவு பெற்றுக்கொண்டனர். சென்னையில் இது தான் முதல் முயற்சி என்றும் இனி இது போல நிகழ்ச்சிகள் தொடரும் என்றும் கூறினர்.

காலை, மதிய உணவு, மாலை சிற்றுண்டி உட்பட ஏற்பாடு செய்து இருந்தார்கள்.

அடுத்த நிகழ்ச்சி இன்னும் சிறப்பாக நடத்துவார்கள், தமிழ் பேச அதிக நபர்களை நியமிப்பார்கள் என்றும் நம்புகிறேன்.

ஒரு தமிழனாக எனக்கு தமிழின் அபரிமிதமான வளர்ச்சி கண்டு மிகப்பெருமையாக உள்ளது.

“தமிழன் வளர்ந்தால் தமிழ் வளரும்” ஆமாம்! உண்மை தான் 🙂 . நன்றி சுந்தர் பிச்சை அவர்களே!

தொடர்புடைய கட்டுரைகள்

மிரட்டும் தமிழும் கூகுள் மொழிமாற்றியும்!

தமிழ் முக்கியத்துவம் குறைய நீங்களும் ஒரு காரணம்!

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).