கடைக்குட்டி சிங்கம் [2018]

ஆண் குழந்தை இல்லாத சத்யராஜ் ஆண் குழந்தை வேண்டி இரண்டாவது திருமணமும் செய்தும்! பெண் குழந்தையே பிறக்க, பின்னர் முதல் தாரத்துக்கே ஆண் குழந்தை பிறக்கிறது, அக்குழந்தை தான் கடைக்குட்டி சிங்கம் கார்த்தி. Image Credit

வளரும் கார்த்தி தன் அக்கா பெண்களை மணக்காமல் வேறு பெண்ணைக் காதலிக்கிறார். அக்காக்களுக்குத் தெரிய வந்து பஞ்சாயத்தாக, இறுதியில் என்ன ஆகிறது என்பது தான் கதை.

கடைக்குட்டி சிங்கம்

கார்த்தி மாதம் ஒன்றரை லட்சம் சம்பாதிக்கும் விவசாயி, தான் விவசாயி என்பதில் பெருமை கொண்டவர். அதை அவ்வப்போது மற்றவர்களிடத்தும் காட்டவும் செய்கிறார்.

நான் இப்படம் பார்க்க முக்கியக்காரணம் இப்படத்தில் கார்த்திக்கு இருக்கும் அக்காக்கள் எண்ணிக்கையே! 🙂

எனக்கு மூன்று அக்காக்கள், பையன் வேண்டும் என்பதற்காகவே நான்காவது வரை. அக்காலங்களில் இது வழக்கமான ஒன்று தான் என்பதால் வியப்பில்லை.

அப்பா பையன் வேண்டும் என்று விரும்பினாரே தவிர, பெண் குழந்தைகள் மீது வெறுப்பில்லை. அம்மா அப்பா இருவருமே நால்வரையும் ஒரே மாதிரி தான் வளர்த்தார்கள்.

மற்றவர்கள் எல்லாம் சொத்துக்காக, மற்ற காரணங்களுக்காகச் சண்டை போடும் போது, “ஏன் இப்படி அடித்துக்கொள்கிறார்கள்?” என்றே தோன்றும்.

நாங்கள் ஒற்றுமையாக இருக்கக் காரணமே எங்கள் பெற்றோர் அனைவரையும் ஒரே மாதிரி அன்பாக வளர்த்ததே!

இதில் ஐந்து அக்காக்கள் என்பதே நான் படம் பார்க்கக் காரணம்.

Read : அக்காவின் அன்பு தெரியுமா?

விவசாயம்

படத்தில் விவசாயத்தை உயர்த்தி இருப்பதாகச் செய்திகளில் வந்தது ஆனால், சில காட்சிகள் தவிர்த்துப் பெரும்பாலும் இவர்கள் குடும்பப் பாசம், சண்டை ஆகியவையே உள்ளது.

இப்படத்தில் சூரி, கார்த்தி அக்கா பையன். எனவே, கூடவே இருக்கும் கதாப்பாத்திரம். சூரி பெரியளவில் நகைச்சுவையில்லை ஆனால், வெறுப்பைக் கொண்டுவரவில்லை.

கார்த்தி காதலிக்கும் பெண்ணாகச் சாயிஷா. மற்றவர்கள் அனைவரையும் கிராம சாயலில் எடுத்த இயக்குநர் பாண்டிராஜ், நாயகிக்கு மட்டுமே வெளி மாநில பெண்ணைப் பிடித்தது ஏன்?

ப்ரியா பவானி சங்கரையே நாயகியாகப் போட்டு இருக்கலாம்.

ப்ரியா எங்கு பார்த்தாலும் “Mobile Selfie Video” எடுத்துட்டு எரிச்சலைக் கிளப்பிக்கொண்டு இருக்கிறார். அவர் அப்படி எடுப்பதற்கான எந்தக் காரணமும் புரியவில்லை.

அடி வாங்குவதற்காகவே ஒரு வில்லன், மற்றபடி குறிப்பிட்டு சொல்லும்படி ஒன்றுமில்லை. இவர் உயரம், முகவெட்டுக்கு இன்னும் சிறப்பாக இவரைப் பயன்படுத்தி இருக்கலாம்.

சத்யராஜ் இரண்டாவது மனைவி பானுப்பிரியா திடீரென்று கோபித்துக்கொண்டு போவதும், இறுதியில் தூண்டி விடுவதும் இயல்பாக இல்லை.

இதில் ஒரு அக்கா பெயர் “உளவுத்துறை” 🙂 .

ஒளிப்பதிவு & இசை

வேல்ராஜ் ஒளிப்பதிவு கிராம பசுமையை அழகாகக் காட்டியது, பல இடங்களுக்குச் சென்று எடுத்து இருப்பார்கள் போல. காடுகளையும் வயல்வெளியையும் காணவே மகிழ்ச்சி!

இசை இமான் என்பதே எனக்கு இப்பட விமர்சனம் எழுதும் போது தான் பார்த்தேன், வழக்கமான இசையில்லை.

அக்காக்கள், அக்கா கணவர் சொந்தம் என்று மிகப்பெரிய நடிகர் பட்டாளமே உள்ளது. கிராமங்களில், சிறு நகர்ப் புறங்களில் இப்படம் மக்களைக் கவர்ந்ததில் வியப்பில்லை.

சண்டை, ஆபாசம், வெட்டு குத்து கொலை என்றே பார்த்து நொந்து போய் இருந்தவர்களுக்கு, இதிலும் சில சண்டைகள் இருந்தாலும் நீண்ட வருடங்களுக்குப் பிறகு கலகலப்பான கிராம படம் வந்ததே மகிழ்ச்சி அளித்து இருக்கும்.

செய்திகளில் கூறியபடியோ, பலரும் மிகையாகக் கூறிய அளவுக்கோ எனக்குப் படம் தோன்றவில்லை.

ஆனால், வழக்கமான படங்களிலிருந்து மாறுதலாகக் கிராமப்படம் பார்த்ததில் மகிழ்ச்சியே!