தீரன் அதிகாரம் ஒன்று [2017] | பேய் துரத்தல்

தமிழகத்துக்கு வந்து கொள்ளையடிக்கும் வடமாநில கொள்ளையர்களைத் தனிப்படை அமைத்துப் பிடித்த உண்மைக் கதையே “தீரன் அதிகாரம் ஒன்று”

தீரன் அதிகாரம் ஒன்று

படம் பார்க்கும் முன்பே பலர் நன்றாக இருக்கிறது என்று ரொம்பக் கூறி விட்டதால், துவக்கத்தில் கார்த்தி ப்ரீத்தி சிங் காட்சிகளைப் பார்த்த போது “என்னடா இது இப்படிப் போகுது, எப்ப முதன்மை கதை வரும்?” என்று தான் இருந்தது.

கார்த்தி ப்ரீத்தி சிங் காட்சிகளை மட்டும் சுருக்கி இன்னும் முதிர்ச்சியாக எடுத்து இருந்தால், படம் தாறுமாறாக இருந்து இருக்கும். மற்றதில் கவனம் செலுத்திய இயக்குநர் இதில் எப்படிக் கோட்டை விட்டார் என்று புரியவில்லை.

அதோடு இயக்குநர்களுக்கு மீண்டும் அதே வேண்டுகோள். தயவு செய்து நாயகிகளைக் கிறுக்கு நாயகிகளாகக் காட்டாதீர்கள்.

தமிழ் பொண்ணுக நீங்க நினைக்கிற மாதிரி மங்குணிக கிடையாது. நல்ல விவரமானவங்க, உஷாராக இருப்பவங்க. இயல்பாகக் காட்ட முயற்சியுங்கள்.

கார்த்தி

கார்த்தி புத்திசாலி காவல் அதிகாரி, உடனுக்குடன் சுறுசுறுப்பாக முடிவெடுக்கக்கூடிய திறமையுள்ளவர்.

2003 ல் இருந்து நடக்கும் கதையாக வருகிறது. எனவே, அப்போது இருக்கும் தொழில்நுட்பம், வசதியை வைத்துக் கதை அமைக்கப்பட்டு இருக்கிறது.

கொள்ளை அடிக்க வருபவர்களின் வன்முறை தாக்குதல்களைத் துப்பறிந்து அதன் தொடர்ச்சியாகக் கதை வட மாநிலங்களில் பயணிக்கிறது.

தமிழ்ப் படங்கள் எல்லாம் நம்ம ஊருக்குள்ளேயே சுற்றிக்கொண்டு இருந்து வட மாநிலங்கள் சும்மா தொட்டுக்கொள்ள இல்லாமல் முழுமையாக இப்படம் பயணிப்பது பார்க்கும் தமிழ் பார்வையாளர்களுக்குப் புது அனுபவமே!

இப்படிப்பட்ட காட்டுத் துரத்தல் படத்துக்குப் பின்னணி இசை சரியில்லை என்றால், படத்தோட வேகமே போய் விடும்.

அதோட கதையை மிரட்டலாகக் கொண்டு செல்ல மிக உதவும் காரணங்களில் பின்னணி இசைக்கு மிக மிக முக்கியத்துவம் உண்டு.

படம் பார்க்கும் போதே யாருயா பின்னணி இசை என்று நினைக்க வைத்து தேட வைக்கணும். இதில் ஜிப்ரான் மிரட்டி இருக்கிறார் குறிப்பாகக் காட்சிகளுக்குத் தகுந்த பின்னணி இசை.

வட மாநில கொள்ளையர்களுக்கு அவர்களுக்கு ஏற்ற பின்னணி இசை செம்ம மிரட்டலாக இருக்கிறது. பின்னணி இசைக்காவே இன்னொரு முறை பார்க்க நினைக்கிறேன்.

ராஜஸ்தான்

கார்த்தி குழுவினர், ராஜஸ்தானில் கொள்ளையர்கள் கிராமம் செல்லும் போது அங்கே நடக்கும் சம்பவங்கள் செம்ம மிரட்டலாக இருக்கிறது.

அங்கே இருந்து தப்பிப்பது என்பது கனவிலும் நடக்கும் என்று தோன்றவில்லை, மிகைப்படுத்தப்பட்டது.

காவலர்கள் குடும்பத்தை விட்டு, சரியான உணவு இல்லாமல், மேலதிகாரிகள் ஒத்துழைப்பு இல்லாமல் இரவு பகலாகச் சிரமப்பட்டுக் கடும் வெயிலில் மாட்டிக் கொள்ளையர்களைத் தேடி அலையும் போது..

நாம் போகிற போக்குல காவலர்களை ஒட்டுமொத்தமாகக் கேவலப்படுத்தி விடுகிறோம் ஆனால், இது போன்ற காவலர்களின் அர்ப்பணிப்பை பார்க்கும் போது கண்கலங்குவது என்னவோ உண்மை.

ஆனால் ஒன்றுமே தெரியாமல் பல நிகழ்வுகள் “கொள்ளையர்கள் பிடிக்கப்பட்டார்கள்” என்ற செய்தியோடு தின வாழ்க்கையில் கடந்து விடுகின்றன.

இடைவேளைக் காட்சிகள் “High Voltage” போலச் சரவெடியாக இருக்கிறது. இது போல இடைவேளையைப் பார்த்து நீண்ட காலமாகிறது. அதே போல இறுதி காட்சிகள் நெருங்கும் போதும்.

பேருந்து தூரத்தல்

பேருந்து தூரத்தல் காட்சிகளில் சண்டை இயக்குநர் நாசம் செய்து இருக்கிறார். இதை எழுதும் போதே உடல் சிலிர்க்கிறது. செம்ம செம்ம.

ராஜஸ்தான் காட்சிகள், பாலைவனம், புழுதி, மழை என்று ஒளிப்பதிவாளர் அப்படியே கண்முன் நிறுத்துகிறார்.

சதுரங்க வேட்டை என்ற படத்தைக் கொடுத்த போது அட! முதல் படத்திலேயே திரைக்கதைல கலக்கி இருக்காருப்பா மனுசன் என்று நினைத்தேன்.

இதில் யம்மாடி! பின்னிட்டாரு.. அடி தூள்.

வில்லனாக வருபவர் மிரட்டி உள்ளார். தாங்கள் துரத்தப்படுவதை உணர்ந்து, துரத்தப் பட வேண்டியது நாமல்ல, காவல்துறை என்று கார்த்திக் குழுவினரை திட்டம்போட்டு சிக்க வைக்கும் காட்சிகள் வயிற்றைப் புரட்டுகிறது.

படம் பேய் துரத்தல்! Liam Neesan படமான Taken படத்தை இத்துரத்தல் நினைவுபடுத்தியது.

சுருக்கமா படம் பச்சை மிளகாயை நறுக்குன்னு கடிச்ச மாதிரி ஜிவ்வுனு இருக்கு.

நடித்த அனைவருக்கும், இயக்குநர் மற்றும் அனைத்து தொழில்நுட்ப குழுவினருக்கும் மனமார்ந்த வாழ்த்துகள். இது உண்மை கதை என்பதையே நம்பச் சிரமமாக உள்ளது.

சம்பந்தப்பட்ட காவல் அதிகாரிகள் அனைவருக்கும் மரியாதை கலந்த வணக்கங்கள்.

கொசுறு

நல்ல படம் வந்தால், இப்படித் தொடர்ச்சியாக வருகிறது. இல்லையென்றால், எதுவுமே வருவதில்லை. அவள், அறம் தற்போது தீரன். ரொம்ப வருடங்களுக்குப் பிறகு மூன்று திரைப்படங்கள் திரையரங்கில்.

பரிந்துரைத்த அனைவருக்கும் நன்றி. எதிர்பார்ப்பு வீணாகவில்லை.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).