பாண்டேவை பதட்டமாக்கிய ராம ஸ்ரீனிவாசன்

ராகுல் வழக்கில் அவருக்கு அளிக்கப்படத் தண்டனை குறித்த விவாதம் பாஜக ராம ஸ்ரீனிவாசன் மற்றும் பாண்டேவுக்கு இடையே நடைபெற்றது. Image Credit

ராம ஸ்ரீனிவாசன்

பேராசிரியரான ராமஸ்ரீனிவாசன் பேசுவதில் வல்லமை பெற்றவர். பாஜகவில் அண்ணாமலைக்குப் பிறகு இவரது பேச்சை விரும்பிக்கேட்பேன்.

காரணம், இவர் பேசுவது தர்க்கரீதியாகவும், தகவலாகவும் சரியானதாக இருக்கும்.

முட்டாள்தனமாகப் பேசாமல், கட்சி பாசத்தில் எதையாவது உளறாமல், தவறுகள் இருந்தாலும் அதையும் எவ்வாறு கூற வேண்டும் என்பதை உணர்ந்து பேசுவார்.

தான் பேசுவது கட்சியைப் பாதிக்கும் அல்லது மற்றவர்கள் கிண்டலடிக்கும்படியாகி விடும் என்பதை சிலர் உணராமல் பேசுவார்கள்.

ஆனால், இதில் ராமஸ்ரீனிவாசன் தெளிவு.

பாண்டே விவாதம்

பாண்டேவின் விவாதத்துக்கு மிகப்பெரிய ரசிகன். யாராக இருந்தாலும், நெருக்கடியான கேள்விகளைக் கேட்டுத் திணறடித்து விடுவார்.

இதனாலே பலரும் இவரை எப்படியாவது திணறடித்து விடவேண்டும் என்ற எண்ணத்தோடே ஆரம்பிப்பார்கள் ஆனால், அசிங்கப்பட்டே நிற்பார்கள்.

‘பாஜகவில் எப்போது இணையப்போறீங்க?‘ என்று ஒரு நிருபர் நக்கலாகக் கேட்டு ஆரம்பிக்க, அதன் பிறகு அவரைப் பாண்டே ‘ஓ! அப்படி வறீங்களா!‘ என்று கேட்டுக் கிறுகிறுக்க வைத்தது இன்றுவரை மறக்க முடியாத விவாதம் 🙂 .

பாண்டேவும் சில விவாதங்களில் தடுமாறியது உண்டு என்றாலும், ராமஸ்ரீனிவாசன் விவாதம் மனதில் நிற்கும்படியாகி விட்டது 🙂 .

தான் கட்சி சார்பற்றவர், நடுநிலையார் என்று பாண்டே கூறினாலும், அனைவருக்கும் தெரியும் வலது சாரி ஆதரவாளர் என்று.

ஒரே வித்யாசம் மற்ற ஊடகவியலாளர்கள் திமுக ஆதரவாக வெளிப்படையாகப் பேசுவார்கள் ஆனால், பாண்டே அது போல மோசமாகப் பேச மாட்டார்.

விவாதத்தில், சரியா சொல்லிட்டீங்க, சரியான இடத்துக்கு வந்துட்டீங்க என்று பாண்டே கூறுவார். சில நேரங்களில் சரியாக இருக்கும் ஆனால், எதிராளியை உளவியல் ரீதியாக குழப்புவதற்கு பயன்படுத்துகிறாரோ என்றும் தோன்றும்.

அதாவது, தான் தவறாக ஏதாவது கூறி விட்டோமோ என எதிராளி தடுமாறி விடுவார்.

வலது சாரி ஆதரவாளன் இல்லை

தான் வலது சாரி ஆதரவாளன் இல்லையென்பதை நிரூபிக்கச் சில நேரங்களில் வலது சாரி ஆதரவாளர்களைத் திமுக ஆதரவாளர்களை விடக் கடுமையாகக் கேட்பார்.

அண்ணாமலையுடனான பேட்டியில் இது போல கேட்டார் ஆனால், அண்ணாமலையும் திறமையாக பதிலளித்ததால் பேட்டியும் சிறப்பாக அமைந்தது.

ராமஸ்ரீனிவாசனுடனும் இதே போல முதல் கேள்வியைக் கேட்ட விதமே பாண்டே எதோ சண்டைக்குத் தயாரானது போலவே இருந்தது.

பாராளுமன்றத்தில் ராகுலுக்குப் பேச அனுமதி கொடுக்கவில்லை என்று கேட்டதுக்கு ராமஸ்ரீனிவாசன் அதற்குப் பதில் அளித்தார்.

பாண்டே கேள்வி சரியானதாக இருந்தாலும், அதற்கு ராமஸ்ரீனிவாசனும் கட்சி சார்பாக மழுப்பலான ஆனால், திணறாத பதிலை அளித்தார்.

எப்படியாவது தான் கூறியதை பேராசிரியர் ஒப்புக்கொள்ள வேண்டும் என்று பாண்டேவும் எவ்வளவோ முயற்சிகள் எடுத்தும் பலனளிக்கவில்லை.

தனது ஈகோ ஏற்றுக்கொள்ளாததால், அதை முடிக்காமல் நீட்டித்துக்கொண்டே சென்று பின் வேறு வழி இல்லாமல் அடுத்தக் கேள்விக்குச் சென்றார்.

வெள்ளை கொக்கு

இதன் பிறகு கேட்ட கேள்விகளுக்கும் ராமஸ்ரீனிவாசன் சிறப்பாகப் பதில் அளித்தார். வெள்ளை கொக்கு எடுத்துக்காட்டு வைத்துப் பேசியது அசத்தல் 🙂 .

பாண்டேவால் சமாளிக்க முடியாதது அவரது பதட்டத்தில் தெரிந்தது. சில கேள்விகள் அவருக்கே சிறுபிள்ளைத்தனமாக இருந்து இருக்க வேண்டும்.

குறிப்பாக ராகுலை பார்த்து பாஜகவுக்கு ஏன் பயம்? என்பதைத் தொடர்ந்து கேட்டுக்கொண்டு இருந்தார்.

உண்மையில் ராகுல் தான் பாஜக க்கு ஸ்டார் காம்பைனர். ராகுல் இருப்பது பாஜக க்கு பலமே. மமதா கூட இதை மறைமுகமாகக் குறிப்பிட்டு விமர்சித்து இருந்தார்.

ராகுலுக்கு பாஜக பயப்படுகிறது என்பதைக் காங்கிரசாரே நம்ப மாட்டார்கள். அரசியலுக்காக மாற்றிக்கூறலாமே தவிர, உண்மை அவர்களுக்கும் தெரியும்.

இடைமறிப்பு

பாண்டே இந்தப்பேட்டியில் ஏராளமான இடைமறிப்புகள். பேராசிரியரைப் பேச விடாமல் தொடர்ந்து இடைமறித்துப் பேசிக்கொண்டு இருந்தார்.

விவாதம் நடந்தது இணையத்தில் (Video call) என்பதால் குரல் தாமதத்தால் மேலும் மோசமாகக் காரணமாக இருந்தது.

தங்களின் வாதத்தில் நம்பிக்கையிழப்பவர்களே அதிகம் இடைமறித்தலை செய்வார்கள். தாங்கள் கூறுவதை நிரூபிக்க ஏற்படும் பதட்டம்.

பாண்டே பெரும்பாலான நேரம் இதைத்தான் செய்துகொண்டு இருந்தார்.

பாண்டே

எல்லோருமே அனைத்து நேரங்களிலும் வெற்றி பெற முடியாது. ஏதாவது ஒரு கட்டத்தில் தோல்வியடையும் நிலை வரலாம்.

அதற்காகச் சம்பந்தப்பட்டவர் திறமையற்றவர் என்ற அர்த்தமில்லை, அன்றைக்கு அவருக்கான நாளில்லை என்று எடுத்துக்கொள்ளலாம்.

இவ்விவாதத்தில் ராமஸ்ரீனிவாசன் பொறுமையாக, தெளிவாக, பதட்டமாகாமல், கோபப்படாமல் அட்டகாசமாகப் பேசினார்.

இதுவே இவ்விவாதத்தில் பேராசிரியரை ஒருபடி மேலே தூக்கி விட்டது.

வெற்றி பெற்றாக வேண்டும் என்ற பதட்டத்தில் இருந்தால், நெருக்கடியான நிலைக்குச் செல்லும் என்பதற்கு இவ்விவாதம் எடுத்துக்காட்டு.

இவ்விவாதத்தில் இருவருமே சமபங்கில் வெற்றி பெற்று இருக்கலாம் ஆனால், பாண்டே தன் புத்திசாலித்தனத்தைக் காட்ட முயற்சித்ததில் சொதப்பி விட்டது.

ஆரம்பித்திலிருந்தே பேராசிரியரைக் கார்னர் செய்ய வேண்டும் என்று நினைத்துப் பேசியது பாண்டேக்கு Backfire ஆகி விட்டது.

ஒருவேளை எனக்குதான் இப்படித் தோன்றியதோ என்று கருத்துப்பகுதியில் பார்த்தால், 95% மேற்பட்டோர் பாண்டேவின் பேச்சை விமர்சித்து இருந்தனர்.

எனவே, ஈகோவை ஒதுக்கி விரைவில் மீண்டும் சிறப்பான ஒரு விவாதத்தைப் பாண்டே தருவதற்காகக் காத்து இருக்கிறேன்.