நீர்ப்பறவை | அசத்தலான ஒளிப்பதிவு

எந்த எதிர்பார்ப்பும் இல்லாமல் பார்க்கும் படங்கள் நம்மை வியப்பில் ஆழ்த்தி விடுவதுண்டு, அது போல ஒரு வியப்பு  தான் “நீர்ப்பறவை” படமும்.

ஆனால், ஒரு சின்ன திருத்தம். என்னை வியப்படைய வைத்தது படத்தின், ஒளிப்பதிவு இயக்குனர் பாலசுப்ரமணியத்தின் அட்டகாசமான ஒளிப்பதிவு.

நீர்ப்பறவை

கொஞ்சம் கூட மிகைப்படுத்தவில்லை.. படம் பார்த்து மனதில் பட்டதை அப்படியே இங்கே பகிர்கிறேன்.

தேசிய விருது பெற்ற இயக்குனர் “சீனு ராமசாமி” இயக்கிய படம் என்ற ஆர்வம் மட்டுமே இப்படத்தை பார்க்கத் தூண்டியது.

சிங்கப்பூரில் வெளியானதா என்று தெரியவில்லை. வந்து சென்று இருந்தால் இந்தப் படத்தை திரையரங்கில் பார்க்காமல் தவறவிட்டதற்காக ரொம்ப வருத்தப்படுகிறேன்

இந்தப்படத்தை இணையத்தில் தரவிறக்கம் செய்து நாட்கள் ஆனாலும், ஏனோ படம் பார்க்க வேண்டும் என்றே தோன்றவில்லை.

சுவாரசியம் இல்லை

பலரும் விஷ்ணுவின் குடியைப் பற்றியே குறிப்பிட்டு எழுதி இருந்ததால் கூட இருக்கலாம் / படித்த சில விமர்சனங்கள் அவ்வாறு நினைக்கத் தூண்டி இருக்கலாம்.

புத்தாண்டு, நண்பர் முத்துவுடன் முருகன் கோவிலுக்குச் சென்று விட்டு இரவு “சரி! ஏதாவது படம் பார்க்கலாம்” என்று இதைப் போட்டேன்.

ஆரம்பத்தில் எந்த ஒரு சுவாரசியமும் இல்லாமல் தான் பார்த்தேன் ஆனால், போகப்போக படத்தின் ஒளிப்பதிவின் அழகில் என்னையே மறந்து விட்டேன்.

இந்த மாதிரி, படம் முழுக்க ஒளிப்பதிவிற்காக எந்தப்படத்தையும் ரசித்தது இல்லை.

ஒரு படத்தில் சில பாடலை, சில காட்சிகளை எடுத்த விதத்திற்காக ரசித்து இருப்பேன் ஆனால், இது போல படம் முழுக்க ரசித்தது இல்லை.

அட! அட! என்ன வண்ணம், என்ன ஒரு கோணம்… பட்டாசாக இருந்தது.

ரோஜா அலைபாயுதே

“ரோஜா” படத்தில் “சின்ன சின்ன ஆசை”யில் வரும் துவக்க இசைக்கு காட்டப்படும் வயல்வெளி நம்மை அப்படியே காட்சியோடு ஒன்றிப்போகச் செய்யும்.

“அலைபாயுதே” படத்தில் மாதவன் ஷாலினியை தேடிச் செல்லும் போது தூரத்தில் ஒரு பாலத்தில் செல்லும் பேருந்தைக் காட்டும் போது அட! எவ்வளவு அழகு என்று நினைத்துள்ளேன்.

தனுஷ் நடித்த “பொல்லாதவன்” (வேல்ராஜ்), “எல்லாம் அவன் செயல்” என்ற RK படத்தின் ஒளிப்பதிவும் (ராஜ ரத்தினம்) வித்தியாசமாக இருக்கும்.

இது போல சில படங்களைக் குறிப்பிடலாம் ஆனால் மொத்தப் படத்தையும் என்னால் ரசிக்க முடிந்தது என்றால் அது சந்தேகம் இல்லாமல் “நீர்ப்பறவை” படம் தான்.

ஒவ்வொரு காட்சியும் அவ்வளவு அழகாக இருக்கிறது. இதற்காகச் சிறப்பு தொழில்நுட்பத்தைப் பயன்படுத்தினார்களா என்று தெரியவில்லை.

நிழல் படம் எடுப்பவர்கள், ஒரு குறிப்பிட்ட காட்சியை, அதற்கான சூழல் அமையும் வரை காத்திருந்து எடுப்பார்கள். அது படத்தைப் பார்த்தாலே நமக்குப் புரியும். இது போலப் படம் முழுக்க இருந்தால்… அது தான் இந்தப்படம்.

படத்தின் கதை, குடியைப் பற்றியும், இலங்கை கடற்படையால் தமிழக மீனவர்கள் அடையும் துன்பத்தைப் பற்றியும் கூறுவதாகும்.

கதையைக் கேட்டால் உங்களுக்கு வழக்கமான டாக்குமெண்டரி படம்போலத் தோன்றலாம் ஆனால், படம் அப்படியில்லை.

விஷ்ணு

சில நேரங்களில் விஷ்ணு குடிப்பதைப் பார்த்தால் நமக்கே டாஸ்மாக்கில், அவருடன் இருப்பது போல இருக்கிறது ஆனால், சரியாகக் கொண்டு சென்று இருந்தார்கள்.

இது போல ஒரு கதாப்பாத்திரத்தில் நடித்ததற்காக விஷ்ணுவையும் பாரட்ட வேண்டும். திரைக்கதை நன்றாகவே இருந்தது. குடியை விட்ட பிறகு ஒருவர் எப்படி மாறுகிறார் என்பதை அழகாக காட்டி இருக்கிறார்கள்.

ஒருவேளை படம் ரொம்ப மோசமாக இருந்து இருந்தாலும், நிச்சயம் ஒளிப்பதிவிற்காகப் பார்த்து இருப்பேன் ஆனால், படம் நன்றாகவே இருந்தது.

படத்தில் கடல் முக்கியப் பகுதி என்பதால், நீல வண்ணம் அதிகம். படத்தில் வரும் காட்சிகள் எல்லாம் இதற்காகவே அழகு படுத்தினார்களா! அல்லது இந்தக் கேமராவில் அனைத்து காட்சிகளும் / இடங்களும் அழகாக தெரிகிறதா!!

ஒரு காட்சியில் விஷ்ணுவும் இன்னொருவரும் சண்டைப் போடுவார்கள் அப்போது இருவரும் எதிர் எதிரே கடலில் தண்ணீர் தெறிக்க ஓடி வருவதை மேலே இருந்து காட்டியிருப்பார்கள்… அற்புதம்.

நிழல் படங்கள் எடுக்கும் போது வெற்று பரப்பாக, எந்த ஒரு கட்டிடமும் இல்லாத இடத்தில், ஒரே ஒரு நபர் இருக்கும் போது, படம் எடுத்தால் செமையா இருக்கும்.

கடலைச் சார்ந்த படம்

நீர்ப்பறவை இயல்பாகவே கடலைச் சார்ந்த படம் என்பதால், கடலும் கடற்கரையும் அதிகம் வருகிறது.

இதனால், யாரையாவது காட்டும் போது பின்னணியில் எவருமில்லாமல் கண்ணுக்கு எட்டிய தூரம் வரை கடலோ அல்லது மணல் பரப்போ அல்லது அலைகள் மட்டுமே தெரிவது போல வந்தால் அட்டகாசமாக உள்ளது.

முதலில் இதுபோல காரணத்தால் தான் அழகாக இருக்கிறது என்று நினைத்தேன் ஆனால், அனைத்துக் காட்சிகளிலுமே (கடல் இல்லாமல் வீடுகள், சர்ச் மற்றும் சாலைகள் கூட) ஒளிப்பதிவு நம் கண்ணை விட்டு அகல மறுக்கிறது.

இதே இப்படி என்றால், உப்பளங்கள் சில காட்சிகளில் வரும். சும்மாவே கலக்குறாங்க! இதில் முழுதாகவே வெண்மையாக இருந்தால்…! சூப்பர்.

பாலசுப்ரமணியம்

கேமராவை எங்கெல்லாம் வைத்தால் அழகாக இருக்குமோ அங்கே எல்லாம் வைத்துத் தூள் கிளப்பி இருக்கிறார் பாலசுப்ரமணியம்.

நான் நிச்சயம் இன்னொரு முறை ஒளிப்பதிவிற்க்காகவே பார்க்கப் போகிறேன்.

விமர்சனங்களில் பொதுவாக ஒளிப்பதிவு சிறப்பாக / சுமாராக இருந்தது, இல்லை என்றால் கும்கி போலச்சில படங்களுக்குக் கொஞ்சம் கூடுதலாகப் பாராட்டி இருக்கிறேன் ஆனால், எந்த ஒரு படத்திற்கும் ஒளிப்பதிவை இப்படி விளக்கியதில்லை.

எனக்கு அதை டெக்னிக்கலாக விளக்கத் தெரியவில்லை.

இது படத்தின் விமர்சனமல்ல ஒளிப்பதிவின் விமர்சனம். ஒரு படத்தின் ஒளிப்பதிவிற்க்காக விமர்சனம் எழுதியதும் எனக்கு இதுவே முதல் முறை.

நான் சிறந்த நிழல் படங்கள் எடுப்பவனல்ல, ஓரளவிற்கு எடுப்பேன் ஆனால், நல்ல ரசனைக்காரன்.

அழகான படங்களை ரசிக்க ரொம்பப் பிடிக்கும் அதனால், இந்தப் படத்தின் ஒளிப்பதிவை ரசித்ததில் எந்த வியப்பும் இல்லை.

ஒரு இயக்குநரின் படம் பார்த்து, படம் நமக்குப் பிடித்து இருந்தால் விக்கியில் சென்று, அவர் இதற்கு முன் என்னென்ன படங்கள் இயக்கி இருக்கிறார் என்று தேடுவோம்.

நான் பல ஆங்கில மற்றும் கொரியன் படங்களுக்கு இவ்வாறு தேடி, பின் அவரின் முந்தைய படங்களைப் பார்த்து இருக்கிறேன்.

கேள்விப்பட்டு இராத ஒளிப்பதிவாளர் பாலசுப்ரமணியன், இதுவரை எந்தெந்த படங்களுக்கு ஒளிப்பதிவு செய்து உள்ளார் என்ற இயல்பான ஆவலில் பார்த்தேன்.

இதில் பின்வரும் படங்களுக்கு ஒளிப்பதிவு செய்து இருக்கிறார்.

இந்தப்படங்களில் “பிதாமகன்”, “தம்பி”, “ஜெயம் கொண்டான்” படங்களின் ஒளிப்பதிவு ரொம்ப நன்றாக இருக்கும்.

எனக்கென்னவோ இயக்குனர்கள் இவரைச் சரியாகப் பயன்படுத்திக் கொள்ளவில்லையோ என்று தோன்றுகிறது.

இது போலச் சிலரே இவரது திறமையை முழுதாக வெளிக்கொண்டு வந்து இருக்கிறார்கள். Image Credit Wikipedia.

உங்களில் யாருக்காவது ஒளிப்பதிவாளர் பாலசுப்ரமணியம் அவர்களைத் தெரிந்தால், அவரை இங்கே ஒருத்தன் மனதார பாராட்டி இருக்கிறான் என்று கூறி விடுங்கள் 🙂 .

இவரைச் சந்திக்கும் வாய்ப்புக் கிடைத்தால், நேரில் பாராட்ட வேண்டும் என்று ஆசை. இந்தப்படத்தின் ஒளிப்பதிவிற்கு விருது கிடைத்தால் ரொம்ப சந்தோசப்படுவேன்.

உங்களுக்குத் தெரிந்த சிறப்பான ஒளிப்பதிவு திரைப்படங்களைப் பகிர்ந்து கொள்ளுங்கள்.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).