புரட்சித் தமிழர்கள்

மோடி பதவியேற்பு விழாவிற்கு SAARC (South Asian Association for Regional Cooperation) (தெற்காசிய) நாடுகளின் உறுப்பினரான இலங்கையை அழைத்ததில் கோபம் கொண்டு நம்ம புரட்சித் தமிழர்கள் தமிழ் அமைப்புகள் உணர்ச்சிகரமாக பொங்கி இருந்தார்கள். Image Credit

புரட்சித் தமிழர்கள்

இதை முதலில் வைகோ அவர்கள் ஆரம்பித்ததும் தங்கள் பங்குக்கு ஊடகங்கள் கொளுத்திப் போட மற்ற அரசியல் தலைவர்களும் “ஜெ” உட்பட இதை எதிர்க்க ஆரம்பித்தார்கள்.

இது போதாது என்று தமிழ் அமைப்புகள், திரைப்படத் துறையினர், மாணவர் அமைப்பினர் தங்கள் பங்கிற்கு “தமிழ் தமிழ்” என்று முழங்க ஆரம்பித்து விட்டார்கள்.

அதிலும் பாரதிராஜா அறிக்கை விட்ட மூன்று வரியில் முப்பது எழுத்துப் பிழைகள்.

என்ன எழுதி இருக்கிறார்கள் என்பதைக் கூடப் பார்க்காமல் கையெழுத்து போட்டு ஊடகங்களுக்கு கொடுத்தாச்சு!

தமிழ் மாணவர் அமைப்பு அதற்கு மேல்! நாலு வரியில் அத்தனை எழுத்துப் பிழைகள். இவர்கள் தான் தமிழை தூக்கி நிறுத்தப் போகிறார்களாம்.

ஏன்யா! தெரியாமத் தான் கேட்கிறேன்… உங்களுக்கெல்லாம் மட்டும் தான் தமிழன் என்ற உணர்வு இருக்கிறதா! மற்றவர்களுக்கெல்லாம் இல்லையா!

சும்மா ஆ ஊன்னா தமிழ் தமிழ் ன்னு கூட்டம் கூட்டமாகக் கிளம்பிடுறீங்க! என்னத்தை இப்ப சாதிச்சீங்க!

வைகோ

எனக்கு இன்றும் வைகோ மீது மிகுந்த மரியாதை இருக்கிறது ஆனால், இவரின் அளவுக்கு மீறிய உணர்ச்சிகரமான நடவடிக்கைகளால் எந்த நன்மையையும் யாருக்கும் ஏற்படப்போவதில்லை.

இது அவர் மீதான மரியாதையைக் குறைக்கிறது.

ஒரு பொறுப்பான தலைவராக நடந்து கொள்ளாமல், உணர்ச்சி மிகு தலைவராகத் தான் காட்சி அளிக்கிறார். இது குறித்து ஏற்கனவே விளக்கமாகக் கூறி இருக்கிறேன்.

விடுவிக்கப்பட்ட மீனவர்கள்

இந்தியா தெற்காசிய நாடுகளை அழைத்ததால் நட்பு வேண்டி / நல்லெண்ண அடிப்படையில் பாக் 150 மீனவர்களையும், இலங்கை சில தமிழ் மீனவர்களையும் விடுவித்து இருக்கிறது.

தற்போது இது நடந்தது எதனால்?

உங்க வீட்டுல நாலு பேரை இலங்கையோ பாகிஸ்தானோ பிடித்து முட்டிக்கு முட்டி தட்டி சிறையில் தள்ளி இருந்து, இது போல விடுவித்தால் சந்தோசப் படுவீர்களா மாட்டீர்களா?

விடுதலை ஆகி வந்தவர்களின் குடும்பத்தினரை சென்று கேளுங்கள்.. இவர்களை (இலங்கை பாக்) அழைத்தது சரியா தவறா என்று கூறுவார்கள்.

ராஜபக்சே ஈழத் தமிழர்களுக்கு இழைத்த அநீதி கொஞ்ச நஞ்சமல்ல. இதை யாரும் யாருக்கும் விளக்க வேண்டிய அவசியமில்லை, அனைவருக்குமே தெரிந்த ஒன்று.

சார்க் நாடுகள்

இந்தப் பதவியேற்பு விழா நடப்பது தமிழ்நாட்டில் அல்ல.

இந்திய அரசு என்பது அனைத்து மாநிலங்களுக்கும் பொதுவான ஒன்று, அனைவரையும் அனுசரித்து போக வேண்டியுள்ளது.

இந்த அழைப்பு ராஜபக்சே என்ற தனி மனிதனுக்கோ அல்லது இலங்கை என்ற தனி நாட்டிற்கோ அனுப்பப்பட்டது இல்லை.

சார்க் நாடுகள் என்ற பங்களாதேஷ், பூட்டான், இலங்கை, ஆப்கானிஸ்தான், பாக், நேபால், மாலத்தீவு ஆகிய நாடுகளுக்கு அனுப்பப்பட்டுள்ளது.

இந்த அழைப்பிற்கு எதிர்ப்பு தெரிவிப்பதால் நாம் என்ன சாதித்து விடப்போகிறோம்.

இழப்பு யாருக்கு?

ஈழத் தமிழ் மக்களை 2009 ல் சொல்லி வைத்து ராஜபக்சே அழித்த போது வாயில் விரல் வைத்து சூப்பிக்கொண்டு, அமைதியாக இருந்து விட்டு தற்போது ஒன்றுமில்லாத பிரச்னைக்கு வானத்திற்கும் பூமிக்கும் ஆளாளுக்கு குதித்துக்கொண்டு இருக்கிறார்கள்.

இதனால் இழப்பு யாருக்கு? இந்த அழைப்பால் இரு நாட்டில் இருந்தும் நூற்றுக்கணக்கான மீனவர்கள் விடுதலை செய்யப்பட்டு இருக்கிறார்கள்.

உங்களது தமிழ் முறுக்கால் மீனவர்கள் சிறையிலேயே இருந்து சாக வேண்டும் என்கிறீர்களா! இது தான் உங்கள் விருப்பமா!

ஒருவேளை இவர்கள் அழைக்கப்படாமல் இருந்து இருந்தால், மீனவர்கள் விடுவிக்கப்பட்டு இருப்பார்களா!

தமிழர்களுக்காக போராட வேண்டாம் என்பதல்ல என்னுடைய கருத்து. கொஞ்சம் உணர்ச்சிவசப்படாமல், எதற்கு கொந்தளிக்கனுமோ அதற்கு போராட வேண்டும் என்பதே நான் கூற வருவது.

மதிப்பு இருக்காது

இது போலப் பொதுவான அழைப்பிற்கெல்லாம் கொந்தளித்தால், போராட்டங்களுக்கே மதிப்பு இல்லாமல் போய் விடும்.

“ஆமாய்யா! இவனுகளுக்கு வேற வேலையே இல்லை.. சும்மா எல்லாவற்றிக்கும் போராட்டம் செய்து கொண்டு இருப்பார்கள்” என்ற மன நிலை அனைவருக்கும் வந்தும் விடும்.

பின் போராட்டக் காரணம் உண்மையிலேயே நியாயமானதாக இருந்தாலும் அது கவனிப்பின்றி சென்று விடும்.

இவை எல்லாவற்றையும் விட தற்போது மத்தியில் ஆளும் பாஜக, தமிழ்நாட்டில் ஒரே ஒரு தொகுதியில் மட்டுமே வெற்றி பெற்று இருக்கிறது. நம் மாநிலத்திற்கு நல்லது நடக்க வேண்டும் என்றால், மத்திய அரசை அனுசரித்து சென்றால் தான் நமக்கு நல்லது.

இதற்கு அர்த்தம் மத்திய அரசு செய்யும் அனைத்திற்கும் ஜிங்சாக் போட வேண்டும் என்பதல்ல.

இது போன்ற பொதுவான நிகழ்ச்சிகளுக்கு, நம் ஒரு மாநிலத்தை மட்டும் அவர்கள் கணக்கில் எடுத்துக்கொள்ள முடியாது.

அப்படிப் பார்த்தால், பாகிஸ்தானை எந்தக் காலத்திலும் இந்தியா அழைக்கவே முடியாது.

காலாகாலத்திற்கும் அடித்துக் கொண்டு இரு தரப்பிலும் அனைவரும் செத்துக்கொண்டே இருக்க வேண்டியது தான்!

அரசாங்கம் செய்ய வேண்டியது என்ன?

இந்த நிகழ்ச்சி முடிந்த பிறகு வழக்கம் போல ஏதேனும் சம்பவம் நடக்கிறதா..! அப்போது போராட்டம் செய்யலாம்.. அது நியாயம்!

பிரதமர் இது குறித்து கண்டுக்காமல் இருக்கிறாரா..! தாராளமாகக் கேள்வி கேளுங்கள்.. யார் வேண்டாம் என்று கூறினார்கள்.

மற்ற நாடுகளுடன் ஒத்துழைப்புடன் இருந்தால் மட்டுமே நம் நாடு வளர்ச்சி பெறும்.

இதன் அர்த்தம் காங் அரசு போல அடி வாங்கிக்கொண்டு, எது நடந்தாலும் வாயை இறுக மூடிக்கொண்டு இருக்க வேண்டும் என்பதல்ல.

நாம் நம் கடமையைச் செய்து விட வேண்டும். இதன் பிறகு பிரச்சனை என்றால், போராட வேண்டும் / கடுமையான நடவடிக்கை எடுக்க வேண்டும்.

இது தான் ஒரு நல்ல அரசாங்கத்திற்கு அழகு. தொட்டதுக்கெல்லாம் சண்டைப் போட்டுக்கொண்டு / போராட்டம் செய்து கொண்டு இருந்தால் என்ன ஆவது!

சில விசயங்களில் நம் விருப்பம் மட்டுமல்லாது மற்ற பிரச்சனைகளையும் கவனத்தில் கொள்ள வேண்டி இருக்கிறது.

ஜெ

எடுத்துக்காட்டுக்கு நம்ம “ஜெ” வை எடுத்துக்கொள்ளுங்கள். எந்த மாநிலத்துடனாவது சுமூக உறவு இருக்கிறதா! அனைவருடனும் சண்டை.

கொஞ்சமும் இறங்கி வராத குணம் இவருடையது! இதனால் யாருக்கு நட்டம்.. நமக்கா மற்ற மாநிலங்களுக்கா!

நாம் இன்றைய தேதி வரை தண்ணீருக்காக மற்ற மாநிலங்களையே நம்பி இருக்கிறோம்.

இருப்பதிலேயே ஆந்திரா மட்டும் தான் ஓரளவு பிரச்சனை செய்யாமல், தண்ணீரை கொடுத்துக் கொண்டு இருக்கிறது.

இனி அதற்கும் தெலுங்கானா வந்து விட்டது. மற்ற மாநிலங்களுடன் பிரச்சனை இருந்தாலும் ஒரு சில விசயங்களில் அனுசரித்தே செல்ல வேண்டும்.

அது போலத்தான் மற்ற நாடுகளும்.

இலங்கை, பாகிஸ்தானுடன் பிரச்சனை இருந்தாலும் இது போன்ற பொதுவான அழைப்புகளைத் தவிர்க்க முடியாது, கூடாது. ஒரேடியாக முறுக்கிக் கொண்டு இருக்க முடியாது.

ஒரு சில விசயங்களில் விட்டுக்கொடுத்துத் தான் ஆக வேண்டும். ஏதாவது பிரச்சனை என்றால் போராடுவது வேறு… அனைத்திற்கும் கண் மூடித்தனமாகப் போராடுவது வேறு.

இதில் இரண்டாவது எந்தக் காலத்திலும் பிரச்சனைகளுக்கு தீர்வைத் தராது.

நம் மாநிலத்துக்கு நல்லது நடக்க வேண்டும் என்றால், நாம் மத்திய அரசுடன் இணக்கமாக சென்று தான் ஆக வேண்டும்.

மோடியும் ஜெ வும் தேர்தல் இறுதி நேரத்தில் சண்டை போட்டுக்கொண்டாலும் அவர்கள் நண்பர்கள் தான் என்று அனைவரும் அறிவார்கள்.

மோடியும் “கருத்து வேறுபாடு இருந்தாலும் ஜெ வும் நானும் நல்ல நண்பர்களே!” என்று கூறி இருந்தார்.

மோடி அரசிற்கு நம் மாநிலத்தால் ஒரு லாபமும் இல்லை (ஒரே ஒரு இடம் தான் வெற்றி பெற்றார்கள்) என்று அவர்களும் வேண்டும் என்றே நம்மைப் புறக்கணித்தால் யாருக்கு நட்டம்!

மோடியின் துவக்க நடவடிக்கைகளைப் பார்த்தால் (தற்போதைக்கு) அனைவரையும் அரவணைத்தே செல்பவர் போலவே தெரிகிறார்.

எனவே, இது போலப் பிரச்சனைகள் இருந்தாலும், பொறுப்பான பிரதமராக தமிழகத்திற்கும் சரியான கவனத்தை கொடுப்பார் என்று நம்புகிறேன்.

இதற்கு நம்ம “ஜெ” முதல்ல பிடி கொடுக்க வேண்டும். “நான்” “என் அரசு” என்று வழக்கம் போல முழங்கிக் கொண்டு இருந்தால், இழப்பு தமிழ்நாட்டிற்குத் தான்.

ஈழத் தமிழர் போராட்டம்

இது வரை தமிழகத்தில் எத்தனை ஈழத் தமிழர் போராட்டம் செய்து இருக்கிறார்கள்…!

இந்தப் போராட்டத்தால் ஈழத் தமிழர்களுக்கு ஏதாவது குறிப்பிடும்படியான நன்மை கிடைத்து இருக்கிறதா! இவற்றால் அவர்களுக்கு மேலும் மேலும் சிக்கல் தான் நேர்ந்து வருகிறது.

தமிழ் அமைப்புகள் மற்றும் தமிழன் பெயரைக் கூறி பிழைப்பு நடத்துபவர்களால் தமிழ்நாட்டு தமிழர்களுக்கும் ஈழத் தமிழர்களுக்கும் ஒரு புண்ணாக்கு நன்மையையும் கிடைத்ததில்லை.

இவர்கள் போராட்டத்தால் அனைவருக்கும் பிரச்சனை தான் நேர்ந்து கொண்டு இருக்கிறது.

போராட்டம் நடத்த வேண்டிய 2009 ல் கொட்டாவி விட்டுத் தூங்கி விட்டு எல்லாம் முடிந்து அனைவருக்கும் பாடை கட்டி விட்டு தற்போது தமிழே என் பேச்சு! தமிழே என் வாட்ச்சு!! என்று முழங்கிக் கொண்டு இருக்கிறார்கள்.

தமிழனுக்கு எதிரி

“தமிழன் என்பதில் பெருமை கொள்ளுங்கள்” தவறில்லை ஆனால், அதையே  அரசியலாக்கி அனைவரும் தமிழர்களை வெறுக்கும்படி செய்யாதீர்கள்.

இணையத்தில் இருப்பவர்களும் அரசியல்வாதிகளும் மட்டுமே “தமிழ் தமிழ்” என்று குதித்துக்கொண்டு இருக்கிறார்கள்.

இதற்கு வெளியே வந்து பாருங்கள்.. அவனவன் தன் வேலையைப் பார்த்துக்கொண்டு அமைதியாக இருக்கிறான்.

இங்கே நடக்கும் எதுவும் பொது மக்களைப் பாதிப்பதில்லை ஆனால், இவர்கள் தமிழன் / தமிழ் என்று அலறிக்கொண்டு இருக்கிறார்கள்.

தமிழனுக்கு எதிரி வேறு எங்கேயும் கிடையாது…..!

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).