அழகர்சாமியின் குதிரை (2011)

வெண்ணிலா கபடிக்குழு, நான் மகான் அல்ல வெற்றிப்படங்களுக்குப் பிறகு இயக்குனர் சுசீந்திரன் இயக்கி இருக்கும் படம் அழகர்சாமியின் குதிரை.

எழுத்தாளர் பாஸ்கர் சக்தி அவர்கள் கதையைப் படமாக்கி உள்ளார் இயக்குனர் சுசீந்திரன்.

அழகர்சாமியின் குதிரை

தேனி மல்லையாபுரம் கிராமம் வறட்சியால் கஷ்டப்படுகிறது இதனால் அங்குள்ள அழகர்சாமி கடவுளுக்கு விழா எடுத்து வேண்ட நினைக்கிறார்கள்.

இந்தச் சமயத்தில் அழகர்சாமியின் குதிரைச் சிலை திருட்டுப்போகிறது இதனால் திருவிழா தடைபடும் நிலையில் உயிருள்ள ஒரு குதிரை கிடைக்கிறது.

இதைக் கடவுளே அனுப்பி வைத்ததாக அனைவரும் நம்புகிறார்கள்.

இந்நிலையில் இக்குதிரையை சொந்தம் கொண்டாடி அப்புக்குட்டி என்பவர் வருகிறார் ஆனால் கிராம மக்கள் குதிரையைக் கொடுக்க மறுக்கிறார்கள்.

இறுதியில் விழா நடந்ததா? அப்புகுட்டிக்குக் குதிரை திரும்பக் கிடைத்ததா! என்பதே கதை.

கிராம மக்கள் உணர்வுகள்

கிராம வாழ்க்கையை எந்தவித மாற்றமும் இல்லாமல் அப்படியே கொடுத்து இருக்கிறார்கள்.

நானும் கிராமத்திலிருந்து வந்தவன் தான் என்பதால் கிராம மக்களுடைய உணர்வுகளை நன்றாக உணர முடிந்தது.

அதில் வரும் ஒவ்வொரு கதாப்பாத்திரமும் கிராம மக்களின் பேச்சுக்களை செய்கைகளை அப்படியே படம் பிடித்துக்காட்டியது.

விழா நடத்த கிராமப்பெரியவர்கள் வசூல் செய்யப்போகும் போது நடக்கும் நிகழ்வுகள் நமக்கு சிரிப்பை வரவழைக்கிறது அதிலும் ஒரு பாட்டி காது கேட்காதது போல நடித்து எஸ்கேப் ஆகப் பார்ப்பது நல்ல நகைச்சுவை.

குதிரைச் சிலை காணாமல் போனதால் ஊர்ப்பெரியவர்கள் காவல் நிலையத்தில் புகார் கொடுக்கும் காட்சி கொஞ்சம் சலிப்பை வரவழைத்தது.

தற்போதெல்லாம் மக்களுக்குக் காட்சிகளை நீட்டி முழக்காமல் சுருக்கமாகக் கூறினால் மட்டுமே ரசிப்பார்கள்.

ஆனால், இதில் சீக்கிரம் யாராவது குதிரையைப் பற்றி விளக்கமா சொல்லுங்கப்பா! என்று நினைக்கும் அளவிற்கு காட்சியை இழுத்து விட்டார்கள்.

இதில் காவல் துறை அதிகாரியாக நடித்து இருந்தவரின் நடிப்பு நன்றாக இருந்தது.

கோடங்கி

கோவில்களில் குறி சொல்பவராக வரும் கோடங்கி போன்றவர்கள் செய்யும் ஏமாற்று வேலையை நன்கு காட்டியிருக்கிறார்கள்.

அவர் தன்னுடைய சுயலாபத்திற்காக கடவுளை பயன்படுத்துவதை பார்த்தாவது மக்கள் திருந்தினால் சரி.

அப்புக்குட்டியாக வெண்ணிலா கபடிக்குழுவில் ஐம்பது புரோட்டாவா! என்று ஆச்சர்யப்படுவாரே அவர் நடித்துள்ளார் இவருடைய பெயரும் அழகர்சாமி.

அப்புக்குட்டிக்கு தன்னுடைய குதிரை கிடைத்தால் மட்டுமே நிச்சயிக்கப்பட்ட திருமணம் நடைபெறும் என்ற நிலை.

காணாமல் போனக் குதிரையை இக்கிராமத்தினர் பிடித்து வைத்து இருப்பதைக்கண்டு அழைத்துச் செல்ல நினைக்கும் போது ஊர்க்காரர்கள் அதை அனுமதிக்க மறுக்க இதனால் இவருக்கும் அவர்களுக்கும் சண்டை ஏற்படுகிறது.

இவர் அடிக்கும் காட்சியும் அடி வாங்கும் காட்சியும் சிறப்பாகக் காட்சியமைக்கப்பட்டுள்ளது. நிஜமாகவே அடி விழுந்து இருக்கும் என்று நினைக்கிறேன்.

கேரளா மாந்திரீக நபராக வரும் முருகன் காட்சிகள் ரசிக்கும்படி இல்லை பழைய படங்களைப் பார்ப்பது போல இருந்தது.

அதே போல வேவு பார்ப்பவராக வரும் காவலர் பின் கோடங்கி போலச் செய்யும் காட்சிகளும் கடுப்பையே தந்தது. கிராமம் என்றால் ஒரு மைனர் என்பது போல இதிலும் ஒருவர் வருகிறார்.

இளையராஜா

இளையராஜா இந்தப்படத்திற்கு இசையமைத்ததைப் பற்றிச் சிலாகித்துக் கூறி இருந்தார் ஆனால், அவர் குறிப்பிடும் அளவிற்கு பாடல்களும் பின்னணி இசையும் கவரவில்லை.

வழக்கமான மசாலப்படங்களிலிருந்து வித்யாசப்படுத்தி இதைப்போலப் படத்தை எடுக்கத் துணிந்த இயக்குனர் சுசீந்திரன் அவர்களுக்கு என் பாராட்டுகள்.

உடன் இதைத் தயாரித்த க்ளவுட் நைன் நிறுவனத்திற்கும்.

இயல்பாகப் படத்தை எடுத்து இருந்தாலும் எதோ ஒன்று குறைகிறது. விறுவிறுப்பாகக் கொடுத்து இருக்கலாமோ! என்ற எண்ணம் வந்ததை தவிர்க்க முடியவில்லை.

Directed by Suseenthiran
Produced by P. Madhan
Written by Bhaskar Sakthi
Screenplay by Suseenthiran
Based on Azhagarsamiyin Kudhirai by Bhaskar Sakthi
Starring : Appukutty, Saranya Mohan
Music by Ilaiyaraaja
Cinematography: Theni Eashwar
Editing by Kasi Viswanathan
Studio Escape Artists Motion Pictures
Distributed by Cloud Nine Movies
Release date(s) May 12, 2011

🛑 To get Blog Article, Finance, UPI, OTT updates, Tech News, Online Offers follow –> giriblog WhatsApp Channel (WhatsApp Blog ⭐).