Udta Punjab (2016 இந்தி) & Sarbjit (2016 இந்தி)

நண்பர்கள் கொடுத்த இரண்டு படங்கள் Udta Punjab & Sarbjit.

Udta Punjab

பஞ்சாப்பில் போதை பழக்கத்துக்கு அடிமையாகி வரும் இளைஞர்களைப் பற்றிய படம். இப்படம் கடும் சர்ச்சைக்குப் பிறகு வெளி வந்தது உங்களில் பலருக்கு நினைவிருக்கலாம்.

பஞ்சாப் முழுக்கவே போதை பழக்கம் கடுமையாகப் பாதித்து இருப்பதாகவும், இதற்குக் காவல்துறை மற்றும் அரசியல்வாதிகள் துணை போவதாகவும் காட்சிப்படுத்தியிருக்கிறார்கள்.

இவர்கள் கூறிய அளவுக்கு மோசமாக இருக்கிறதா இல்லையா என்பதைச் சம்பந்தப்பட்ட மாநிலத்தார் தான் கூற வேண்டும். பார்க்கும் நமக்குத் திக்கென்று தான் இருக்கிறது.

ஷாகித் கபூர் Rockstar ஆக நடித்து இருக்கிறார். செம்மையா நடித்து இருக்கிறார். எனக்கு இவரை ஏனோ பிடிப்பதில்லை, ஏன் என்ற காரணம் எனக்குப் புரியவில்லை.

Padmavat படத்தில் கூட அப்படியொன்றும் என்னைக் கவரவில்லை ஆனால், இதில் அந்தக் கதாப்பாத்திரமாகவே வாழ்ந்து இருக்கிறார்.

மற்றவர்களுக்கு எப்படியோ எனக்கு மிகப் பிடித்தது. அந்தக்கதாப்பாத்திரமாக அவரைக் கருதாமல் பார்த்தால், அவர் நடிப்புப் பைத்தியக்காரத்தனமாகத் தோன்றலாம்.

கரீனா கபூர் மருத்துவராக வந்து கொஞ்சம் சமூகச் சேவைகள் எல்லாம் செய்கிறார்.

Alia Bhatt கிராமத்து பெண்ணாக வந்து போதை கும்பலிடம் எதிர்பாராமல் சிக்கி படாதபாடு படுகிறார்.

இவரை ஒரு வழியாக்கி விட்டார்கள். சிறப்பான நடிப்பு குறிப்பாக ஷாகித் கபூரை எதிரிகளிடம் இருந்து காப்பாற்றும் காட்சியில் தெறிக்கவிட்டு இருக்கிறார்.

பஞ்சாப் பற்றித் தெரிந்தவர்கள் இப்படத்தில் உள்ளது போலப் போதை பழக்கம் அவ்வளவு மோசமாக உள்ளதா! என்பதைத் தெரியப்படுத்தினால் ஒரு செய்தியாகத் தெரிந்து கொள்வேன்.

Sarbjit

இதுவும் நம் எல்லோருக்கும் தெரிந்த கதை (உண்மை சம்பவம்) தான்.

பல வருடங்களுக்கு முன்பு (1990) பாகிஸ்தான் எல்லையில் தவறுதலாகச் சென்றவரை (Sarbjit) குண்டு வைத்த இந்திய உளவுத்துறை நபராகப் பாக் இராணுவம் கைது செய்தது.

பின் அவரைச் சித்திரவதை செய்து பெயரையே மாற்றி, குண்டு வைத்தவன் பெயர் தான் தன்னுடையது என்று ஒப்புக்கொள்ள வைப்பார்கள்.

அடி தாங்க முடியாமல் வேறு வழியில்லாமல் தன் பெயரை “ரஞ்சித் சிங்” என்று ஒத்துக்கொள்வார்.

இவர் காணாமல் போனதாகக் குடும்பத்தினர் நினைத்து இருக்க, பல மாதங்களுக்குப் பிறகு தான் இவர் பாக் சிறையில் இருக்கும் தகவல் தெரியும்.

இவருடைய சகோதரியாக ஐஸ்வர்யா ராய்.

தவறே செய்யாமல் 22 வருடங்களாகத் தன்னுடைய இளமை காலங்களைத் தொலைத்து கடுமையான சித்திரவதைகளை அனுபவித்து இருப்பார்.

பல்வேறு போராட்டங்களுக்குப் பின் தன்னுடைய குடும்பத்தைச் சந்திக்க அனுமதிக்கப்படுவார். இதற்கும் பாக்கில் உள்ள வழக்கறிஞரே உதவுவார்.

இக்காட்சிகள் எல்லாம் எவரையும் கலங்கடித்து விடும்.

தான் அனுபவித்த சிரமங்களில் ஒன்றாக 22 வருடங்களில் 11 முறை மட்டுமே குளிக்க அனுமதித்ததாகக் கூறும் போது கொடுமையாக இருக்கும். இவர் ரஞ்சித்சிங் அல்ல என்று நிரூபித்தும் வெளிவர முடியாதது பரிதாபம்.

Randeep Hooda

Sarbjit ஆக நடித்த Randeep Hooda ஆகச்சிறந்த நடிப்பு குறிப்பாக இரண்டாம் பாதியில்.

ஆளே உருமாறி நம்பிக்கையிழந்து இருப்பார். ஐஸ்வர்யா ராய் இவரின் விடுதலைக்காகப் போராடுவது எல்லாம் செமையாக உள்ளது. எதார்த்தத்தை மீறாமல் உள்ளது.

உண்மைச் சம்பவம் என்பதால் முடிந்தவரை மிகைப்படுத்தாமல் எடுக்கப்பட்டுள்ளது.

ஒரு நீண்ட போராட்டம், பல முறை விடுவிப்பதாக அறிவிக்கப்பட்டு எதோ காரணத்தால், தள்ளிப்போகிறது. ஐஸ்வர்யா ராய் குடும்பத்தை விட நமக்கு மிகக் கவலையாக இருக்கும்.

தூக்கில் போடுவது கடைசி நேரத்தில் மாறுவதும், பின் திரும்ப முடிவாவதும், பின் திரும்பவில்லையென்பதும் என்று நம்மை விரக்தியின் உச்சிக்கே கொண்டு செல்கிறது.

படம் பார்க்கும் நமக்கே இப்படி உள்ளது, உண்மையில் இதை அனுபவித்த Sarbjit மற்றும் அவரது குடும்பத்தினரை நினைத்தால், பாவமாக உள்ளது.

சோகமான படத்தை விரும்பவில்லையென்றால், இப்படத்தை நான் உங்களுக்குப் பரிந்துரைக்கவில்லை, தவிர்த்து விடுங்கள்.

இதையெல்லாம் பார்க்கும் போது நமக்கெல்லாம் எந்தக் கஷ்டமும் இல்லாத வாழ்க்கை வாழ்கிறோம் என்று தோன்றியது. 

“நமக்கும் கீழே உள்ளவர் கோடி, நினைத்துப் பார்த்து நிம்மதி நாடு” என்பது தான் நினைவுக்கு வந்தது.

மேற்கூறிய இரண்டு படங்களுமே லாபம் கொடுத்தவையே! இவையல்லாமல் இன்னும் சில இந்திப் படங்களை பார்த்து வருகிறேன். விரைவில் அவை பற்றியும் எழுதுகிறேன்.

தற்போது தான் Subtitle உடன் பார்க்க வாய்ப்புக்கிடைத்தது 🙂 .

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).