நடுநிசி நாய்கள் (2011) | சைக்கோ த்ரில்லர்

சமீபத்தில் அதிகம் திட்டு வாங்கிய படம் அநேகமாக “நடுநிசி நாய்கள்” படமாகத் தான் இருக்கும் 🙂 . அந்த அளவிற்கு பலர் திட்டித் தீர்த்து விட்டார்கள்.

அதற்குக் காரணம் இதை ஒரு சைக்கோ த்ரில்லராகப் பார்க்காமல் வழக்கமான கண்ணோட்டத்தில் படம் பார்த்ததே ஆகும்.

நடுநிசி நாய்கள்

பலர் தங்கள் எதிர்பார்ப்பு அல்லது தங்களது ரசனையைவிட வேறு மாதிரி படம் இருந்தால் உடனே படம் குப்பை வன்முறை என்று பலவாறு திட்டி விடுகிறார்கள் 🙂 .

அதோடு தங்கள் கருத்தை மற்றவர்கள் மீது திணிக்கவும் செய்து விடுகிறார்கள்.

இதைப்போலப் படங்களைத் தமிழ்நாட்டில் வெளியிட இன்னும் காலம் எடுக்கும் கவுதம் கொஞ்சம் ஆர்வக்கோளாரில் முன்பாகவே எடுத்து விட்டார் 🙂 .

தந்தையின் தவறான வளர்ப்பினால் பாலியல் தொந்தரவிற்கு ஆளாகும் சிறுவன் மனச்சிதைவுக்கு ஆளாகி கொலைகளையும் வன்புணர்வுகளையும் செய்கிறான்.

முடிவில் என்ன ஆகிறது என்பதே கதை.

வீரா

மனச்சிதைவிற்கு ஆளான நபராகக் கவுதமின் உதவியாளர் வீரா நடித்து இருக்கிறார். குறையேதும் கூற முடியாத அளவிற்கு தன் கதாப்பாத்திரத்தைச் செய்து இருக்கிறார்.

அந்நியன் போல ஸ்ப்லிட் பர்சனாலிட்டி.  அவர் மீது வெறுப்பு வரும் அளவிற்கு சிறப்பாகச் செய்து இருக்கிறார்.

சிறுவயதில் வீரா கதாப்பாத்திரத்தைக் காட்டுவது நிச்சயம் பள்ளி செல்லும் வயதிற்கு பொருத்தமானதாக இல்லை அதோடு கேவலமான விக் வேறு.

இவ்வளவு பெரிய பையன் பள்ளி செல்கிறான் என்று எந்த அர்த்தத்தில் காட்டினார்கள் என்று புரியவில்லை.

மீனாட்சி

வீராவின் வளர்ப்பு அம்மாக வரும் மீனாட்சியின் நடிப்பு அருமை. இதற்கு முன் வேறு எதுவும் படத்தில் நடித்து இருக்கிறாரா! ரொம்ப அழகாகவும் இருக்கிறார்.

துவக்கத்தில் அமைதியாகவும் அன்பாகவும் வருபவர் பின் வரும் காட்சிகளில் அதிரடியாக மிரட்டி இருக்கிறார்.

திருமணமே செய்து கொள்ளாமல் இருப்பவர் அவருடைய கல்லூரி நண்பர் பல முறை கேட்டும் ஒத்துக்கொள்ளாதவர் பின் திருமணத்திற்கு ஒத்துக்கொள்வதுக்கு எனக்கு இரண்டு காரணம் புரிந்தது.

இரண்டுமே என்னைப் பொறுத்த வரையில் ஏற்றுக்கொள்ளும்படி இருந்தது. எனக்கு இவரை ரொம்ப பிடித்து இருந்தது ஏன் என்று தெரியவில்லை.

வீரா ‘மீனாட்சியம்மா! மீனாட்சியம்மா!!‘ என்று கூறுவது வித்யாசமாக உள்ளது ஆனால், இப்படிக் கூறி விட்டு அவர் செய்தது உறுத்தலாக இருக்கிறது.

இருப்பினும் மீனாட்சி பற்றிய தன் எண்ணத்தை முதலிலேயே கூறி விடுவதால் முரண்பாட்டுடன் ஏற்றுக்கொள்ள வேண்டியதாக இருக்கிறது.

த்ரில்லர் படங்களுக்கு விமர்சனம் எழுதுவதில் ஒரு பிரச்சனை ரசித்த அல்லது பிடிக்காத காட்சியை வெளிப்படையாகக் கூற முடிவதில்லை.

காரணம் அந்தக்காட்சியின் சஸ்பென்சை கூற வேண்டி வருவதால்.

ஏமாற்றப்படுவது

இணையம் மற்றும் பல்வேறு விசயங்களில் பெண்கள் எவ்வாறு ஏமாற்றப்படுகிறார்கள் எவ்வாறு உஷாராக இருக்க வேண்டும் என்பதை விளக்கி இருக்கிறார்கள்.

இதில் கூறியுள்ளவை யாவும் தற்போதைய காலக்கட்டங்களில் நடக்க ஏராளமான வாய்ப்புள்ளது. சமீராவும் வீராவால் பாதிக்கப்படும் ஒரு பெண்ணாக வருகிறார்.

பாடல்கள் இல்லை, பின்னணி இசை இல்லை ஆனால், அது உறுத்தலாக இல்லை.

பாடல்கள் இல்லாமல் படங்கள் வந்ததுண்டு ஆனால், இதைப்போலப் பின்னணி இசை இல்லாமல் (உண்டு ஆனால் மிகமிகக் குறைவு) வந்ததில்லை.

ஒளிப்பதிவும் த்ரில்லர் படங்களுக்கே உரிய வித்யாசமான காட்சியமைப்புடன் எடுக்கப்பட்டுள்ளது. ஏமாற்றம் தரவில்லை.

முடிவாகத் தமிழில் ஒரு நல்ல முயற்சி ஆனால், காலம் கடந்த முயற்சி என்று ஒரு சிலவற்றை குறிப்பிடுவார்கள் இதில் அது ரிவர்சில் வருகிறது ஆமாம் இது தற்போதைய மக்களின் ரசனைக்கு ஏற்றப் படமல்ல.

இக்கதையைக் ஏற்றுக்கொள்ளும் அளவுக்கு மக்கள் இன்னும் பக்குவப்படவில்லை. அதனாலே திட்டி விமர்சனங்கள் வருகிறது.

சைக்கோ த்ரில்லரில் வேறு என்ன இருக்கும் என்று எனக்குப் புரியவில்லை. மற்றபடி என்னளவில் அருமையான சைக்கோ த்ரில்லர் படம் தமிழில். வாழ்த்துக்கள் கவுதம்.

கவுதம் படங்களை ரசிப்பவராக இருக்கலாம் ஆனால், அவரது VTV, வாரணம் ஆயிரம், மின்னலே படங்கள் போல இருக்கும் என்று சென்று விடாதீர்கள், ஏமாற்றமே மிஞ்சும்.

சைக்கோ த்ரில்லர் படங்களை ரசிப்பவர் என்றால் தவறவிடக்கூடாத படம்.

சரியான கண்ணோட்டம்

முடிவாக ஒருபடத்திற்கு செல்கிறீர்கள் என்றால் அந்தப்படத்தைப் பற்றிய கண்ணோட்டத்தோடு செல்லுங்கள்.

மசாலா படத்துல உலகப்படத்தை தேடுவது, பேய் படத்துல போய் லாஜிக் பார்ப்பது, சென்டிமென்ட் படத்துல போய் நகைச்சுவை மற்றும் சண்டையே இல்லை என்று புலம்புவது என்ன நியாயம் என்று புரியவில்லை.

வேலு மிலிட்டரி உணவகத்தில் சரவண பவன் சுவையைத் தேடாதீர்கள். படத்தின் கதைக்கரு என்னவென்று புரிந்து, இது நமக்கு ஏற்றதா நம் ரசனைக்கு ஒத்து வருமா என்று தீர்மானித்துச் சென்றால் ஏமாற்றங்களைத் தவிர்க்கலாம்.

என்னால் அனைத்து வகைப்படங்களையும் ரசிக்க முடிகிறது.

மகிழ்ச்சி, சோகம், சைக்கோ, சண்டை, விண்வெளி, நகைச்சுவை, மசாலா, வன்முறை, அழுகை, ஹாரர், பேய், போர், த்ரில்லர்,  கருப்பு வெள்ளை என்று அனைத்தும்.

Directed by Gautham Menon
Produced by Kumar, Jayaraman, Madan
Written by Gautham Menon
Starring Veera Bahu, Sameera Reddy, Deva
Cinematography Manoj Paramahamsa
Release date(s) 18 February 2011
Running time 110 minutes

🛑 To get Blog Article, Finance, UPI, OTT, Tech News, Offers follow -–> giriblog WhatsApp Channel (WhatsApp Blog ⭐).