முள்ளும் மலரும் [1978]

ரஜினியின் நடிப்பு என்றால், இன்றளவும் பலரால் கூறப்படுவது “முள்ளும் மலரும்”. Images Credit

இதில் நடிப்பு மட்டுமல்ல, இயக்கம், இசை, ஒளிப்பதிவு, கதாப்பாத்திரங்கள் என்று அனைத்துமே ஒருங்கே இணைந்து அமைந்த “குறிஞ்சிப் பூ” படம்.

எனக்கு மிக மிகப் பிடித்த படங்களில் ஒன்று முள்ளும் மலரும், அது தலைவர் படம் என்பதில் கூடுதல் மகிழ்ச்சி.

இப்படம் ஏற்கனவே, பலர் பலமுறை பார்த்து இருப்பீர்கள். எனவே, படத்தின் விமர்சனமாக இல்லாமல் படம் குறித்த தகவல்களைக் கதாபாத்திரங்களை விவரிக்கும் கட்டுரையாக இதை எடுத்துக்கொள்ளுங்கள்.

1967 ஆம் ஆண்டுக் கல்கி இதழின் வெள்ளி விழாப் போட்டியில் உமா சந்திரன் அவர்கள் எழுதி முதல் பரிசு பெற்ற நாவல் முள்ளும் மலரும்.

இதை இயக்குநர் மகேந்திரன் அடிப்படையாக வைத்து உருவாக்கிய கதை தான் இப்படம்.

இந்நாவல் அப்படியே முழுமையாகப் படமாக்கப்படவில்லை, பல மாற்றங்களுக்குப் பிறகே படமானது.

இயக்குநரை கவர்ந்த விஞ்ச் மற்றும் காளி

இயக்குநர் மகேந்திரன் அவர்களை இந்நாவலில் கவர்ந்தது “விஞ்ச்” பகுதியும் காளியின் கதாப்பாத்திரமும் தான்.

இதை அடிப்படையாக வைத்தே படத்தை உருவாக்கியிருக்கிறார்.

யோசித்துப் பார்த்தால், படம் சிறப்பு, நடிப்பு அசத்தல், இசை ஒளிப்பதிவு அட்டகாசம் என்று இருந்தாலும், மக்களைக் கவர்ந்ததில் அது குறித்து அதிகம் வெளிவராமல் போன “விஞ்ச்” பகுதியும் இருந்து இருக்கணும் என்றே நினைக்கிறேன்.

மற்ற சிறப்புகளின் முன் மக்களின் மறைமுக விஞ்ச் கவர்ச்சி அடிபட்டு போய் விட்டது.

தயாரிப்பாளர் வேணு செட்டியார்

தயாரிப்பாளர் வேணு செட்டியார், இயக்குநர் மகேந்திரனுக்குப் பழக்கம் என்பதால், அவரின் தயாரிப்பில் படம் உருவாக்கப்பட்டு இருக்கிறது.

படத்தை வெளியீட்டுக்கு முன்பு பார்த்த தயாரிப்பாளர் “அடப்பாவி என் தலையில் மண்ணை அள்ளிப் போட்டுட்டியே, படத்துல வசனமே இல்ல” என்று புலம்பி உள்ளார்.

ஓடாத படத்துக்கு எதற்கு விளம்பரம் என்று விளம்பரமும் செய்ய மறுத்து விட்டார்.

தயாரிப்பாளர் வேணு செட்டியார் கோபப்பட்டதில் நியாயமில்லாமல் இல்லை. ஏனென்றால், அப்போது வசனங்கள் ஆட்சி செய்து கொண்டு இருந்த காலம்.

சிறு காட்சியாக இருந்தாலும், பக்கம் பக்கமாக வசனம் பேசப்பட்ட காலம்.

சோக காட்சிகள் என்றால், கண்ணீரும் கம்பலையுமாக கதறிய காலம். எனவே, ஒரு தயாரிப்பாளராக அவர் பயப்பட்டதில் நியாயமுண்டு.

ஆனால், வெளியாகி முதல் இரண்டு வாரங்கள் சத்தமில்லாமல் இருந்த படம் மூன்றாவது வாரத்தில் இருந்து மக்களின் வரவேற்பில் செம்ம ஓட்டம் ஓடி இருக்கிறது.

இதன் பிறகு தயாரிப்பாளர் “Blank Cheque” கொடுத்து நிரப்பிக்கச் சொன்னதை “இப்படத்தை இயக்க வாய்ப்புக் கொடுத்ததே பெரிய உதவி” என்று மகேந்திரன் மறுத்து இருக்கிறார்.

கமல்

முள்ளும் மலரும் வெளிவந்ததில் மற்றும் மற்ற விஷயங்களில் கமல் அவர்களின் பெரும்பங்கு இருந்து இருக்கிறது.

அண்ணன் தங்கச்சி பாசத்தைக் கூறிய சிறந்த மூன்று படங்கள்

தமிழில் இதுவரை (*2017) அண்ணன் தங்கச்சி அன்பு குறித்த மூன்று படங்கள் மிகப்பெரிய வெற்றி பெற்று உள்ளது.

அண்ணன் தங்கச்சி படம் என்றால் தவிர்க்க முடியாத படங்கள், பாசமலர், முள்ளும் மலரும், கிழக்குச் சீமையிலே.

இனி முள்ளும் மலரும்

படம் பார்ப்பவர்களைத் தங்கள் நடிப்பால் அசத்தியவர்கள் இருவருக்கு முக்கியப்பங்குண்டு, ஒன்று ரஜினி இன்னொன்று ஷோபா.

இருவரின் இயல்பான நடிப்பே இன்றளவும் இப்படத்தைப் பற்றிப் பேச வைத்து இருக்கிறது.

இயக்குநர் மகேந்திரன் கதாப்பாத்திரங்களை எந்த மாற்றமும் செய்யாமல் அவர்கள் இயல்பிலேயே உலவ விட்டு இருப்பார்.

இப்படத்தில் நடிகர்களைக் காண முடியாது, கதாப்பாத்திரங்களை மட்டுமே காண முடியும்.

காளி கதாப்பத்திரம் நாயகன் என்றாலும் நாயகனுக்குண்டான சமரசங்கள் எதுவுமில்லாமல், அக்கதாப்பாத்திரம் எப்படி நடந்து கொள்ளுமோ அதை அப்படியே உலவவிட்டு இருக்கிறார்.

சுயகவுரவம் (Ego) மிக்க காளி

காளி இப்படத்தில் சுயகவுரவம் அதிகம் இருக்கும் கதாப்பாத்திரம்.

காளிக்கு தகுந்த மாதிரி நடந்து கொண்டால், அவருக்காக எதையும் செய்வான் ஆனால், அவமதித்ததால்  அவனால் பொறுத்துக்கொள்ள முடியாது.

எனவே, சுய கவுரவம் காரணமாகத் தன் தவறை ஏற்றுக்கொள்ளாமல், தான் செய்வது அனைத்தும் சரி என்பது போலவே நினைத்துக் கொள்ளும் முரட்டுச் சுபாவம் உடைய கோபக்காரன் ஆனால், அடிப்படையில் நல்லவன்.

படம் பார்ப்பவர்கள் அனைவருக்கும் தெரியும் பொறியாளர் மீது எந்தத் தவறுமில்லை, அவர் தனது கடமையைத் தான் செய்கிறார் என்று, இருப்பினும் காளி அவர் மீது கோபித்துக்கொள்வான்.

தாய் தந்தை இல்லாமல் வாழ்க்கையில் அடிபட்டு சுயம்புவாகத் தன் ஒருவனின் உழைப்பிலேயே முன்னேறியவன் காளி, உடன் தன் தங்கையையும் வளர்த்தவன்.

எனவே, இயல்பிலேயே சுயகவுரவம், தன்னம்பிக்கை அதிகம் கொண்ட கதாப்பாத்திரமாக காளி கதாப்பாத்திரம் சித்தரிக்கப்பட்டு இருக்கும்.

தன் தங்கை பிச்சை எடுப்பதைப் பார்த்து அதிச்சியாகி பிடுங்குவதும், வளர்ந்த பிறகு ஏழை ஒருவரை அவர் செய்த தவறுக்காகப் பணக்காரர் திட்டுவதைப் பார்த்துக் கார் விளக்கு கண்ணாடியை உடைப்பதும் என்று பணக்காரர்கள் அதிகாரம் மிக்கவர்கள் மீதான காளி வெறுப்பு காட்டப்பட்டு இருக்கும்.

முதல் சந்திப்பே சண்டை

முதல் சந்திப்பே சண்டையோடு துவங்கி விடுவதால், பொறியாளர் (சரத்பாபு) மீது காளிக்கு வெறுப்பு உருவாகி இது அப்படியே இறுதி வரை முடிவில்லாமல் தொடரும்.

சண்டையோடு உறவு துவங்கினாலும் இவர்கள் இருவரும் இணைந்து நடித்த படங்கள் ஏராளம். வேலைக்காரன், அண்ணாமலை, முத்துப் படங்கள் குறிப்பிடத்தக்கவை.

நித்தம் நித்தம் நெல்லுச் சோறு

மங்கா (படாஃபட் ஜெயலட்சுமி) காளி அறிமுகமே நகைச்சுவையுடன் ஆரம்பிக்கும்.

சாப்பாட்டு பிரியையான மங்கா வாசலில் அலங்கோலமாகப் படுத்து இருப்பதைப் பார்த்துக் காளி இருமி சத்தம் ஏற்படுத்த, ஒவ்வொரு உடையாகச் சரி செய்வார்.

காளி பார்த்துக் கொண்டே இருக்க, “ஏய்யா முன்னபின்ன பொம்பளைய பார்த்ததே இல்லையா” என்று கேட்க, அதற்கு காளி கொடுக்கும் உடல்மொழி… 🙂 .

கைத்தடிகள்

காளியை ஒருவர் பொறியாளரிடம் போட்டுக்கொடுத்தது தெரிந்து காளி அவரைப் புரட்டி எடுத்து விடுவான். கட்டுப்படுத்தவே முடியாத முரடன்.

காளியின் கைத்தடிகள் “அண்ணே பின்னிட்டீங்கண்ணே.. புரட்டி எடுத்துட்டீங்க… நீங்க செஞ்சது தாண்ணே சரி.. இதோட விட்டு இருக்கக்கூடாதுண்ணே” என்று கூறி விட்டு.. “ஆமாண்ணே! அவன் என்னண்ணே பண்ணுனான்” என்று கேட்பது கைத்தடிகள் என்றால் யார் என்பதை காட்டியிருக்கும் 🙂 .

பொண்ணுகளைக் கண்டால் உருகும் காளியின் கைத்தடிகளில் ஒருவர் (சாமிக்கண்ணு) செமையா செய்து இருப்பார்.

வயதான இவருக்கு இளம் மனைவி, மனைவியிடம் இவர் வழியும் காட்சிகளும், சிரிப்பும் அருமையான சித்தரிப்பு.

காளி “ஆமா உனக்குப் பொண்ணுங்கனா அப்படி என்ன இது” என்று கேட்க அதற்கும் அதே அசட்டுச் சிரிப்பு சிரிப்பார்.

பாலுமகேந்திராவும் மான்டேஜ் பாடலும்

படத்துக்கு எவ்வளவு தேவையோ, ஒளிப்பதிவாளர் பாலுமகேந்திரா அதை மட்டும் கொடுத்து இருக்கிறார். படத்தின் இயல்புத் தன்மையைக் கெடுக்காத ஒளிப்பதிவு.

தமிழில் முதன் முறையாக மான்டேஜ் பாடலை அறிமுகப்படுத்தியது “செந்தாழம் பூவில்” பாடலில் தான்.

இப்பாடலை முதலில் சில வரிகள் சரத் பாபு பாடுவதாகத் திட்டமிட்டுப் பின் பாலு மகேந்திரா யோசனையின் படி முழுக்க மான்டேஜ் பாடலாகப் படமாக்கியிருக்கிறார்கள்.

இதற்கு முன் மான்டேஜ் பாடலை, பாலு மகேந்திரா தான் இயக்கிய கமல் நடித்த கன்னட படம் “கோகிலா“வில் வைத்து இருந்து இருக்கிறார்.

காளியின் கோபம்

மங்கா செய்த வேலையாலும் வெளி ஆள் விஞ்ச் இயக்கியதாலும், காளியை பொறியாளர் 10 நாள் தற்காலிக பணி நீக்கம் செய்து விடுவார்.

இதை அவமானமாக நினைக்கும் காளி வெகுண்டெலெழுந்து கோபமாகக் மலைக்குத் தண்ணி அடிக்கச் சென்று விடுவார்.

“ராமன் ஆண்டாலும் ராவணன் ஆண்டாலும்” பாடலில் ஆத்திரமாகப் பெருங்கோபத்துடன் ஆடும் போது காளியைப் பார்க்க நமக்கே பயமாக இருக்கும்.

முகத்திலும் கண்ணிலும் அப்படியொரு வெறித்தனம் இருக்கும்.

அந்த நேரத்தில் பொறியாளர் இருந்தால், பொளந்து விடுவான் போல இருக்கும்.

தமிழ்த் திரைப்படங்களில் கோபத்தை இயல்பாக மிக சிறப்பாக வெளிப்படுத்துபவர் ரஜினி, இவருக்குப் பிறகு தனுஷ்.

படம் பார்ப்பவர்களுக்கே பயத்தைக் கொடுப்பவர்கள்.

கதறித் தான் உணர்வை வெளிப்படுத்த வேண்டும் என்பதில்லை..

விபத்தில் கை போன பிறகு ஊருக்கு வரும் காளி, அதைத் தூரத்தில் இருந்து பார்த்து ஓடி வரும் வள்ளி, காளியை பார்த்து மகிழ்ச்சியுடன் வர, தன்  கை போனதை எப்படித் தங்கையிடம் சொல்லுவது என்ற கவலையில் காளி கனத்த மனதுடன் நிற்பார்.

தொட்டுப்பார்த்து அதிர்ந்த வள்ளி அதிர்ச்சியாகி கண்ணீர் விடுவார். “ஒண்ணும் இல்லடா” என்று காளி கூறி சில முகப் பாவனைகளுடன் முடிந்து இருக்கும்.

எந்த ஒரு உணர்ச்சி பிழம்பு வசனங்களோ கதறலோ எதுவும் இல்லாத உணர்ச்சிகளை வெளிப்படுத்திய அழகான காட்சி. பின்னணி இசை, இக்காட்சியை மேலும் அழகுபடுத்தியிருக்கும்.

இது போன்ற காட்சிகளைப் பார்த்து தான் தயாரிப்பாளர் பீதி ஆகி இருப்பார் 🙂 .

கெட்ட பய சார் இந்தக் காளி

காளியை இனி வேலைக்கு வரவேண்டாம் என்று பொறியாளர் கூறும் காட்சி தான் இன்று வரை பிரபலம்.

காளி உள்ளே வரும் போது அவரால் அடிவாங்கியவர் “வாய்யா பெரிய மனுஷா” என்று காளி கை போனதை நக்கல் அடிக்கும் போது அதற்கு ஆவேசமாக எதுவும் கூறாமல், தன் நிலையுணர்ந்து கன்னத்தில் தட்டி “நல்லா இரு” என்று கூறி உள்ளே செல்வான்.

பொறியாளர் கூறியதை கேட்டு அதிர்ந்து காளி காட்டும் முகபாவனை, உடல் மொழிகள் அசத்தல். நாற்காலியை “க்ரீச்” சத்தத்துடன் இழுத்துப் போடும் காளி, பொறியாளர் கூறியதைக் கேட்டவுடன் ஒரு பின்னணி இசை வரும்.

சில நொடிகளே வரும் காட்சி இன்றுவரை பலரால் போற்றப்படுகிறது.

கோபம், இயலாமை, வெறுப்பு, எதிர்காலம் குறித்த கவலை, இனி என்ன செய்யப் போகிறோம் என அனைத்தையும் சில நொடிகளில் முகத்தில் பிரதிபலித்து இருப்பார்.

“இரண்டு கையும் இரண்டு காலும் போனாக் கூட காளிங்கறவன் பொழைச்சுக்குவான் சார்… கெட்ட்ட்ட பய சார் அவன்” என்ற தன்னம்பிக்கை மிகுந்த வரிகள் இன்றுவரை பிரபலம்.

தமிழ்த் திரையுலகம் அற்புதமான கலைஞனை மசாலாவில் பலி கொடுத்து விட்டதே என்ற வருத்தம் இக்காட்சியைப் பார்க்கும் போதெல்லாம் எனக்குத் தோன்றும்.

வள்ளி

வள்ளியின் அப்பாவித்தனம், மிகையில்லாத நடிப்பு, அன்பு, வெகுளித்தனம் என்று படம் பார்க்கும் அனைவரையும் கவர்ந்து இருப்பார்.

அமைதியான முகவெட்டு, பெரிய பொட்டு, களையான முகம் என்று அசத்தலான அழகில் வள்ளி.

நமக்கு இப்படியொரு தங்கச்சி இருந்தால், எவ்வளவு நல்லா இருக்கும் என்று நினைக்க வைக்கும் கதாப்பாத்திரம்.

காளியின் திருமணத்துக்கு வரும் பொறியாளரை காளி மதிக்காததால், வருத்தப்பட்ட வள்ளி பொறியாளரின் வீட்டுக்கே சாப்பாடை கொண்டு வருவார்.

அப்போது அவர் அணிந்து இருக்கும் சிவப்பு புடவை, சிறிய அழகான ஒரு ஆபரணம், பெரிய சிவப்பு பொட்டு என்று ஒரு குட்டி தேவதை போல இருப்பார்.

இதே புடவை தான் இறுதிக்காட்சியிலும் இருக்கும் என்று நினைக்கிறேன்.

காளி பொறியாளரின் மீது இருந்த கோபத்தை, சாப்பாடு கொண்டு வரும் வள்ளியின் மீது காட்டி அதற்காக வருத்தப்பட்டுத் தங்கையிடம் மன்னிப்பு கேட்கும் காட்சிகள் மிகை நடிப்புமில்லாமல் சிறப்பாகக் காட்சிப்படுத்தப்பட்டு இருக்கும்.

ஷோபாகிட்ட உள்ள சிறப்பு என்னவென்றால், அழுது சோகத்தைக் காட்டாமல் கண்களாலேயே சோகத்தைக் காட்ட முடிவது தான். இது ஒரு அழகான மென்சோகம்.

ரஜினிக்கு ஷோபா தங்கச்சியோ! 🙂

சபலமான நபராக முருகேசன் (வெண்ணிறாடை மூர்த்தி) போல ஊருக்கு ஒருத்தராவது இருப்பார், தான் எப்படி இருந்தாலும் வரப்போகும் பெண் சுத்தமானவளாக இருக்க வேண்டும் என்று நினைக்கும் சராசரி கதாப்பாத்திரம்.

வள்ளி பற்றித் தவறாகக் கூறியதை கேட்டுக் கொதித்தெழுந்த காளி “டேய்ய்ய்ய்ய்” என்று வெறியாகி முருகேசனை போட்டு புரட்டி எடுக்கும் போது “ஒருவேளை உண்மையாகவே ரஜினிக்கு ஷோபா தங்கச்சியோ!” என்று எண்ண வைக்கும் 😀 .

ரசனையான காட்சி

எனக்குப் படத்தின் இயல்பான காட்சிகளில் காளி, வள்ளி, மங்கா மூவரும் மீனை நெருப்பில் வாட்டிக்கொண்டே பேசிக்கொண்டு இருக்கும் காட்சி மிக ரசித்த காட்சி.

எவ்வளவு அழகான காட்சில்ல.. 🙂 .

குடும்பமாக இருந்தாலும், நண்பர்களோடு என்றாலும் இதுபோல ஒரு தருணத்தை நினைத்தாலே அற்புதமாக இருக்கிறது. ரசனையான காட்சி.

இதில் சாமிகண்ணுவை கிண்டல் செய்ய மட்டுமே இக்காட்சி உதவும் மற்றபடி இது அன்றாட கிராம வாழ்க்கையில் நடக்கும் செயல்களில் ஒன்று.

எனக்கு மிகவும் பிடித்த காட்சி.

இக்கட்டுரைக்கு சம்பந்தமில்லா கேள்வி.

இப்படத்தில் காட்டப்படும் கிராமத்தில் ஆற்றில் தண்ணீர் ஓடிக்கொண்டே இருக்கும் ஆனால், பசுமை குறைவாக இருக்கும். ஏன்?

தண்ணீர் உள்ள பகுதி ஏன் வறட்சி பகுதி போல இருக்கிறது?

பய புள்ளைக

“பய புள்ளைக” என்று ஆரம்பித்து காளி கைத்தடிகளுடன் பேசுவதும், அப்படி ஒரு சமயத்தில் இசைக் கலைஞர்கள் அந்த வழியே வரும் போது காளியைப் பார்த்து..

“இவனா..! பிரச்சனை பண்ணாம விட மாட்டானே!” என்று ஒதுங்க. அவர்களை அழைத்துப் படுத்துவது அசல் கிராமத்து அடாவடி பேர்வழியின் நடவடிக்கை.

முருகேசனை வள்ளிக்கு மணமுடிக்கக் காளி திட்டமிட்டதும், இன்னொருவருக்கு நிச்சயம் செய்த பிறகு எப்படிப் பெண்ணுடன் செல்வது என்று நாகரீகம் கருதி பொறியாளர் தயங்குவார்.

மங்கா பொறியாளரிடம் பேசுவது தேர்ந்த வழக்கறிஞர் வசனங்கள் போல இருக்கும்.

பொறியாளர் நிலையில் இருந்து பார்த்தால், அவர் கூறுவது சரி என்பது போலவும், மங்கா கேள்விகளும் அவர் நிலையில் நியாயமாக இருக்கும்.

திருமண வேலைகளில் காளியின் கைத்தடிகள் ஆர்வமில்லாமல் இருப்பார்கள், காரணம் திருமணத்தில் உடன்பாடு இல்லையாததால்.

இதனால் கடுப்பான காளி “டேய்! ஒரு கை இல்லாததால் உங்களை எல்லாம் எதிர்பார்க்க வேண்டி இருக்கு… கொஞ்சம் உதவி பண்ணுங்கடா” என்று இயலாமை கலந்த கோபத்தில் கூறும் இடம் கனக்க வைக்கும்.

என்னதான் காளி செய்யும் செயல் சரியில்லை என்றாலும், அந்த வசனம் வருத்தப்பட வைக்கும்.

காலம் கடந்தும் நிற்கும் பின்னணி இசையும் காட்சிகளும்

அனைவரும் திருமணத்துக்குச் சென்று விட, காலையில் எழும் காளி, எவரையும் காணாத அதிர்ச்சியில் பதட்டத்துடன் ஓடி விசயம் தெரிந்து அதிர்ச்சியாகி நிற்பான்.

இவ்வளவு காலம் உயிராக நினைத்த வள்ளி, தன்னைக் கைவிட்டு போவதை தாங்காமல், உடல் பலம் முழுவதும் இழந்தது போலத் தளர்ந்து நின்று விடுவான் காளி.

அனைவரின் பேச்சைக் கேட்டு வந்தாலும், மனசாட்சியை உறுத்தும் குற்ற உணர்வும், அண்ணனின் பாசமும் வள்ளியை திரும்ப அண்ணனை நோக்கி ஓட வைக்கும்.

பின்னணி இசையின் பிதாமகன்

இங்கே தான் காலம் கடந்தும் நிற்கும் அந்தப் பின்னணி இசை. இளையராஜா இப்படம் முழுக்க அதகளம் செய்து இருப்பார்.

எங்குத் தேவையோ அங்கு மட்டும் பின்னணி இசை, மற்ற இடங்களில் அமைதி என்று கலக்கி இருப்பார்.

ஒவ்வொரு காட்சிக்கும் ஒரு பின்னணி இசை என்று அசத்தி இருப்பார்.

அந்தப் பின்னணி இசை ஒலிக்கும் போதே நாம் அக்காட்சியுடன் ஒன்றி விடுவோம், மற்றது நமக்கு மறந்து முழுக்கவனமும் அக்காட்சியில் சென்று விடும்.

கார்ட்டூன் பார்க்கும் குழந்தைகளை என்ன அழைத்தாலும் அவர்கள் காதில் விழாது, அவர்கள் ஒருங்கிணைந்த முழுக் கவனமும் தொலைக்காட்சியில் இருக்கும்.

அது போல நம் முழுக்கவனமும் அப்பின்னணி இசையில் ஒன்றியிருக்கும்.

மனப்போராட்டம்

காளி அடிப்படையில் நல்லவன் ஆனால், தன்னுடைய சுயகவுரவம் (Ego) காரணமாக, அவசரப்பட்டுக் கோபத்தில் அனைத்து முடிவுகளையும் எடுப்பான்.

இதைத்தான் மங்காவும் “உனக்கு எஞ்சினியரை பிடிக்கலைன்னா, கல்யாணம் வேண்டாம்னு சொல்லு.. அதுக்கு ஏன் இவனுக்கு கல்யாணம் செய்து வைக்கிறே” என்று கேட்பாள்.

தங்கை தன்னை விட்டு சென்று விட்டாள் என்று அறிந்ததும் அனைத்தையும் இழந்தது போல நின்று கொண்டு இருப்பான்.

வள்ளி திரும்ப ஓடி வரும் போது ரொம்ப நேரம் அவள் பக்கம் திரும்பாமல் தலை குனிந்து மனதின் பாரத்தால் நின்று கொண்டு இருப்பான்.

இதே மற்ற படங்கள் என்றால், திரும்ப வரும் தங்கையை உடனே பார்ப்பது போலக் காட்சி இருந்து இருக்கும்.

ஆனால், இங்கே ரொம்ப அருகில் வரும் போது தான் தங்கையைக் காணும் படி காட்சி இருக்கும், திரும்பப் பார்த்தால் கவனித்துப் பாருங்கள்.

எனக்கு ரொம்பப் பிடித்த காட்சி இது.

இறுதியில் தங்கை தன்னுடன் வந்த பிறகு இழந்த பலம் அனைத்தையும் பெற்ற, தன் சுய கவுரவத்தில் வெற்றி பெற்ற, தங்கை மீதான பாசத்தை மற்றவர்கள் முன்பு நிரூபித்த மகிழ்ச்சியில் காளி இருப்பான்.

இந்த நேரத்தில் காளியின் அரவணைப்பில் வள்ளி இருப்பாள். தாய் கோழியின் பாதுகாப்பில் அதன் குஞ்சு இருப்பது போல இருக்கும் அசத்தலான காட்சி.

காளியின் முகத்திலும் உடல்மொழியிலும் அப்படி ஒரு பெருமை, கர்வம் இருக்கும்.

இறுதியிலும், காளியின் கதாப்பாத்திர குணத்தை சிதைக்காமல் “எஞ்சினியர் சார்.. இப்பவும் உங்கள எனக்கு பிடிக்கல சார்” என்று கூறி வள்ளியை சேர்த்து வைப்பது நிறைவான காட்சி.

“முள்ளும் மலரும்” தலைப்புக்கு ஏற்ற கதாப்பாத்திரங்கள் “காளியும் வள்ளியும்” 🙂 .

Directed by J. Mahendran
Produced by Venu Chettiar V. Mohan
Screenplay by J. Mahendran
Based on Mullum Malarum by Umachandran
Starring Rajinikanth, Sarath Babu, Fatafat Jayalaxmi, Shoba
Music by Ilaiyaraaja
Cinematography Balu Mahendra
Edited by D. Vasu
Production company Ananthi Films
Release date 15 August 1978
Running time 143-145 minutes
Country India
Language Tamil

எங்கள் தலைவருக்கு காலத்தால் அழியாத மிகச் சிறப்பான படத்தை கொடுத்த இயக்குநர் மகேந்திரன் அவர்களுக்கு ரஜினி ரசிகர்கள் சார்பாக நன்றி.

ரஜினி இன்றுவரை தனக்கு பிடித்த இயக்குநராக மகேந்திரன் அவர்களையே குறிப்பிடுவது குறிப்பிடத்தக்கது.

தொடர்புடைய கட்டுரைகள்

“தளபதி” நினைவுகள் [1991]

மகாநதி [1994] ஒரு ரஜினி ரசிகனின் விமர்சனம்

கொசுறு 1

ரொம்ப நாட்களாக இப்படம் குறித்து எழுத வேண்டும் என்று நினைத்து, தற்போது முடித்து விட்டேன். நினைவு வைத்துக் கேட்ட நண்பர்களுக்கு நன்றி.

முழுதாகப் படித்தவர்களுக்குச் சிறப்பு நன்றி 🙂 .

கொசுறு 2

இன்று பிறந்த நாள் காணும் தலைவர் அவர்கள் நல்ல உடல் நலத்துடன் நீடூழி வாழ ரசிகர்கள் சார்பாக அன்பான வாழ்த்துகள் 🙂 .

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).