ஊடகத்துறை அசிங்கப்பட யார் காரணம்?

பத்திரிகையாளர் சந்திப்பில் தேமுதிக கட்சிப் பொருளாளர் பிரேமலதா அவர்கள் ஒருமுறையில் பேசியதும், மரியாதைக்குறைவாக நடந்துகொண்டதும் சர்ச்சையானது. ஊடகத்துறை சம்பந்தப்பட்டவர்கள் விமர்சித்தார்கள்.

ஊடகத்துறை

ஊடகங்களும் அரசியல் கட்சி தலைவர்கள் பலரும் இதற்குக் கண்டனம் தெரிவித்துள்ளார்கள். Image Credit

பிரேமலதா நடந்து கொண்டது தவறான ஒன்று தான், அதில் மாற்றுக்கருத்தில்லை ஆனால், ஊடகங்கள் உலக உத்தமர்கள் போலப் பேசிக்கொண்டுள்ளார்கள்.

ஊடகத்துறை ஒரு காலத்தில் மரியாதைக்குரியதாக இருந்தது ஆனால், அம்மரியாதையை இழந்து பல ஆண்டுகள் ஆகி விட்டதை நேர்மையான ஊடகவியலாளர்களே ஏற்றுக்கொள்வார்கள்.

சமூகத்தளங்களில் பிரேமலதா பேசியதுக்கு (அரசியலுக்காக வந்த மீம்கள் தவிர்த்து), கருத்துப்பகுதிகளில் அவர் பேசியத்துக்கு ஆதரவான கருத்தே இருந்தது.

இது குறித்த செய்தித்தளங்களின் கட்டுரையின் கருத்துப் பகுதியில் சென்று பார்த்தால், எல்லோரும் என்ன நினைக்கிறார்கள் என்பது புரியும்.

ஒருமையில் பேசினார் என்ற தவறைத் தவிர, கேள்விகளைத் தைரியமாகக் கையாண்டார்.

நடுநிலையா… அது எங்கே கிடைக்கும்?!

ஊடகத்துறை என்பது நடுநிலையான கருத்தைக் கூறாமல், தங்களுடைய தனிப்பட்ட கருத்தைத் திணிக்கும் துறையாக மாறி விட்டது என்பதில் யாருக்கும் மாற்றுக்கருத்து இருக்க முடியுமா?

ட்விட்டரில் சென்று பாருங்கள்! ஊடகத்துறையினரின் இலட்சணத்தை, எந்த அளவுக்குக் கேவலமாக நடந்து கொள்கிறார்கள் என்று.

ஊடகத்துறையைச் சேர்ந்தவர் என்றால், என்னவென்றாலும் கேட்பார்கள் சம்பந்தப்பட்டவர் கோபப்படாமல் நாகரீகமாகப் பதில் சொல்ல வேண்டுமாம்!

அன்புமணி

அன்புமணி பத்திரிகையாளர் சந்திப்பில் நாகரீகமாகவே தன் கருத்தைப் பதிவு செய்தார்.

அவரின் கொள்கை முடிவுகள், மாறி மாறிக்கூட்டணி வைப்பது எல்லாம் தவறு தான் ஆனால், அதை அவர்கள் கேட்டதுக்குப் பொறுமையாகவும் நாகரீகமாகவுமே பதில் அளித்தார்.

தொடர்ந்து கேள்வி கேட்டு அன்புமணியைக் கோபப்படுத்திய “ஷபீர்” பக்கா திமுக நபர். அவர் ட்விட்டர் கணக்கில் ஒரு தலைப்பட்சமான கருத்துகளே இருக்கும்.

காங்குடன் கூட்டணியே கிடையாது என்று கூறிய திமுக, திரும்ப அவர்களுடன் கூட்டணி வைத்ததை இது போலக் கேள்வி கேட்க முடியுமா?!

அன்புமணி தானாகப் பத்திரிக்கையாளர் சந்திப்பு வைத்து மாட்டிக்கொண்டார்.

தமிழ் பத்திரிகையாளர்!

தமிழகப் பத்திரிகையாளர் என்று பெயர் ஆனால், முழுக்க முழுக்க ஆங்கிலக்கலப்பில், எழுத்துப்பிழையுடன் தவறாக எழுதுவது.

தமிழில் ‘தினமணி’ ‘தமிழ் இந்து’ செய்தித்தாள்கள் தவிர எந்த முன்னணி பத்திரிக்கையாவது ஆங்கிலக்கலப்பு இல்லாமல், எழுத்துப் பிழை இல்லாமல் எழுத முயற்சிக்கிறார்களா?!

செய்தித்தாளில், இணைய செய்தி ஊடகங்களில் உள்ள செய்திகளில் ஆயிரம் பிழைகள். இவர்கள் எல்லாம் எப்படிப் பத்திரிகையாளர்களானார்கள்?

பொதுமக்கள் கற்றுக்கொள்வதே செய்தித்தாள்கள், ஊடகத்துறையினரிடம் இருந்து தான்.

இவர்கள் தங்களுடைய அடிப்படை பொறுப்பை, கடமையைக் கூடச் சரிவரச் செய்வதில்லை ஆனால், கோபம் மட்டும் வருகிறது!

இவர்களுக்கெல்லாம் கோபப்பட என்ன தார்மீக உரிமையுள்ளது?!

தகுதியில்லாதவர் எல்லாம் பத்திரிகையாளர்

பத்திரிகையாளர் என்பதற்கே மரியாதை குறைந்ததுக்குக் காரணம், கேப்டன், பிரேமலதா போன்றவர்கள் பேசியதல்ல, அதற்குப் பத்திரிகையாளர் நடந்து கொள்ளும் முறையே!

ஊடகவியலாளர் சந்திப்பு என்றால், எதோ சந்தையின் உள்ளே நுழைந்ததைப் போலக் காட்டுக்கத்தல், கூச்சல், குழப்பம், ஒவ்வொருவருக்குள்ளும் அடிதடி!

இவ்வளவு பேசும் பத்திரிகையாளர்கள், ஒரே ஒரு அமைதியான பத்திரிகையாளர் சந்திப்பை நடத்த முடியுமா?! என்று முயற்சியுங்கள்.

இப்பெல்லாம் எவர் வேண்டும் என்றாலும், பத்திரிகையாளர் என்று கூறிவிட்டு என்ன வேண்டும் என்றாலும் கேள்வி கேட்க முடிகிறது.

நமக்கான மரியாதை கிடைப்பது நாம் நடந்து கொள்ளும் முறையிலேயே உள்ளது.

அதைப் புரிந்து கொள்ளாமல் ஊடகத்துறையை அவமதித்து விட்டார்கள் என்று ஒப்பாரி வைப்பதில் எந்தப் பயனுமில்லை.

இனி கனவிலும் தங்களுக்கான மரியாதையைப் பொதுமக்களிடமும் எதிர்பார்க்க முடியாது. நாளாக இன்னும் மோசமான எண்ணங்களே மக்களுக்கு இருக்கும்.

அபிநந்தன் தென்னிந்தியா என்று மட்டும் கூறியபிறகு அவர் குறித்த அனைத்து விவரங்களையும் சில நிமிடங்களில் TRP க்காக உலகுக்கே தெரிவித்த புண்ணியவான்கள் தான் இவர்கள்.

எதோ இன்னும் ஒரு சில பத்திரிகையாளர்கள் நேர்மையாக இருப்பதால் தான், கொஞ்சமாவது ஊடகத் துறைக்கு மரியாதையுள்ளது. விரைவில் அந்தக் கொஞ்சமும் காணாமல் சென்று விடும்.

ஊடகத்துறையின் இந்த மோசமான நிலைக்குக் காரணம் மற்றவர்கள் அல்ல! முழுக்கப் பத்திரிகையாளர்கள் நடந்து கொள்ளும் முறையே.

தொடர்புடைய கட்டுரை

தமிழ் ஊடகங்களின் தமிழ் அழிப்பு

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).